1 Pedru 1:21 - ꞌRe Ihâimana Uꞌâsi Mono Zadawa Wasuꞌu

²¹ Cristu hã dâ'â uptabi nherẽ, ma tô ab're hawi hâiwa'utu, 'Re ihâimana u'âsi mono hã, rowẽ uptabi te te tãma pisutu da, hâiwa ãma. Ãhã wasu'u hã aima waihu'u pese za'ra wa'aba wa, te oto õhõ si asina 're i'umnhasi za'ra wa'aba mo, te te dama iropisutuzé hã te te aima ãma uwaimrami za'ra wa'aba da.

1 Pedru 1:21 ပူးပေါင်းရင်းမြစ်များ

Mateu 28:18

Tawamhã Zezusi hã ma tô 'râwi itẽme timorĩ za'ra oto. Taha wamhã, ma tô tãma nharĩ za'ra, ãne: — Ĩmama hã ma tô ĩma pisutu, isadawa para dama ĩpire na 're ĩhâimana mono da, ti'ai ãma, duré hâiwa ãma zama.

Zuwã 12:44

Tawamhã Zezusi te da'ab'mahâ: — Ni'wam norĩ hã Danho'reptui'wa na te te sina 're ĩ'umnhasi za'ra mono wamhã, ĩzazei'wa si 're nomro mono õ di za. Ĩ'u'âbâ te za we ĩzatõrĩ'wa zazei'wa duré 're nomro.

Zuwã 14:1

Tawamhã Zezusi te duré tãma nharĩ za'ra, ãne: — Aihâtâ'â za'ra wa'aba õ di za. 'Re ihâimana u'âsi mono si, te za asina i'umnhasi za'ra wa'wa. Ĩzama te za duré asina ĩ'umnhasi za'ra wa'wa, Danho'reptui'wa na hã.

Zuwã 14:6

Tawamhã Zezusi ma te asa ãma tãma wa'rã ãne: — Wa hã bâdâdi uptabi na, wa ĩsiwasu'u, duré tô sena na rowaihu'u wẽ nhomri'wa na, duré 're idanomro u'âsi mono zé nhomri'wa na. Tahawa, ni'wa hã ĩ'ãma 're morĩ õ nherẽ, Ĩmama u hã wisi waihu'u õ di za.

Zuwã 17:1

Tawamhã tãma siwasu'u za'ra pari, Timama ma mreme da, te hâimo rob'madâ, Zezusi hã. Ãne te Timama ma tinha: — Ĩmama, bâdâ ĩma ipisutuzé hã ma tô iwa waptãrã. Ma'ãpé, we ĩpawapto na, ĩ'ãma irotizé hã te dama ĩsina uwaimrami da, ai'ãma 're dawata u'âsi za'ra mono da.

Zuwã 17:24

— Ti'ai õ ré te 're ĩzawi pese mo, marĩ õ uptabi ré. 'Re ĩzawi pese mono wa, ma tô ĩma ipisu, ĩ'ãma 're dawata u'âsi za'ra mono da, duré ĩhâiba na rowa'a za'ẽtẽ ré, 're ĩhâimana u'âsi mono da. Ĩmama, ãne na hã te te 're ĩ'madâ'â za'ra mono da hã, wa tô ĩsima wẽ za'ra, za 're ĩhâimana mono zéb ãma, ĩ'rata 're si'ubumroi u'âsi mono da, ĩma ipisutu za'ra norĩ hã.

Zuwã 17:5

Ti'a õ ré hã, wa tô aiwa wawaihu'u pese na wasiré 're wasimasisi u'âsi, marĩ õ uptabi ré hã. Tahawa, rowẽ uptabi di, wama. Ma'ãpé, we ĩma nharĩ, aiwa wasiré 're wasimasisi u'âsi mono da duré apâ.

