1 Samuéu 22:3 - ꞌRe Ihâimana Uꞌâsi Mono Zadawa Wasuꞌu

³ Tawamhã Dawi, ta hawi watobro wamhã, ma tô mo, Mispa na 'ri'ahâ nhisi u, Moabi na romnhisi 'remhã. Tamomo wisi wamhã, ma tô tame ti'ai wa'õtõ nho'õmo 're, apito ma tinha ãne: — Ma'ãpé ĩmama ma duré ĩna ma rowairébé, we ãwa neb da, suru na a'â aime hâimana zahuré da ãme, 'Re ihâimana u'âsi mono za marĩ te te ĩma i'manharĩzé hã za te iwaihu'uzéb u.

1 Samuéu 22:3 ပူးပေါင်းရင်းမြစ်များ

Zenezi 47:11

Tawamhã Zuzé, timama ma, duré tisisãnawã norĩ ma, ma tô Ezitu ãma ti'a iwẽ 're isa'wari mono hã tãma sõmri za'ra, 'ri nho'u Ramesé na isisi 'ratamhã apito te te tãma iwaihu'uzéb zarina. Tahawa ti'a norĩ na ãma site za'ra wa, te oto iwamhã 're hâimana za'ra.

Ezodu 20:12

— Aimama hã, duré ana te za 're iwazé pese za'ra wa'aba mo, ti'a te aima isõmri za'ra wa'aba 're, 're aihâimana hâ za'ra wa'aba mono da.

1 Timotiu 5:4

Pi'õi mrotõ 'ra norĩ hã 're hâimana za'ra mono wamhã, tiwarahuzé wa'rãmi, te za tina hã marĩ na te te 're pawapto pese za'ra. Duré pi'õi mrotõ nhihudu norĩ hã 're hâimana za'ra mono wamhã, tiwarahuzé wa'rãmi, te za ti'rata norĩ hã marĩ na te te 're pawapto pese za'ra. Ãne te za 'Re ihâimana u'âsi mono nhimiroti zarina te te tãma ãma 're uwaimrami za'ra, ãne si tãma wẽ wa.

Zuize 11:29

Tawamhã Uburé Danhib'apito pẽ'ẽzani, ma tô Zéptéhé wamhã ãzé. Tahawa Ziliadi ti'a wa'waibaba duré Manasé ti'a wa'waibaba ma tô ro'razâ. Tahawa, ma tô Ziliadi ãma Mispa u apâ sina siri. Tawamhã duré ta hawi Amo ti'ai u oto morĩ wamhã,

Ruti 4:10

Rutihi ãma wa za duré ĩmro, moabita norĩ sipi'õi mrotõ ãma, Marõ hã sipara te te irẽme ãma. Ti'a hã idâ'â sisãnawã siwadi norĩ ma, 're hâimana u'âsi mono da, wa za ãma ĩmro, pi'õi ãma. Ãne wamhã, Marõhõ nhisi na te za ãhã 'remhã ãma 're dapo're pu'u u'âsi za'ra, duré ipotozéb 'reb zama 'ri nho'õmo 'remhã. Ãne na ma tô ã bâtâ na ĩ'madâ'â za'ra wa'wa.

Ruti 4:17

Tawamhã pi'õ norĩ hã iwaptoma 're isi'ubumroi mono norĩ hã te te 'madâ'â za'ra wamhã, ma tô sima nharĩ za'ra: — Noẽmihi ma, i'ra ma te 'maipodo. Tawamhã Obedi na ma tô siwi sisi, ai'uté hã. Ta hã Zéséhé mama da hã Obedi hã. Duré Zésé ta hã apito Dawihi mama.

1 Samuéu 14:47

Tawamhã Sau Izaraéu nhihudu norĩ ma si'i'rãnho'õmo parimhã, ma tô iwaptoma isitob'ru norĩ uburé 're isi'ubumroi mono norĩ hã a'wapé, Moabi na romnhisi ãma 're ihâimana za'ra mono norĩ hã, Amo na romnhisi ãma 're ihâimana za'ra mono norĩ hã, Edõ na romnhisi ãma 're ihâimana za'ra mono norĩ hã, Zoba na romnhisi ãma danhib'ihâ'a 're ihâimana za'ra mono norĩ hã, duré filisteu norĩ hã. Tawamhã ã norĩ hã te te a'wapéi mono wamhã, ma tô uburé ãma ai'uté za'ra.

1 Samuéu 22:2

Uburé aibâ norĩ tãma iropire za'ra hã, dama rowa'âbâ su'u õ 'wa norĩ, duré robzei ãna 're ihâimana za'ra mono norĩ hã ma tô uburé ai'rã'õtõ Dawi ihâimanazéb u hã. Tawamhã uburé ta norĩ ma, ma tô Dawi hã si'ĩ'rãnho'u, 400 na aibâ norĩ ihâimana za'ra ma.

1 Samuéu 22:4

Tawamhã ãne te te ãma sadanharĩ wa, ma tô Dawihi ma sa'ré, Moabi ãma apito hã. Tahawa, ma tô oto ime tihâimana zahuré imama norĩ hã ina me, Dawi hã ẽtẽ zahâpâ na ab're ãma sima'uri ré.

1 Samuéu 3:18

Tahawa, Samuéu ma tô uburé tãma wasu'u, te te tiwi udâ ãna, te te tãma inharĩzé hã. Tawamhã te Eri tinha, ãne: — Õ hã tô 'Re ihâimana u'âsi mono, Uburé Danhib'apito. Ĩma wẽ di tô, marĩ te te 're i'ab'manharĩ mono da hã, tãma iwẽzéb zarina si!