1 Pedru 4:10 - ꞌRe Ihâimana Uꞌâsi Mono Zadawa Wasuꞌu

¹⁰ 'Re ihâimana u'âsi mono hã sõpru wa, ma tô aihâiba mono bâ dama 're iromhuri za'ra wa'aba mono zéb da hã, aima sõmri za'ra wa'wa, sipu'u pese na. Taha zarina te za oto ate aba mono bâ dama ãma 're i'uwaimrami za'ra wa'aba mo, asimiromhuri za'ra wa'aba na hã.

1 Pedru 4:10 ပူးပေါင်းရင်းမြစ်များ

Mateu 20:28

Tane duré, ti'ai ãma Dasiré Ipodo hã da te tãma 're romhuri za'ra mono da, we morĩ õ di, ti'ai u. Te te 're da'apawapto mono da si, te we datẽme mo, sihâiba zawi ãna dazada dâ'â da, da'upana te te da'awa'âbâ da.

Mateu 24:14

'Re ihâimana u'âsi mono, da'ãma 're isib'a'uwẽ mono zé wasu'u hã iwẽ uptabi hã, ĩzazei'wa norĩ hã te za daro mono bâ te te dama 're wasu'u za'ra, daro mono bâ da te oto 're wapari za'ra mono da, da te ãma 're isaze za'ra mono zéb da hã. Tame te za oto tirob'rãsutu.

Mateu 24:21

Rowasédé hã oto dazô 're wairébé mono wamhã, te za oto da te 're robzépata za'ẽtẽ za'ra. 'Re ihâimana u'âsi mono te te i'aropoto na'rata mono zém hawimhã, ãne na hã da te 're robzépata za'ẽtẽ uptabi za'ra mono õ di. Duré tane nherẽ niwamhã ãne na hã da te 're robzépata zahu za'ra mono õ di za.

Mateu 24:45

Tawamhã Zezusi te duré tãma ãma romnhimiré'é za'ra, ãne: — Dama romhuri'wa i'umnha hã duré isimiroti wẽ hã, e niha 're ihâimana mono zé hã. Ãne hã 're hâimana mono wamhã, te za isib'apito hã nimomo tiwi morĩ õ ré, tãma pisutu, uburé tãma iromhuri'wa norĩ hã isa'u nherẽ, te te sô 'madâ'â pese za'ra da. Te za duré tãma roti, bâtâ pisutu zéb zarina isa za'ra zé hã te te ãma tãma uwaimrami za'ra da, tãma iromhuri'wa norĩ ma.

Mateu 25:17

Tane duré tãma iromhuri'wa hã 2 miu na rob'uiprazé isapotore te te i'âri ma hã ma tô duré tãma sina hâ. Tawamhã 2 miu na nherẽ, ma tô duré 2 miu na tãma ihâimana amo na ãma ato. Uburé hã oto tawamhã duré 4 miu na ihâiba hã oto.

Mateu 25:44

— Tawamhã ta norĩ hã te za asa tãma nharĩ za'ra, ãne: “Apito, e niwa wa tô taré wa te 're ai'madâ'â za'ra, mram na 're aihâimana mono ré hã, duré 'rubu 're sépata mono ré hã, duré wama aiwaihu'u õ nherẽ, nima hawi watẽme 're aimasisi mono na hã, duré ai'uza ãna 're aimorĩ ré hã, duré aihâzé na 're aihâimana mono ré hã, duré dazazéb 're, 're asa mono ré hã. E niwa wa tô ãne na hã taré wa te 're ai'madâ'â za'ra, wa te wasiwi 're aipawaptob za'ra mono ãna.” Ãne te za duré ta norĩ hã isadanharĩ na tãma ãma wa'rãmi za'ra, isimi'e niwĩ isimasam norĩ hã.

Marcu 10:45

Tane duré, ti'ai Dasiré Ipodo hã da te tãma 're romhuri za'ra mono da, we morĩ õ di, ti'ai u hã. Te te 're da'apawapto mono da si, te we datẽme mo, sihâiba zawi ãna dazada dâ'â da, da'upana te te da'awa'âbâ da.

