1 Samuéu 13:14 - ꞌRe Ihâimana Uꞌâsi Mono Zadawa Wasuꞌu

¹⁴ Tazahã, ãhã na a hã dama i'rãnho'õmo na 're aihâimana mono na ãma uzusi õ di za. E marĩ wa. A hã wapari õ wa, Wanhib'apito te te aima i'ruzé hã. Tahawa, te za aibâ zô, rĩtĩ te te 'mazabu da, te te sima iwẽzéb zarina te te pisutu da Izaraéu nhihudu norĩ ma isi'apito da hã.

1 Samuéu 13:14 ပူးပေါင်းရင်းမြစ်များ

Salmu 78:70

Tawamhã 'Re ihâimana u'âsi mono, ma tô Dawi tãma 're iromhuri mono 'wa hã pisutu. Ma tô pone'ẽrebâ 'wawi wa'ra hawimhã waze,

Provébiu 27:24

E marĩ wa. Danhimarĩ za'ẽne hã duré apito si'uirĩ na ti'ra ma, da'madâ'âzép te tinhoprezé nhomrizé hã õne u'â dama 're hâimana za'ra mono õ na dâ'âsina.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:22

Tawamhã te te oto 're da'uwati mono tõ da, ma tô waze, 'Re ihâimana u'âsi mono hã. Isa'u hã ma tô Dawi hã dama hâiba nho, da'uwati'wa da oto. Ta hã ma tô duré wẽsã oto. Ãne te te iwẽsãmrizé hã: “Dawi hã Zéséhé 'ra ĩma wẽ di. Ĩnhimiroti te te ãma uwaimrami da, te za te te 're ĩwapari u'âsi.” Ãne ma tô Dawi hã wẽsã, 'Re ihâimana u'âsi mono hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:46

Tawamhã Dawi hã ma tô tiprédu. Prédu wamhã, 'Re ihâimana u'âsi mono hã ma tô wẽsã. Tahawa, Dawi hã ma tô tiwi waptẽ, 'ri ité hã te te tãma sãrĩ da, iwa 're isãmra mono zéb da hã. Ãne te tiwi waptẽ: “E te za ĩma i'ru, 'ri ité, te aima sãrĩ da hã. A hã 'Re ihâimana u'âsi mono, Zacoho nhib'apito. Tahawa, wa ĩsima wẽ, 'ri hã te aima sãrĩ da.” Ãne ma tô tiwi waptẽ, 'Re ihâimana u'âsi mono wi. Tane nherẽ, Dawi hã te te tãma 'ri õ di. I'ra si, ma tô tãma 'ri, Saloma hã tipoto'wa uirĩ na si.

Hebreu 2:10

'Re ihâimana u'âsi mono hã ma tô uburé te te ro'apoto. Taha ma si te uburé marĩ hã tãma 're hâimana. Ta hã tô ibâ, ma ti'ra hã pisutu Zezusi hã, dazada dâ'â wa, te te robzépata da a'â, taha zarina te te 're da'anho'reptui mono da, te te sina uwaimrami da, 'Re ihâimana u'âsi mono te te tãma ipisutuzéb zarina. Da'ahâ na hâiwa ãma rowẽ uptabi na i'rata 're danomro u'âsi mono da, ma tô ãne da hã tãma pisutu, 'Re ihâimana u'âsi mono hã.

1 Samuéu 15:23

Wanhib'apito wi tiwi 're idasipizari za'ra mono hã pire uptabi di, aiwa simi'â na da te 're iromhuri za'ra mono ne. Duré 'râwi 're idasi'madâ'â ze za'ra mono hã tô dawasédé, romhâibarĩ na 're idawata za'ra mono zém ne. Tahawa, ma tô Wanhib'apito siwi aiwẽ'õ. E marĩ wa. Aima isimirotizé hã, asiwi wẽ'õ wa, a hã.

