1 Pedru 1:3 - ꞌRe Ihâimana Uꞌâsi Mono Zadawa Wasuꞌu

³ 'Re ihâimana u'âsi mono ãma si oto 're wawata u'âsi za'ra wa'aba mono, Wanhib'apito Zezu Cristuhu mama ãma. E marĩ wa. Ipẽ'ẽzézé hã sa'ẽtẽ na tãma 're hâimana mono wa, ma tô wa'apoto té, wapẽ'ẽ 're, wahâimanazép té iwẽ na si oto ãma 're wahâimana za'ra mono da. Zezu Cristu hã dâ'â uptabi nherẽ, ma tô Imama hã ab're hawi hâiwa'utu, tiwaihu'u pese na. Taha zarina, wa za duré wasina sô 're wanhimipari za'ra, 're wadâ'â za'ra mono pari, te te 're iwa'ahâiwa'utu mono zéb zô.

1 Pedru 1:3 ပူးပေါင်းရင်းမြစ်များ

Salmu 41:13

Uburé Danhib'apito, Izaraéu nhihudu norĩ te, 'Re ihâimana u'âsi mono ãma si 're wawata za'ra wa'aba mono, õne u'â si'utõrĩ ãna! Tane tô! Tane tô!

Ezodu 34:6

Tawamhã Mozésihi nho're te te oto ro'razâri wamhã, ma tô mreme 'rãihâ na tinha ãne: — Wa hã Uburé Danhib'apito, 'Re ihâimana u'âsi mono! Wa hã da'ãma 're ĩsiwãrĩ wẽ mono 'wa, duré da'ãma 're ĩpẽ'ẽzé mono 'wa. Dazada hã 're ĩnhiti'ru su'u mono õ di. Duré dama ĩ'umnhasizé, ĩnhimizawizé me hã sa'ẽtẽ uptabi zahuré di.

Zona 4:2

Ãne te mre: — Ĩnhib'apito 'Re ihâimana u'âsi mono, e ãne hã te nharĩ õre bâ, ĩnhipti'ai hawi we ĩwatobro wana ré hã, tô ãne na i'manharĩzém na hã. Taha zarina, wa tô ĩsima rowairébé, Espãnha u si ĩmorĩ da, aiwi ĩsimani da. Ĩma waihu'u pese di, a hã 'Re ihâimana u'âsi mono asimizawi pese na hã, duré da'ãma i'aipẽ'ẽzé pese na hã. Duré ĩma waihu'u pese di, da'ãma i'aiwa'a su'u õ na hã, duré iwẽ na si dama 're i'ab'manharĩ u'âsi mono na hã. Te duré 're asi'madâ'â u'âsi mo, asimirosa'rata na ãma 're isaprĩ mono na, taha zarina, 're dahâ za'ra mono tõ da.

Zuwã 1:13

E i'ra siro, ma tô ta norĩ hã 're rere'e, ti'ai ãma timama sipoto na. Mare di. Taha zarina, i'ra siro, 're rere'e mono õ di. 'Re ihâimana u'âsi mono si ma tô ãma 're 'ra za'ra.

Roma 12:12

Uburé marĩ iwẽ hã 'Re ihâimana u'âsi mono, za te te wama 're i'apisutu mono zéb zô, wa za wanhimipari nhimi'ẽ na sô 're wahâimana za'ra, wato sina. Zezusihi zazei'wa oto 're anomro aba mono wa, da te 're ai'ruiwapari za'ra wa'aba mono nherẽ, te za asiptete sina ãma 're anomro u'âsi aba mo. 'Re ihâimana u'âsi mono ma, te za 're aimreme zusi u'âsi aba mo.

Roma 15:13

'Re ihâimana u'âsi mono hã waihu'u pese wa, te za te te 're wa'apawaptob u'âsi, marĩ iwẽ hã te te wama 're ipisutu za'ra mono zéb zarina, za te te wama ãma 're i'a'uwaimrami mono zéb zô, wa te wasiwi 're umnhasi za'ra mono sina, sô 're wanhimipari u'âsi za'ra mono da. Tahawa, wa ai'ãma tãma 're ĩmreme u'âsi za'ra wa'wa, atoi uptabi na 're aihâimana u'âsi za'ra wa'aba mono da, duré rowẽ si te te aima 're pisutu za'ra wa'aba mono da, asina 're i'umnhasi za'ra wa'aba mono paramhã. Ipẽ'ẽzani nhimipawaptobzéb zarina, marĩ iwẽ uptabi hã 'Re ihâimana u'âsi mono, za te te aima 're isõmri za'ra wa'aba mono zéb zô, asiwi 're umnhasi za'ra wa'aba mono sina, sô 're asimipari za'ra wa'aba mono zém na, 'râwi asima ãma 're sa'ẽtẽ za'ra wa'aba mono da, wa tô te ĩsima 're aiwẽ za'ra wa'wa.

