1 Pedru 1:6 - ꞌRe Ihâimana Uꞌâsi Mono Zadawa Wasuꞌu

⁶ Tahawa, te za iwasu'uwẽ zarina aipẽ'ẽ 're, 're atoi u'âsi za'ra wa'aba mo, rowasédé hã asada 're hâimana za'ra wa'aba mono wa, 're robzépata za'ra wa'aba mono nherẽ.

1 Pedru 1:6 ပူးပေါင်းရင်းမြစ်များ

Salmu 119:28

Ĩpẽ'ẽ 'remhã ĩma robzei'õ uptabi wamhã, te ĩhâimana ze zé hã ĩwi 're si'utõrĩ. Tahawa, ma'ãpé ĩnhiptede apâ ĩma sõmri, iropisutuzéb zarina.

Salmu 119:75

Uburé Danhib'apito, ĩma waihu'u pese di, i'uwaibaba na si dama 're irowairébé mono zé hã. Duré ĩma waihu'u pese di, sena na 're i'aihâimana mono zéb zarina, niha hã ĩma 're irob'manharĩ mono zé hã.

Salmu 34:19

Wẽ na 're inomro mono norĩ hã, te tô ropire na te te 're robzépata za'ra. Tane nherẽ, Uburé Danhib'apito, te uburé ropire mono hawimhã te te 're anho'reptu.

Salmu 69:20

Da te ĩ'ãma 're iwasété za'ra mono zé hã ma tô te 're ĩsiri wai're. Tahawa, marĩ iwẽ zô hã oto 're ĩnhimnhasi waihu'u mono õ di. Ni'wa ĩ'ãma isiwamri zô ne, wa aré mapa. Tane nherẽ, ni'wa hã ĩ'ãma siwamri õ di. Duré ni'wa te te sina ĩpẽ'ẽ tété da hã, wa aré mapa. Tane nherẽ, ni'wa ĩtẽmemhã we morĩ õ di.

Salmu 95:1

We ai'aba'réi wa'aba, Uburé Danhib'apito ãma wanho're na wawata za'ra da! Duré wato sina, ẽtẽ tõmo wawẽ ne te te 're iwa'anho'reptui mono 'wai ãma wawata za'ra wa'aba.

Mateu 11:28

— Marĩ ipire, da te 're 'wasari mono wamhã, te za 're dazadâ'â wairébé. Tane te duré a norĩ wa'wa hã 're asiwasutu u'âsi za'ra wa'aba mo, dama rowahutu'wa norĩ nhimirowasu'u hã 're i'madâ'â pese za'ra wa'aba mono zéb zarina, 'Re ihâimana u'âsi mono te te 're asõ'reptu za'ra wa'aba mono da newa. Tane nherẽ, asina 're uwaimrami waihu'u za'ra wa'aba mono õ di za. Ãne hã uburé 're aihâimana za'ra wa'aba mono norĩ hã ma'ãpé we ĩzô 're asõpré u'âsi aba mono. We ĩzô 're asõpré u'âsi aba mono wamhã, wa za te 're aipẽ'ẽ nomri za'ra wa'wa za, 're asiwasutu zahu za'ra wa'aba mono tõ da hã oto.

Mateu 26:37

Tawamhã Pedru hã te siré saprõ, Zebedehe 'ra norĩ me. Ãhã wamhã ma tô Zezusihi wi, tiwi tirobzei'õ pese. Za te te irobzépatazé hã ma tô sima simimnhasi.

Mateu 5:12

Tahawa, ma'ãpé atoi u'âsi, ãma 're anomro aba mono za. 'Re ihâimana u'âsi mono hã te za marĩ iwẽ hã sa'ẽtẽ na te te aima 're sõmri za'ra wa'wa, hâiwa ãma asô 're isimi'wara aba mono hã. Duréihã 'Re ihâimana u'âsi mono zadawa 'mahârâ 'rata 'wa norĩ ma, ma tô da te tãma 're rob'manharĩ u'âsi za'ra, da te aima 're irob'manharĩ wasété za'ra wa'aba mono ne. — Ãne na ma tô Zezusi hã tãma waihu'u siromo za'ra romhâ ré, te te waihu'u zara da.

Luca 1:47

— Wanhib'apito ãma, wa za 're ĩwata u'âsi. 'Re ihâimana u'âsi mono hã Ĩnho'reptui'wa, te 're mo. Tãma ĩwapure nherẽ, ma tô ĩ'ãma rosa'rata. Tahawa, ĩpẽ'ẽ na, wa 're ĩto. 'Re ihâimana u'âsi mono hã iwaihu'u pe hã, iwẽ uptabi hã iwẽ na ma tô ĩma 'manha. Tahawa, iwẽ na te te ĩma i'manharĩ wẽ na, te za dasima hã da te 're ĩwasu'u u'âsi.