Luca 12:42

Tahawa, te Wanhib'apito hã asa ãma romnhimiré'é, Zezusi hã ãne: — Dama romhuri'wa i'umnha hã duré isimiroti wẽ hã, e niha 're ihâimana mono zé hã. Ãne hã 're hâimana mono wamhã, te za isib'apito hã nimomo tiwi morĩ õ ré, tãma pisutu, uburé tãma iromhuri'wa norĩ hã isa'u nherẽ, te te sô 'madâ'â za'ra da. Te za duré tãma pisutu, bâtâ pisutuzém na isazéb da hã, te te tãma ãma uwaimrami za'ra da, tãma iromhuri'wa norĩ ma.

Luca 19:13

Tahawa, te morĩ õ ré, sitẽme sô tihârâ za'ra, tãma iromhuri'wa norĩ zô, 10 na ihâiba za'ra norĩ zô. Misi si, ma tô te te tãma sõmri, rob'uiprazé isapotore hã, ẽtẽ waipo pré oru 'manharĩ hã. Tawamhã te ãne tãma 'ru za'ra: “Marĩ hã te za 're i'manharĩ za'ra wa'aba mo, rob'uiprazém na ãma atob za'ra wa'aba da, apâ we ĩmorĩ õ ré.” Taha pari, te oto tiwi timorĩ za'ra.

Luca 8:3

Duré, Zuãna na pi'õ nhisi hã. Cuzaha mro hã, apito Erodihi ma romhuri'wai mro hã. Duré, Suzana na pi'õ nhisi hã. Aimawi norĩ hã te duré isiré 're nomro, pi'õ norĩ hã, ahâ na. Ta norĩ hã tinhimarĩ na, te Zezusi norĩ hã te te 're pawaptob za'ra.

Roma 15:25

Tane nherẽ, wa za a'â Zeruzalẽ u si mo, ã awa'awi hã, tame 'Re ihâimana u'âsi mono nhib'a'uwẽ 're isi'ubumroi mono norĩ hã te duré pawaptob za'ra da a'â.

Roma 15:27

Ta norĩ hã zudeu'õ isazei'wa norĩ hã si'uihâ na ma tô sima pisutu za'ra, te te siwi ãma ipawaptob za'ra zéb da hã, zudeu norĩ hã. Ãne hã tô i'uwaibaba ma tô siwi ãma pawaptob za'ra. E marĩ wa. Duréihã zudeu norĩ ma, ma tô 'Re ihâimana u'âsi mono hã tiwasu'uwẽ na tãma siwaihu'u na'rata za'ra, tipẽ'ẽ na robzei u'âsi ãma 're nomro mono da. Taha na ma tô zudeu'õ norĩ hã te te siwi ãma 're pawaptob za'ra iwasu'uwẽ na, aiwapsi oto õhõ ãma si 're hâimana za'ra mono da. Ãne wa'rãmi, te za tô zudeu'õ norĩ hã tinhimarĩ na te te siwi 're pawaptob za'ra, zudeu norĩ hã, tô isarina si.

1 Corĩtu 15:10

Tane nherẽ, 'Re ihâimana u'âsi mono hã tinhimizawi pese zéb zarina si, ma tô ĩma tinhopru, tô õhõ na si dama 're ĩhâimana mono da oto, Cristuhu zadawa wasu'u'wa na. E tawamhã, taré ma tô ĩma tinhopru, 'Re ihâimana u'âsi mono hã. Mare di. Wa tô te ĩsina tãma 're uwaimrami u'âsi. Uburé ĩsiré Cristuhu zadawa wasu'u'wa norĩ hã, wa tô romhuri na te 're 'rãnhipai u'âsi za'ra. Tane nherẽ, ĩsi'uihâ na te dama 're romhuri mono õ di. 'Re ihâimana u'âsi mono si, ma tô te te 're ĩpawapto, ãne na te dama 're romhuri mono da, ĩma isõprubzéb zarina si.

