1 Samuéu 5:7 - ꞌRe Ihâimana Uꞌâsi Mono Zadawa Wasuꞌu

⁷ Tawamhã ãne hã 'rinho'u Asidodi ãma 're ihâimana za'ra mono norĩ te te 'madâ'â za'ra wamhã, ma tô nharĩ za'ra, ãne: — Izaraéu nhihudu norĩ te, 'Re ihâimana u'âsi mono hã ma tô wahâ za'ra. Wate za'ra ihâiba'õ hã ma tô duré azâ, Dagõ na isisi hã. Tahawa, wa te wasiwi tété õ di za, Izaraéu nhihudu norĩ te, 'Re ihâimana u'âsi mono nhimiroti ré, wedehâ're hã ãme inomro da hã, wa'ratab za'ra.

1 Samuéu 5:7 ပူးပေါင်းရင်းမြစ်များ

Ezodu 10:7

Tawamhã ihawi pusi za'u, te apito nhimiromhurizé 'ri za'ẽtẽ 're, te te tãma 're iromhuri za'ra mono tãma nharĩ za'ra ãne, apito ma: — E momo te za ã hã aibâ nhimimnhasizé wama za'ra hã ti'rãsutu. Ma'ãpé, aibâ norĩ satõrĩ waré za'ra na si'aba'ré da, tinhib'apito 'Re ihâimana u'âsi mono ãma, 're wata za'ra mono da. E waihu'u ã bâ bété, Ezitu 're iropsiwamnarĩ pese zém na hã.

Ezodu 12:33

Tawamhã ezipsiu norĩ hã ma tô Izaraéu nhihudu norĩ ma hã tãma rob'ru za'ra, ti'ai wa'õtõ nho'õmo hawi isa'ru za'ra hawi hã si'aba'ré na oto wairébé da. Tahawa te ãne tãma nharĩ za'ra: — Aiwairébé aba õ wamhã, wa norĩ hã wa za uburé ai'utõrĩ ni. Taha õ ré, te za oto aiwairébé 'wa.

Ezodu 8:28

Tawamhã apito te duré tãma nharĩ zahuré ãne: — Romhâ na ai'aba'réi wa'aba dai õ wamhã, wa za rop si 're irosa'wari mono u danhimroi wa'aba mono da hã aima waprosi wa'wa, Uburé Danhib'apito, ate za'ra wa'wa 'Re ihâimana u'âsi mono ma asimizama zata na ãma tãma asõprub za'ra wa'aba da hã. Tawamhã te za duré ĩ'ãma zama 're aimreme aba mo.

Ezodu 8:8

Tawamhã apito Fara'o, Mozési norĩ zô Arãhã me hã ma tô sô tihârâ zahuré, te te ãne tãma nharĩ zahuré da: — Ma'ãpé, asib'apito 'Re ihâimana u'âsi mono ma tãma aimreme aba, uti zarãpré hã ĩnhiti, duré ĩnhib'a'uwẽ norĩ nhiti te te satõrĩ za'ra da. Tawamhã wa hã wa za asib'a'uwẽ norĩ ma hã waprosi za'ra, za si'aba'ré da, Uburé Danhib'apito uptabi ma, abaze da te 're izata za'ra mono na tãma 're sõprub za'ra mono da hã.

Ezodu 9:28

Ma'ãpé, Asib'apito wa'aba ma, aimreme aba. Tãirãrã hã tã ipĩni nhama ré hã sipari zahuré hâ. Pipa uptabi di! Tawamhã ai'aba'réi wa'aba da hã wa za oto aima waprosi za'ra wa'wa. Tawamhã duré oto i'asimipari zahu aba da hã mare di za.

1 Samuéu 4:8

Wa za ai'utõrĩ ni! E 'wa te za bété wa'anho'reptu, ihâiba'õ isiptete norĩ wi hã. Ihâiba'õ norĩ hã ezipsiu norĩ ma tô te te a'wapé a'ubuni wimhã, sipu'u pese na rob'manharĩ wasété na hã.

1 Samuéu 5:6

Tawamhã Uburé Danhib'apito ma tô sa'ẽtẽ hâ za'ra oto, 'rinho'u Asidodi ãma 're ihâimana za'ra mono norĩ hã, duré taha waptoma tame 're ihâimana za'ra mono norĩ zama. Ihâ 'rowi iwa're tob'mai'ãsi na ma tô hâ za'ra.

1 Samuéu 5:8

Tahawa, ma tô sô 'mazatõrĩ za'ra romreme 'wapéi'wa norĩ hã, filisteu norĩ te 5 na dama i'rãnho'õmo norĩ zô, si'rã'õtõ da, te te siwi ãma sadanharĩ za'ra da, ãne: — E marĩ, wa za ãma 'manharĩ za'ra ni, Izaraéu nhihudu norĩ te, 'Re ihâimana u'âsi mono nhimiroti ré wedehâ're na hã. Tawamhã ma tô ãma dazada'âbâ za'ra ãne: — Asiwi âri aba, 'rinho'u Gati na isisi u! Tahawa, te oto filisteu norĩ hã tamomo siwi ti'â.

1 Samuéu 6:20

Tawamhã aibâ norĩ Bete-Semesi ãma 're ihâimana za'ra mono norĩ hã te sima nharĩ za'ra ãne: — E 'wa hã te za Uburé Danhib'apito 'Re ihâimana u'âsi mono nho'remhã tihâiba, iwasété'õ iwẽ uptabi nho'remhã. Mare di. Ni'wa hã ihâimana da hã waihu'u õ di. Duré isimiroti ré, wedehâ're hã e momo wa za wasiwi sõmri ni, wanhiti za'ra 're ihâimana mono da hã.