1 Samuéu 22:17 - ꞌRe Ihâimana Uꞌâsi Mono Zadawa Wasuꞌu

¹⁷ Taha pari, te da'madâ'â'wa 'râwi i'rata isimasam norĩ ma 'ru za'ra ãne: — Mo oto simroi wa'aba, 'Re ihâimana u'âsi mono te sasedoti norĩ hã. Õ norĩ hã, Dawihi me ma tô ĩzada si'rã'õtõ. Isimanizé hã te te ĩma wasu'u za'ra õ di, tãma waihu'u pese za'ra nherẽ. Tane nherẽ, da'madâ'â'wa norĩ, Uburé Danhib'apito te sasedoti, te te siwi uprosi tõ da, ma tô siwi sisisi za'ra.

1 Samuéu 22:17 ပူးပေါင်းရင်းမြစ်များ

Ezodu 1:17

Tane nherẽ, ai'uté zapari'wa norĩ te 'Re ihâimana u'âsi mono hã te te 're wazé pese zahuré. Tahawa, Ezitu te apito, te te tãma i'ru zahuré zé hã te te wapari zahuré õ di. Tahawa aibâ na 're ipoto za'ra mono hã te te 're a'mapãrĩ zahuré mono õ di.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:19

Tawamhã Pedru norĩ hã te asa tãma nharĩ za'ra, Zuwãhã me: — E ma hã bété, 'Re ihâimana u'âsi mono ma, iwẽ. E imreme, wa za wapari ni. E aimreme za'ra wa'wa hã, wa za duré bété wapari ni. 'Re ihâimana u'âsi mono mreme si, wa za wapari ni. Ma'ãpé, asima ãma rosa'rata za'ra wa'aba, waihu'u za'ra wa'aba da. Wa norĩ hã wa za wa te dama 're rowasu'u u'âsi za'ra, uburé wa te 're i'madâ'â za'ra mono zém na hã, wa te 're iwapari za'ra mono zém na zama. Wa te dawi 're udâ waihu'u za'ra mono õ di za.

1 Samuéu 14:45

Tane nherẽ, dasi'wapéi 'manharĩ'wa norĩ hã ma tô ãma sada'âbâ za'ra ãne: — Tô'ã. Zonata idâ'â da hã mare di za. Taha nhimipawaptobzéb zarina wa tô Izaraéu nhihudu norĩ hã da'ãma ai'uté za'ra ni. Wa norĩ hã wa tô, Wanhib'apito 'Re ihâimana u'âsi mono ma hã ropisutu za'ra ni i'rãi hawimhã iséré hã da te tiwi 'matari tõ da. Ã bâtâ na marĩ hã te te i'manharĩ na hã 'Re ihâimana u'âsi mono nhimipawaptobzém na si ma tô 'manha. Ãne ma tô dasi'wapéi 'manharĩ'wa norĩ hã siwi sõ'reptu Zonata hã, idâ'âzé wi.

1 Samuéu 2:31

Ma'ãpé rob'madâ'â mono! Bâdâ iwa iwaptã'ãzé hã romhuture di oto wa hã za uburé ai'ra norĩ te isimrozéb da hã, duré aimama 'ra norĩ si'aibâ hã te isimrozéb da hã 'masi'ĩhi tõ da.

1 Samuéu 20:33

Tawamhã ãne te te tãma nharĩ wa, ma tô Sau Zonata hã tite isi'uwazi 'rã'wa na hã ãma simri te te ãma wĩrĩ da. Ãne wa tawamhã, Zonata ma tô oto timama hâimanazé hã waihu'u, tô aré Dawi te te wĩrĩ da, te te sima irosa'rata na hã.

1 Samuéu 22:13

Tawamhã Sau te sadanha ãne: — E marĩ da, ma tô Dawihi me ĩzada asihâiba wapto wa'wa, rosa'rada hã ĩzada 'manharĩ aba da. Duré e marĩ da, ma tô isa hã tãma isõ, duré sib'ézé 'wapa hã. E marĩ da, ma tô duré 'Re ihâimana u'âsi mono hã ãma isadanha, Dawi hã za marĩ te te i'manharĩzéb da hã. Tahawa, ma tô ãhã na awa'awi na hã Dawi ĩzada tiwasété. Tahawa, te oto duré ĩzada mare, te te ĩwĩrĩ da hã.

1 Samuéu 22:16

Tane nherẽ, te apito Sau hã ãne tãma tinha: — Aimereti, uburé te za asisãnawã siwadi norĩ me ai'utõrĩ 'wa.

1 Samuéu 25:17

Tahawa, ãne na rosa'rata wamhã, ma'ãpé asima rowairébé, marĩ 'manharĩ da hã. E marĩ wa. Iwasédé hã za oto watobro wa, wanhib'ihâ'a tẽmemhã, duré uburé i'ra norĩ tẽmeb zama. Õ hã wasété uptabi wa, ni'wa hã te te tãma irobzanhamri da hã waihu'u õ di.

1 Samuéu 8:11

Tawamhã te tãma rowasu'u za'ra ãne: — Ãne te za apito hã aima 're ihâimana za'ra wa'aba mono hã te te 're romhuri za. Ai'ra norĩ wa'wa hã te za awaibu, dasi'wapéi 'manharĩ'wa da hã. Te za duré ni'wam norĩ hã waibu, tite wedewara zapore na dasi'wapézém na isisa'rei mono da hã, ihâiba amo norĩ awaru na isisa'rei mono da hã, duré wedewara zapore na dasi'wapézém nhowa za isisa'rei mono da hã.