1 Pedru 3:20 - ꞌRe Ihâimana Uꞌâsi Mono Zadawa Wasuꞌu

²⁰ Ta norĩ hã Nowé ti'ai ãma 're morĩ ré, te te 're wapari za'ra mono õ di, 'Re ihâimana u'âsi mono nhimiroti hã. Nowé hã 'ri ne uba're, te te 'manharĩ ré, te ta norĩ hã po're ãna 're nomro. Tane nherẽ, da'ãma wa'a su'u õ wa, te te da'uprosi su'u õ di, 'Re ihâimana u'âsi mono hã. Te te oto da'uprosi wamhã, 'ri ne uba're wa, isisisi norĩ si, ma â wi hã sõ'reptu za'ra. Ta norĩ hã umro za'ra di. 8 na ihâiba za'ra hã.

1 Pedru 3:20 ပူးပေါင်းရင်းမြစ်များ

Zenezi 6:13

Tahawa te 'Re ihâimana u'âsi mono, Nowéhé ma tinha ãne: — Uburé te da'uprosi da, wa tô ĩsima da'ãma rowairébé. Tahawa wa za uburé pese tô da'uprosi. Duré ti'ai wa, uburé marĩ 're ihâimana za'ra mono zama wa za uprosi. E marĩ wa. Ti'ai ãma da te dasina 're irowamnarĩ za'ra mono zé te te sina rosa'réi u'âsi mono wa, hâimo.

Zenezi 6:3

Tahawa te Uburé Danhib'apito tinha ãne: — A'uwẽ, wasété na 're ihâimana za'ra mono zarina, õne u'â 're ihâimana za'ra mono da hã, mare di za. Tahawa te za duré oto ã hawim haré 120 na ãma iwahum na si 're hâimana za'ra.

Zenezi 6:5

Tawamhã Uburé Danhib'apito, 're idawasété pese uptabi za'ra mono zé ma tô te te 're ab'madâ'â, õne u'â dawasété si da te 're 'manharĩ za'ra mono da, da te dasima ãma 're irosa'rata za'ra mono zé hã.

Zenezi 6:8

Tane nherẽ, Uburé Danhib'apito, Nowé 're ihâimana wẽ mono zéb zabâdâ si tãma 're toi u'âsi mono di.

Zenezi 7:13

Tawamhã tô taha bâtâ na Nowé norĩ, timro me hã ma tô ti'ra Sẽ norĩ siré, Cãhã siré, Zaféhé siré, duré ta norĩ mro za'ra siré uba're 'remhã tizasi zahuré.

Zenezi 8:1

Tawamhã 'Re ihâimana u'âsi mono, Nowéhé ãma, duré uburé abaze, uba're wa isiré ihâimana za'ra norĩ ãma, ma tô oto po're puru. Tahawa rowa'u, ti'a nhisiwi te te â wapõrĩ mono da hã, ma tô tãma tinha. Ãhã wa, ma tô duré apâ â'ré mono na hã ãma sãna'rata.

Zenezi 8:18

Tawamhã Nowé norĩ, timro me, ti'ra norĩ siré, duré tisani'aba norĩ siré hã ma tô uba're hawimhã oto tipusi zahuré.

Luca 12:32

Te duré tãma nharĩ za'ra, ãne: — Ĩsiré norĩ, ai'umrore wa'aba nherẽ, asina 're aihâtâ'â za'ra wa'aba mono õ di za. Aimama 'wa hã Danhib'apito uptabi hã, te za aima pisutu za'ra wa'wa, isiré dama 're roti za'ra wa'aba mono da. Ãne ma tô sima aiwẽ za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:41

Tawamhã da'ahâ na ma tô Zezusi hã saze za'ra ni, Pedru te te dama isadawa wasu'uzém na hã. Tahawa, ma oto â dawabzuri hã 'manharĩ za'ra ni, 3 miu na dahâiba hã. Tawamhã Zezusihi zazei na'rata 'wa norĩ me, ma tô oto sitẽme atob za'ra. Taha wamhã, ahâ uptabi di oto, isazei'wa norĩ hã.

Roma 9:22

Tane te za duré 'Re ihâimana u'âsi mono hã wa'manharĩ'wa hã marĩ hã te te wama 're apisutu, zé 'manharĩ'wa ne. Te te sima 're iwẽ mono zéb zarina, te za uburé marĩ hã te te dama 're apisutu, iwẽ hã duré iwẽ prã hã. Ta hã te te sima 're wẽ u'âsi, tiwaihu'u pese na dapo're'õ norĩ hã te te 're ahâ za'ra mono da, taha zarina isimihâ nhiptetezém na da te dasina 're waihu'u za'ra mono da. Tane nherẽ, te te siwi 're i'awẽ'õ pese mono norĩ ãma hã, 're wa'a su'u mono õ di, za te te 're ida'uprosi za'ra mono norĩ ãma hã.

