1 Samuéu 2:1 - ꞌRe Ihâimana Uꞌâsi Mono Zadawa Wasuꞌu

¹ Tawamhã Ãna te ãne mre: Uburé Danhib'apito hã rowẽ za'ẽne hã ĩpẽ'ẽ 'remhã ma tô ĩma tisõ, sa'ẽtẽ na. Te te ĩma i'manharĩzéb u'âbâ, wa nasi ĩ'rãiwahutu haré ne. Wa nasi ĩnhitob'ru norĩ na hã aihâ za'ra. Duré ĩpẽ'ẽ 'remhã ĩma rowẽ uptabi di, 'Re ihâimana u'âsi mono te te ĩpawaptobzém na hã.

1 Samuéu 2:1 ပူးပေါင်းရင်းမြစ်များ

Neemia 11:17

Matania, Micaha 'ra, Zabdihi nhihudu, duré Asafihi nhihudu hawimhã a'uwẽ. Ta hã ma tô 'Re ihâimana u'âsi mono nhorõwa 'ri 're tãma 're idamreme zusi mono zéb ãma danho're na ãma 're iwata za'ra mono da hã, danho're te te dama 're 'wani. Duré Baquebuquia hã, Mataniaha pawapto'wa na 're ihâimana mono. Abda, Samuaha 'ra, Gala'oho nhihudu hã, Zedutu nhihudu hawimhã a'uwẽ.

Salmu 118:14

Uburé Danhib'apito, apâ 're ĩnhiptete mono 'wa. Ta hã ma tô ĩnho'reptu.

Salmu 51:15

Uburé Danhib'apito, ma'ãpé ĩzadawa na damreme iwẽ hã ĩma 're sõmri mono. Tawamhã wa za ai'ãma 're ĩwata u'âsi.

Salmu 89:17

'Re ihâimana u'âsi mono, a hã, aiwaihu'u pe duré aiwasété ãna 're i'aihâimana wẽ uptabi mono, te wama za'ra 're aihâimana mo. Duré 're i'asimi'manharĩ wẽ mono zéb zarina, wa wa te da'ãma 're ai'uté za'ra.

Salmu 89:18

A hã ma tô ipisu, wa'wawi 're isimapa mono 'wa da hã. Uburé Danhib'apito, Izaraéu te 'Re ihâimana u'âsi mono, marĩ iwasédé, ai'ãma 're ihâimana mono õ, a hã ma tô wate apito hã wama isõ.

Salmu 89:24

Ĩ'umnhasizé hã, ĩnhimizawizé me, te za isiré hã 're hâimana u'âsi zahuré. Ĩnhisi na te za isiptetezé hã õne u'â te te sina tãma 're hâimo.

Ezodu 15:1

Tawamhã Mozési, Izaraéu nhihudu norĩ me, Uburé Danhib'apito ãma hã ma tô tinho're za'ra ãne: Uburé Danhib'apito ma, wa za tãma 're ĩnho're u'âsi. E marĩ wa. Õ hã te te da'ãma ai'uté wẽ dâ'âsina; Õ hã ma tô awaru norĩ hã, duré awaru na isi'wapéi'wa norĩ hã, â u hã sãmra.

Ezodu 15:21

Ãne Miriã, te tawamhã tãma tinho're za'ra: Uburé Danhib'apito ma, te za tãma 're asõ're u'âsi za'ra wa'aba mo, aipẽ'ẽ 're ãma 're aiwata za'ra wa'aba mono sina. E tihai wa. Õ hã iwẽ uptabi na hã te te da'ãma ai'uté wa; Õ hã ma tô awaru hã, duré awaru na isi'wapéi'wa norĩ hã, â wa'wa u sãmra.

Luca 1:69

Ma tô we oto watẽme satõ iwaihu'u pe hã, Wanho'reptui'wa da hã, apito Dawihi nhihudu hã. Tãma iromhuri'wa, Dawi hã.

Roma 5:11

Tane nherẽ, taha si õ di. 'Re ihâimana u'âsi mono ãma, wa duré watoi u'âsi 're wahâimana za'ra, Wanhib'apito Zezu Cristu dâ'âzém na, wa'ãma 're siwadi za'ra mono wa oto.

