1 Pedru 2:6 - ꞌRe Ihâimana Uꞌâsi Mono Zadawa Wasuꞌu

⁶ Duréihã iwana ré 'Re ihâimana u'âsi mono, ma tô ẽtẽ na Zezu Cristuhu ãma simiré'é. Ãne te tawamhã taha na tinha: “Ẽtẽ tõmo wawẽ hã wa tô pisutu, ĩnhorõwa ãma te hiri da, Siã na 'ri nho'õmo nhisi ãma. 'Ri na'rata wẽ'ẽzéb ãma wa za tihi, 'ri hã siptete na sab da. Ẽne hã ĩma wẽ uptabi di. Ĩma sawi uptabi di duré. Taha umnhasi sina 're dahâimana za'ra mono wamhã, iwẽ na za te te dama ãma 're a'uwaimrami u'âsi mono wa, dawi 're robzei'õ za'ra mono õ di za.”

1 Pedru 2:6 ပူးပေါင်းရင်းမြစ်များ

Zenezi 49:24

Tane nherẽ, tinhimnhi'ã te te rési ãna, te za itété tete na hã ãma uzusi. Duré ipaihi si'uiwa na paihi nhiptete zahuré di za, Zacoho te 'Re ihâimana u'âsi mono iwaihu'u pese nhiptetezém hawim na wa, Pone'ẽrebâ 'madâ'â'wa ne Izaraéu nhihudu norĩ te, Ẽtẽ tõmo wawẽ nhisi na hã.

Salmu 40:14

Te te siwi ĩwĩrĩ da, te te sima iwẽ za'ra norĩ hã da te ãma i'ai'uté za'ra da si, duré rowazé tãma ihâimana za'ra da si, ibâre hã. Duré ĩma ropire wa, te te ĩ'ãma sima irowẽ za'ra norĩ hã rowazép te, apâ ĩma isipizari za'ra da si, ĩma iwẽ hã.

Salmu 89:19

Duréi uptabi hã, asib'a'uwẽ sena na ai'ãma 're inomro mono ma sõtõ 'rowim ne sõ'awi tãma asihâi'ré za'ra wamhã, ma tô ãne tãma inharĩ za'ra: “Wa hã dasi'wapé 'manharĩ'wai ma, wa tô isiptetezé hã tãma tisõ. Duré pire na dama 're sa mono da hã, wa tô aibâ te ipisutu ma hã tãma tisõ, a'uwẽ wa'wamhã.

Mateu 12:18

“Ãhãta te ipisudu ĩma romhuri'wa da, te 're isawi pese mono hã. Taha ãma si wa ãma 're ĩpẽ'ẽ toi u'âsi. Taha ma, wa za ĩpẽ'ẽzani hã tãma tisõ. Tawamhã daro mono bâ te 're ida'anho'reptui mono zé wasu'u na te za te te dama 're rowasu'u, da te 're iwaihu'u za'ra mono zéb da hã.

Marcu 12:10

— Oro 'Re ihâimana u'âsi mono zadawa wasu'u na rob'ui'éré hã 're sõré za'ra wa'aba mono za, aima waihu'u za'ra wa'aba õ di bété. Ãne ibaihâ na rob'ui'éré hã: “Ẽtẽ tomhâpâ wẽ 'ri na'ratazéb da, wẽ uptabi nherẽ, wasété newa, 'ri'wa norĩ te te siwi iwẽ'õ hã te oto tô taré nherẽ pire na hã, 're sa'wari u'âsi.

Luca 20:17

Tawamhã Zezusi te da'ab'madâ'â pese. Tahawa te dama tinha, ãne: — Ẽtẽ wasu'u na rob'ui'éré hã, ãne: “Ẽtẽ tomhâpâ wẽ 'ri na'ratazéb da, wẽ uptabi nherẽ, wasété newa, 'ri'wa norĩ te te siwi iwẽ'õ hã te oto tô taré nherẽ pire na hã, 're sa'wari u'âsi.” Ãne, ẽtẽ wasu'u na rob'ui'éré, ibaihâ na hã.

Luca 23:35

Zezusi norĩ hã simnhatã ré, te zudeu norĩ hã i'rata asimro, te te 'madâ'â za'ra da. Tahawa, te roti'wa norĩ hã sima nharĩ za'ra, ãne: — Ma tô te te 're da'anho'reptu aré. Tô sena Danho'reptui'wa da, 'Re ihâimana u'âsi mono te te pisutu wamhã, ma'ãpé sisõ'reptu.

