1 Pedru 1:2 - ꞌRe Ihâimana Uꞌâsi Mono Zadawa Wasuꞌu2 Aipoto za'ra wa'aba õ ré, ma tô Wamama hã sima aipisutu siromo za'ra wa'wa, 'Re ihâimana u'âsi mono hã, isib'a'uwẽ na oto 're anomro aba mono da. Taha da, ma tô Tipẽ'ẽzani hã aipẽ'ẽ 're aima sõmri za'ra wa'wa, aiwẽ uptabi na oto õhõ ãma si 're anomro aba mono da, duré Zezu Cristuhu nhimiroti si 're wapari pese za'ra wa'aba mono da, duré Cristu hã dazada idâ'âzéb zarina, aipẽ'ẽ 're te te 're ai'a'upsõi wa'aba mono wa, aiwasété ãna ãma 're anomro aba mono da oto. 'Re ihâimana u'âsi mono ma, wa ai'ãma 're ĩmreme u'âsi za'ra wa'wa, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, duré ãma 're anomro aba mono da, taha ãma si. အခန်းကိုကြည့်ပါ။ |
1 Pedru 1:2
53 ပူးပေါင်းရင်းမြစ်များ
'Re ihâimana u'âsi mono hã bâdâ ma tô sima pisutu, za da te 're irobzépata za'ra mono zé, te te dama wãtari da, rowasété ré da'ãma romhâimana pahâ tõ da. Ãne hã te te sima pisutu õ 'wa'âhã, te aré uburé dasi'utõrĩ pese, za daré irob'rãsutuzém na hã. 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ zawi te, te za ãne hã tô 'manha.
E marĩ wa, wa ãne aima waihu'u za'ra wa'wa. Ni'wam norĩ hã te za datẽme 're nomro, danho'reptui'wa na, niha wamhã, 'Re ihâimana u'âsi mono zadawa 'mahârâ'wa na dama 're siwasu'u za'ra mono da, sadawa nhipese sina. Ta norĩ hã marĩ dama i'manharĩ waihu'u'õ hã te za duré te te dama 're 'manharĩ za'ra, 'Re ihâimana u'âsi mono zadawa param newa, da te ãma 're sasõmri za'ra mono da. Isazei'wa norĩ zama te te dame ãma 're saze za'ra mono da, te za ãne na te te dama 're romhõsi za'ra. Tane nherẽ, te te dame 're sazei waihu'u za'ra mono õ di za ta norĩ hã, 'Re ihâimana u'âsi mono te te sima 're apisutu siromo mono wa, ãma 're sib'a'uwẽ za'ra mono da hã.
Tawamhã hâiwa ãma tãma romhuri'wa hã tinhimnhihârâzém na te za oto amnhihâ, hârâ 'rãihâ uptabi na, daro mono bâ da te iwapari za'ra da hã. Simnhihârâ wi, hâiwa hawi tãma romhuri'wa norĩ hã te za we dazô satõrĩ za'ra, ti'ai u. Tawamhã 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ hã te za we daro mono bâ te te simro, itẽme.
'Re ihâimana u'âsi mono hã ma tô sima pisutu, bâdâ hã za da te 're irobzépata za'ra mono zéb da hã, te te dama wãtari da, rowasété ré da'ãma romhâimana pahâ tõ da. Ãne hã te te sima pisutu õ 'wa'âhã, te aré uburé dasi'utõrĩ pese, za da'ãma irob'rãsutuzém na hã. 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ zawi te, te za ãne hã 'manha.
E marĩ wa, wa ãne aima waihu'u za'ra wa'wa. Ni'wam norĩ hã te za datẽme 're nomro, danho'reptui'wa na, niha wamhã, 'Re ihâimana u'âsi mono zadawa 'mahârâ'wa na dama 're siwasu'u za'ra mono da, sadawa nhipese na. Ta norĩ hã marĩ dama i'manharĩ waihu'u'õ hã te za te te dama 're 'manharĩ za'ra, 'Re ihâimana u'âsi mono zadawa para newa, da te ãma 're sasõmri za'ra mono da. Isazei'wa norĩ zama te te dame ãma 're saze za'ra mono da, te za ãne na te te dama 're romhõsi za'ra. Tane nherẽ, te te dame 're sazei waihu'u za'ra mono õ di za ta norĩ hã, 'Re ihâimana u'âsi mono te te sima 're apisutu siromo mono wa, ãma 're sib'a'uwẽ za'ra mono da.
