1 Pedru 3:3 - ꞌRe Ihâimana Uꞌâsi Mono Zadawa Wasuꞌu

^3-4 Asima 're asipese za'ra wa'aba mono na si, 're asõpré wa'aba mono õ di za, ai'rãi waipo iwẽ na, duré asõ'rebzu za'ra wa'wa hã iwẽ na. Duré ai'uza za'ra wa'wa iwẽ na si asima 're rosa'rata za'ra wa'aba mono õ di za. Asimirosa'rata wẽ na oto 're i'anomro aba mono zéb zô si, te za asima 're asõpré wa'aba mo, duré aiwaimri 're i'aihâimana za'ra wa'aba mono zéb zô zama. Ãne si tãma wẽ uptabi di, 'Re ihâimana u'âsi mono ma hã.

1 Pedru 3:3 ပူးပေါင်းရင်းမြစ်များ

Zenezi 24:22

Tawamhã awaru ba'õmore norĩ te te oto âhuri parimhã, ma tô isi'uwazi zapodo, ẽtẽ waipo pré oru 'manharĩ hã ti'â, 6 grama na ipire pibuzé hã. Tawamhã ta hã ma tô isisi're ãma tãma sasõ. Ma tô duré danhipsisizé 100 grama na ipire pibuzé hã tãma tiza.

Zenezi 24:47

Tawamhã wa tô duré sadanha ãne: “E 'wa hã aimama.” Tawamhã ma te ĩzada'â ãne: “Wa hã Betu'éhé 'ra, Milca norĩ nhihudu, Naoho me.” Tawamhã wa tô isisi're ãma isi'uwazi zapodo ãma sasõ. Wa tô duré isipsisizé isimizu ãma hã tãma tiza.

Zenezi 24:53

Tawamhã ma tô ẽtẽ waipo prã prata 'manharĩ hã, duré ẽtẽ waipo pré oru 'manharĩ hã, da'uzazé ihâpa siré tãma sõmri za'ra, Rebecaha ma. Tawamhã ihitébré norĩ ma zama ina me hã ma tô taré marĩ iwa'âbâ za'ẽtẽ na hã ãma tãma tinhoprub zahuré.

Salmu 45:9

Asipi'õ norĩ 'remhã te darob amoi ãma apito norĩ 'ra sipi'õ hã 're si'ubumro. Duré ate apito simasisizém nhimire niwĩ, te duré aimro dama ipire i'rãnho'u hã 're sãmra, ẽtẽ waipo pré oru uptabi na i'uza 'manharĩ ré.

Ezodu 3:22

Tahawa te za hâiba mono bâ Izaraéu nhihudu norĩ nhipi'õ, ezipsiu nhipi'õ norĩ isõrõwa 're, 're ihâimana za'ra mono wi hã, duré iwaptoma 're ihâimana za'ra mono wi hã, marĩ hã, ẽtẽ waipo prã prata hã, ẽtẽ waipo pré oru hã, duré i'uza ãma 're isi'uza za'ra mono da hã, i'ra si aibâ norĩ hã, duré i'ra sipi'õ norĩ hã tiwi tãma waptẽrẽ za'ra za. Tawamhã ãne te za ezipsiu norĩ wi isimarĩ hã tiwi iwaibu za'ra wa'wa za.

Ezodu 32:2

Tawamhã Arã, ma te ãma sada'âbâ za'ra ãne: — Ma'ãpé aimro norĩ hã, ẽtẽ waipo pré oru 'manharĩ na ãma 're isipo're za'ru za'ra mono zé hã tiwi sani za'ra wa'aba, ai'ra si'aibâ norĩ te zama, duré ai'ra sipi'õ norĩ te zama, we ĩma 'wasari aba da.

Ezodu 33:4

Tawamhã ã hã romreme Izaraéu nhihudu norĩ ma, Mozési te te tãma wasu'u za'ra wamhã, ma tô tisiwa'õ na sãna'rata za'ra. Tahawa, duré tihâiba na marĩ iwa'âbâ za'ẽtẽ na si'ma'wamarĩ za'ra õ di.

Roma 12:2

Ti'ai ãma dahâimana wasété na 're idanomro mono norĩ ãma hã, 're sasõmri za'ra wa'aba mono õ di za. 'Re ihâimana u'âsi mono wi si, te za 're irowaptẽrẽ u'âsi za'ra wa'aba mo, asimirosa'rata wẽ na si, aipẽ'ẽ 're, 're aihâimana za'ra wa'aba mono zé hã te te aima 're pisutu za'ra wa'aba mono da, 're aihâimana za'ra wa'aba mono zép tém na si, oto 're anomro aba mono da. Tawapsi te za 'Re ihâimana u'âsi mono, te te aima 're ipisutu za'ra wa'aba mono hã asina 're iwaihu'u pese za'ra wa'aba mo, marĩ iwẽ si tãma 're i'manharĩ za'ra wa'aba mono zém na hã.