1 Samuéu 14:23 - ꞌRe Ihâimana Uꞌâsi Mono Zadawa Wasuꞌu

²³ Bete-Awé na romnhisi inomro nhipai u bâdâdi na ma tô duré te te 'wapéi u'âsi za'ra. Tawamhã Danhib'apito 'Re ihâimana u'âsi mono hã tô taha bâtâ na ma tô Izaraéu nhihudu norĩ ma sõmri za'ra, za te te da'ãma i'ai'uté za'ra zéb da hã.

1 Samuéu 14:23 ပူးပေါင်းရင်းမြစ်များ

Ezodu 14:30

Uburé Danhib'apito tô taha bâtâ na ezipsiu norĩ wi, Izaraéu nhihudu norĩ te te sõ'reptu za'ra wamhã, ma tô isi'utõrĩ norĩ â zaihâ na supara wa isimi'wara mono hã 'madâ'â za'ra.

Zozué 7:2

Tawamhã Zozué ma tô aibâ norĩ hã satõrĩ za'ra, Zerico hawi si'aba'ré da, Ai na 'ri nho'õmo nhisi u, Bétéu bâtâ pusizém niwĩ 're ihâimana mono niwĩ, Bete-Awé na romnhisi 'ratamhã. Ti'a te te siwi 'madâ'â da, ma tô satõrĩ za'ra. Tawamhã oto ta norĩ hã si'aba'réi wamhã, ma tô 'ri nho'u siwi waihu'u wẽ.

Zuize 2:18

Tawamhã Uburé Danhib'apito, dama i'rãnho'u te te dama 're sõmri za'ra mono sidâpâsi, ma tô te te 're pawaptob za'ra. Duré dama i'rãnho'u we 're hâimana za'ra mono sidâpâsi, ma tô Uburé Danhib'apito, danhitob'ru norĩ wi hã te te 're da'anho'reptu. E marĩ wa, Izaraéu nhihudu norĩ ãma 're siwamri mono wa, te te 're irobzépata za'ra mono zém na hã, duré iwada'uri pese na da te 're iwati za'ra mono zém na.

1 Samuéu 10:19

Wa hã asib'apito za'ra wa'wa. Ĩwétési wa marĩ wi hã te 're asõ'reptu za'ra wa'wa, duré ropire hawimhã. Tane nherẽ, ãhã na hã ma tô asiwi ĩwẽ'õ wa'wa. Duré ma tô asiwi iwaptẽrẽ 'wa, apito hã te aima 'maipisutu za'ra wa'aba da hã. Wẽ di tô. Tahawa, ma'ãpé asi'rã'õtõ aba ĩnho're, aihi'rata norĩ nhihudu mono bâ duré aimama norĩ zarina ai'upsãtã aba mono bâ.”

1 Samuéu 13:5

Tawamhã filisteu norĩ hã ma tô duré si'rã'õtõ, Izaraéu nhihudu norĩ te te isahu da hã. Tahawa, ite za'ra 30 miu na wedewara zapore na dasi'wapézé hã duré 6 miu na awaru na da'wapéi'wa norĩ hã. Duré ahâ uptabi di dasi'wapéi 'manharĩ'wa norĩ hã â zaihâ na supara 'ré 're ihâimana za'ra mono ne. Tawamhã ma tô oto ai'aba'ré Mitima u, Bete-Awé na 'ri nho'õmo nhisi bâtâ pusizém niwĩ. Tame ma tô sima 'ri nhoré za'ra.

1 Samuéu 9:16

— Awẽmhã tô ãne bâtâ na wa za we aibâ hã atẽme satõ, Bẽzamihĩ nhihudu hã. Tawamhã a hã te za i'rãti za ĩnhib'a'uwẽ Izaraéu nhihudu norĩ te, i'rãnho'õmo da hã. Duré ta hã te za Izaraéu nhihudu norĩ hã anho'reptu, filisteu norĩ nhiptetezé wi hã. E marĩ wa. Wa hã wa tô te 're 'madâ'â, ĩnhib'a'uwẽ te te 're irobzépata za'ra mono zé hã. Duré wa tô te 're wapari za'ra, te 're pawaptob za'ra mono da, te te ĩwi 're irowaptẽrẽ za'ra mono zé hã.