'Re ihâimana u'âsi mono hã ma tô tiwaihu'u pese na waihu'u siro romhâ ré, Zezusihi dâ'âzé hã. Te te iwaihu'u siromo zéb uwaibaba, duré te te sima iwẽzéb uwaibaba, ma tô aima pisutu za'ra wa'wa, Zezusi hã dama 'ru za'ra wa'aba da, 'Re ihâimana u'âsi mono nhimiroti waihu'u'õ'wa norĩ ma, ai'upana za'ra wa'aba, te te siwi wĩrĩ da. Tahawa, ma tô siwi sasõ, wedepo'o nhonhi'rãmi na. Taha na ma siwi tiwĩ.
— Ãhã na hã 'Re ihâimana u'âsi mono ma, wa za oto airẽme za'ra wa'wa, taha si te te 're ai'madâ'â za'ra wa'aba mono da oto. Isimizawi pese zé wasu'u na te za 're asõpré u'âsi aba mo. Ta hã te za te te 're aipawaptob u'âsi za'ra wa'wa, isaze za'ra wa'aba zém na aiprédup sina 're aihâimana za'ra wa'aba mono da. Uburé marĩ iwẽ hã tinhib'a'uwẽ norĩ ma, te te 're i'anhomri mono hã te za duré aima sõmri za'ra wa'wa, ate za'ra wa'aba da oto.
'Re ihâimana u'âsi mono hã tinhoprubzéb zarina ma tô Cristuhu ma ĩpisutu siro, ĩpire na te dama 're sadawa wasu'u mono da. Cristuhu ma, te 're romhuri wẽ mono da, ma tô ĩpisutu, ĩnhimiromhurizéb zarina dapoto mono bâ, da te 're sazei pese za'ra mono da, duré da te 're sazei pese za'ra mono wa, isimiroti si, da te 're 'madâ'â pese za'ra mono da.
'Re ihâimana u'âsi mono ma, asawi pese za'ra wa'aba di. Taha si ma tô aipisutu za'ra wa'wa, isib'a'uwẽ si oto 're anomro aba mono da, tãma. Tahawa, wa ãhã na aima ãma rob'ui'éré za'ra wa'wa, Roma ãma 're aihâimana za'ra wa'aba mono norĩ ma. Wamama ma, wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da.
Tinhib'a'uwẽ norĩ hã, tô sena te te siwi 're awẽ'õ mono õ di 'Re ihâimana u'âsi mono hã, duréihã isãna'rata hawimhã, te te sima 're i'apisutu mono norĩ hã. Duréihã Eliasi 'Re ihâimana u'âsi mono zadawa 'mahârâ'wa hã ma tô Izaraéu nhihudu norĩ ãma iwasété na ãma sa'ra, 'Re ihâimana u'âsi mono ma. Ãne na te te ãma irob'ui'érézé hã, aima waihu'u pese za'ra wa'aba di. Ãne ma tô ãma rob'ui'éré: “Wanhib'apito, asadawa 'mahârâ'wa norĩ hã ma tô ta norĩ hã te te 're simro. Duré ẽtẽ za'ra 'manharĩ hã, isisiwi aima danhoprubzéb da, marĩ, da te iwa 're isa'ra za'ra mono zé hã ma tô uburé te te 're prub za'ra, ẽne hã. Ĩsiwaprosi uptabi, wa oto 're ĩhâimana, te 're i'asawi pese mono hã. Taha 'ru te, te duré ĩzada 're hâimana za'ra, ĩzama te te siwi ĩwĩrĩ da.”
Zudeu norĩ hã Cristuhu wasu'uwẽ hã ma tô ahâ na te te siwi 're wẽ'õ za'ra. Tahawa, te oto 'Re ihâimana u'âsi mono nhitob'ru ne 're hâimana za'ra. Taha wa'rãmi, ma tô ai'ãma 're siwadi za'ra wa'wa, asiré zudeu'õ norĩ ãma hã. Tane nherẽ, isib'a'uwẽ 're nomro mono da, te te pisutu za'ra wa, te ta norĩ hã te te 're azawi pese u'âsi sima, ta norĩ hi'rata ma, te te sina iropisutu za'ra zéb zarina.
Tanei õ di, a norĩ wa'wa hã. Zezusihi wasu'uwẽ 're iwapari pese za'ra wa'aba mono zém na, ma tô daro mono bâ isazei'wa norĩ hã aiwasu'u za'ra wa'wa hã te te 're wapari ze za'ra. Tahawa, ma tô ãma asina ĩma 're irowẽ zani za'ra wa'aba mo. Ãne wa, wa za duré aima roti za'ra wa'wa. Asimiza'rese sina, te za marĩ iwẽ hã 're i'manharĩ za'ra wa'aba mono zéb da si, asina 're asõpré wa'aba mo. Marĩ iwasédé hã 're 'manharĩ za'ra wa'aba mono da, asima 're 'madâ'â za'ra wa'aba mono õ di za. Te za tiwi 're asiptete za'ra wa'aba mo, aiwasété wi hã.