1 Corĩtu 3:10

'Ri na romhuri'wa norĩ hã 'ri na'rata uimrehẽne, te za siwi 'manha, sipese na. Tane duré wa hã, ĩnhimiromhuri wẽ na, wa tô sãna'rata, te aima 're irowasu'u za'ra wa'aba mono na hã, Cristuhu wasu'uwẽ na, 'Re ihâimana u'âsi mono, tiwaihu'u pese na te te oto 're ĩpawapto mono zéb zarina. Duré 'ri na'rada hã da te dasiwi 'manharĩ pari, ihâiba amo 'ri'wa norĩ isisiwi te te oto siwi i'ri ne, tane te duré ni'wam norĩ hã te te aima ãma 're rowasu'u za'ra wa'wa, ĩza'u hã. 'Ri na'rata 'manharĩ nhisiwi, da te dasiwi 'ri wamhã, pibui pese na te za dasiwi 'ri ni, marĩ iwẽ na si hã oto. Tane ni'wam norĩ hã Cristuhu wasu'uwẽ na te te dama 're rowasu'u za'ra mono wamhã, pibui pese na te za oto te te dama ãma 're rowasu'u za'ra, i'uwaibaba si.

1 Corĩtu 4:7

E asiré norĩ nhipai u 're aihâimana pire za'ra wa'aba mono bâ, te bété ãne na 're asi'madâ'â ze za'ra wa'aba mo. E marĩ te aré aima 're hâimana za'ra wa'wa, 'Re ihâimana u'âsi mono te te aima 're sõmri za'ra wa'aba mono õ 'wa'âhã. Marĩ iwẽ hã aima 're hâimana za'ra wa'aba mono õ di aré. Uburé iwẽ hã 'Re ihâimana u'âsi mono nhoprubzéb si, te oto aima 're hâimana za'ra wa'wa. E marĩ wa, te bété asina 're aiwata za'ra wa'aba mo, uburé marĩ iwẽ hã aima 're ihâimana za'ra wa'aba mono hã, 'Re ihâimana u'âsi mono nhoprubzéb õ newa, aihawim na aima 're wairébé aba mono newa.

2 Corĩtu 6:1

Wa norĩ hã 'Re ihâimana u'âsi mono siré, wa te tãma 're iromhuri za'ra mono norĩ hã, wa za oto aima ãma roti pese za'ra wa'aba ni. 'Re ihâimana u'âsi mono, ma tô tinhimizawi pese zéb zarina, aima 're sõprub za'ra wa'wa, iwẽ na hã. Tahawa, isazei'wa na taré dama 're asiwasu'u za'ra wa'aba mono õ di za. 'Re aihâimana za'ra wa'aba mono zém na, te za asa iwa'rãmi asina tãma 're i'uwaimrami u'âsi za'ra wa'aba mo, 'Re ihâimana u'âsi mono ma hã.

2 Corĩtu 9:1

E wa hã wa za ãne na aima ãma roti na sahu za'ra wa'wa, ĩnhimi'ui'éré na hã, Zudéa na danhipti'a nho'õmo nhisi ãma 'Re ihâimana u'âsi mono nhib'a'uwẽ norĩ ma, asõprub za'ra wa'aba da, dame. Mare di. Ãne na, te aima ãma roti na sahu za'ra wa'aba õ di za, ãhã na hã.

Éfézu 3:8

Ĩwana isazei'wa norĩ hã ĩwẽ na te sipa za'ra õ di. Ta norĩ si ma tô tiwẽ na ĩnhipa za'ra. Tane nherẽ, ma tô ĩpisutu, zudeu'õ norĩ ma te tãma 're wasu'u za'ra mono da, iwẽ hã sa'ẽtẽ na Cristuhu ma 're ihâimana mono hã dama ãma 're isõpru mono zéb da hã.

Éfézu 4:11

Cristu hã ma tô ni'wam norĩ hã pisutu za'ra, isadawa wasu'u'wa 're nomro mono da. Ni'wam norĩ ma, ma tô duré pisutu za'ra, marĩ te te tãma iwaihu'u za'ra zéb zarina, 'Re ihâimana u'âsi mono te te 're sadawa wasu'u za'ra mono da, isazei'wa norĩ ma. Duré ni'wam norĩ hã ma tô pisutu za'ra, iwasu'uwẽ na te te 're dapo're pu'u za'ra mono da. Duré ni'wam norĩ hã ma tô pisutu za'ra, dama rowahutu'wa da, isimiroti na te te 're dapawaptob za'ra mono da, ãma 're dahâimana wẽ za'ra mono da.

