1 Samuéu 17:45 - ꞌRe Ihâimana Uꞌâsi Mono Zadawa Wasuꞌu

⁴⁵ Tahawa, Dawi hã ma tô ãma tãma wa'rã: — A hã te we ĩzô aimo, sib'ézé 'wapa ré ãma ĩ'wapé da, isi'uwazi 'rã'wa ré, duré isi'uwazi 'rã'wa i'rutu ré. Tane nherẽ, wa za Wanhib'apito iwaihu'u pese nhisi na, ai'wapé ãhã na hã wa hã, Izaraéu nhihudu norĩ dasi'wapéi 'manharĩ'wa norĩ te, 'Re ihâimana u'âsi mono zada i'aihâimana nhisi na.

1 Samuéu 17:45 ပူးပေါင်းရင်းမြစ်များ

Salmu 44:6

Ĩnhimnhi'ã, wa hã te umnhasi õ di. Duré ĩte sib'ézé 'wapa hã te da'ãma ai'utézé hã te te ĩma sõmri õ di.

Provébiu 18:10

Uburé Danhib'apito nhisi hã aiwa 'ri 'rãihâ dasimapazé isiptete ne hã te 're hâimana. Taha tẽme te sena na i'uwaibaba na si 're ihâimana za'ra mono norĩ hã 're nomro, sima iwẽ na iwa 're hâimana za'ra mono da hã.

2 Corĩtu 10:4

Ti'ai ãma 're idasi'wapé za'ra mono zém na danhimnhi'ãsi na, wa te 're a'wapéi mono õ di duré. 'Re ihâimana u'âsi mono nhimnhi'ãsi na si, wa tô wa te 're a'wapéi u'âsi, iwaihu'u pese zarina. Isitob'ru norĩ nhiptetezé hã wa te tiwi ãma 're i'a'uprosi mono zéb da hã, wa ãhã na si wa te 're a'wapéi u'âsi, ta norĩ hã, 'Re ihâimana u'âsi mono nhimnhi'ãsi na si.

2 Corĩtu 3:5

E wa norĩ hã wasi'uihâ na wama waihu'u pese di ãne hã, Cristuhu wasu'uwẽ na wa te dama 're irowasu'u mono zéb da hã. Mare di. 'Re ihâimana u'âsi mono te te 're iwapawapto mono zéb zarina si, wama waihu'u pese di, iwasu'uwẽ na, wa te dama 're iromhuri mono zéb da hã, taha zarina, da te 're saze za'ra mono da.

Filipu 4:13

Ãne hã niha ĩma 're romhâimana mono nherẽ, wa sada 're ĩnhiptete mono. E marĩ wa. Cristu hã ĩnhiptetezé te te ĩma sada 're anhomri u'âsi mono wa.

1 Samuéu 17:10

Tahawa, ãhã na Izaraéu nhihudu norĩ, wa hã wa asô ĩhârâ zahi za'ra wa'wa dasi'wapéi 'manharĩ'wa norĩ hã te te ĩ'mai'wapé da hã. Tahawa, ma'ãpé we asiwi 'mazatõrĩ aba, te te ĩ'wapé da hã.

1 Samuéu 17:26

Tawamhã te Dawi hã dasi'wapéi 'manharĩ'wa norĩ, i'rata isimasam norĩ hã sadanharĩ za'ra ãne: — E marĩ te za ni'wa hã ti'â, ã hã filisteu te te wĩrĩ wa, taha zarina Izaraéu nhihudu norĩ ma te te ropese wa, te te anho'reptui wamhã. E 'wa bété ãhã, filisteu ihâimana wasédé hã. E tô ibâ 'Re ihâimana u'âsi mono te dasi'wapéi 'manharĩ 'wa norĩ zô ihârâ zahi za'ra zé hã.

1 Samuéu 17:36

Wa hã hu'u zérépa te ipãrĩ ré hã duré ursu zama. Tane wa za duré tãma rob'manha, filisteu ihâimana wasété ma hã, 'Re ihâimana u'âsi mono te dasi'wapéi 'manharĩ'wa norĩ zô ihârâ zahi ma hã.

1 Samuéu 17:6

Ihi ubuzé hã ẽtẽ topsada brõzi 'manharĩ na hã. Duré tinhisé te te 're imrami mono hã ẽtẽ topsada brõzi 'manharĩ na hã i'rã'wa ré hã.