Luca 10:20

Asimirob'ru zarina wa'aba, wa'uburé hã dama 're wairébé mono wa, ma tô 're ato za'ra wa'aba mo. Tane nherẽ, taha nhipai u te za 're ato uptabi za'ra wa'aba mo, asisi hã hâiwa ãma 're hâimana za'ra wa'aba mono wa, asisi ui'éré za'ra wa'wa hã.

Luca 2:10

Tawamhã hâiwa ãma romhuri'wa, te tãma nharĩ za'ra, ãne: — Aipahi za'ra wa'aba tõ. Wa hã wa wei mo, rowasu'uwẽ te aima wasu'u za'ra wa'aba da. Rowasu'uwẽ hã da te wapari za'ra wamhã, dama 're rowẽ uptabi za'ra mono di za.

Zuwã 16:22

Tane duré a norĩ wa'wa hã, te za aipẽ'ẽzé hã a'â isépata za'ra wa'wa. Apâ atẽme ĩwisi aba wapsi, aima 're rowẽ za'ra wa'aba mono di za. Robzei u'âsi te za 're anomro aba mo.

Zuwã 16:33

Ãne na wa tô aima rowasu'u za'ra wa'wa, ĩ'ãma 're aihâimana za'ra wa'aba mono wa, rowẽ na 're aihâimana za'ra wa'aba mono da. Tane nherẽ, ĩzazei'õ'wa norĩ hã te za tô te te 're ai'ruiwapari u'âsi za'ra wa'wa. Tahawa, te za 're irobzépata za'ra wa'aba mo. Tane nherẽ, te za asiptete sina ĩ'ãma 're anomro aba mo. Wa hã ĩzazei'õ'wa norĩ ma, ĩnhiptete uptabi wa, wa tô ãma ai'uté za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 14:22

'Ri nho'õmo wa'wai baba neb zahuré wamhã, ma tô isazei'wa norĩ hã pawaptob za'ra, hâimana nhiptete na 're nomro mono da, 'Re ihâimana u'âsi mono ãma te te 're sasõmri u'âsi za'ra mono da. Ãne te duré tãma nharĩ za'ra: — A norĩ wa'wa hã Zezusihi zazei'wai wa, marĩ iwasédé hã da te aima 're 'manharĩ za'ra wa'aba mono wamhã, tãma 're aipahi za'ra wa'aba mono õ di za. Ãne na hã te za tô 're irobzépata za'ra wa'aba mo. Tane nherẽ, 'Re ihâimana u'âsi mono nhib'a'uwẽ oto 're anomro aba mono wa, te za niwapsi hâiwa ãma i'rata 're aihâimana u'âsi za'ra wa'aba mo, rowẽ na. — Ãne te tãma nharĩ za'ra.

Roma 12:12

Uburé marĩ iwẽ hã 'Re ihâimana u'âsi mono, za te te wama 're i'apisutu mono zéb zô, wa za wanhimipari nhimi'ẽ na sô 're wahâimana za'ra, wato sina. Zezusihi zazei'wa oto 're anomro aba mono wa, da te 're ai'ruiwapari za'ra wa'aba mono nherẽ, te za asiptete sina ãma 're anomro u'âsi aba mo. 'Re ihâimana u'âsi mono ma, te za 're aimreme zusi u'âsi aba mo.

Roma 5:11

Tane nherẽ, taha si õ di. 'Re ihâimana u'âsi mono ãma, wa duré watoi u'âsi 're wahâimana za'ra, Wanhib'apito Zezu Cristu dâ'âzém na, wa'ãma 're siwadi za'ra mono wa oto.

Roma 5:2

Zezusi hã wa te wasina 're umnhasi za'ra mono wa, te 'Re ihâimana u'âsi mono hã iwẽ si te te wama 're ab'madâ'â. Taha na si, wa oto wa norĩ hã 're wahâimana za'ra. Niwapsi te za 'Re ihâimana u'âsi mono hã te te wama 're apisutu, iwaihu'u pese zarina ihâiba na rowa'a za'ẽtẽ na isiré 're wahâimana u'âsi za'ra mono da, rowẽ uptabi na. Tahawa, wato sina, wa sô 're wanhimipari za'ra, wa te 're sazei utõrĩ za'ra mono ãna.