Aipẽ'ẽ 'remhã asimirosa'rata wasété na 're aihâimana za'ra wa'aba mono wamhã, te za atâ'â u'âsi ne 're anomro aba mo, 'Re ihâimana u'âsi mono nhiti. 'Re ihâimana u'âsi mono pẽ'ẽzani nhimipawaptobzém na, uburé aiwasédé 're i'manharĩ za'ra wa'aba mono zé hã asiwi 're uprosi pese za'ra wa'aba mono wapsi, te za 're aihâimana u'âsi za'ra wa'aba mo, 'Re ihâimana u'âsi mono 'rata.
Wa norĩ hã 'Re ihâimana u'âsi mono, tinhib'a'uwẽ da, te te sima 're iwa'apisutu mono norĩ si, ma tô te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. E ni'wam norĩ hã wawasédé te te wa'ãma 're sa'ra mono da bâ bété. Ni'wam norĩ hã, wawasédé te te wa'ãma 're sa'ra waihu'u mono õ di za oto. Ãne wa za duré aima waihu'u za'ra wa'wa. Cristu Zezusi hã ma tô wazada dârâ, wa'upana. Apâ ma tô duré hâiwa'udu. Tahawa, te oto Timama nhimire niwĩ 're sãmra, dama pire na. Timama ma, te duré te te 're wa'awasu'u wẽ u'âsi, wazada idâ'âzéb zarina, wawasédé hã te te wa'ãma 're ab'madâ'â tõ mono da oto. Ãne wa, e ni'wam norĩ hã wawasété na te te wama 're nharĩ zahu za'ra mono da bâ oto. Mare di.
'Re ihâimana u'âsi mono nhimipisutuzéb zarina si, te oto Cristu Zezusihi ãma 're anomro aba mo. Cristuhu ãma si oto 're anomro aba mono wa, te tinhimirowaihu iwẽ hã te te aima 're waihu'u u'âsi za'ra wa'wa. Cristuhu dâ'âzém na si, ma tô 'Re ihâimana u'âsi mono hã te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. Taha zarina si, ma tô duré te te 're wa'apisutu, isib'a'uwẽ si oto tãma 're wahâimana wẽ za'ra mono da. Taha zarina si, ma tô duré wawasété hawi wa'anho'reptu, sitẽme te te 're wa'awaibui mono da.
Ãne na si, ma tô ni'wam norĩ a norĩ wa'wa aré 're aihâimana wasété u'âsi za'ra wa'aba mo, 're saze za'ra wa'aba mono õ ré hã. Tane nherẽ, 'Re ihâimana u'âsi mono hã Zezusihi dâ'âzém na, ma tô oto te te 're ai'upsõ za'ra wa'wa, aiwasété hawi. Ma tô duré te te 're aipisutu za'ra wa'wa, isib'a'uwẽ si oto ãma 're anomro wẽ wa'aba mono da. Aiwasédé hã te te oto ai'ãma 're i'ab'madâ'â aba mono õ zéb zarina, ma tô duré te te 're aiwẽsãmri za'ra wa'wa, Wanhib'apito Zezu Cristuhu zadawa para, 'Re ihâimana u'âsi mono pẽ'ẽzani nhimipawaptobzém na hã.
Taha na si, wa duré danhimiroti tô senai'õ hã wa te dawi 're a'uprosi. Ni'wam norĩ hã tiwẽ na sina 're wata za'ra mono wa, te 'Re ihâimana u'âsi mono hã tãma waihu'u ãna, 're hâimana za'ra. Ãne na danhimirosa'rata wasédé hã, wa duré wa te dawi 're a'uprosi u'âsi, 'Re ihâimana u'âsi mono nhimnhi'ãsi na, iwaihu'u pese zarina. Uburé Cristuhu nhitob'ru norĩ nhimirosa'rata wasédé hã wa duré wa te tiwi 're awaibui u'âsi, Cristuhu nhimiroti zarina si, te te oto 're rosa'rata za'ra mono da, ta norĩ hã iwẽ na si.
