1 Samuéu 2:9 - ꞌRe Ihâimana Uꞌâsi Mono Zadawa Wasuꞌu

⁹ Õ hã te i'wawi 're simapa u'âsi za'ra, sena na ãma 're inomro mono norĩ 'wawimhã. Tane nherẽ, wasété na 're inomro mono norĩ wi si te tiwi 're sipizari za'ra, 're simani za'ra mono da si'uihâ na, robra u hã. E tihai wa. Ni'wa hã tinhiptete hawim na 'râwi te te da'ãma ai'uté õ wa.

1 Samuéu 2:9 ပူးပေါင်းရင်းမြစ်များ

Salmu 1:6

Ite bâdâdi na 're inomro wẽ mono norĩ si, te tô Uburé Danhib'apito hã te te 're awẽsãmri. Tane nherẽ, 're inomro wasété mono norĩ nhibâdâdi hã te 're isi'utõrĩ mono zéb u si te te 're ãwisi za'ra.

Salmu 94:18

Uburé Danhib'apito, ĩsi'marõwĩrĩ da, ĩzai praba ne, oto ĩdâ'â da, ĩsiwaihu'u wamhã, asimizawizé hã ma tô ĩ'upa.

Provébiu 16:9

'Râwi danhimirowa'õtõ 'manharĩ na hã te tô 're dahâimana za'ra. Tane nherẽ, te 'Re ihâimana u'âsi mono si 're idahâimana za'ra mono zé hã te te dama 're anhimro.

Provébiu 2:8

Ni'wam norĩ hã i'uwaibaba si te te 're ida'apawapto mono norĩ 'wawimhã te 're simapa. Imreme te te 're iwapari pese za'ra mono norĩ hã te duré te te 're a'madâ'â pese.

Provébiu 3:26

E marĩ wa. Uburé Danhib'apito te za 're irob'umnhasi mono zé hã aima te te 're anhomri. Duré niwamhã te te airẽme waihu'u õ di za, romnhiwasi rosa'rese õ ré niha hã ai'ârizé hã asisiwi waptã'ã tõ da.

Mateu 8:12

Tane nherẽ, ni'wam norĩ hã 'Re ihâimana u'âsi mono, ãma 're sib'a'uwẽ za'ra mono da nherẽ, isiré 're si'ubumroi mono da nherẽ, te za sãmra sisiti, robra si 're isa'wari mono u. Tame te za sina 're 'ru'ru. Te za duré 're 'wasitete za'ra, te te 're robzépata za'ẽtẽ za'ra mono wa.

Roma 3:19

Duréihã 'Re ihâimana u'âsi mono nhimiroti na ma tô Mozési hã rob'ui'éré, zudeu norĩ ma, õhõ na si ãma 're hâimana za'ra mono da. Tahawa, 'Re ihâimana u'âsi mono nhimiroti 'rata na rob'ui'éré hã 're hâimana siromo mono wa, ni'wa hã tiwẽ na 're imorĩ wasété õ na dama 're siwasu'u waihu'u mono õ di. Uburé dawasété na 're dasisãmri za'ra mono da si, te dama 're hâimana, rob'ui'éré 'rada hã, duré 'Re ihâimana u'âsi mono, dawasété na te te 're ida'awẽ'õ mono zé hã da te dasina 're waihu'u za'ra mono da.

1 Pedru 1:5

Ate za'ra wa'aba da, te iwẽ hã asô 're hâimana u'âsi za'ra wa'wa. A norĩ wa'wa hã iwaihu'u pese na te oto asina 're i'umnhasi za'ra wa'aba mo. Tahawa, te za iwasété wi te te 're ai'madâ'â pese za'ra wa'wa, asõ'reptui wa'aba zé hã asina uwaimrami za'ra wa'aba da, ro isi'utõrĩzéb ãma.

