1 Samuéu 15:22 - ꞌRe Ihâimana Uꞌâsi Mono Zadawa Wasuꞌu

²² Tawamhã Samuéu ma duré ãma tãma wa'rã ãne: — E ma hã tawamhã tãma iwẽ, Wanhib'apito 'Re ihâimana u'âsi mono ma hã. E dapo're pe. E abaze da te tãma 're izata za'ra mono na tãma danhoprubzé. 'Re ihâimana u'âsi mono, da te 're iwapari pese za'ra mono zé hã iwẽ uptabi, pone'ẽrebâ zéré mapure si'aibâ iwẽ na tãma 're idanhoprub za'ra mono zém nhipai u.

1 Samuéu 15:22 ပူးပေါင်းရင်းမြစ်များ

Zenezi 4:4

Duré Abéu tinhimizama pone'ẽrebâ 'ra poto'rada hã ma tô duré 'mai'â. Tawamhã taha na nimahã inhi wẽ uptabi na ma tô Uburé Danhib'apito ma ãma tãma tinhopru. Tawamhã Abéu ma hã duré isibzari ma zama toi uptabi di.

Ezodu 19:5

Ãne ãhã na hã wa za aima waihu'u za'ra wa'wa. A norĩ wa'wa hã 're ĩwapari pese za'ra wa'aba mono wamhã, duré ĩnhimiroti na ãma 're uwaimrami za'ra wa'aba mono wamhã, ĩnhib'a'uwẽ te za ĩma 're aihâimana za'ra wa'aba mo. Ropâ uburé 're idahâimana za'ra mono, tô ĩte hã. Tane nherẽ, a norĩ wa'aba si te za tô ĩnhib'a'uwẽ na ĩma 're aihâimana za'ra wa'aba mo, te ĩsima aipisutu za'ra wa'aba wa.

Provébiu 21:3

I'uwaibaba na sena na si ma'ãpé marĩ hã 're ab'manharĩ mono, Uburé Danhib'apito ma ãma tãma 're rowẽ zani mono da, danhimizama zata na ãma tãma 're i'asõpru mono zém nhipai u.

Mateu 12:7

Duréihã 'Re ihâimana u'âsi mono zadawa 'mahârâ'wa hã ma tô ãne na rob'ui'éré ibaihâ na hã, 'Re ihâimana u'âsi mono mreme na: “Asimizama hã ĩma 're izata za'ra wa'aba mono zô, 're ĩnhimipari mono õ di oto. Asimizawi pese zarina da'ãma 're aiwamri za'ra wa'aba mono da si, wa ĩsima te 're aiwẽ za'ra wa'wa oto.” Ãne hã ãma waihu'u za'ra wa'aba wamhã, aré iwasédé hã ãma sa'ra wa'aba õ di, ĩsiré 're inomro mono norĩ ãma hã, marĩ iwasédé hã te te 'manharĩ za'ra õ wa, ã bâtâ na ta norĩ hã.

Mateu 23:23

— Farizeu norĩ, duré dama rowahutu'wa norĩ, aihâimana uptabi õ na dama 're aihâimana za'ra wa'aba mono wa, aima 're ropipa uptabi za'ra wa'aba mono di za. 'Re ihâimana u'âsi mono nhimiroti 'rada hã taha ma, tãma ipire prã si te 're i'madâ'â pese za'ra wa'aba mo. Wesuirã isu zadazei mono hã ma tô 'Re ihâimana u'âsi mono ma, isimiroti 'rata zarina, tãma 're ipo'o za'ra wa'aba mo, suru na otelã na wesuirã zadaze wamri hã, duré ewa-doce na wesuirã nhisi hã, duré cominhu na dasai warĩrĩzé nhisi hã. Tane nherẽ, isimiroti pire na Mozési te te ãma i'arob'ui'éré mono hã 're 'madâ'â za'ra wa'aba mono õ di, isarina si dama 're irob'manharĩ wẽ za'ra wa'aba mono zéb da hã, duré da'ãma 're aipẽ'ẽzé za'ra wa'aba mono zéb da hã, duré 'Re ihâimana u'âsi mono wi, 're aipizari za'ra wa'aba mono ãna 're anomro aba mono zéb da hã. Ãne hã isimiroti ipire prã norĩ zu, 're 'madâ'â za'ra wa'aba mono 'wa'âhã, te aré tô sena aihâimanazém na asina tãma ãma 're i'uwaimrami za'ra wa'aba mo, 'Re ihâimana u'âsi mono ma hã.