Roma 4:25

'Re ihâimana u'âsi mono hã ma tô Zezusi hã dama tisõ, da te dasiwi wĩrĩ da, wawasété na 're wanomro mono wa. Ma tô duré hâiwa'utu, taha na te te 're wa'awẽsãmri mono da, wawasédé hã te te oto wa'ãma 're ab'madâ'â tõ mono da, 'Re ihâimana u'âsi mono hã.

Roma 5:10

'Re ihâimana u'âsi mono nhitob'ru, wa aré 're wanomro. Tane nherẽ, ti'ra dâ'âzém na ma tô wa'ãma 're siwadi za'ra oto. Tawamhã isiwadi oto 're wahâimana za'ra mono wa, te za tô oto Zezusi hã te te 're wa'anho'reptu, dâ'â nherẽ, apâ hâiwa'utu wa, dâ'â ãna 're hâimana u'âsi mono wa za oto.

Roma 8:11

'Re ihâimana u'âsi mono hã Zezusihi hâiwa'utu'wa hã, Ipẽ'ẽzani te aipẽ'ẽ 're, 're sãmra za'ra wa'wa. Tô õ hã Cristu te te ihâiwa'udu hã te za aihâiba hã niwamhã aiwi 're si'utõrĩ pese za'ra wa'aba mono nherẽ, te te 're aihâiwa'utu za'ra wa'wa, Ipẽ'ẽzani hã aipẽ'ẽ 're, 're isãmra za'ra wa'aba mono zéb zarina.

Roma 8:24

'Re ihâimana u'âsi mono, iwẽ si za te te wama 're i'apisutu mono zéb zô, wa te 're wawã za'ra mono ãna, sô 're iwanhimipari za'ra mono zéb zarina, ma tô te te 're wa'anho'reptu. Ti'ab ré, marĩ zô 're wanhimipari za'ra mono ré, wa te oto 're 'madâ'â za'ra mono wamhã, e wa za õne u'âsi sô 're wanhimipari za'ra. Mare di. Tâibâ oto, sô 're iwanhimipari za'ra mono zé hã za. Marĩ zô 're iwanhimipari za'ra mono zé hã, zahadu wa te 're 'madâ'â za'ra mono õ ré si, wa za tô wanhiptete sina sô 're wanhimipari u'âsi za'ra, wa te 're sazei utõrĩ za'ra mono ãna.

1 Corĩtu 13:13

Ãne, wa za oto aima ãma 'rãsutu za'ra wa'wa, isazei'wa norĩ nhimizawi pese hâimanazém na hã. 'Re ihâimana u'âsi mono hã da te dasina 're i'umnhasi pese za'ra mono zé hã, si'utõrĩ õ di za. Duré 'Re ihâimana u'âsi mono umnhasi sina, iwẽ zô dasina 're idanhimipari za'ra mono zé hã, si'utõrĩ õ di za. Duré 're idanhimizawi pese za'ra mono zéb zama hã, si'utõrĩ õ di za. E ma hã tawamhã, danhipai u ipire uptabi. 'Re idanhimizawi pese za'ra mono zé, ta hã danhipai u, ipire uptabi na te za 're hâimana.

1 Corĩtu 15:20

Tazahã, 'Re ihâimana u'âsi mono hã ma tô apâ hâiwa'utu tô sena, Cristu hã. E marĩ te tawamhã, wama wasu'u za'ra, Cristu apâ ihâiwa'utuzé hã. Niwapsi uburé isazei'wa 're idâ'â za'ra mono norĩ hã, tô sena za apâ 'Re ihâimana u'âsi mono te te ihâiwa'utu za'ra zé, te wama wasu'u za'ra. Taréi õ di, ã hã.

2 Corĩtu 1:3

'Re ihâimana u'âsi mono ãma si, 're wawata za'ra wa'aba mono za, Wanhib'apito Zezu Cristuhu mama ãma. Ta hã te wa'ãma 're siwamri u'âsi. Te duré te te 're wa'apawaptob u'âsi, wapẽ hã i're wama 're simi'wara u'âsi mono da.