Zuwã 7:38

Duréihã ma tô ãne â u'âsi na rob'ui'éré, 'Re ihâimana u'âsi mono zadawa 'mahârâ'wa hã: “Â u'â hã 're sidototo u'âsi mono wamhã, dama 're irowẽ za'ra mono zé hã te za dama 're hâimana u'âsi za'ra, isipti hã. Tane Danho'reptui'wa na da te dasina 're ĩ'umnhasi za'ra mono wamhã, taha zarina te za rowẽ nhomri'wa hã dama 're hâimana za'ra.” Ãne ma tô ãma rob'ui'éré, ibaihâ na hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 1:16

— Wasiré Zezusihi zazei'wa norĩ, ĩwapari za'ra wa'aba. Zudaha wasu'u na wa za aima rowasu'u za'ra wa'wa. Duréihã, 'Re ihâimana u'âsi mono pẽ'ẽzani hã ma tô Zuda hã waihu'u siro, romhâ ré. Tahawa, Dawihi ma, ma tô tinha, dama roti'wai ma, te te iwaihu'u siromo zém na te te ãma rob'ui'éré da. Tawamhã Dawi hã ma tô Zudaha ãma rob'ui'éré siro, poto õ ré. Ãne ibaihâ na ãma irob'ui'éré hã: “Isõrõwa ãma hã 'ri baba di za oto. 'Ri baba na te za oto 're sa. Ni'wa hã iwa 're sãmra mono õ di za oto.” Ãne Zudaha dâ'âzé wasu'u na hã ma tô wama rob'ui'éré za'ra. — Rob'ui'éré na iwasu'u hã ma tô sina uwaimra Zuda hã, tidâ'âzé wasu'u hã te te sina waihu'u ãna. Siwi iwẽ'õ'wa norĩ hã ma tô te te sô simro, Zezusihi zô. Isiré 're wanomro mono nherẽ, wasiré romhuri, Zezusi te te tãma pisutu nherẽ, ma tô te te sô danhimro, te te dama hâiba nhomri da. Te te dama hâiba nhomri parip si, ma tô sima uipra ti'a hã, Zezusi te te dama isõmrizé wa'âbâ na. Tawamhã tame ma tô dârâ, tinhipti'ai 're, Zuda hã. Ma tô waptãrã, ti'ai wa. Waptã'ã wamhã, ma tô nomohaipo'o. Nomosipo'o wamhã, uburé isãna ma tiwi asa'wa. Ãne ma tô Zuda hã sina uwaimra, za idâ'âzé wasu'u na rob'ui'éré hã. — Tawamhã iwasu'u hã 'ri baba, ma tô te te ropé, Zeruzalẽ ãma. Tahawa, Asédama na ma tô isipti'a hã da te 're sisi za'ra, dasimremezém na. Wamreme na ãma isaprĩzé hã, dawapru za'warizém na darom nhisi na. — Duré ãne 'Re ihâimana u'âsi mono, te te iwaihu'u siromo zéb zarina ma tô rob'ui'éré siro, Dawi hã Zudaha wasu'u na: “Romhuri hã, itei õ di oto. Ni'wa te hã za oto, isõwa're'remhã.” Ãne ma tô ãma rob'ui'éré siro, Dawi hã.

Roma 10:11

Duréihã Izaia hã ma tô duré ãne na ibaihâ na rob'ui'éré: “'Re ihâimana u'âsi mono hã, Danho'reptui'wa da, te te ipisudu hã da te dasina 're umnhasi za'ra mono wamhã, niwamhã te te sina 're umnhasi baba za'ra mono õ di za. Te za te te dama ãma 're a'uwaimrami u'âsi.” Ãne Izaia hã te te ãma irob'ui'érézé hã.

Éfézu 1:4

Ta hã ti'a te te poto õ ré, ma tô romhâ ré te te 're wa'apisutu siro, tinhib'a'uwẽ da, Cristuhu ãma za 're wanomro mono wa, wawẽ uptabi na ãma 're wanomro mono da, marĩ, wa te 're 'manharĩ wasété za'ra mono ãna. Ta hã te te 're wa'apoto mono õ ré, ma tô romhâ ré te te 're wa'azawi pese.

