1 Samuéu 27:2 - ꞌRe Ihâimana Uꞌâsi Mono Zadawa Wasuꞌu

² Tahawa, ma tô oto Dawi hã mo, ãne te te sima rosa'rata wi, tite aibâ norĩ 600 na ihâiba za'ra norĩ ré, Aqui hã Ma'oquihi 'ra 're ihâimana mono zéb u, Gati na 'ri nho'õmo nhisi ãma danhib'ihâ'a hã.

1 Samuéu 27:2 ပူးပေါင်းရင်းမြစ်များ

1 Samuéu 21:10

Tawamhã Dawi tô taha bâtâ na ma aimani, Sauhu wi hã. Tahawa, ma tô mo, apito Aqui na isisi zô, 'ri'ahâ Gati na isisi ãmab zô 're rĩtĩ mono da.

1 Samuéu 21:11

Tawamhã 'ri'ahâ 're dama ipire norĩ hã ma tô tãma wasu'u za'ra ãne, Aquihi ma: — Oro ã hã Dawi, Izaraéu nhihudu norĩ nhipti'ai ãma apito za. Pi'õ norĩ hã ma tô taha ãmamhã tinho're za'ra, si'rẽne sina ãne: “Sau hã ma tô dapã miu na, duré Dawi hã ma tô dapã 10 miu na.”

1 Samuéu 25:13

Tawamhã ma tô Dawi hã tãma nharĩ za'ra ãne: — Ma'ãpé ai'usisi na sib'ézé 'wapa asima séme aba! Tawamhã ãne te te tãma 'ru za'ra wa, ma tô imreme zarina sima sé. Dawihi zama ma tô tite sib'ézé 'wapa hã ti'â. Taha pari, ma tô oto watobro, tite aibâ norĩ 400 na ihâiba za'ra ré hã. Taha ré, ma tô 200 na ihâiba za'ra, asi ré hã isa'u za'ra a'â tihâimana za'ra.

1 Samuéu 30:8

Tahawa, ma tô Dawi hã Uburé Danhib'apito hã sadanha ãne: — E we ãwa pi'uriwi waro wamnarĩ'wa norĩ zarina hã wa za mo. E tawamhã te sasãmri waihu'u pese za'ra di duré, te iwaibu da hã. Tawamhã ma ãne 'Re ihâimana u'âsi mono hã ãma sada'â: — Aimorĩ tô isarina za'ra hã. Tawamhã sasimri za'ra wamhã, da te isimroi mono norĩ hã te za isõ'reptu za'ra.

1 Samuéu 30:9

Tawamhã Dawi, tite 600 na aibâ norĩ me hã ma tô oto wairé. Tawamhã panho'õmo ãma Bezo na isisi u sihutu wamhã, ma tô ni'wam norĩ tame a'â daza'u tihâimana za'ra.