Galata 6:16

Õhõ wasu'u zarina 're dahâimana za'ra mono wamhã, wa ĩsima te 're da'awẽ, rowẽ na si oto 're danomro mono da, 'Re ihâimana u'âsi mono da'ãma 're ipẽ'ẽzé mono zéb zarina. Taha da, wa za da'ãma te tiwi 're rowaptẽrẽ u'âsi, uburé 'Re ihâimana u'âsi mono nhib'a'uwẽ norĩ ãma hã.

Éfézu 1:17

Wamama hã waihu'u pese za'ẽtẽ na dâ'âsina, wa aima za'ra wa'aba te tiwi 're rowaptẽrẽ u'âsi, hâiwa hawi dahâimanazém na rowaihu hã Tipẽ'ẽzani na te te aima 're sõmri u'âsi za'ra wa'aba mono da, duré Wamama hã ihâimanazém na 'râwi 're waihu'u za'ra wa'aba mono da, 'Re ihâimana u'âsi mono hã, Wanhib'apito Zezu Cristuhu 'madâ'â'wa hã.

Éfézu 1:3

'Re ihâimana u'âsi mono hã sõpru uptabi di, Wanhib'apito Zezu Cristuhu mama hã. Ta hã Cristuhu ãma 're wanomro mono wa, ma tô marĩ mono bâ wama ãma 're sõpru, uburé marĩ iwẽ na, hâiwa hawi. Tahawa, wama 're sõprub za'ra mono wa, ãma 're wawata u'âsi za'ra wa'aba mono za.

Éfézu 1:7

Cristu hã wedepo'o nhonhi'rãmi na wazada dâ'â wamhã, ma tô tidâ'âzém na wa'awa'â. Marĩ, wa te 're i'manharĩ wasété za'ra mono zé hã ma tô duré te te wama 're apari, wawasédé hã te te wa'ãma 're ab'madâ'â tõ mono da oto. Ãne wamhã, ma tô Wamama hã wa'ãma uwaimrami wẽ, sa'ẽtẽ na tãma 're hâimana mono wa, te te 're iwa'azawi pese mono zé hã.

Éfézu 2:4

Tane nherẽ, wawasété na 're wanomro mono wa, 're iwadâ'â za'ra mono ne, 're wahâimana za'ra mono nherẽ, ma tô Cristu te te ihâiwa'utuzém ne wapẽ'ẽ 're te te 're wa'ahâiwa'utu, rowẽ na si oto ãma 're wanomro mono da. Ãne ma tô wama ãma uwaimrami wẽ za'ra 'Re ihâimana u'âsi mono hã, ipẽ'ẽzézé hã sa'ẽtẽ na tãma 're hâimana mono wa, duré tãma wazawi uptabi za'ra wa. Tahawa, te te 're iwa'anho'reptui mono zé wa'rãmi, marĩ zô 're simipari mono ãna, ma tô, tô te te 're wa'anho'reptu.

Éfézu 3:20

'Re ihâimana u'âsi mono hã waihu'u pese di, te te wama ãma 're i'a'uwaimrami mono zéb da hã, marĩ iwẽ zô wa te 're irosa'rata za'ra mono zém nhipai u, duré marĩ iwẽ hã wa te tiwi 're iwaptẽrẽ za'ra mono zém nhipai u zama. Tiwaihu'u pese na te te 're iwa'apawapto mono zéb zarina, tãma waihu'u pese di, iwẽ na te te wama ãma 're i'a'uwaimrami mono zéb da hã.

Colosu 1:23

Tahawa, õne haré te za Cristuhu wasu'uwẽ si asina 're i'umnhasi za'ra wa'aba mo asiptete sina, 'ri hã ẽtẽ nhisiwi siptete na 're sa mono wa, simei waihu'u õ na 're isa mono ne. Te za tô ãma 're aihâimana u'âsi za'ra wa'aba mo, tiwi asina 're aipahâ za'ra wa'aba mono ãna. Imorĩ'rata na Cristuhu wasu'uwẽ hã wapari na'rata za'ra wa'aba wamhã, iwẽ uptabi hã hâiwa ãma asô 're isimi'wara aba mono wasu'u wi, tiwi asina 're ai'ré za'ra wa'aba mono õ di za, sô 're asimipari za'ra wa'aba mono wasu'u wi hã. Ãhã wasu'uwẽ hã ropâ ma tô da te dasima 're wasu'u za'ra, da te 're waihu'u za'ra mono da. Duré wa hã Paulu, wa ãhã wasu'uwẽ na te dama 're romhuri u'âsi.