Zuwã 3:34

Ti'ra we te te satõrĩ wamhã, ma tô Tipẽ'ẽzani hã tãma tisõ, iré 're morĩ u'âsi da. Tahawa, te Timama nhimiroti si te te dama 're wasu'u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:24

Tane nherẽ, 'Re ihâimana u'âsi mono hã ma tô hâiwa'utu, ab're hawi watobro da, dâ'â uptabi nherẽ. Ma tô duré pawapto, dâ'â u'âsi nomro tõ da. Idâ'âzé tãma wapure wa, dâ'â u'âsi nomro waihu'u õ di, Zezusi hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 3:13

'Re ihâimana u'âsi mono, wahi'rata norĩ nhib'apito, Abra'ãhã nhib'apito, duré Izaquihi nhib'apito, duré Zacoho nhib'apito. Ta hã ma tô Zezusi hã wẽsã, tãma iromhuri wẽ 'wa hã. Tane nherẽ, Zezusi hã ma tô asiwi iwẽ'õ za'ra wa'wa. Ma tô asiwi isõmri 'wa, Pilatuhu ma. Taha nho'a, ma tô asiwi iwẽ'õ za'ra wa'wa, te te sima wẽ nherẽ Pilatu hã, morĩ da apâ, dazazém hawi.

Zezusihi zadawa wasuꞌuꞌwa norĩ nhimiromhuri na robꞌuiꞌéré 3:15

Dahâimana wẽ zéb da, dapẽ'ẽ wẽ hã za te te dama 're i'anhomri mono 'wa hã, aima za'ra wa'aba, da te dasiwi wĩrĩ da, ma tô dama i'ru za'ra wa'wa. Tazahã 'Re ihâimana u'âsi mono, ma tô apâ hâiwa'utu, dâ'â uptabi nherẽ. Wa norĩ hã Zezusi apâ hâiwa'utu wa, wa te isabu za'ra hã wa tô wa te dama 're wasu'u za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:10

Tawamhã a norĩ wa'wa hã te za iwaihu'u pese za'ra wa'wa, aihâiba mono bâ wa'aba. Uburé wasiré Izaraéu nhihudu norĩ zama te za duré waihu'u pese za'ra za. Zezu Cristuhu zadawa para, wa tô pese ni, ihi'ré hã. Zezusi hã Nazaré ãma aré 're isãmra mono hã asiwi wĩrĩ aba da, ma tô dama i'ru za'ra wa'wa. Taha paramhã ma tô dasiwi sasõmri ni, wedepo'o nhonhi'rãmi na. Ãhã wa, ma tô duré dârâ. Dâ'â nherẽ, 'Re ihâimana u'âsi mono, ma tô apâ hâiwa'utu. Taha zadawa para, te aibâ ihi'ré hã ãme za, rowẽ na. Ma tô tipese oto.

Roma 10:9

Zezusi hã Asib'apito uptabi na, asadawa na danho'a 're sisi za'ra wa'aba mono wamhã, duré 'râwi aipẽ'ẽ 're, 'Re ihâimana u'âsi mono, Zezusi te te ihâiwa'utuzém na, 're sazei pese za'ra wa'aba mono wamhã, tawapsi te za te te 're asõ'reptu za'ra wa'wa, 'Re ihâimana u'âsi mono hã.

Roma 4:24

Wa norĩ zama, wa te wasina 're i'umnhasi za'ra mono norĩ hã te za duré te te 're wa'awẽsãmri, Wanhib'apito Zezusihi hâiwa'utu'wa, wa te wasina 're i'umnhasi za'ra mono norĩ hã.

2 Corĩtu 6:15

Cristu hã bété. E Satanasihi me, te siré 're hâimana zahuré, aiwa. E tinhimirosa'rata na te duré 're sisaze zahuré, 're siwẽ'õ zahuré mono ãna. Mare di. Tane duré, isazei'wa norĩ hã aiwa 're hâimana za'ra mono õ di, isazei'õ'wa norĩ me hã. Ãne hã baba uptabi di, wama hã.