1 Samuéu 15:26

Tawamhã Samuéu ma ãma tãma wa'rã ãne: — Ãma asiré ĩmorĩ õ di za. A hã ma tô iwẽ'õ Wanhib'apito 'Re ihâimana u'âsi mono te te aima irotizé hã. Taha zarina, ma tô duré aiwẽ'õ, Izaraéu nhihudu norĩ nhib'apito na i'aihâimanazém na hã.

1 Samuéu 15:28

Tawamhã Samuéu te duré tinha ãne: — Ã bâtâ na ma tô 'Re ihâimana u'âsi mono hã aiwi hâiwazu, Izaraéu nhihudu norĩ 'madâ'âzé hã. Tahawa, ma tô oto tisõ, asipai u iwẽ ma, Izaraéu nhihudu norĩ nhib'ihâ'a da ma.

1 Samuéu 16:1

Tawamhã Uburé Danhib'apito te Samuéu ma tinha ãne: — E momo te za Sauhu ãma aipẽ'ẽzézé hã i'rãsu. Wa hã te ĩsima wẽ zahu õ di, Izaraéu nhihudu norĩ nhib'apito na 're ihâimana mono da hã. Tahawa, ma'ãpé azeitona 'rãi wa'u hã 'masisi abazei õmo 're, asiré âri da. Taha parimhã te za aimo, Belẽ na 'ri'ahâ nhisi u aibâ Zésé na isisi nhorõwa u. E marĩ wa. Wa hã i'ra norĩ wa tô 'maipisutu, i'masi'apito da hã.

1 Samuéu 16:12

Tawamhã Zésé ma tô oto sô da'mazatõ. Ta hã ai'repudu iwẽ, ihâiba 'madâ'â ze, duré itõmo 'madâ'â ze. Tawamhã Uburé Danhib'apito te Samuéu ma tinha ãne: — Ĩhe ta hã. Ma'ãpé 'rãti'i.

1 Samuéu 2:30

Wa hã Izaraéu nhihudu norĩ te, 'Re ihâimana u'âsi mono Uburé Danhib'apito hã wa tô ropisutu duréihã aihi'rata norĩ ma hã za isihudu norĩ hã õne u'â te te ĩma 're iromhuri za'ra mono na hã sasedoti na. Tane nherẽ, ãhã na hã wa za tinha, õne u'â 're ihâimana mono õ na hã za oto. E marĩ wa. Wa hã za oto te 're da'awazé mono dâ'âsina, da te 're ĩwazéb za'ra mono norĩ hã, duré za oto te 're da'awazé mono õ dâ'âsina, da te 're ĩwazéb za'ra mono õ norĩ hã.

1 Samuéu 24:20

Tahawa, ãhã na hã tô sena wa tô waihu'u, za asi'apito da, Izaraéu nhihudu norĩ ma hã, duré za asiptete na i'rãnho'õmo na 're aihâimana mono ré 're ida'a'madâ'â mono na hã.

1 Samuéu 25:30

Wanhib'apito 'Re ihâimana u'âsi mono hã te za uburé tiha iwẽ na hã ãma aima uwaimra, te te aima iropisutuzéb zarina. Te za duré tawamhã aipisutu, Izaraéu nhihudu norĩ ma asi'apito da hã.

1 Samuéu 9:16

— Awẽmhã tô ãne bâtâ na wa za we aibâ hã atẽme satõ, Bẽzamihĩ nhihudu hã. Tawamhã a hã te za i'rãti za ĩnhib'a'uwẽ Izaraéu nhihudu norĩ te, i'rãnho'õmo da hã. Duré ta hã te za Izaraéu nhihudu norĩ hã anho'reptu, filisteu norĩ nhiptetezé wi hã. E marĩ wa. Wa hã wa tô te 're 'madâ'â, ĩnhib'a'uwẽ te te 're irobzépata za'ra mono zé hã. Duré wa tô te 're wapari za'ra, te 're pawaptob za'ra mono da, te te ĩwi 're irowaptẽrẽ za'ra mono zé hã.