1 Samuéu 25:28 - ꞌRe Ihâimana Uꞌâsi Mono Zadawa Wasuꞌu

²⁸ Ma'ãpé siwa'ru tiha na ĩwasédé te i'manharĩzém na hã ĩ'ãma 'madâ'â õ di za. Wanhib'apito 'Re ihâimana u'âsi mono te za aipisutu za, asi'apito da hã, duré asihudu norĩ zama si'apito za'ra da hã. E tihai wa. A hã 'Re ihâimana u'âsi mono te te aima i'ruzéb zarina dasi'wapé hã i'upana 're 'manharĩ mono õ wa. Tahawa, tiha hã iwasédé hã ai'ãma 're hâimana mono õ di za, 're aihâimana mono ré hã.

1 Samuéu 25:28 ပူးပေါင်းရင်းမြစ်များ

Salmu 89:29

Taha uirĩ na hã te za isihudu sidâpâsi õne u'â dama 're si'i'rãnho'õmo za'ra. Duré hâiwa 're sa'wari mono ré, te za 're isimi'madâ'â za'ra mono zé hã 're hâimana u'âsi.

Mateu 5:16

Tane duré, a norĩ wa'wa hã te za sõ'awi dama 're aihâimana za'ra wa'aba mo, rob'uiwẽzé hã sõ'awi te te dama 're irob'uiwẽ za'ra mono ne. Uburé marĩ hã te za dama 're i'manharĩ wẽ u'âsi za'ra wa'aba mo, dama 're i'manharĩ wẽ za'ra wa'aba mono zé hã da te 're i'madâ'â za'ra mono zéb zarina, Aimama za'ra wa'aba ãma 're dawata za'ra mono da, hâiwa ãma 're isãmra mono ãma.

Luca 23:41

Wa norĩ hã wawasété wa, ma tô wama rob'manharĩ ni. Tazahã, ã hã marĩ hã te te dama 'manharĩ wasété õ di.

Luca 23:47

Tawamhã aibâ hã ma tô tinhowẽ, da'wapéi'wa norĩ wada'uri'wa hã, romanu hã. Sõwẽ wamhã, te ãma tiwata, 'Re ihâimana u'âsi mono ãma. Ãne te tinha: — Nare õ hã, aibâ 're imorĩ wẽ tô.

1 Samuéu 15:28

Tawamhã Samuéu te duré tinha ãne: — Ã bâtâ na ma tô 'Re ihâimana u'âsi mono hã aiwi hâiwazu, Izaraéu nhihudu norĩ 'madâ'âzé hã. Tahawa, ma tô oto tisõ, asipai u iwẽ ma, Izaraéu nhihudu norĩ nhib'ihâ'a da ma.

1 Samuéu 17:47

Ãme uburé ihâimana za'ra hã te za 'Re ihâimana u'âsi mono waihu'u za'ra, sib'ézé 'wapa ãna, duré wedewãi waré 'rã'wa ãna tinhib'a'uwẽ te te isõ'reptu za'ra na hã. E marĩ wa. Dasi'wapé hã 'Re ihâimana u'âsi mono te wa. Ta hã te za wanhib'rata uburé wama aihâiba nhomri za'ra wa'wa.

1 Samuéu 18:17

Tawamhã Sau te Dawihi ma tinha ãne: — Ãhãta ĩ'ra ipoto'rada, Merabe na isisi hã. Ã hã wa za aima tisõ, ãma aimro da hã. Tawamhã a hã dasi'wapéi 'manharĩ'wa asiptete na te za ĩma 're aihâimana mo za ĩma ai'umnhasi na, duré Uburé Danhib'apito te dasi'wapé na ãma 're ai'wapéi mono da. Sau te rosa'rata ãne: “Te iwĩrĩ da hã mare di wa hã. Ĩma wẽ di filisteu norĩ si ĩ'upana te te siwi iwĩrĩ da hã.”

1 Samuéu 2:35

Tawamhã wa hã wa za duré 'maipisutu ĩte sasedoti ĩma romhuri'wa da hã, duré uburé marĩ za te te 're i'manharĩ mono da hã te ĩsima 're i'awẽ mono zéb zarina. Duré wa za wa hã õhõ ma te tãma 're sõmri za'ra isihudu hã. Ta norĩ hã te za õne u'âsi apito ma te te 're romhuri za'ra za, apito te ipisutu ma hã.

