1 Samuéu 11:11 - ꞌRe Ihâimana Uꞌâsi Mono Zadawa Wasuꞌu

¹¹ Tawamhã awẽ bâtâ na ma tô Sau hã tite dasi'wapéi 'manharĩ'wa norĩ si'ubdatõ iwa'õtõ na hã upsãtã za'ra. Tawamhã awẽ wi, ma tô amonita norĩ te te sima i'ri nhoré za'ra zéb u asisi, te te 'wapé za'ra da hã. Tahawa, ma tô abzuma u hã uprosi, tinhitob'ru norĩ hã. Duré tiwi isimani za'ra norĩ hã ma tô siwi sipé misisi robzawi te.

1 Samuéu 11:11 ပူးပေါင်းရင်းမြစ်များ

Zenezi 22:14

Tawamhã Abra'ã taha ẽne hã ma tô sisi, “Uburé Danhib'apito, te za marĩ ibâ na te te dama 're anhomri u'âsi”. Tahawa te ta hawim haré da te ãma 're romnhisi za'ra, ãne: “Uburé Danhib'apito, tite ẽtẽ ãma marĩ ibâ na te te dama 're i'anhomri u'âsi mono” na.

Ezodu 14:24

Tawamhã awẽ wi unhama ro'o pisutu pese hawi, duré hâiwa'a isarob'a pisutu pese hawi, ma tô Uburé Danhib'apito, ezipsiu norĩ dasi'wapéi 'manharĩ'wa hã 'madâ'â za'ra sipapara, i'rãiwaihu'u'õ te te tãma i'manharĩ za'ra zarina sitẽme siwa'ru te te iro'rahâri za'ra mono zé te te tãma 'manharĩ za'ra da.

Mateu 7:2

Asi'uihâ na asiwi 're dawẽ'õ pese za'ra wa'aba mono wamhã, taha zarina te za tô duré 'Re ihâimana u'âsi mono hã te te siwi 're aiwẽ'õ pese za'ra wa'wa, iwa'rãmi. Asiwi 're dawẽ'õ za'ra wa'aba mono õ wamhã, tawapsi, te te duré siwi 're aiwẽ'õ za'ra wa'aba mono õ di za, ãne na hã aiwa.

Tiagu 2:13

Nimahã bâtâ na dahâimanazém na te te da'awaihu'u wapsi, da'ãma 're ipẽ'ẽzé za'ra mono õ norĩ ãma, pẽ'ẽzé õ di za, 'Re ihâimana u'âsi mono hã, ti'ab ré da'ãma 're isiwamri za'ra mono õ norĩ ãma hã. Da'ãma 're ipẽ'ẽzé u'âsi za'ra mono norĩ ãma si, te za ãma 're pẽ'ẽzé za'ra.

Zuize 1:7

Ãhã wa, te Adoni-Bezequi hã tinha ãne: — Wa hã wa tô ti'ru, 70 na apito norĩ nhiptõmohi na'rata za'ra hã, duré iparadub'rã na'rata za'ra hã, da te tiwi sihâri za'ra da. Ta norĩ hã ma tô ĩte wedeza zahâpâ dasai'a'a hã te te 're waibu. Tahawa, ãhã na awa'awi na hã 'Re ihâimana u'âsi mono, ma tô ãne hã ĩma 'manha, ta norĩ ma, te 're i'ab'manharĩ mono zém ne hã. Tawamhã Adoni-Bezequi, 'rinho'u Zeruzalẽ u ma tô dasiwi saprõni ni. Tahawa, tame ma tô oto dârâ.

Zuize 4:16

Tane nherẽ, Baraqui wedewara na dasi'wapéi 'manharĩzéb zarina, duré dasi'wapéi 'manharĩ'wa norĩ zarina ma tô Harosete-Hagozĩ u te te 'rãza'õtõ pibu za'ra. Tahawa uburé Siseraha te dasi'wapéi 'manharĩ'wa norĩ hã ma tô dasiwi uprosi pese ni, sib'ézé 'wapa na. Tahawa 'masi'atarẽme õ di, ihâiba ré na hã.

Zuize 7:16

Tawamhã Gidiã, 300 na dahâiba na hã ma tô si'ubdatõ dawa'õtõ na da'ãma sipo'o. Tawamhã aibâ hâiba mono bâ ma tô danhimizama õmo na danhimnhihârâzé hã te te tãma sõmri, duré piza'a wata 'rãza'itire zé'a 'manharĩ wa, 'rãsitõ iwa ihâimana za'ra zama.

Zuize 7:20

Tawamhã si'ubdatõ dawa'õtõ norĩ, ma tô danhimnhihârâzé hã te te hãsi. Ma tô duré piza'a wata 'rãza'itire hã te te prub za'ra. Tahawa, 'rãsitõ ma tô tinhib'rata nhimi'e niwĩmhã te te tété za'ra. Duré tinhib'rata nhimire niwĩmhã, ma tô danhimnhihârâzé hã te te tété za'ra. Ãhã wa, te ãne hãsi, hârâ 'rãihâ na: “Sib'ézé 'wa pa, Uburé Danhib'apito ma, duré Gidiãhã ma!”

Zuize 9:43

Tahawa tite aibâ norĩ ãma si'ubdatõ iwa'õtõ na ãma sipo'o mono pari, ma tô simipari za'ra sina dazô si'ubumro da hã aima'uri za'ra. Tawamhã duré Abimelequi, 'ri nho'õmo hawi idawairébé na te te da'a'madâ'â wamhã, ma tô tisima'urizém hawi dazô watobro, te te da'awano'õ da.

1 Samuéu 11:2

Tawamhã apito Na'asi ma tô ãma sada'âbâ za'ra ãne: — Wa za tô aima 'manharĩ za'ra wa'wa ĩnhimiropisudu hã ãne: Aihâiba mono bâ wa'aba wa za atõmo nhimire niwĩp si atopu'u za'ra wa'wa. Tawamhã ãne wamhã, wa hã wa za uburé Izaraéu nhihudu norĩ hã ãma sisém nomri za'ra za, ĩnhimi'manharĩzém na hã.

1 Samuéu 14:47

Tawamhã Sau Izaraéu nhihudu norĩ ma si'i'rãnho'õmo parimhã, ma tô iwaptoma isitob'ru norĩ uburé 're isi'ubumroi mono norĩ hã a'wapé, Moabi na romnhisi ãma 're ihâimana za'ra mono norĩ hã, Amo na romnhisi ãma 're ihâimana za'ra mono norĩ hã, Edõ na romnhisi ãma 're ihâimana za'ra mono norĩ hã, Zoba na romnhisi ãma danhib'ihâ'a 're ihâimana za'ra mono norĩ hã, duré filisteu norĩ hã. Tawamhã ã norĩ hã te te a'wapéi mono wamhã, ma tô uburé ãma ai'uté za'ra.