Colosu 1:27

'Re ihâimana u'âsi mono hã ma tô sima ãma roti, ãhã wasu'u hã iwẽ uptabi hã aré da te 're iwaihu'u za'ra mono õ hã te te oto dama awasu'u hâi'ré da sõ'awi, dapoto mono bâ da te oto 're waihu'u za'ra mono da, zudeu'õ norĩ zama. Ãhã wasu'u hã aré da te 're iwaihu'u za'ra mono õ hã, ãne: Cristu hã te oto aipẽ'ẽ 're, 're sãmra za'ra wa'wa. Tahawa, te za tô taha zô si 're asimipari za'ra wa'aba mo, 'Re ihâimana u'âsi mono, iwẽ uptabi hã za te te wama 're i'apisutu mono zô si. Ãne 'Re ihâimana u'âsi mono wasu'u hã, ã hã aré da te 're iwaihu'u za'ra mono õ.

1 Tesalonita 1:3

Tãma 're wamreme zusi mono sina, wa ai'ãma 're wapo're pu'u u'âsi za'ra wa'wa, 're aihâimana wẽ za'ra wa'aba mono zém na, ãma 're wawata za'ra mono da. A norĩ wa'wa hã sazei pese za'ra wa'aba wa, marĩ iwẽ si te 're i'manharĩ za'ra wa'aba mo. Wamama hã, Wanhib'apito 'Re ihâimana u'âsi mono, te 're isawi pese za'ra wa'aba mo. Taha zarina, te duré 're idazawi pese za'ra wa'aba mo. Tahawa, dawi 're asisawi za'ra wa'aba mono õ di, marĩ iwẽ hã dama 're 'manharĩ za'ra wa'aba mono tõ da. Duré Wanhib'apito Zezu Cristu we imorĩzéb zô, asimi'ẽ na te sô 're asimipari u'âsi za'ra wa'aba mo. Ãne na 're anomro wẽ wa'aba mono na, wa ai'ãma 're wapo're pu'u u'âsi za'ra wa'wa, wawa'a ãna, Wamama ma 're wamreme zusi mono wamhã.

1 Tesalonita 4:13

Wasisãnawã norĩ, ni'wa hã 'Re ihâimana u'âsi mono zazei'õ'wa, dawi dâ'â wamhã, te za isiré norĩ hã ãma 're pẽ'ẽzé pese za'ra, apâ 're idahâiwa'utu za'ra mono zé wasu'u hã te te 're waihu'u za'ra mono õ wa. Tanei õ di za, a norĩ wa'wa hã. Tahawa, wa wasima wẽ za'ra ni, sena na waihu'u za'ra wa'aba da, dadâ'â wasu'u hã.

2 Tesalonita 2:16

'Re ihâimana u'âsi mono hã Wamama hã, te te 're wa'azawi pese. Te duré te te 're wa'apawapto, wapẽ'ẽ 're, 're wanomro wẽ u'âsi mono da, wahâimana nhiptete sina wanhimi'ẽ na sô 're wanhimipari u'âsi za'ra mono da, iwẽ zô. Tahawa, wa za Wamama wi, wa te 're rowaptẽrẽ u'âsi za'ra, duré Wanhib'apito Zezu Cristuhu wi zama, ato sina 're aihâimana za'ra wa'aba mono da, duré asiptete sina iwẽ na si tãma 're romhuri pese za'ra wa'aba mono da, asimirowasu'u wẽ za'ra wa'aba na hã.

1 Timotiu 1:14

Wanhib'apito hã tinhimizawi pese zém na ma tô ĩpawapto pese, te saze da, duré dazawizéb da hã, ĩma hâimana da. Aihĩni Cristu Zezusihi ãma 're ihâimana za'ra mono norĩ hã te te 're ipawaptob za'ra mono ne, ma tô ĩpawapto duré.

Titu 2:13

Ãne wa za 're wanomro, Wa'anho'reptui'wa zô wanhimipari sina. Wa za rowẽ u'âsi 're wahâimana za'ra, wasina 're wanhimipari za'ra mono sina. Rowa'a za'ẽtẽ ré, apâ wei morĩ wapsi, wa za watõmo na 'madâ'â za'ra ni, danhipai u 're ihâimana mono hã, Wanhib'apito Zezu Cristu hã.