1 Samuéu 22:14

Tawamhã Aimereti ma tô ãma tãma wa'rã ãne: — Dawi hã aima da'madâ'â'wa norĩ nhipai u, aima i'umnha te 're hâimana. Duré õ hã asa'õmo uptabi, danhib'ihâ'a uburé ti'ai wa'õtõ nho'õmo mono bâ isimiwazéb za'ẽne te 're ihâimana.

1 Samuéu 24:11

Ĩnhib'apito, ma'ãpé ai'uza nhizâri hâiwa'õno hã 'madâ'â ĩnhib'ratamhã. Wa hã wa tô aiwi anhizâ, ai'uza hâ 'rãsudu hã. Tane nherẽ, wa hã te aiwĩrĩ õ di. Ã hã te za iwaihu, wa hã te rosa'rata õ di, asada ĩhâimana da hã, duré ĩwasédé te ai'ãma i'manharĩ da hã. A hã ĩzô 're airĩtĩ mono zé hã ĩwĩrĩ da, te waihu'u pese nherẽ, tane nherẽ, wa hã te ai'wapéi õ di tô.

1 Samuéu 24:17

Tawamhã te duré tãma tinha ãne, Dawihi ma: — A hã i'uwaibaba na si te aihâimana mo. Ĩwétési wa tô ĩwasété na hã ĩhâimana. A hã ma tô iwẽ na si ĩma aihâimana mo, wa hã ĩwasédé te aima 'manharĩ mono ré hã.

1 Samuéu 24:21

Tahawa, te za Wanhib'apito 'Re ihâimana u'âsi mono nhisi na ĩma iropisu, ĩnhihudu norĩ hã ĩwi uprosi tõ da. Ãne wamhã, ĩnhisi na duré ĩte a'uwẽ norĩ nhisi na hã 're dapo're si'âri za'ra mono õ di za.

1 Samuéu 24:4

Tawamhã isiré aibâ norĩ hã ma tô tãma nharĩ za'ra ãne, Dawihi ma: — Ate hã oto bâdâ. A hã te za oto asi'madâ. Wanhib'apito 'Re ihâimana u'âsi mono ma tô tinha, asitob'ru hã te te aima sõmri da, asib'rata, a hã marĩ ãma 'manharĩ da, asima iwẽzéb uwaibaba. Tawamhã ãne wa, Dawi hã ma tô oto atãma hâire sisa'ré, Sau tisai 'rata ma isãmrazéb u. Tahawa, ma tô duré te te sina sa'rese ãna i'uza hâzada'ré hã tiwi anhizâ, suru na.

1 Samuéu 25:24

Tawamhã ipara ãma ti'ubu na te te roptop sina te ãne tãma tinha: — Ĩnhib'apito, ma'ãpé ĩwapari. Ĩ'ãma si hiri ĩwasédé hã.

1 Samuéu 29:3

Tawamhã filisteu norĩ te dasi'wapéi 'manharĩ'wa norĩ 'madâ'â'wa hã ma tô ãne anharĩ za'ra: — E marĩ te hebreu norĩ hã ãmemhã 'manharĩ za'ra. Tawamhã Aqui ma tô ãma sada'âbâ za'ra ãne: — Ã hã Dawi, Izaraéu nhihudu norĩ nhib'apito ma romhuri'wa aré, Sauhu ma hã. Duré ma tô bâtâ ahâ na hã ĩsiré 're hâimana, Sau te te irẽme hawim haré. Tô ĩtẽme wisi hawim haré, marĩ hã te 'madâ'â õ di, te te i'manharĩ upazé hã, ĩwi.

1 Samuéu 30:26

Tawamhã Dawi Zicradi u apâ wisi wamhã, ma tô marĩ hã tinhitob'ru norĩ wi te te iwaibu za'ra hã, tisiwaihu'u norĩ ma sõmri za'ra, Zuda ti'ai ãma dama i'rãnho'õmo norĩ ma. Tawamhã ãne rob'ui'éré na hã ma tô tãma nharĩ za'ra: — Ã hã ate za'ra wa'aba da, wa ãma aima sõmri za'ra wa'wa, Wanhib'apito 'Re ihâimana u'âsi mono nhitob'ru norĩ wi, wa te irowaibu te aima ãma ipo'o za'ra wa'wa hã.