A norĩ wa'wa hã 'Re ihâimana u'âsi mono nhib'a'uwẽ, te tô oto 're aihâimana za'ra wa'aba mo. Ta hã te te 're asawi pese za'ra wa'aba mono wa, ma tô sima aipisutu za'ra wa'wa, taha ma si tãma 're aihâimana za'ra wa'aba mono da oto. Tahawa, da te 're robzépata za'ra mono wamhã, te za tô oto da'ãma 're aiwamri za'ra wa'aba mo. Te za duré 're idapawapto wẽ za'ra wa'aba mo. Asiré norĩ ma, aipire na 're aihâimana za'ra wa'aba mono na, 'râwi 're asi'madâ'â ze za'ra wa'aba mono õ di za. Aiwaimri te za dama 're aihâimana za'ra wa'aba mo. Duré aiwara sina dazada 're asahi za'ra wa'aba mono õ di za.
Wasisãnawã norĩ, 'Re ihâimana u'âsi mono ãma, wa 're wawata u'âsi za'ra, ãma 're anomro wẽ wa'aba mono wa, Wanhib'apito te te 're i'asawi pese za'ra wa'aba mono norĩ hã. 'Re ihâimana u'âsi mono hã ma tô marĩ õ uptabi ré sima aipisutu za'ra wa'wa, imorĩ'rata na te te 're asõ'reptu za'ra wa'aba mono da. Tawamhã Tipẽ'ẽzani hã ma tô te te aima 're anhomri 'wa, itẽme 're anomro wẽ wa'aba mono da. Ma tô duré ai'ãma tinhib'a'uwẽ uptabi za'ra wa'wa. Ma tô duré te te 're aipawaptob u'âsi za'ra wa'wa, tô sena iwasu'uwẽ hã 're sazei pese za'ra wa'aba mono da.
Te irobzépata da hã ĩma pire nherẽ, ĩsisawi õ di, te robzépata tõ da hã. Te 're robzépata mono nherẽ, 'Re ihâimana u'âsi mono hã tinhib'a'uwẽ da, te te sima ipisutu za'ra norĩ hã wa za te 're apawaptob u'âsi, Cristu Zezusi hã te te 're saze za'ra mono da, taha zarina tinho'reptuzé hã te te sina 're uwaimrami za'ra mono da, rowẽ na i'rata 're hâimana u'âsi za'ra mono da.
Wa hã Paulu, 'Re ihâimana u'âsi mono ma romhuri'wa, duré Zezu Cristuhu zadawa wasu'u'wa 're ĩmorĩ, wa ãma aima rob'ui'éré. Zezu Cristu hã ma tô ĩpisutu, te te datẽme ĩzatõrĩ da, 'Re ihâimana u'âsi mono nhib'a'uwẽ norĩ u, te tãma 're apawapto mono da, Wanhib'apito umnhasi sina 're hâimana za'ra mono da, duré Wanhib'apito wasu'u wẽ na te 're apawapto mono da, ãma 're nomro wẽ mono da. Taha da, ma tô datẽme ĩzatõ.
Wawasété na 're wanomro mono wa, wapẽ'ẽ na 'râwi 're iwasisãmri za'ra mono na, 're iwasiwẽ'õ za'ra mono zé hã ma tô Cristu tiwapru na hã te te wama 're apari, duréihã sasedoti norĩ hã te te ãma 're dahâiba wẽ za'ra mono da, danhimizama wapru na suru na te te ãma 're idahâiba di'i za'ra mono ne. Sasedoti norĩ hã 're sihâiba wasété za'ra mono ãna, 'Re ihâimana u'âsi mono u 're sisisi mono da, 're isihâiba upsõi pese za'ra mono ne, wa oto wa norĩ hã wahâiba upsõi pese ne tãma 're wahâimana za'ra, 'Re ihâimana u'âsi mono ma si. Tahawa, wa za oto wapẽ'ẽ na 'râwi itẽme 're wasihutu, wahâimanazé sena ré si, 'Re ihâimana u'âsi mono u hã, õhõ si wa te oto wasina 're i'umnhasi za'ra mono zéb zarina.
Mozési hã 'Re ihâimana u'âsi mono si te te sina 're i'umnhasi mono zéb zarina, ma tô duré Pascowa na dato hã te te 're i'manharĩ za'ra mono zéb da na tãma roti za'ra Izaraéu nhihudu norĩ ma hã, ta norĩ hã tisai 'manharĩ na te te ãma sãna'rata za'ra da, 'Re ihâimana u'âsi mono hã Mozésihi ma te te ipisutuzéb zarina. 'Re ihâimana u'âsi mono si te te sina 're i'umnhasi mono zéb zarina, ma tô duré Mozési hã tãma roti za'ra Izaraéu nhihudu norĩ ma hã, tinhimizama wapru na 'ridawa zada'ré hã te te ãma sapré za'ra mono da, hâiwa ãma romhuri'wa hã Dapãrĩ'wa na iwaptẽrẽ hã, aibâ tãma 're ipoto'rata za'ra mono hã te te tiwi simroi mono tõ da, Izaraéu nhihudu norĩ wi hã.