Éfézu 2:20

Ẽtẽ 'manharĩ na wa za 'ri na ai'ãma simiré'é za'ra wa'wa. Ẽtẽ na'rata nhisiwi, da te dasiwi 're i'ri za'ra mono ne, ma tô Cristuhu wasu'uwẽ na te te 're aipawaptom na'rata za'ra wa'wa, isadawa wasu'u'wa norĩ hã. Duré Wamama pẽ'ẽzani, marĩ hã te te tãma iwaihu'u za'ra zéb zarina, duréihã 'Re ihâimana u'âsi mono te te dama 're isadawa wasu'u za'ra mono norĩ zama ma tô te te 're aipawaptob za'ra wa'wa. 'Ri uparizéb da, 'ri na'rata wẽ'ẽzéb ãma, ẽtẽ tõmo hâpâ wawẽ na, wa za Zezu Cristuhu ãma simiré'é, wapawapto uptabi 'wa wama 're hâimana za'ra mono wa, ta hã.

2 Timotiu 3:16

Uburé isimiroti wẽ na rob'ui'éré hã, 'Re ihâimana u'âsi mono te te dama 're i'awaihu'u mono zéb zarina si, te dama 're hâimana za'ra. Ãne wa, isimiroti mono bâ wẽ di, roti tô sena na, da te ãma 're idapawaptob za'ra mono zéb da hã. Duré wẽ di, isimiroti hã, danhimiroti tô senai'õ na, da te dama ãma 're irowaihu'u za'ra mono zéb da hã. Duré wẽ di, isimiroti hã, dahâimanazém na da te 're upa za'ra mono wamhã, da te dama ãma 're iroti za'ra mono zéb da hã, ãma 're idahâimana wẽ za'ra mono da hã oto.

1 Pedru 2:4

Ma'ãpé, Wanhib'apito u asimirosa'rata na si nherẽ, 're aihutu aba mono. Ta hã wẽ nherẽ, ma tô dasiwi wẽ'õ ni, ẽne hã 'ri'wa norĩ te te siwi iwẽ'õ ne. Tane nherẽ, da te dasiwi wẽ'õ nherẽ, 'Re ihâimana u'âsi mono ma, wẽ uptabi di, Wanhib'apito hã. Tãma sawi uptabi di duré.

1 Pedru 2:8

Duré ẽtẽ tõmo wawẽ wasu'u amo na rob'ui'éré hã, ãne: “Ẽne hã te za nasi da'marõpãrĩ za'ra.” Ẽne te te nasi da'marõpãrĩ za'ra wamhã, dama 're rowẽ za'ra mono õ di za. Tane Cristuhu wasu'uwẽ hã da te 're saze za'ra mono õ wamhã, dama 're rowẽ za'ra mono õ di za, 'Re ihâimana u'âsi mono hã te te siwi 're ida'awẽ'õ mono zéb zarina.

2 Pedru 1:20

'Re ihâimana u'âsi mono zadawa 'mahârâ 'rata 'wa norĩ nhimirowasu'u na rob'ui'éré hã, marĩ te te iwasu'uzé hã, ni'wa hã si'uihâ na te te waihu'u õ di, te te dama 're i'awaihu'u mono da hã. E marĩ wa. Ta norĩ hã, si'uihâ na te te dama 're rowasu'u za'ra mono õ wa. 'Re ihâimana u'âsi mono si, ma tô Tipẽ'ẽzani na te te tãma 're awaihu'u, te te dama 're wasu'u za'ra mono da. Tane, wa norĩ zama isadawa wasu'u'wa norĩ nhimirowasu'u hã, wasi'uihâ na wa te 're waihu'u za'ra mono õ di, marĩ te te iwasu'uzé hã wa te dama 're iwaihu'u za'ra mono da hã. Taha wasu'u hã pire wa, ma'ãpé ãma 're rosa'rata pese za'ra wa'aba mono, waihu'u za'ra wa'aba da.

2 Pedru 3:16

Ãne na ma tô te te dama 're awaihu'u, Paulu hã te te dama ãma 're rob'ui'éré mono wamhã. Nimame te tihâimana za'ra, isimi'ui'éré pire hã. Ta hã dama pire za'ra di, da te 're iwaihu'u za'ra mono zéb da hã. Ãne wa, ma tô ni'wam norĩ hã isimiroti na te te ãma 're upa za'ra, te te 're waihu'u pese za'ra mono õ wa, wẽ nherẽ, isimiroti hã. Ta norĩ hã Wanhib'apito ãma siptete sina 're hâimana za'ra mono õ wa, ma tô Pauluhu nhimiroti na te te ãma 're upa za'ra. Duré 'Re ihâimana u'âsi mono nhimiroti 'rata na rob'ui'éré hâiba amo na zama, ma tô te te ãma 're upa za'ra. Tahawa, te za 'Re ihâimana u'âsi mono hã hâ za'ra.