Roma 9:2

Ĩsiré zudeu norĩ ãma hã, ãma 're ĩpẽ'ẽzé uptabi za'ra mono di, Cristu hã te te siwi 're wẽ'õ za'ra mono wa. Tahawa, te duré ĩwi 're robzei'õ pese, ĩpẽ'ẽ 'remhã. Ta norĩ ãma 're ĩpẽ'ẽzé uptabi za'ra mono wa, wa aré te ĩsima 're rosa'rata u'âsi ĩpẽ'ẽ na, 'Re ihâimana u'âsi mono ma, ĩsipisutu da, i'upana za'ra te te 're ĩwẽ'õ mono da, duré Cristuhu nhiti, i'upana 're ĩhâimana u'âsi za'ra mono da. Ãne hã 'Re ihâimana u'âsi mono hã te te ĩma 'manharĩ dai õ nherẽ, wa taré ĩsiwaihu'u, ĩsiré zudeu norĩ ãma 're ĩpẽ'ẽzé uptabi za'ra mono zém na. Ãne na, wa tô aima ĩsiwasu'u za'ra wa'wa, 're ĩzadawa nhipese mono õ na hã.

2 Corĩtu 4:17

Ti'ab ré, wa za tô wa te 're robzépata a'â. Tane nherẽ, ta hã wama wapure di. E marĩ wa. Taha wa'rãmi, te za 'Re ihâimana u'âsi mono iwẽ uptabi na hã duré ipire uptabi na hã te te wama 're wa'âbâ, isi'utõrĩ'õ na. Ti'ab ré, wa te 're robzépata za'ẽtẽ mono nherẽ, taha nhipai u wẽ uptabi di za, iwẽ na te te wama iropisutu siromo zé hã.

2 Corĩtu 6:10

Nimahã bâtâ na, da te dasina 're wapẽ'ẽzé zani za'ra mono nherẽ, wa watoi u'âsi 're wahâimana za'ra, 'Re ihâimana u'âsi mono ãma si. Duré wanhibrob'õ na 're wahâimana za'ra mono nherẽ, wa wa te 're dapawaptob za'ra, iwasu'uwẽ na si, danhibro pese ne, rowẽ na 're dahâimana u'âsi za'ra mono da, 'Re ihâimana u'âsi mono siré. Wa norĩ hã wanhimarĩ õ nherẽ, 'Re ihâimana u'âsi mono, uburé te te wama 're i'anhomri mono ré si, wa oto 're wanomro, iwẽ uptabi ré si.

Galata 5:22

Ãne 're danomro wasété mono õ di za, 'Re ihâimana u'âsi mono pẽ'ẽzani nhimiwada'uri zarina 're danomro mono wamhã. Te za da te 're dazawi pese za'ra. Duré dapẽ'ẽ 're datoi u'âsi, te za 're dahâimana za'ra. Duré dapẽ'ẽ toi u'âsi, te za 're dahâimana za'ra. Duré dawara sina dasisada 're dazahi za'ra mono õ di za. Duré danhimizawi pese na te za 're dahâimana za'ra. Duré marĩ iwẽ na te za dama 're danhoprub za'ra. Duré tô sena wa, ropisutu wẽ na, te za da te dama ãma 're rob'manharĩ wẽ za'ra.

Filipu 2:26

Ta hã te te duré apâ asabu ze za'ra wa'aba di, uburé ai'ãma pẽ'ẽzé za'ra wa'aba wa. Duré ai'ãma hâtâ'â za'ẽtẽ za'ra wa'aba di, ãme ihâzé na isiwasu'uzé hã wapari za'ra wa'aba wa. Tahawa, wa za tô ãma atẽme satõrĩ su'u za'ra wa'wa, Timotiuhu wana.

Filipu 3:3

Ta norĩ hã sena na 're hâimana za'ra mono õ di, 'Re ihâimana u'âsi mono nhib'a'uwẽ na hã. Wa norĩ si, wa 'Re ihâimana u'âsi mono nhib'a'uwẽ uptabi hã 're wahâimana za'ra, Ipẽ'ẽzani nhimipawaptobzém na ãma 're wawata za'ra mono wa. Tahawa, marĩ hã wasi'uihâ na wa te 're i'manharĩ za'ra mono zém na 'râwi 're wasi'umnhasi za'ra mono õ di, wasihawim na wanho'reptuzé hã wa te wasina ãma 're i'uwaimrami za'ra mono da hã. Cristu Zezusi, iwẽ te te wama i'manharĩ za'ra zém na si, wa tô wa te wasima ãma 're rowẽ za'ẽtẽ uptabi za'ra, taha zarina si te te oto 're wa'anho'reptui mono wa, 'Re ihâimana u'âsi mono hã.