Zezusihi u ma tô duré asina 're irob'umhutu za'ra wa'aba mo. Ta hã te oto 'Re ihâimana u'âsi mono te te dama iropisutuzép té hã te te wa'ãma 're ab'madâ'â u'âsi. Duréihã Caĩ hã tino te te wĩrĩ wa, iwapru hã tiwi pu'u wamhã, 'Re ihâimana u'âsi mono te te i'ruiwa'âbâzé, te wasu'u, Abéu wapru hã. Tanei õ di, Zezusihi wapru hã. Dazada dâ'â wa, iwapru hã tiwi pu'u wamhã, 'Re ihâimana u'âsi mono hã dawasédé te te dama 're i'apari mono zé, te wasu'u.
Dazada idâ'âzém na si ma tô aiwa'âbâ za'ra wa'wa, iwapru hã tiwi ipu'uzém na. Ta hã te 're mo, pone'ẽrebâ iwẽ uptabi ne, da te dasiwi iwĩrĩ da hã, dawasété wa, dawa'âbâzéb da. Cristu hã wẽ uptabi na 're ihâimana mono hã ma tô tidâ'âzém na aiwasédé hã wa'âbâ za'ra wa'wa. Ta hã te te iwawa'âbâ za'ra zé hã wẽ uptabi di.
Wanhib'apito nhimiroti hã, tô sena. A norĩ wa'wa hã ma tô isimiroti hã 're iwapari pese za'ra wa'aba mo. Tahawa, marĩ iwasété na asima 're rosa'rata za'ra wa'aba mono õ di oto. Aiwẽ na 're anomro aba mono da si, te oto asima 're irosa'rata za'ra wa'aba mo. Dazawizé hã tô sena te oto aima 're hâimana za'ra wa'wa, asiré Wanhib'apito zazei'wa norĩ ãma. Tahawa, te za õne u'âsi 're asisawi pese za'ra wa'aba mo.
Tanei õ di, a norĩ wa'wa hã. 'Re ihâimana u'âsi mono, ma tô sima aipisutu za'ra wa'wa, isib'a'uwẽ si oto tãma 're anomro aba mono da. Sasedoti norĩ hã te te sima 're i'apisutu mono ne, te oto a norĩ wa'wa hã uburé Danhib'apito ma romhuri'wa, 're anomro aba mo, õhõ ãma si 're anomro aba mono da, ite da. Ta hã robra hawi ma tô rowa'a u sitẽme asô tihârâ za'ra wa'wa, 're anomro wasété aba mono zém hawi, rowẽ uptabi na si 're anomro aba mono da oto. Taha wasu'u na, tiwaihu'u pese na te te aima ãma 're i'uwaimrami wẽ za'ra wa'aba mono zém na, ma tô sima aipisutu za'ra wa'wa, ãma 're dapo're pu'u u'âsi za'ra wa'aba mono da.
Wa hã, Wanhib'apito zazei'wa norĩ 'madâ'â'wa, wa ãma aima rob'ui'éré za'ra wa'wa, tinhib'a'uwẽ da, 'Re ihâimana u'âsi mono te te 're i'aipisutu za'ra wa'aba mono norĩ ma. Tame te asiré isazei'wa norĩ me hã, 're asi'rã'õtõ u'âsi aba mo. Pi'õ norĩ hã ti'ra te te 're i'madâ'â pese za'ra mono ne, te 're asi'madâ'â pese za'ra wa'aba mo, isazei'wai mono bâ. Tahawa, sena na hã ĩma asawi pese za'ra wa'aba di. Tane nherẽ, ĩma si asawi za'ra wa'aba õ di. Uburé Zezusihi wasu'uwẽ waihu'u pese 'wa norĩ ma zama, asawi za'ra wa'aba di duré.
Wa hã wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, da'ãma 're ipẽ'ẽzé mono zé hã aima 're hâimana u'âsi za'ra wa'aba mono da, sa'ẽtẽ na, duré rowẽ hã te te aima 're pisutu za'ra wa'aba mono da. Wa te te tiwi 're rowaptẽrẽ u'âsi duré, isimizawizé hã ai'ãma 're hâimana u'âsi za'ra wa'aba mono da.
ကြော်ငြာတွေ