1 Samuéu 22:10 - ꞌRe Ihâimana Uꞌâsi Mono Zadawa Wasuꞌu

¹⁰ Tahawa, Aimereti hã ma tô Dawihi ãma hã Wanhib'apito 'Re ihâimana u'âsi mono hã sadanha ãne: “E marĩ te za Dawi i'uwaibaba hã 'manha.” Tawamhã ãne pari, ma tô isa hã tãma tisõ, Dawihi ma. Tahawa, Guliaha nhi'wa zama ma tô duré tãma tisõ.

1 Samuéu 22:10 ပူးပေါင်းရင်းမြစ်များ

1 Samuéu 10:22

Tahawa, te Samuéu Uburé Danhib'apito hã duré sadanha ãne: — E zahadu duré daré hã. Tawamhã 'Re ihâimana u'âsi mono ma ãma sada'â ãne: — Ĩhe, zahadu daré hã. Ma aima'u dawi, danhimarĩ wazari.

1 Samuéu 21:10

Tawamhã Dawi tô taha bâtâ na ma aimani, Sauhu wi hã. Tahawa, ma tô mo, apito Aqui na isisi zô, 'ri'ahâ Gati na isisi ãmab zô 're rĩtĩ mono da.

1 Samuéu 22:11

Tawamhã apito Sau ma tô sô hâ, Aimeretihi zô. Duré uburé isisãnawã siwadi norĩ zô zama, Nobi ãma sasedoti na 're ihâimana za'ra mono norĩ zô zama ma tô hâ. Ãne wa, ma tô itẽme ai'aba'ré, apito u.

1 Samuéu 22:13

Tawamhã Sau te sadanha ãne: — E marĩ da, ma tô Dawihi me ĩzada asihâiba wapto wa'wa, rosa'rada hã ĩzada 'manharĩ aba da. Duré e marĩ da, ma tô isa hã tãma isõ, duré sib'ézé 'wapa hã. E marĩ da, ma tô duré 'Re ihâimana u'âsi mono hã ãma isadanha, Dawi hã za marĩ te te i'manharĩzéb da hã. Tahawa, ma tô ãhã na awa'awi na hã Dawi ĩzada tiwasété. Tahawa, te oto duré ĩzada mare, te te ĩwĩrĩ da hã.

1 Samuéu 22:15

E imorĩ'rata na 'Re ihâimana u'âsi mono hã te sadanharĩ bâ, Dawi za marĩ te te i'manharĩzéb da hã. Imorĩ'rata na hã te sadanharĩ õ di. Tahawa, ĩwasédé hã ĩ'ãma hiri õ di za, duré ĩsisãnawã siwadi norĩ ãmab zama iwasédé hã sa'ra õ di za, asada wahâimana za'ra da, rosa'rada hã wa te wasima i'manharĩ za'ra na hã. Tahawa, tane na hã ĩma waihu'u õ di.

1 Samuéu 23:12

Tawamhã te duré Dawi sadanha ãne: — E tawamhã te za Queira ãma 're idahâimana za'ra mono norĩ hã Sauhu ma ĩhâiba nhomri za'ra za, duré ĩte dasi'wapéi 'manharĩ'wa norĩ zama. — Ĩhe! Wa za tô tãma aihâiba nhomri za'ra. — Ãne ma tô Uburé Danhib'apito hã ãma tãma wa'rã.

1 Samuéu 23:2

Tahawa, te Uburé Danhib'apito hã sina sadanha ãne: — E wa za mo, te a'wapé da, filisteu norĩ hã. — Tô aimorĩ, a'wapé da filisteu norĩ hã, duré anho'reptu da, 'ri'ahâ Queira ãma, 're idahâimana za'ra mono norĩ hã. — Ãne ma ãma tãma wa'rã, 'Re ihâimana u'âsi mono hã.

1 Samuéu 23:4

Tawamhã Dawi, Uburé Danhib'apito hã ma duré isadanharĩ na ãma sahu. Tahawa, ma ãne ãma tãma wa'rã: — Mo oto aimorĩ Queira u, a'wapé da, za te aima sõmri wa, filisteu norĩ ãma i'ai'uté za'ra zé hã.

1 Samuéu 30:8

Tahawa, ma tô Dawi hã Uburé Danhib'apito hã sadanha ãne: — E we ãwa pi'uriwi waro wamnarĩ'wa norĩ zarina hã wa za mo. E tawamhã te sasãmri waihu'u pese za'ra di duré, te iwaibu da hã. Tawamhã ma ãne 'Re ihâimana u'âsi mono hã ãma sada'â: — Aimorĩ tô isarina za'ra hã. Tawamhã sasimri za'ra wamhã, da te isimroi mono norĩ hã te za isõ'reptu za'ra.