1 Corĩtu 9:9 - ꞌRe Ihâimana Uꞌâsi Mono Zadawa Wasuꞌu

^9-10 Ãne duréihã Mozési te te ãma irob'ui'érézé hã: “Amnho trigu hã, powawẽ tipara na te te aima 're sub za'ra wa'aba mono ré, 're wata wasisi za'ra wa'aba mono õ di za, 're saihuri tõ mono da.” E tawamhã, powawẽ si te 'Re ihâimana u'âsi mono hã te te 're azawi. Mare di. Taha zawi nhipai u, te duré wa norĩ hã te te 're wa'azawi pese. Tahawa, duréihã ãne na te te rowasu'u wamhã, taha wasu'u nhipai u, ma tô duré wa'ãma zama romnhimiré'é. Buru da, ti'a te te 're ihâibâdâ za'ra mono norĩ hã duré oto 're 'rãi'ré za'ra mono wa, te te 're i'rãihâri za'ra mono norĩ hã, e buru tede'wa te te tãma 're ipo'o za'ra mono zéb zô, 're simnhasi za'ra mono õ di za bété. Te za tô sô 're simnhasi za'ra. Ãne hã aiwa, te wasu'u.

1 Corĩtu 9:9 ပူးပေါင်းရင်းမြစ်များ

Salmu 104:27

Uburé te abaze norĩ hã aihawim na si 're hâimana za'ra. Tahawa, bâtâ uwaibaba isa tãma 're isõmri za'ra mono zô hã, te duré 're sõpré.

Provébiu 12:10

Sena na 're ihâimana za'ra mono norĩ hã tinhimizama hã te te 're 'madâ'â wẽ za'ra mono di. Tane nherẽ, iwasété norĩ nhimirob'manharĩzé hã wasété uptabi di.

Zona 4:11

E i'uwaibaba õ di bété, Niniwé 'ri nho'õmo za'ẽtẽ ãma 're idahâimana za'ra mono norĩ ãma ĩpẽ'ẽzé da hã, rob're nhipai u. Tô i'uwaibaba da'ãma ĩpẽ'ẽzézé hã. E marĩ wa. 120 miu na iwa 're dahâimana za'ra mono wa, 're idanomro wẽ mono na, duré 're idanomro wasété mono na da te dasina 're iwaihu'u za'ra mono õ norĩ hã. Duré danhimizama ahâ uptabi na iwa 're simasa mono wa.

Roma 4:23

Duréihã rob'ui'éré 'rata na Abra'ãhã wasu'u hã, 'Re ihâimana u'âsi mono te te iwẽsãmrizém na hã, taha wasu'u si õ di.