1 Samuéu 13:6 - ꞌRe Ihâimana Uꞌâsi Mono Zadawa Wasuꞌu

⁶ Tawamhã Izaraéu nhihudu norĩ ma tô sina waihu'u za'ra, dapusizéb da iwaihu'u'õ na hã, duré tãma iromnhimimnhasi za'ra zé hã. Tahawa, ma tô ni'wam norĩ hã aima'uri za'ra ẽtẽ 'rãihâ zahâpâ ẽtẽ're 're, duré ab're 're. Duré ni'wam norĩ hã, ma tô aima'uri za'ra ẽtẽ nhi'riti 're ab're wa, duré ẽtẽ na ab're 're, duré â zô ab're 're.

1 Samuéu 13:6 ပူးပေါင်းရင်းမြစ်များ

Filipu 1:23

Ĩnhimirosa'rada hã maparane te 're si'wapé zahuré, ĩpẽ'ẽ 'remhã. Ti'ai ãma 're ĩmorĩzé hã te rẽme da hã, wa ĩsima te 're wẽ tô, Cristuhu siré 're ĩhâimana mono da oto, hâiwa ãma. Ãne wamhã, ĩma 're rowẽ uptabi mono di aré, ti'ai ãma 're ĩhâimana mono zém nhipai u hã.

Hebreu 11:38

Ta norĩ hã hâiwi si ma tô 're nomro a'ubuni wi, ẽtẽ 'rãihâ u zama. Duré ẽtẽ 'rãihâ zahâpâ ẽtẽ're wa, ma tô duré dawi 're si'ubumro, ab're wab zama. Ta norĩ si ma tô 'Re ihâimana u'âsi mono ma 're hâimana wẽ za'ra.

Zozué 8:20

Tawamhã Ai ãma aibâ norĩ siwa'rãmi te te rob'madâ'â za'ra wamhã, ma tô hâiwa u unhama nhizé isi'réi mono hã siwi 'madâ. Tane nherẽ, nima niwĩ sisa'rei waihu'u mono õ di. E marĩ wa. Izaraéu nhihudu norĩ, a'ubuni wi supara 'ré si ro 're isa'wari mono u tãma isisa'rei mono hã apâ sitẽmeb za'ra hã sô sito mono wa, te te i'wapé za'ra da hã siwi.

Zuize 10:9

Tawamhã amonita norĩ zama ma tô panho'u Zodã pa â na hã saprĩ za'ra, Zudaha nhihudu norĩ, Bẽzamihĩ nhihudu norĩ, duré Efraĩ nhihudu norĩ, te te 'wapé za'ra da hã. Ãne ma tô Izaraéu nhihudu norĩ te te 're irobzépata za'ẽtẽ za'ra mono zém na hã 're hâimana za'ra.

Zuize 20:41

Tawamhã Izaraéu nhihudu norĩ apâ te te sina siri za'ra wamhã, ma tô Bẽzamihĩ nhihudu norĩ hã tãma tipẽ'ẽwara pese za'ra, za ropire tãma ihâimana za'ra zé hã te te sina waihu'u siromo za'ra wa.

Zuize 6:2

Tahawa Izaraéu nhihudu norĩ, ma tô midiãnita norĩ wi aima'uri za'ra, ẽtẽ 'rãihâ zahâpâ ab're ãma, duré nima niwĩ ẽtẽ nhi'ridi ihâimana za'ra ãma, tãma romnhimimnhasi za'ra ãna hâimana za'ra da, midiãnita norĩ hã tãma siptete za'ra wa.

1 Samuéu 13:15

Tawamhã Samuéu ma tô oto watobro Gilga hawi, morĩ da oto. Tahawa, Sau a'uwẽ norĩ siré Gilga hawimhã ma tô mo, Bẽzamihĩ nhihudu norĩ nhipti'ai 're tite dasi'wapéi 'manharĩ'wa norĩ tẽme Zibea u morĩ da. Tawamhã tame ma tô tite dasi'wapéi 'manharĩ'wa norĩ hã aza'rata. Tawamhã ma tô aibâ norĩ uburé hã watobro 600 na.

1 Samuéu 14:11

Tawamhã sõ'awi ma tô oto tineb zahuré, filisteu norĩ te te siwi 'madâ'â za'ra da hã. Tawamhã ãne te sima 'mahârâ za'ra, te te siwi 'madâ'â za'ra wamhã: — Ma'ãpé asiwi 'madâ'â aba! Ni'wam norĩ hebreu norĩ hã ma tô tipusi zahuré, ab're wa isima'uri za'ra zém hawi.

1 Samuéu 14:22

Tawamhã Izaraéu nhihudu norĩ, Efraĩ na romnhisi ãma ẽne ihâimana ãma isima'uri za'ra zama, ma tô filisteu norĩ pahi te siwa'ru dawi isisa'rei mono zé hã waihu'u za'ra. Tahawa, apâ sada si'rã'õtõ pari wamhã, ma tô Filisteu hã bâdâdi na te te 'wapéi u'âsi za'ra.

1 Samuéu 23:19

Tawamhã ni'wam norĩ hã Zipe na romnhisi ãma 're ihâimana za'ra mono norĩ hã ma tô 'mane Zibea u hã. Tawamhã ta norĩ hã ma tô Sauhu ma hã 'mairowasu'u ãne: — Dawi hã ma tô aima'u, wanhipti'a za'ra Horeza ãma, Haquira na ẽtẽ nhisi ãma, Zézimo na romnhisi ãma, hâiwa nhimi'e niwĩ.

1 Samuéu 24:3

Tawamhã Sau, ma tô oto wi ẽtẽ zahâpâ ab're 'rata, pone'ẽrebâ 'wawi wa'ra u hã bâdâdi 'ratamhã. Tawamhã tame tisai 'rada te te sa'wari da hã ma tô ãzé. Tahawa, te Dawi norĩ hã tô tame ab're 're tihâimana za'ra, ab're wa'wa u pese.

1 Samuéu 31:7

Tawamhã Izaraéu nhihudu norĩ Zezereu na ẽtẽ siwa'aba nhisi zara niwĩ 're ihâimana za'ra mono norĩ hã, duré panho'u Zodã pa zara niwĩ bâtâ pusizém niwĩ 're ihâimana za'ra mono norĩ zama, ma tô Izaraéu nhihudu norĩ dasi'wapéi 'manharĩ'wa isimani za'ra na hã waihu'u za'ra, duré Sau norĩ ti'ra norĩ me idâ'â za'ra na hã. Tahawa, ma tô tite za'ra 'ri'ahâ hã siwi tirẽ. Tawamhã ma tô filisteu norĩ hã itẽme zâmo, 'ri'ahâ wa iwa 're hâimana za'ra mono da.

1 Samuéu 7:7

Tawamhã Mispa ãma Izaraéu nhihudu norĩ isi'rã'õtõzém na filisteu norĩ te te waihu'u za'ra wamhã, ma tô imrotõ na dama i'rãnho'õmo norĩ hã wairé, tinhib'a'uwẽ norĩ ré te te 'wapé za'ra da hã. Tawamhã ãne hã Izaraéu nhihudu norĩ te te waihu'u za'ra wamhã, ma tô tãma tipahi za'ra, iwasu'u za'ra ma hã.