Mateu 5:24

Ãhã wamhã, te za a'â asisô 're isa'ra wa'aba mo, 'Re ihâimana u'âsi mono ma, asõprubzé hã wedeza ne nho're, asiré u a'â asitẽme 're anomro aba mono da, asima 're asiwasu'u za'ra wa'aba mono wa, apâ duré asina 're asiwadi za'ra wa'aba mono da. Taha parip si te za apâ 're anomro aba mo, 'Re ihâimana u'âsi mono nhorõwa u, tãma asõprubzé hã oto tãma 're sõmri za'ra wa'aba mono da.

Mateu 9:13

Duréihã ma tô 'Re ihâimana u'âsi mono zadawa 'mahârâ'wa hã ãne na rob'ui'éré, 'Re ihâimana u'âsi mono mreme na: “Asimizama hã ĩma 're izata za'ra wa'aba mono zô hã, sô 're ĩnhimipari mono õ di oto. Asimizawi pese zarina, da'ãma 're aiwamri za'ra wa'aba mono da si, wa ĩsima te 're aiwẽ za'ra wa'wa oto.” Ãne duréihã 'Re ihâimana u'âsi mono mreme na rob'ui'éré hã sô sabu za'ra wa'aba ibaihâ hã, waihu'u pese za'ra wa'aba da. Dawẽ na 're idanomro mono norĩ zô ĩsitẽme sô 're ĩhârâ za'ra mono da, we ĩmorĩ õ di. Dawasété na 're idanomro mono norĩ zô si ĩsitẽme sô 're ĩhârâ za'ra mono da si, wa tô wei mo.

Marcu 12:33

Tahawa, wa za tô wa te 're sawi pese za'ra, 'Re ihâimana u'âsi mono hã. Taha zarina, wa za isimiroti na wa te ãma 're rosa'rata u'âsi za'ra. Wa za duré wanhimi'ẽ na wa te tãma 're romhuri u'âsi za'ra. Wa za duré wa te 're dazawi pese za'ra. Marĩ iwẽ zô wasima 're iwanhopré mono ne, wa za uburé dama zama sô 're wanhopré, iwẽ zô. Wa norĩ hã wa za wanhimizama hã duré wanhimarĩ hã wa te tãma 're sõmri za'ra, 'Re ihâimana u'âsi mono ma, da te tãma 're zata za'ra mono da, izatazém na. Ãne wamhã, tãma wẽ di, 'Re ihâimana u'âsi mono ma. Tane nherẽ, maparane isimiroti hã ipire uptabi hã wa te 're 'madâ'â pese za'ra mono wamhã, tãma wẽ uptabi di za.

1 Samuéu 13:12

Tahawa wa tô rosa'rata ãne: “Filisteu norĩ hã te za we ai'aba'ré ãwa, Gilga u, te te siwi ĩ'wapé da. Tane nherẽ, zahadu te pibui õ di, Wanhib'apito 'Re ihâimana u'âsi mono nhimipawaptobzéb hã.” Tawamhã wa tô oto tisã, ãma tãma ĩnhoprubzéb da hã.

1 Samuéu 13:13

Tawamhã Samuéu ma ãma sada'â ãne: — A hã asimiza'rese õ ne ma tô marĩ hã i'manha. Wapari õ di, Wanhib'apito 'Re ihâimana u'âsi mono te te aima i'ruzé hã. Wapari 'wa'âhã, te aré Izaraéu nhihudu norĩ ma i'rãnho'õmo na tãma 're aihâimana u'âsi za'ra mo. Asihudu norĩ zama te aré dama i'rãnho'õmo na dama 're hâimana u'âsi za'ra.