Hebreu 3:6

Tane nherẽ, te Cristuhu si tãma umnhasi na uburé isib'a'uwẽ norĩ hã te te tãma 're 'madâ'â pese za'ra, pire uptabi na, 'Re ihâimana u'âsi mono 'ra hã. Wa norĩ hã Cristuhu ãma si 're wanomro mono wa, da te wama 're rob'manharĩ wasété za'ra mono nherẽ, wapahi ãna wanhiptete sina ãma 're wanomro mono wamhã, wa za tô isib'a'uwẽ na tãma 're wahâimana u'âsi za'ra. 'Re ihâimana u'âsi mono hã iwẽ si, za te te wama ipisutu za'ra zéb zô, wama umnhasi sina sô 're iwanhimipari u'âsi za'ra mono zéb zarina, tiwi 're wasipizari za'ra mono õ wamhã, tawapsi wa za tô isib'a'uwẽ na tãma 're wahâimana u'âsi za'ra.

Tiagu 1:18

Te te sima 're ida'awẽ mono zéb uwaibaba, ma tô timreme na te te 're wa'apoto té, wapẽ'ẽ 're, uburé isimipoto norĩ nhipai u, isib'a'uwẽ tãma 're wahâimana za'ra mono da oto. Ma tô, tô sena na timreme na te te 're wa'apoto té, wapẽ'ẽ 'remhã.

1 Pedru 1:13

Zezu Cristu hã nimahã na te za wei mo apâ. Tahawa, te za aihâimana nhimiza'rese 're aihâimana za'ra wa'aba mo. Aihâiba na te za 'râwi 're asi'madâ'â za'ra wa'aba mo. Zezu Cristu hã apâ wei morĩ wapsi, te za aima 're irowẽ za'ra wa'aba mono zé hã aima pisutu za'ra wa'wa, hâiwa ãma. Taha zô si te za asina 're asimipari u'âsi za'ra wa'aba mo.

1 Pedru 1:21

Cristu hã dâ'â uptabi nherẽ, ma tô ab're hawi hâiwa'utu, 'Re ihâimana u'âsi mono hã, rowẽ uptabi te te tãma pisutu da, hâiwa ãma. Ãhã wasu'u hã aima waihu'u pese za'ra wa'aba wa, te oto õhõ si asina 're i'umnhasi za'ra wa'aba mo, te te dama iropisutuzé hã te te aima ãma uwaimrami za'ra wa'aba da.

1 Pedru 1:23

'Re ihâimana u'âsi mono zadawa wasu'u hã pire na te 're hâimana u'âsi. Niwa si'utõrĩ waihu'u õ di za. Ta hã ma tô oto timreme na aipoto téb za'ra wa'wa aipẽ'ẽ 're, i'ra si oto 're anomro aba mono da. Ti'ai ãma damama norĩ si te za nimahã na dawi 're si'utõrĩ za'ra. Tanei õ di, Aimama 'wa hã aipẽ'ẽ 're te te 're i'aipoto téb za'ra wa'aba mono hã. Niwa ta hã dame si'utõrĩ waihu'u õ di.

1 Pedru 2:2

Ai'uté ipoto té hã tina hâiwa'u zô 're i'ru'ru mono ne, te za Wanhib'apito nhimiroti zô si 're irob'ruiwapari za'ra wa'aba mo, ãma 're asiptete za'ra wa'aba mono da, aihâimana wasété hawi asõ'reptuzé hã 'râwi oto asina 're waihu'u za'ra wa'aba mono da.

1 Pedru 3:15

Cristu hã Asib'apito aima 're hâimana za'ra wa'aba mono wa, te za aihâimana prédup sina 're iwapari pese za'ra wa'aba mo. Duré Cristu 're isaze za'ra wa'aba mono zém na, da te 're asadanharĩ za'ra wa'aba mono wamhã, awa'awi te za dama 're asiwasu'u waré za'ra wa'aba mo.