2 Timotiu 1:18

Ãne wa, wa ĩsima wẽ, Wanhib'apito hã iwẽ na te te ãma tãma uwaimrami da, bâdâ iwa tãma waptã'ã wa, dahâimanazém na te te ida'awaihu'uzéb da hã. Onesifuru hã ma tô marĩ mono bâ nasi ĩpawapto, Éfézu ãma 're ĩhâimana mono ré hã. Ãne na hã aima waihu'u pese di.

Titu 1:7

Da'madâ'â'wa norĩ hã te za dama 're hâimana wẽ za'ra, 're nomro wasété mono wa, da te dasiwi 're wẽ'õ tõ za'ra mono da. 'Re ihâimana u'âsi mono ma, te te 're da'madâ'â za'ra mono wa, dama 're hâimana wẽ za'ra mono di za. Ãne te za 're nomro, da'madâ'â'wa norĩ hã. Dama pire wẽ te, 'râwi sina 're wata za'ra mono õ di za. Duré hâimana nhiti'ru na 're hâimana za'ra mono õ di za. Duré âzézei'wa na 're nomro mono õ di za. Duré sahi wa, te te 're dahâ za'ra mono õ di za. Duré sadawa nhipese na te te dama 're rob'rãmi za'ra mono õ di za.

Hebreu 6:10

'Re ihâimana u'âsi mono hã taré te te dama 're aropisutu mono õ di. I'uwaibaba si te uburé marĩ hã te te dama 're ab'manharĩ, te te dawi ãma 're a'upai mono ãna. Tahawa, tãma 're iromhuri za'ra wa'aba mono zém na hã ãma 're po're si'âri waihu'u mono õ di za. Isib'a'uwẽ norĩ hã tãma 're ipawaptob za'ra wa'aba mono zém na hã, duré tãma 're isawi pese za'ra wa'aba mono zém na hã, ãma po're si'âri waihu'u õ di za. Te za tô ãma 're sipo're pu'u u'âsi, ta norĩ ãma hã.

1 Pedru 5:10

Tane nherẽ, 're robzépata hâ za'ra wa'aba mono õ ré, rowẽzé hã te za te te aima ãma 're a'uwaimrami 'wa, 'Re ihâimana u'âsi mono hã. Taha si te za te te 're asiptete u'âsi za'ra wa'wa, tiwaihu'u pese na, asiptete u'âsi ãma 're aihâimana za'ra wa'aba mono da. Õhõ ma si te isimizawizé hã sa'ẽtẽ na tãma 're hâimana. Tahawa, ma tô sitẽme asô tihârâ za'ra wa'wa, rowẽ isi'utõrĩ'õ ãma isiré 're aihâimana u'âsi za'ra wa'aba mono da, Cristuhu nhib'a'uwẽ oto 're anomro aba mono wa.

1 Pedru 5:12

Sila hã ma tô ĩpawapto, aima ĩnhimiroti suru za'ra wa'aba nherẽ, te te aima rob'ui'éré za'ra wa'aba da. Ta hã ĩsisãnawã ne, te ĩma 're hâimana. Tahawa, ĩma umnhasi di. Wa hã wa tô ĩsima aiwẽ za'ra wa'wa, ĩnhimiroti na te aipawaptob za'ra wa'aba da, Wanhib'apito ãma si asiptete sina 're anomro aba mono da, 'Re ihâimana u'âsi mono nhimipawaptobzé hã asi'uihâ na asina 're waihu'u za'ra wa'aba mono da. Taha wasu'u na si, wa tô te aima 're rowasu'u za'ra wa'wa, tô sena wa ta hã. Tahawa, te te 're aipawapto wẽ za'ra wa'aba mono wa, te za asiptete sina ãma 're anomro aba mo.