Filipu 4:4

Ma'ãpé atoi u'âsi 're aihâimana za'ra wa'aba mono, Wanhib'apito ãma oto 're anomro aba mono na dâ'âsina. Wa za duré aima ãma sahu za'ra wa'wa. Ma'ãpé atoi u'âsi ãma 're aihâimana za'ra wa'aba mono za.

1 Tesalonita 1:6

A norĩ wa'wa hã ma tô 're anomro wẽ wa'aba mo, ãma iwasisanhozéb zarina, duré Wanhib'apito ãma isisanhozéb zarina. Iwaihu'u pese pẽ'ẽzani hã ma tô te te 're aipawaptob u'âsi za'ra wa'wa, atoi uptabi za'ra wa'aba na 're sazei pese za'ra wa'aba mono da, da te ai'ãma 're irowasété za'ra wa'aba mono na 're robzépata za'ra wa'aba mono nherẽ.

Tiagu 1:2

Ĩsisãnawã norĩ, marĩ hã ahâ na asada 're hâimana za'ra wa'aba mono nherẽ, te za atoi u'âsi 're anomro aba mo.

Tiagu 1:9

Wasiré isazei'wa norĩ hã simarĩ õ nherẽ, Wanhib'apito zazei'wai wa, te za tipẽ'ẽ na 're toi u'âsi za'ra.

Tiagu 4:9

Aiwasété na 'râwi 're asisãmri za'ra wa'aba mono wa, te za 're ai'ru'ru wa'aba mo. Rowẽ te, aipẽ'ẽ 're, 're ato za'ra wa'aba mono õ di za a'â. Robzei'õ na te za a'â 're aihâimana za'ra wa'aba mo.

1 Pedru 3:17

Ãté 're aihâimana wẽ za'ra wa'aba mono 'ru te, te za da te aima 're rob'manharĩ wasété za'ra wa'wa. Ãne zarina, 're robzépata za'ra wa'aba mono wamhã, te za iwaihu'u za'ra wa'wa, 'Re ihâimana u'âsi mono te te sima 're aiwẽ za'ra wa'aba mono zéb zarina, a'â 're irobzépata za'ra wa'aba mono na. Ãne hã te te wama 're awẽ mono õ di, dama 're iwahâimana wasété za'ra mono zéb da hã. Dama 're wahâimana wasété za'ra mono wamhã, ãté te za da te 're wahâ za'ra. Ãne zarina, wa te 're robzépata za'ra mono wamhã, i'uwaibaba wa za tô wa te 're robzépata za'ra.

1 Pedru 4:7

Ro isi'utõrĩzéb u hã, romhuture di oto. Tahawa, te za aihâiba na asina 're asiptete za'ra wa'aba mo. Duré aihâimana nhimiza'rese te za 're aihâimana za'ra wa'aba mo, 'Re ihâimana u'âsi mono ma, 're aimreme zusi u'âsi aba mono da.

1 Pedru 5:10

Tane nherẽ, 're robzépata hâ za'ra wa'aba mono õ ré, rowẽzé hã te za te te aima ãma 're a'uwaimrami 'wa, 'Re ihâimana u'âsi mono hã. Taha si te za te te 're asiptete u'âsi za'ra wa'wa, tiwaihu'u pese na, asiptete u'âsi ãma 're aihâimana za'ra wa'aba mono da. Õhõ ma si te isimizawizé hã sa'ẽtẽ na tãma 're hâimana. Tahawa, ma tô sitẽme asô tihârâ za'ra wa'wa, rowẽ isi'utõrĩ'õ ãma isiré 're aihâimana u'âsi za'ra wa'aba mono da, Cristuhu nhib'a'uwẽ oto 're anomro aba mono wa.

1 Samuéu 2:1

Tawamhã Ãna te ãne mre: Uburé Danhib'apito hã rowẽ za'ẽne hã ĩpẽ'ẽ 'remhã ma tô ĩma tisõ, sa'ẽtẽ na. Te te ĩma i'manharĩzéb u'âbâ, wa nasi ĩ'rãiwahutu haré ne. Wa nasi ĩnhitob'ru norĩ na hã aihâ za'ra. Duré ĩpẽ'ẽ 'remhã ĩma rowẽ uptabi di, 'Re ihâimana u'âsi mono te te ĩpawaptobzém na hã.