1 Samuéu 25:26 - ꞌRe Ihâimana Uꞌâsi Mono Zadawa Wasuꞌu

²⁶ Wanhib'apito 'Re ihâimana u'âsi mono hã ma tô aiwi sawi asi'ruiwa'âbâ tõ da, duré asitob'ru norĩ uprosi tõ da. Tahawa, ãhã na hã wa tô sena aima waihu'u Wanhib'apito nhisi na hã. Tô sena te za asitob'ru norĩ ma rob'manharĩ za'ra ni za, Nabau ma da te tãma irob'manharĩ ne. Te za uburé te te aima rob'manharĩ za'ra da, te te sima iwẽ za'ra norĩ ma zama tãma rob'manharĩ za'ra ni za.

1 Samuéu 25:26 ပူးပေါင်းရင်းမြစ်များ

Zenezi 20:6

Tawamhã 'Re ihâimana u'âsi mono, sõtõ 'rowim na nherẽ, ma te ãma sada'â ãne: — Tô ĩma waihu'u pese di, uburé marĩ aihâimana wẽ zarina iwẽ i'manharĩzé hã. Tahawa tô aiwasété tõ da, wa hã wa tô aiwi tété, pi'õ upi tõ da hã.

Salmu 44:3

Wahi'rata norĩ hã sib'ézé i'wa pa nai õ di, ti'a te te siwi dawi i'âri hã. Duré tinhiptete nai õ di, te te da'ãma i'ai'uté za'ra hã. Ta norĩ hã aiwaihu'u pese na si, duré asiptete na si duré ai'ãma rowa'a na si ma tô da'ãma ai'uté za'ra. Ãne zarina, ma tô a hã asimizawizé hã ãma ihâi'ré za'ra.

Provébiu 31:12

Bâtâ bâre te õne u'âsi iwẽ si timro ma, te te 're ab'manharĩ, niwamhã marĩ iwasédé te te tãma 'manharĩ ãna.

Daniéu 4:19

Tawamhã Daniéu, Béutésaza na isisi amo ãne hã te te wapari wa, ma tô tãma a'rã. Tahawa, te a'â rosa'rata ma za, ari'iwi. Tawamhã te apito tãma tinha ãne: — Béutésaza, aihâtâ'â tõ, rosawẽrẽ na hã duré za marĩ te te iwasu'uzém na hã. Tane nherẽ, ma tô Daniéu ãne ãma tãma wa'rã: — Apito, asimirosawẽrẽzé iwasu'u hã aré tô iwẽ ĩma hã, aihâiba upana asitob'ru norĩ hâiba u ihâimana da hã. Tane nherẽ, ta norĩ hâiba hã te te wasu'u õ di.

Hebreu 10:30

Tahawa, te za tô ta norĩ hã nimahã na hã hâ za'ra, 'Re ihâimana u'âsi mono hã. Duréihã ma tô ãne na ni'wa hã ãma rob'ui'éré siro, 'Re ihâimana u'âsi mono mreme na hã. Ãne na hã 'Re ihâimana u'âsi mono mreme hã wama waihu'u pese za'ra di oto: “Wa hã ĩsiwaprosi wa za te 're da'a'ruiwa'âbâ. Ĩwétési wa za te dama ãma 're awa'rãmi, marĩ, da te 're i'manharĩ wasété za'ra mono norĩ ma hã.” Ãne duré 'Re ihâimana u'âsi mono mreme na rob'ui'éré amo hã: “Wa hã uburé Danhib'apito uptabi hã wa za i'uwaibaba uptabi na si te 're da'ahâ za'ra, dawasété na ĩsiwaprosi te 're ida'awaihu'u mono zéb zarina.”

1 Samuéu 1:26

Tawamhã Ãna te ãne tãma tinha: — Ĩnhib'apito! Tô sena wa aima ĩsiwasu'u. Wa hã pi'õ hâiwi ĩzab ré ĩ'madâ, 'Re ihâimana u'âsi mono ma ĩmreme ré hã.

1 Samuéu 2:9

Õ hã te i'wawi 're simapa u'âsi za'ra, sena na ãma 're inomro mono norĩ 'wawimhã. Tane nherẽ, wasété na 're inomro mono norĩ wi si te tiwi 're sipizari za'ra, 're simani za'ra mono da si'uihâ na, robra u hã. E tihai wa. Ni'wa hã tinhiptete hawim na 'râwi te te da'ãma ai'uté õ wa.

1 Samuéu 20:16

wa norĩ hã wa te wasima iropisutuzém na hã wa te ãma wasima upa tõ da. Tawamhã ãma upai wamhã a hã, te za 'Re ihâimana u'âsi mono aima rob'manha.

1 Samuéu 20:3

Tawamhã Dawi ma ãma tãma wa'rã ãne: — Aimama ma hã waihu'u pese di, aima ĩwẽ za'ẽtẽ na hã. Tahawa, te te ĩ'ãma sima irosa'ratazé hã te te aima wasu'u õ di, waihu'u da hã, robzépata tõ da, aiwi irobzei'õzém na. Ãhã na wa za Wanhib'apito 'Re ihâimana u'âsi mono sena na 're ihâimana mono ne, a hã duré sena na 're aihâimana mono ne ropisudu hã aima 'manha. Tô sena ĩdâ'â da hã romnhimimnhasi wa oto.

1 Samuéu 22:3

Tawamhã Dawi, ta hawi watobro wamhã, ma tô mo, Mispa na 'ri'ahâ nhisi u, Moabi na romnhisi 'remhã. Tamomo wisi wamhã, ma tô tame ti'ai wa'õtõ nho'õmo 're, apito ma tinha ãne: — Ma'ãpé ĩmama ma duré ĩna ma rowairébé, we ãwa neb da, suru na a'â aime hâimana zahuré da ãme, 'Re ihâimana u'âsi mono za marĩ te te ĩma i'manharĩzé hã za te iwaihu'uzéb u.

1 Samuéu 25:25

Nabau hã waparire tõ. E tihai wa. Tiha dai õre di ta hã tarére hã. Tô ibâ õhõ nhisi te te iwasu'u hã: Isimiza'rese'õ. Duré wa hã tô te 'madâ'â za'ra õ di, aima romhuri'wa ãma isatõrĩ za'ra hã.

1 Samuéu 25:39

Tawamhã Dawi, Nabauhu dâ'âzé te te waihu'u wamhã, te ãne tinha: — Wanhib'apito 'Re ihâimana u'âsi mono ãma 're wawata za'ra wa'aba mono! Ta hã ma tô ĩ'ruiwa'â, Nabau ĩ'ãma iwasété'wa na hã. Ãne ma tô ĩpawapto, isib'a'uwẽ marĩ te 'manharĩ wasété tõ da hã. Wanhib'apito ma tô tãma rob'manha Nabauhu ma hã, wasété uptabi wa. Tawamhã Dawi hã ma tô romreme hã tãma tisõ, Abigaiuhu ma ãma mro da hã.

1 Samuéu 26:10

Sena na 're ihâimana u'âsi mono ne Wanhib'apito, tô sena te za tô taha si tiwĩ Sau hã, ite bâdâ hã tãma wisi wapsi, idâ'âzéb da hã, niha wamhã tô, dasi'wapéi u.