Éfézu 5:26

Marĩ hã â na da te 're i'upsõ za'ra mono ne, ma tô tinhimiroti na wawasété hawi te te 're wa'a'upsõi wẽ wapẽ'ẽ 're, 're wanomro wẽ mono da, isib'a'uwẽ si oto 're wahâimana za'ra mono da tãma.

Hebreu 11:7

Nowé hã, 'Re ihâimana u'âsi mono si te te sina 're i'umnhasi mono zéb zarina, ma tô duré ãma saze, ropipa hã za dazô iwatobrozém na 'Re ihâimana u'âsi mono hã romhâ ré te te ãma ipo're pu'uzém na, zahadu marĩ hã titõmo na te te 'madâ'â õ nherẽ, Nowé hã. Tahawa, isimiroti zarina ma tô uba're za'ẽne hã 'manha, ti'ra norĩ hã te te ãma sõ'reptu za'ra da, duré timro zama hã, duré tisani'aba norĩ zama hã te te ãma sõ'reptu za'ra da. Taha zarina, ma tô 'Re ihâimana u'âsi mono hã siwi da'awẽ'õ pese, dawasété na si 're dahâimana za'ra mono wa, Nowéhé si isimiroti hã te te 're 'madâ'â pese mono wa. Tawamhã Nowé hã, 'Re ihâimana u'âsi mono si te te sina 're umnhasi mono wa, ma tô 'Re ihâimana u'âsi mono hã ãma tiwata, ãne: “Ãhã si te 're timorĩ wẽ.” Ãne 'Re ihâimana u'âsi mono hã, Nowéhé ãma iwatazé wasu'u hã.

1 Pedru 1:22

Wanhib'apito nhimiroti hã, tô sena. A norĩ wa'wa hã ma tô isimiroti hã 're iwapari pese za'ra wa'aba mo. Tahawa, marĩ iwasété na asima 're rosa'rata za'ra wa'aba mono õ di oto. Aiwẽ na 're anomro aba mono da si, te oto asima 're irosa'rata za'ra wa'aba mo. Dazawizé hã tô sena te oto aima 're hâimana za'ra wa'wa, asiré Wanhib'apito zazei'wa norĩ ãma. Tahawa, te za õne u'âsi 're asisawi pese za'ra wa'aba mo.

1 Pedru 2:25

Rowẽ na 're aihâimana za'ra wa'aba mono õ di aré, pone'ẽrebâ, bâdâdi nhiti 're isipa za'ra mono ne, 're anomro aba mono wa aré. Ãhã na ma tô apâ aipizari za'ra wa'wa, Da'madâ'â wẽ 'wai u, isarina si oto 're anomro aba mono da, rowẽ na.

1 Pedru 3:19

Tihâiba na u'âsi, te adâ'â norĩ u hã mo, dazazéb 're, 're idasimasa mono ne, nimomo 're iwairébé mono õ norĩ u. Uburé Danhib'apito uptabi na te te sina po're pu'u za'ra da, te itẽme timorĩ za'ra.

1 Pedru 4:19

Ãté wa za a'â robzépada hã wa te wasina 're 'madâ'â za'ra, 'Re ihâimana u'âsi mono te te wama 're i'awẽ mono zéb zarina. Tane nherẽ, 'Re ihâimana u'âsi mono, wa'apoto mono 'wai umnhasi sina, wa za dama 're wahâimana wẽ za'ra, ta hã tinhimiropisutu wẽ na za te te wama ãma 're a'uwaimrami u'âsi mono wa.

2 Pedru 2:5

Duréi uptabi hã 'Re ihâimana u'âsi mono tinhimihâzé hã te te dama ba'a õ di, ti'ai ãma 're idahâimana za'ra mono norĩ ma. Â ma, ma tô tinha, â pusi mono da, â na te te da'uprosi da, 're dahâimana wasété za'ra mono wa. Nowé norĩ si ma tô sõ'reptu za'ra, 7 na ihâiba za'ra norĩ me. Nowé hã te te aré dama 're roti u'âsi, 're dahâimana wẽ za'ra mono da, 'Re ihâimana u'âsi mono nhimiroti na.

2 Pedru 3:15

Ma'ãpé, ãma 're rosa'rata pese za'ra wa'aba mono, Wanhib'apito hã da'ãma iwa'a su'u õ zém na hã. Ta hã te simi'ẽ na 're hâimana, tinhimihâzé wi te te 're ida'anho'reptui mono da hã. Ãne na ma tô duré Paulu hã wama isawi pe hã aima rob'ui'éré za'ra wa'wa, hâiwa hawi rowaihu'u na 'Re ihâimana u'âsi mono te te tãma iwaihu'uzéb zarina.