1 Samuéu 25:31 - ꞌRe Ihâimana Uꞌâsi Mono Zadawa Wasuꞌu

³¹ Ãne uburé tiha iwẽ aima hâimana wamhã, a hã i'asiwẽ'õ da hã maze di za. E tihai wa. Niwamhã asima iwẽ na hã siwa'ru da'maiwĩrĩ õ wa, duré asi'uihâ na niwamhã 'râwi asi'ruiwa'âbâ õ wa. Tahawa duré nimahãna Wanhib'apito 'Re ihâimana u'âsi mono iwẽ na te te aipawapto wamhã, ĩ'ãma hã aipo're si'âri õ di za.

1 Samuéu 25:31 ပူးပေါင်းရင်းမြစ်များ

Zenezi 40:14

Tawamhã õme apâ rowẽ na aima 're romhâimana mono wamhã, ĩ'ãma hã aipo're pu'u za, iwẽ na hã ĩpawaptob da. Apito ma, ĩhâiba na hã tãma nharĩ za, dazazém hawimhã te te apâ ĩwazere da.

Salmu 94:1

Uburé Danhib'apito, a hã 'Re ihâimana u'âsi mono, dama 're i'arob'manharĩ mono 'wa na 're i'aihâimana mono! Ma'ãpé 're i'asimi'ruiwa'âbâ mono zém na hã asihâi'ré na.

Luca 23:42

Tahawa, te Zezusihi ma tinha, ãne: — Zezusi, ĩ'ãma aipo're pu'u za, Danhib'apito na apâ we aimorĩ wamhã.

Roma 12:19

Ĩsisãnawã ĩma asawi pese aba norĩ, da te aima 're rob'manharĩ wasété za'ra wa'aba mono wamhã, 'Re ihâimana u'âsi mono upana asi'uihâ na 'râwi 're asi'ruiwa'âbâ za'ra wa'aba mono õ di za. Taha si, tinhimihâzém na te te 're ai'ruiwa'âbâ za'ra wa'aba mono da, te za õhõ si 're i'madâ'â za'ra wa'aba mo. Duréihã ãne na ma tô Wanhib'apito mreme na rob'ui'éré, Mozési hã: “Wa hã ĩsiwaprosi, wa za te 're da'a'ruiwa'âbâ. Ĩwétési, wa za te dama ãma 're awa'rãmi, marĩ, da te 're i'manharĩ wasété za'ra mono zém na hã.”

Roma 14:21

Tahawa, romnhi hã siwa'ru 're huri aba mono õ di za, duré uwa 'rãi wa'u isé hã 're âhuri aba mono õ di za, taha zarina asiré isazei'wa norĩ hã tiwasété na apâ 're si'marõpãrĩ tõ za'ra mono da. Duré siwa'ru marĩ aimawi hã 're 'manharĩ za'ra wa'aba mono wa, ni'wam norĩ hã tiwasété na apâ 're si'marõpãrĩ tõ za'ra mono da, 're 'manharĩ za'ra wa'aba mono õ di za.

2 Corĩtu 1:12

Ni'wam norĩ hã asiré 're hâimana za'ra wa'aba mono nherẽ, ma tô wahâimana nhipese na hã wa'ãma siwi tihi. Tane nherẽ, senai õ di ta hã. Wa norĩ hã 'râwi wapẽ'ẽ na 're wasiwẽ'õ mono õ di. E marĩ wa. Marĩ hã wa te ai'ãma 're 'manharĩ za'ra wa'aba mono õ wa, 're iwahâimana wẽ u'âsi mono zarina. Pi'uriwi aiwi 're wahâimana za'ra wa'aba mono õ di. Marĩ iwẽ si, wa tô wa te aima 're 'manharĩ za'ra wa'wa. Ti'ai ãma isazei'õ'wa norĩ nhimirowaihu'u pese zarina, 're wahâimana mono õ di. 'Re ihâimana u'âsi mono nhimizawi pese zéb zarina si, wa ãne na hã 're wahâimana oto.

1 Samuéu 24:15

Tahawa, te za Wanhib'apito 'Re ihâimana u'âsi mono si wawaihu'u, nimahã wa te i'upazém na hã, e a hã e wa hã. Wa tiwi waptẽ, te te ĩwaihu'uzéb zarina, ĩ'ãma sisaprĩ da, duré taha zarina te te aiwi ĩnho'reptu da hã.

1 Samuéu 25:30

Wanhib'apito 'Re ihâimana u'âsi mono hã te za uburé tiha iwẽ na hã ãma aima uwaimra, te te aima iropisutuzéb zarina. Te za duré tawamhã aipisutu, Izaraéu nhihudu norĩ ma asi'apito da hã.

1 Samuéu 25:33

Wẽ uptabi di ãhã na a hã i'manharĩ hã ĩpawaptobzém na. Wa hã wa tô aré ĩsima rowairébé, marĩ iwasédé te 'manharĩ da hã. Wa tô duré aré ĩsima wẽ, 'râwi ĩsi'ruiwa'âbâ da hã.

1 Samuéu 25:40

Tawamhã tãma romhuri'wa norĩ hã ma tô ai'aba'ré Carmeru u hã. Tahawa, te ãne tãma rowasu'u za'ra, itẽme sihutu wamhã: — Dawi hã ma tô we asô wazatõrĩ za'ra, wa te wasiwi asaprõni da, ãma aimro da.

1 Samuéu 26:23

Wanhib'apito 'Re ihâimana u'âsi mono hã te 're inomro wẽ mono norĩ ma si te te 're awa'âbâ iwẽ na hã, te te sina 're i'umnhasi za'ra mono norĩ ma hã, duré sena na i'uwaibaba na si ãma 're inomro mono norĩ ma hã. Ã bâtâ na ma tô aré ĩma aihâiba nho ĩnhib'ratamhã. Tane nherẽ, ĩnhib'rada te sarõtõ õ di, 'Re ihâimana u'âsi mono, apito da, te te i'aipisudu te i'aiwĩrĩ da hã.