Éfézu 1:15

Aiwasu'u wẽ za'ra wa'wa hã ma tô we ĩtẽme tiwisi 'wa, Wanhib'apito Zezusihi zazei'wa oto 're anomro aba mono na, duré asiré isazei'wa norĩ 're isawi pese za'ra wa'aba mono na zama.

Colosu 1:27

'Re ihâimana u'âsi mono hã ma tô sima ãma roti, ãhã wasu'u hã iwẽ uptabi hã aré da te 're iwaihu'u za'ra mono õ hã te te oto dama awasu'u hâi'ré da sõ'awi, dapoto mono bâ da te oto 're waihu'u za'ra mono da, zudeu'õ norĩ zama. Ãhã wasu'u hã aré da te 're iwaihu'u za'ra mono õ hã, ãne: Cristu hã te oto aipẽ'ẽ 're, 're sãmra za'ra wa'wa. Tahawa, te za tô taha zô si 're asimipari za'ra wa'aba mo, 'Re ihâimana u'âsi mono, iwẽ uptabi hã za te te wama 're i'apisutu mono zô si. Ãne 'Re ihâimana u'âsi mono wasu'u hã, ã hã aré da te 're iwaihu'u za'ra mono õ.

1 Timotiu 1:1

Ĩ'ra Timotiu, wa hã Paulu, Cristu Zezusihi zadawa wasu'u'wa, wa ãma aima rob'ui'éré. Wanhib'apito wasu'uwẽ na te ãma i'aipo're pu'uzéb zarina, isazei'wa oto 're aimorĩ wa, wa ĩ'ra na asisi. 'Re ihâimana u'âsi mono hã Wanho'reptui'wa hã ma tô ĩpisutu, te dama 're sadawa wasu'u mono da. Taha da, ma tô Cristu Zezusihi zama ĩpisutu. Õhõ zô si, wa sô 're wanhimipari za'ra, marĩ iwẽ uptabi hã te te wama ipisutu za'ra zéb zarina, te te wama ãma 're a'uwaimrami mono da. Wamama ma, wa ai'ãma 're ĩmreme u'âsi, 'Re ihâimana u'âsi mono ma, duré Wanhib'apito Cristu Zezusihi ma zama, isimizawizé hã ai'ãma 're hâimana u'âsi mono da, duré ai'ãma 're pẽ'ẽzé u'âsi zahuré mono da, rowẽ u'âsi, ãma 're aimorĩ da.

1 Timotiu 3:16

Tô sena Zezu Cristuhu wasu'uwẽ hã wẽ uptabi di, aré dama sa'rese õ nherẽ, Wamama hã te te oto dama ihâi'ré hã wa te 're isaze za'ra mono zé hã, ãma 're iwanomro wẽ mono zéb da hã. Ãne te te dama iwaihu'uzé hã: “A'uwẽ na ma podo, ti'ai ãma. Duré tô sena i'ra 're imorĩ wẽ uptabi na, ma tô Tipẽ'ẽzani na dama waihu'u za'ra. Duré hâiwa ãma 'Re ihâimana u'âsi mono ma romhuri'wa norĩ hã ma tô titõmo na 'madâ'â za'ra. Duré a'uwẽ mono bâ 're idahâimana za'ra mono norĩ hã ma tô iwasu'uwẽ na da te 're dapo're pu'u za'ra, daro mono bâ. Ma tô duré da te dasina 're umnhasi za'ra. Duré rowẽ uptabi u ma tô mo, hâiwa u.”

Hebreu 2:9

Zezusi 're imorĩzép si wa tô wa te 're waihu'u pese za'ra. Ta hã ma tô 'Re ihâimana u'âsi mono hã pisutu, ti'ai ãma 're hâimana mono ré hã, hâiwa ãma tãma iromhuri'wa norĩ ma, wapu na a'â 're hâimana mono da, dasine. Zezusi hã dazada dâ'â da si, ma tô pisutu 'Re ihâimana u'âsi mono hã, da'ãma 're pẽ'ẽzé mono wa, da'ãma 're isiwãrĩ mono zéb da hã oto. Ma tô duré pisutu ti'ra hã, pire na dama 're hâimana u'âsi mono da oto, dazada idâ'âzéb zarina, te te irobzépata na te te sina tãma ãma uwaimrami wa, Timama ma hã.