2 Pedru 2:17

Senai'õ na rowasu'u'wa norĩ hã, tinhimirowasu'u na te te ãma 're dapawaptob za'ra mono õ wa, wa za oto marĩ na aima ãma romnhimiré'é za'ra wa'wa. Ta norĩ hã sipti hã 're i'â'ré mono ne, te 're hâimana za'ra. Duré hâiwa nhirõno hã rowa'u hã nimomo te te 're sate mono wa, tã hã ihawi we 're ita'a mono õ ne, te 're hâimana za'ra. 'Re ihâimana u'âsi mono hã ma tô ta norĩ hã pisutu siromo za'ra, robra si 're isa'wari mono zéb ãma, iwa 're hâimana u'âsi za'ra mono da.

Zuda 1:1

Wa hã Zuda, Zezu Cristuhu ma romhuri'wa, Tiaguhu no, wa aima ãma rob'ui'éré za'ra wa'wa. 'Re ihâimana u'âsi mono hã ma tô te te 're aipisutu za'ra wa'wa, isib'a'uwẽ na oto tãma 're aihâimana za'ra wa'aba mono da. Tahawa, tãma asawi pese za'ra wa'aba di, Wamama ma hã. Duré Zezu Cristu hã te te oto 're ai'madâ'â pese za'ra wa'wa.

Zuda 1:13

 sisasi hã 're isibzaihâ za'ra mono ne, te ta norĩ hã tãma 're rowẽ za'ra mono da newa, hâiwi si 're nomro, 're wa'utu za'ra mono ãna. Duré â nhibzaihâ zaipro iwasédé, supara 'ré u te te 're isãmra mono ne, te marĩ iwasété si te te 're 'manharĩ za'ra, ta norĩ hã. Wasi hã siwa'ru 're inomro mono ne, te duré ta norĩ hã siwa'ru 're hâimana za'ra, te te 're rob uptabi za'ra mono ãna. Ta norĩ ãma ma tô 'Re ihâimana u'âsi mono hã sima ãma roti siromo za'ra, za te te ihâ za'ra zém na hã. Robra si 're isa'wari mono zéb u te za satõrĩ za'ra, robra u'âsi u, iwa 're hâimana u'âsi za'ra mono da, tame.

Zuda 1:3

Ĩsisãnawã norĩ, ĩma asawi pese za'ra wa'aba norĩ hã, wa tô aré ĩsima rosa'rata, 'Re ihâimana u'âsi mono te te 're iwa'anho'reptui mono zém na te aima rob'ui'éré za'ra wa'aba da. Tane nherẽ, marĩ iwasétére hã ai'ãma 're hâimana za'ra wa'aba mono wa, wa tô ĩnhimirosa'rata na ĩsima ãma saprĩ, taha na si te ãma aima rob'ui'éré za'ra wa'aba da. Wa norĩ hã 'Re ihâimana u'âsi mono nhib'a'uwẽ, wa oto 're wahâimana za'ra. Ta hã ma tô misi haré te te wama 're anhomri, Cristuhu wasu'uwẽ na roti na ãma 're iwanomro mono zéb da hã. Tahawa, wa oto aima ãma rob'ui'éré za'ra wa'wa, tô da'ãma 're ai'aba'ré za'ra wa'aba mono da, Cristu, da te dasina 're i'umnhasi za'ra mono zéb udâna.

1 Samuéu 25:26

Wanhib'apito 'Re ihâimana u'âsi mono hã ma tô aiwi sawi asi'ruiwa'âbâ tõ da, duré asitob'ru norĩ uprosi tõ da. Tahawa, ãhã na hã wa tô sena aima waihu'u Wanhib'apito nhisi na hã. Tô sena te za asitob'ru norĩ ma rob'manharĩ za'ra ni za, Nabau ma da te tãma irob'manharĩ ne. Te za uburé te te aima rob'manharĩ za'ra da, te te sima iwẽ za'ra norĩ ma zama tãma rob'manharĩ za'ra ni za.