1 Samuéu 14:36 - ꞌRe Ihâimana Uꞌâsi Mono Zadawa Wasuꞌu

³⁶ Tawamhã Sau, te tite dasi'wapéi 'manharĩ'wa norĩ ma nharĩ za'ra ãne: — Filisteu norĩ wa te 'wapé za'ra da hã, bara na ã hã ẽtẽ hawimhã wa te si'ra za'ra wa'aba za. Tawamhã wa te ãma awẽ u pré za'ra wamhã, wa za uburé marĩ tãma ihâimana za'ra hã wa te duri. Tawamhã filisteu norĩ hâiba ré wa te wasiwi i'mairẽme za'ra da hã mare di za. Tawamhã ma ãma sada'âbâ za'ra ãne: — 'Manharĩ tô nimahã asima iwẽzéb zarina. Tane nherẽ, te sasedoti tãma nharĩ za'ra ãne: — Imorĩ'rata na a'â 'Re ihâimana u'âsi mono hã wa te wasiwi sadawa pibui wa'aba, marĩ wa te a'â waihu'u za'ra da.

1 Samuéu 14:36 ပူးပေါင်းရင်းမြစ်များ

Tiagu 4:8

Ma'ãpé Wamama u asimirosa'rata na 're aihutu aba mono. Tawamhã õ hã te za duré 'râwi atẽme 're simasisi 'wa. Ipo're'õ norĩ, asib'rata u're wa, 're asimisõ za'ra wa'aba mono ne, te za 'râwi aipẽ'ẽ na aiwasété na 're asiwẽ'õ za'ra wa'aba mo, aiwẽ na 're anomro aba mono da oto. Wamama ãma tô sena 're aihâimana za'ra wa'aba mono newa, tazahã tô sena ãma 're aihâimana za'ra wa'aba mono õ di. Tahawa, ma'ãpé aihâimana wasété wi 're aipizari za'ra wa'aba mono, aihâimana wẽ na ãma 're aihâimana za'ra wa'aba mono da.

Zozué 10:19

Tane nherẽ, tamemhã asimroi wa'aba tõ. Ai'aba'réi wa'aba asitob'ru zarina. Daza'u isi'ubumro norĩ 'wapé za'ra wa'aba. Apâ tite 'ri nho'õmo u si'aba'ré da hã taré 'madâ'â za'ra wa'aba tõ, Uburé Danhib'apito wate za'ra 'Re ihâimana u'âsi mono te te aima sõmri za'ra wa'aba wa, si'utõrĩ pese da hã.

Zozué 11:14

Tawamhã marĩ iwa'âbâ za'ẽtẽ norĩ na, duré 'ri nho'õmo norĩ te danhimizama na hã ma tô Izaraéu nhihudu norĩ hã uburé pese ãma ate za'ra. Tane nherẽ, ma tô uburé pese siwi da'uprosi, ni'wa hã hâiba ré hã hâimana ãna.

1 Samuéu 1:23

Tawamhã Eucana ma ãma sada'â, ãne: — Ma'ãpé 'manharĩ tô, asima iwẽzéb zarina. Tahawa, 'ri 're a'â tô iré aihâimana, aihâ te te irẽmezéb u. Duré ĩma wẽ di, Uburé Danhib'apito hã te te aipawaptob da hã, tãma ãma uwaimrami da, asimiropisudu i'manharĩzé hã. Tahawa, ma tô Ãna hã 'ri 'rep si iré hâimana, i'ra ihâ te te irẽmezéb u.

1 Samuéu 11:11

Tawamhã awẽ bâtâ na ma tô Sau hã tite dasi'wapéi 'manharĩ'wa norĩ si'ubdatõ iwa'õtõ na hã upsãtã za'ra. Tawamhã awẽ wi, ma tô amonita norĩ te te sima i'ri nhoré za'ra zéb u asisi, te te 'wapé za'ra da hã. Tahawa, ma tô abzuma u hã uprosi, tinhitob'ru norĩ hã. Duré tiwi isimani za'ra norĩ hã ma tô siwi sipé misisi robzawi te.

1 Samuéu 14:3

Tawamhã sasedoti si'uzazém na ãma 're isi'uza mono hã, Ai'asi na isisi, Aitubihi 'ra, Icabôhô 'ra wapté hã. (Icabô hã Finéaha 'ra, Erihi nhihudu. Eri hã, aré Silo ãma Wanhib'apito 'Re ihâimana u'âsi mono ma 're ihâimana mono sasedoti na hã.) Tawamhã aibâ norĩ te te siwi waihu'u õ di, 'ri nhorézém hawi Zonata iwatobrozé hã.