1 Samuéu 25:29 - ꞌRe Ihâimana Uꞌâsi Mono Zadawa Wasuꞌu

²⁹ Ni'wa hã te te aiwĩrĩ da, te te ai'wapéi pibui wamhã, te za ate 'Re ihâimana u'âsi mono hã ai'wawi aimapa, aibâ tiha iwa'âbâ za'ẽtẽ 'wawi 're isimapa mono ne. Tahawa, te za duré asitob'ru norĩ hã romhâ na aima sãmra za, aibâ ẽne tite powawẽ hâ 'manharĩ na te te 're i'anhamra mono ne.

1 Samuéu 25:29 ပူးပေါင်းရင်းမြစ်များ

Zenezi 15:1

Tawamhã ãhã parip si Abrã ma tô sõtõ 'rowim ne marĩ 'madâ. Taha na te Uburé Danhib'apito ãne tãma tinha: — Abrã, aipahi tõ. Marĩ isimimnhasi wi wa za wa hã 're ĩsimapa, ai'wawi. Duré iwẽ wa za te aima 're anhomri.

Zuwã 14:19

Suru na, wa za oto ai'rata ĩnhamra 'wa, irẽme ma. Taha ré hã te za duré a'â dasiwi ĩ'madâ'â ni. Taha parip si, da te dasiwi ĩzabu na sahu õ di za oto. A norĩ wa'aba si, te za duré ĩzabu za'ra wa'wa. Ĩdâ'â nherẽ, ab're hawi ĩhâiwa'utu wa, wa za oto ĩdâ'â ãna 're morĩ u'â. Tahawa, te za duré a norĩ wa'wa hã atâ'â ãna 're asimroi u'âsi aba mo, hâiwa ãma.

Zuwã 17:23

Ĩsiré 're aimorĩ ne, wa za duré wa hã isiré 're ĩmorĩ u'âsi za'ra. Tawamhã wasine 're sisawi u'âsi za'ra mono wa, tinhimirosa'rata na zama te za 're sisazei pese u'âsi za'ra. Ãne wamhã, te za da te 're ĩzaze za'ra, tô sena datẽme we ĩzatõrĩ na. Duré 're ĩzawi pese mono ne, ĩzazei'wa norĩ hã 're i'azawi pese mono na, te za da te 're aiwaihu'u za'ra.

1 Pedru 1:5

Ate za'ra wa'aba da, te iwẽ hã asô 're hâimana u'âsi za'ra wa'wa. A norĩ wa'wa hã iwaihu'u pese na te oto asina 're i'umnhasi za'ra wa'aba mo. Tahawa, te za iwasété wi te te 're ai'madâ'â pese za'ra wa'wa, asõ'reptui wa'aba zé hã asina uwaimrami za'ra wa'aba da, ro isi'utõrĩzéb ãma.

1 Samuéu 2:9

Õ hã te i'wawi 're simapa u'âsi za'ra, sena na ãma 're inomro mono norĩ 'wawimhã. Tane nherẽ, wasété na 're inomro mono norĩ wi si te tiwi 're sipizari za'ra, 're simani za'ra mono da si'uihâ na, robra u hã. E tihai wa. Ni'wa hã tinhiptete hawim na 'râwi te te da'ãma ai'uté õ wa.