1 Pedru 5:7 - ꞌRe Ihâimana Uꞌâsi Mono Zadawa Wasuꞌu

⁷ 'Re ihâimana u'âsi mono hã te te 're ai'madâ'â wẽ za'ra wa'wa. Tahawa, marĩ na 're aihâtâ'â za'ra wa'aba mono wamhã, te za tãma 're asiwasu'u za'ra wa'aba mo, 're i'aihâtâ'â za'ra wa'aba mono zém na. Taha parimhã, ãma 're rosa'rata za'ra wa'aba mono õ di za oto.

1 Pedru 5:7 ပူးပေါင်းရင်းမြစ်များ

Salmu 34:15

'Re ihâimana u'âsi mono hã te sena na 're ihâimana za'ra mono norĩ hã te te 're ab'madâ'â pese. Te duré te te tiwi 're irowaptẽrẽ za'ra mono zé hã te te 're awapari.

Salmu 40:17

Wa hã ĩnhimarĩ'õ, duré marĩ zô ĩwi 're irowaptâ'â mono. Tane nherẽ, a hã Uburé Danhib'apito, ma tô ĩ'ãma 're aihâtâ'â mo. A hã 're ĩpawapto mono 'wa, duré ĩma marĩ nhiwasi'wa. Ĩte 'Re ihâimana u'âsi mono, asimipawaptobzéb zô hã rowaptâ'â hâ tõ!

Provébiu 16:3

Ma'ãpé 'Re ihâimana u'âsi mono wi, asimirowa'õtõ na iwẽ na te te 're aipawapto mono da, tiwi 're waptẽrẽ mono. Tawamhã iwẽ na te za tô asimirowa'õno hã aima 're hâimana.

Mateu 6:27

Sire zawi nhipai u, tãma asawi uptabi za'ra wa'aba di. Tahawa, sire te te 're i'ab'madâ'â mono zém nhipai u, te za te te 're ai'madâ'â pese za'ra wa'wa, Aimama 'wa hã, asina 're aihâtâ'â za'ra wa'aba mono ãna 're aihâimana za'ra wa'aba mono da. Duré asina 're aihâtâ'â za'ra wa'aba mono wamhã, e asibâtâ na 're atâ'â za'ra wa'aba mono õ di za. E asibâtâ nhipai u, te za 're aihâimana siroptub za'ra wa'aba mo. Mare di. Asina 're aihâtâ'â za'ra wa'aba mono zéb zarina, asibâtâ nhipai u 're aihâimana siroptub za'ra wa'aba mono õ di za.

Mateu 6:28

— E marĩ wa, te bété ai'uza za'ra wa'aba zém na asina hã 're aihâtâ'â za'ra wa'aba mo. E asina 're aihâtâ'â za'ra wa'aba mono zéb zarina, te za rowẽ na 're aihâimana za'ra wa'aba mo. Mare di. Ma'ãpé, romnhirãrã 're ihâimana za'ra mono zém na rosa'rata za'ra wa'aba, rom na 're isimasa mono na hã. Ta norĩ hã ti'uzazéb da hã, te te sisada 're 'manharĩ za'ra mono da, te te 're romhuri za'ra mono õ di.

Mateu 6:31

Aimama 'wa hã hâiwa ãma 're isãmra mono ma hã, tãma aiwaihu'u pese za'ra wa'aba di, marĩ zô aiwi 're irowaptâ'â za'ra wa'aba mono zém na hã. Tahawa, marĩ na asina 're aihâtâ'â za'ra wa'aba mono õ di za. Ãté asina 're aihâtâ'â za'ra wa'aba mono wa, te za ãne asima 're irosa'rata za'ra wa'aba mono zéb zarina, ãne asima 're inharĩ za'ra wa'aba mo: “E ma hawi te za mra hã wama 're wairébé, duré wa te 're i'âhuri mono zéb da hã, duré wa'uzazéb da hã.” Ãne na asima 're rosa'rata za'ra wa'aba mono õ di za. 'Re ihâimana u'âsi mono waihu'u'õ'wa norĩ hã, taha zô si te sima 're sõpré, sina 're hâtâ'â za'ra mono na 're hâimana za'ra mono wa, ta norĩ hã.

Marcu 4:38

Tane nherẽ, te Zezusi hã nhono, uba're na're ãma. Da'rã zaparizém na te 'rã zapa. Tahawa, ma tô siwi utu. Ãne te oto siwi 'mahâ: — Rowahutu'wa, wa za ai'utõrĩ ni. E wa'ãma aipẽ'ẽzé za'ra õ di za.

Luca 12:22

Tawamhã Zezusi te tinha, tisiré 're inomro mono norĩ ma, ãne: — Tahawa, wa za duré ãne aima waihu'u za'ra wa'wa. Marĩ na 're aihâtâ'â za'ra wa'aba mono õ di za. Asazéb za'ra wa'aba na asina 're aihâtâ'â za'ra wa'aba mono õ di za. Duré, ai'uza õ na zama asina 're aihâtâ'â za'ra wa'aba mono õ di za.

Zuwã 10:13

E marĩ wa, te za tiwi wara, romhuri'wa hã. Itede'wai õ wa, duré te te 're azawi pese mono õ wa.

Filipu 4:6

Marĩ na 're aihâtâ'â za'ra wa'aba mono ãna, te za oto 're aihâimana za'ra wa'aba mo. 'Re ihâimana u'âsi mono ma, 're aimreme zusi aba mono zép sidâpâsi, te za duré tiwi 're irowaptẽrẽ za'ra wa'aba mo, uburé marĩ zô aiwi 're irowaptâ'â za'ra wa'aba mono zém na hã. Aipẽ'ẽ 're, ãma 're aiwata za'ra wa'aba mono sina, te za asi'ãma duré tãma 're aimreme zusi aba mo.

1 Samuéu 30:6

Tawamhã Dawihi ma hã ropire uptabi di. E marĩ wa. Ite aibâ norĩ hã 'ra ãna oto hâimana za'ra wa, ma te oto isé pire hã sô tiwatobro za'ra. Tahawa, Dawi hã ẽtẽ na te te siwi wĩrĩ da te ãma sima robzanhamri pibu za'ra. Tane nherẽ, ma tô Uburé Danhib'apito ite 'Re ihâimana u'âsi mono nhimipawaptobzém na hã ipẽ'ẽ 'remhã aptete.