Filipu 3:3

Ta norĩ hã sena na 're hâimana za'ra mono õ di, 'Re ihâimana u'âsi mono nhib'a'uwẽ na hã. Wa norĩ si, wa 'Re ihâimana u'âsi mono nhib'a'uwẽ uptabi hã 're wahâimana za'ra, Ipẽ'ẽzani nhimipawaptobzém na ãma 're wawata za'ra mono wa. Tahawa, marĩ hã wasi'uihâ na wa te 're i'manharĩ za'ra mono zém na 'râwi 're wasi'umnhasi za'ra mono õ di, wasihawim na wanho'reptuzé hã wa te wasina ãma 're i'uwaimrami za'ra mono da hã. Cristu Zezusi, iwẽ te te wama i'manharĩ za'ra zém na si, wa tô wa te wasima ãma 're rowẽ za'ẽtẽ uptabi za'ra, taha zarina si te te oto 're wa'anho'reptui mono wa, 'Re ihâimana u'âsi mono hã.

Filipu 4:4

Ma'ãpé atoi u'âsi 're aihâimana za'ra wa'aba mono, Wanhib'apito ãma oto 're anomro aba mono na dâ'âsina. Wa za duré aima ãma sahu za'ra wa'wa. Ma'ãpé atoi u'âsi ãma 're aihâimana za'ra wa'aba mono za.

Filipu 4:6

Marĩ na 're aihâtâ'â za'ra wa'aba mono ãna, te za oto 're aihâimana za'ra wa'aba mo. 'Re ihâimana u'âsi mono ma, 're aimreme zusi aba mono zép sidâpâsi, te za duré tiwi 're irowaptẽrẽ za'ra wa'aba mo, uburé marĩ zô aiwi 're irowaptâ'â za'ra wa'aba mono zém na hã. Aipẽ'ẽ 're, ãma 're aiwata za'ra wa'aba mono sina, te za asi'ãma duré tãma 're aimreme zusi aba mo.

1 Pedru 1:8

A norĩ wa'wa hã atõmo na asiwi 're 'madâ'â za'ra wa'aba mono õ di, Zezu Cristu hã. Tane nherẽ, aima sawi uptabi za'ra wa'aba di, Wanhib'apito hã. Atõmo na asiwi 're 'madâ'â za'ra wa'aba mono õ nherẽ, te Wanhib'apito umnhasi sina 're aihâimana za'ra wa'aba mo. Tahawa, aima 're rowẽ za'ra wa'aba mono wa, te aipẽ'ẽ 're, 're atoi u'âsi za'ra wa'aba mo, ato za'ẽtẽ za'ra wa'aba na. E marĩ wa. 'Re aihâimana wasété za'ra wa'aba mono zém hawi, te te 're asõ'reptu za'ra wa'aba mono wa. Taha da, te Wanhib'apito hã asina 're i'umnhasi za'ra wa'aba mo, te te 're asõ'reptu za'ra wa'aba mono da.

Apocalipsi 18:20

Ãne te i'awapari mono hã, ĩnhotõ 'rowim ne, ĩpo're na. Tahawa, ma'ãpé hâiwa ãma 're aihâimana za'ra wa'aba mono hã ãma 're atoi u'âsi za'ra wa'aba mono, 'ri nho'õmo za'ẽne hã isi'utõrĩzém na. Duré 'Re ihâimana u'âsi mono nhib'a'uwẽ norĩ, ma'ãpé 're atoi u'âsi za'ra wa'aba mono, isadawa wasu'u'wa norĩ zama, duré Cristuhu zadawa wasu'u'wa norĩ zama. E marĩ wa. Babilonia ãma da te aima 're rob'manharĩ wasété za'ra wa'aba mono wa, 'Re ihâimana u'âsi mono hã te te da'uprosi wa oto. Tahawa, te za ãma 're atoi u'âsi za'ra wa'aba mo.

1 Samuéu 1:6

Tawamhã Penina ma tô nasi ãma tinhitob'ru. Duré ma tô nasi ãma tito, Ãnahã ãma. Tahawa, ma tô nasi ãma sisém no, nasi ãma itozém na hã. E marĩ wa. Zahadu Uburé Danhib'apito hã te te tãma pisutu õ wa, i'ra da hã. Tane nherẽ te nasi tô ãma tito.

1 Samuéu 1:7

Ãne ma tô nasi tãma rob'manha Penina hã, wahup sidâpâsi. Uburé Danhib'apito nhorõwa u, 're nomro mono sidâpâsi te Penina hã wi te te 're ro'wa'ré, Ãna hã. Tane nherẽ, te te ãma tãma 're wa'rãmi mono õ di, Ãna hã. Tiwawa si te te 're 'manharĩ. Tahawa duré, 're sai mono õ di, mram na hã.