Hebreu 6:1

Tahawa, Cristuhu wasu'uwẽ na 're saze za'ra wa'aba mono da, duréihã da te aima ãma 're irowasu'u na'rata za'ra wa'aba mono zém na si asima ãma 're rosa'rata u'âsi za'ra wa'aba mono õ di za oto. Taha nhipai u, te za 'Re ihâimana u'âsi mono nhimiroti mono bâ ipire uptabi hã 're iwaihu'u pese za'ra wa'aba mo Cristuhu wasu'uwẽ hã, aihâimana prédub sina ãma 're aihâimana za'ra wa'aba mono da. 'Re ihâimana u'âsi mono nhimiroti mono bâ, duréihã da te aima ãma 're irowasu'u na'rata za'ra wa'aba mono zém na apâ asima ãma 're roti zahu za'ra wa'aba mono õ di za oto. Taha na rowasu'u mono hã ma tô 're iwaihu'u pari za'ra wa'aba mo, dapẽ'ẽ 're, dadâ'â u'âsi ne dawasédé, da te 're 'manharĩ za'ra mono pari, ta hawi 're idasipizari za'ra mono zém na rowasu'u hã, duré 'Re ihâimana u'âsi mono, da te dasina 're i'umnhasi za'ra mono zém na rowasu'u hã.

Hebreu 7:25

Tahawa, te te 're da'anho'reptui waihu'u pese mono di ta hã, da te dasina 're i'umnhasi za'ra mono zéb zarina, 'râwi dapẽ'ẽ 're itẽme 're idasihutu mono norĩ hã, 'Re ihâimana u'âsi mono u. 'Re ihâimana u'âsi mono ma, da'ãma 're mreme mono da, dama 're hâimana u'âsi mono wa, te te 're da'anho'reptui waihu'u pese mono di, ta hã oto.

1 Pedru 1:11

Ãne te ta norĩ hã te te sima 're nharĩ za'ra: “E 'wa hã, Danho'reptui'wa za. E niwa te za tawamhã te te 're da'anho'reptu.” Ãne te ta norĩ hã te te sô 're rosa'rata pese za'ra, te te waihu'u za'ra da. Cristuhu pẽ'ẽzani hã ipẽ'ẽ 're, 're hâimana za'ra mono wa, ma tô tãma waihu'u siromo za'ra, Cristu hã za te te irobzépatazém na. Taha pari, rowẽ uptabi hã hâiwa ãma za tãma 're ihâimana mono na ma tô duré tãma waihu'u siromo za'ra.

1 Pedru 1:3

'Re ihâimana u'âsi mono ãma si oto 're wawata u'âsi za'ra wa'aba mono, Wanhib'apito Zezu Cristuhu mama ãma. E marĩ wa. Ipẽ'ẽzézé hã sa'ẽtẽ na tãma 're hâimana mono wa, ma tô wa'apoto té, wapẽ'ẽ 're, wahâimanazép té iwẽ na si oto ãma 're wahâimana za'ra mono da. Zezu Cristu hã dâ'â uptabi nherẽ, ma tô Imama hã ab're hawi hâiwa'utu, tiwaihu'u pese na. Taha zarina, wa za duré wasina sô 're wanhimipari za'ra, 're wadâ'â za'ra mono pari, te te 're iwa'ahâiwa'utu mono zéb zô.

1 Pedru 3:22

Cristu hã hâiwa u morĩ wa, te oto pire na Timama nhimire niwĩ 're sãmra, Danho'reptui'wa hã. 'Re ihâimana u'âsi mono ma romhuri'wa norĩ 'madâ'â'wa, te 're hâimana. Uburé hâiwa nho're ãma, pire na duré waihu'u pese na 're ihâimana za'ra mono norĩ ma zama, te pire uptabi na hã tãma 're hâimana za'ra.