1 Pedru 3:7 - ꞌRe Ihâimana Uꞌâsi Mono Zadawa Wasuꞌu

⁷ Duré aibâ norĩ, aimro siré te oto 're aihâimana za'ra wa'aba mo. A norĩ wa'wa hã aibâ wa, aihâiba hã siptete za'ra wa'aba di, aimro hâiba za'ra wa'aba ma hã. Ãne hã te za asina iwaihu'u za'ra wa'wa. Tahawa, te za aimro ma 're aihâimana wẽ za'ra wa'aba mo. Rowẽ isi'utõrĩ'õ hã te za 'Re ihâimana u'âsi mono hã aima sõmri za'ra wa'wa, hâiwa ãma. Aimro norĩ wa'aba ma zama, te za duré tô tãma sõmri za'ra. Tahawa, te za aimro ma 're aihâimana wẽ za'ra wa'aba mo. Tawamhã 'Re ihâimana u'âsi mono ma, asiré 're aimreme zusi aba mono wamhã, te za te te 're ai'awapari 'wa, Wamama hã.

1 Pedru 3:7 ပူးပေါင်းရင်းမြစ်များ

Mateu 18:19

— Ãne wa za duré tô sena aima waihu'u za'ra wa'wa. Ni'wam norĩ hã maparane na aihâiba nherẽ, marĩ na ti'ai ãma 're asisaze za'ra wa'aba mono wamhã, Ĩmama wi 're irowaptẽrẽ za'ra wa'aba mono zéb uwaibaba, te za tô te te aima ãma 're a'uwaimrami 'wa, hâiwa ãma 're isãmra mono hã.

1 Corĩtu 7:3

Aibâ norĩ hã pi'õ na oto 're mro za'ra mono wamhã, timro wi, tihâiba hã te te 're sawi za'ra mono õ di za oto. Duré pi'õ norĩ hã aibâ na oto 're mro za'ra mono wamhã, duré timro wi tihâiba hã te te 're sawi za'ra mono õ di za oto.

Éfézu 3:6

Rowasu'u wẽ hã aré dama iwaihu'u'õ hã 're ihâimana mono hã, ãne. Zudeu'õ norĩ hã Cristuhu wasu'uwẽ te te 're saze za'ra mono wa, marĩ iwẽ na zudeu norĩ ma 're isõpru mono zéb da hã, 'Re ihâimana u'âsi mono te te tãma 're iropisutu za'ra mono zéb ré, te za 're hâimana za'ra. Simisutu te za oto 're hâimana za'ra, dahâiba misi ne. Cristu Zezusihi ãma oto 're nomro mono wa, 'Re ihâimana u'âsi mono hã tinhib'a'uwẽ norĩ ma, marĩ iwẽ na te te tãma iropisutu za'ra zéb zarina, te za zudeu'õ norĩ ma zama te te tãma ãma 're a'uwaimrami, zudeu norĩ zu. Ãne zudeu'õ norĩ ãma te te sima irotizé hã.

Éfézu 4:30

'Re aihâimana wasété za'ra wa'aba mono õ di za, aihâimanazém na Wamama pẽ'ẽzani wi 're robzei'õ tõ za'ra wa'aba mono da. E marĩ wa. Ipẽ'ẽzani hã te wapẽ'ẽ 're, wama 're hâimana za'ra, wapibui pese zéb da hã, 'Re ihâimana u'âsi mono te, tãma 're iwahâimana za'ra mono na, bâdâ iwa waptã'ã õ ré, te te iwa'anho'reptuzéb da hã.

Éfézu 5:33

Aima za'ra wa'aba zama, te rowasu'u hã 're hâimana, ãma 're i'aihâimana za'ra wa'aba mono zéb da hã oto. Tahawa, aibâ norĩ, te za aimro 're isawi pese za'ra wa'aba mo. 'Re isawi pese za'ra wa'aba mono zéb zarina, marĩ iwẽ zô asima 're asõpré wa'aba mono ne, te za duré aimro ma zama 're asõpré wa'aba mo, iwẽ zô hã. Duré pi'õ norĩ, aimro hã te za 're iwazéb za'ra wa'aba mo.

Éfézu 6:18

Te aima iroti za'ra wa'aba zéb zarina, te za uburé 're i'manharĩ u'âsi za'ra wa'aba mo. Duré ipẽ'ẽzani te te wama 're i'awaihu'u mono zéb zarina, te za Wamama ma 're aimreme zusi aba mo. Te za tiwi 're irowaptẽrẽ u'âsi za'ra wa'aba mo, te te 're aipawaptob za'ra wa'aba mono da. Asimiza'rese sina te za 're aihâimana za'ra wa'aba mo, tãma 're aimreme zusi aba mono da. Aiwi 're robzei'õ za'ra wa'aba mono õ di za. 'Re ihâimana u'âsi mono nhib'a'uwẽ 're ihâimana za'ra mono norĩ ma, te za duré tiwi 're irowaptẽrẽ u'âsi za'ra wa'aba mo, te te 're apawaptob u'âsi mono da, daro mono bâ.

Colosu 3:19

Aibâ norĩ, aimro te za 're isawi pese za'ra wa'aba mo. Tãma 're aihâimana wasété za'ra wa'aba mono ãna, te za asima 're isawi pese za'ra wa'aba mo.

1 Tesalonita 4:4

Aibâ norĩ hã aimro si te za 're i'madâ'â za'ra wa'aba mo, aiwasédé hã 're 'manharĩ za'ra wa'aba mono tõ da.

Titu 3:7

Wawasété na 're wanomro mono nherẽ, ma tô te te 're wa'azawi pese, 'Re ihâimana u'âsi mono hã. Tahawa, ma tô te te 're wa'awẽsãmri, wawasédé hã te te oto wa'ãma 're i'ab'madâ'â mono õ zéb zarina, rowẽ isi'utõrĩ'õ ãma i'rata 're wasi'ubumroi u'âsi mono da. Tahawa, wa za wasina sô 're wanhimipari u'âsi za'ra, i'rata 're iwasi'ubumroi u'âsi mono zéb zô hã.

Hebreu 1:14

E niha tawamhã, hâiwa ãma romhuri'wa norĩ 're ihâimana za'ra mono zé hã. Ta norĩ hã ihâiba'õ, 'Re ihâimana u'âsi mono ma, romhuri'wa norĩ. Ta norĩ si ma tô 'Re ihâimana u'âsi mono hã te te 're satõrĩ za'ra ti'ai u, za te te isõ'reptu za'ra norĩ hã te te 're pawaptob za'ra mono da, ti'ab ré. Taha na si, ta norĩ nhimiromhurizé hã te tãma 're hâimana za'ra.

1 Pedru 3:1

Pi'õ norĩ, romhuri'wa norĩ hã tinhib'apito mreme te te 're iwapari pese za'ra mono ne, te za duré aimro mreme hã 're iwapari pese za'ra wa'aba mo. Ãté aimro za'ra wa'wa hã zahadu te te saze za'ra õ di, 'Re ihâimana u'âsi mono nhimiroti hã. Tane nherẽ, tãma 're aihâimana wẽ za'ra wa'aba mono zéb zarina, te za oto sima wẽ za'ra, Cristuhu zazei'wa oto 're hâimana za'ra mono da. Te te 're saze za'ra mono da, tãma 're roti za'ra wa'aba mono õ nherẽ, te za uihâ na te te 're saze za'ra. E marĩ wa. Tãma 're aihâimana wẽ za'ra wa'aba mono wa, duré imreme hã 're wapari pese za'ra wa'aba mono wa.