1 Pedru 3:21

Ta hã â hã, â dawabzuri, te wasu'u, danho'reptuzé. E da'u're wa, da'upsõzé, te â dawabzuri hã wasu'u. Mare di. 'Re ihâimana u'âsi mono ma, da te dasi'ãma 're iropisutu za'ra mono zé te wasu'u, â dawabzuri hã. Dawasédé te te dama 're apari mono wa, 'râwi 're dasiwaihu'u za'ra mono õ di oto, dawasété na hã. Tahawa, dama 're irowẽ za'ra mono zéb zarina, te za oto dasina da te tãma 're ropisutu za'ra, ãma 're idanomro mono zéb da hã. Zezu Cristu hã dâ'â uptabi nherẽ, Imama hã ab're hawi te te hâiwa'utu wa, duré apâ 're morĩ wa, te oto asõ'reptuzé hã aima tihâimana za'ra wa'wa.

1 Pedru 3:5

Ãne si ma tô wahi'rata sipi'õ norĩ hã 're nomro, 're ihâimana wẽ za'ra mono norĩ hã. 'Re ihâimana u'âsi mono si, ma tô ta norĩ hã te te sina 're umnhasi za'ra, te te 're pawapto wẽ za'ra mono da. 'Re inomro wẽ mono na, ma tô duré ta norĩ hã sina 're sõpré. Tahawa, ma tô timro mreme si te te 're wapari pese za'ra.

1 Zuwã 2:29

Cristu hã 're imorĩ wẽ uptabi na hã aima waihu'u pese za'ra wa'aba di oto, marĩ na 're isiwasété mono õ na hã. Tahawa, ni'wam norĩ hã 'Re ihâimana u'âsi mono te te dama 're i'apisutu mono zéb zarina si 're nomro wẽ mono wamhã, tawapsi te za oto iwaihu'u za'ra wa'wa, ta norĩ hã 'Re ihâimana u'âsi mono nhib'a'uwẽ, sena na 're inomro mono na hã.

1 Zuwã 3:3

Õhõ zô rob'umnhasi sina, sô 're wanhimipari za'ra mono ré, wa za uburé marĩ iwasédé hã wa te wasiwi 're wẽ'õ pese za'ra 'râwi, iwẽ na si 're wahâimana za'ra mono da. Cristu hã wasété ãna 're imorĩ ne, wa za 're wahâimana za'ra.

1 Zuwã 3:9

'Re ihâimana u'âsi mono 'ra norĩ hã tiwasédé te te 're 'manharĩ u'âsi za'ra mono õ di za. Mare di. E marĩ wa. 'Re ihâimana u'âsi mono hã ipẽ'ẽ 're, 're ipoto téb za'ra mono zé hã te te tãma 're anhomri mono wa. Duré 'Re ihâimana u'âsi mono hã, ãma 're 'ra za'ra mono wa, tiwasédé hã õne u'âsi te te 're 'manharĩ waihu'u za'ra mono õ di za tô.

1 Zuwã 4:7

Ĩsisãnawã norĩ, 're idasisawi pese za'ra mono zé hã 'Re ihâimana u'âsi mono te wa, wa za ãma 're wasisawi pese uptabi za'ra. Ni'wam norĩ hã te te 're dazawi pese za'ra mono wamhã, ta norĩ hã 'Re ihâimana u'âsi mono 'ra, te oto 're hâimana za'ra. 'Râwi te duré te te 're waihu'u pese za'ra, 'Re ihâimana u'âsi mono hâimanazé hã.

1 Zuwã 5:1

Ni'wam norĩ hã, Zezu Cristu, Danho'reptui'wa da, 'Re ihâimana u'âsi mono te te ipisutu na te te 're sazei pese za'ra mono wamhã, ta norĩ si te 'Re ihâimana u'âsi mono 'ra, 're hâimana za'ra. Ni'wa hã aibâ hã wama sawi pese za'ra wamhã, taha u'âbâ, wa za duré i'ra norĩ hã wa te 're sawi pese za'ra.

1 Zuwã 5:18

Ni'wam norĩ hã 'Re ihâimana u'âsi mono hã ãma 're 'ra za'ra mono wa, isib'a'uwẽ na oto 're nomro wẽ mono wamhã, tiwasédé hã te te oto duré 're i'manharĩ u'âsi za'ra mono da hã mare di za. 'Re ihâimana u'âsi mono 'ra hã, Zezusi hã oto ãma 're sisaprĩ u'âsi za'ra mono wa, tiwasédé hã te te 're 'manharĩ waihu'u za'ra mono õ di za tô oto duré. Tahawa, iwasété uptabi hã te te oto 're upi waihu'u za'ra mono õ di za, Wa'uburé hã. Ãne hã wama waihu'u pese za'ra di oto.