1 Corĩtu 9:5 - ꞌRe Ihâimana Uꞌâsi Mono Zadawa Wasuꞌu

⁵ Zezusihi zadawa wasu'u'wa norĩ, wasiré norĩ hã Zezusi te te dama 're sadawa wasu'u za'ra mono da, nimomo 're nomro mono wamhã, timro hã te za siré te te 're simro. Duré Wanhib'apito no norĩ zama, te za timro hã siré te te 're simro. Pedruhu zama te za duré timro hã siré te te 're saprõni. Wa hã bété. Ĩmro ré, 're ĩhâimana mono 'wa'âhã, duré isazei'wa si'uiwa 're wahâimana mono wamhã, e i'uwaibaba 're ĩhâimana mono õ di aré, daza'rui mono bâ, ĩsiré te 're saprõni mono wamhã. Duré wasazéb da, ĩmro ãma zama, 're ana wa'aba mono wamhã, e i'uwaibaba õ di bété aré. I'uwaibaba tô aré, wahâimanazé hã.

1 Corĩtu 9:5 ပူးပေါင်းရင်းမြစ်များ

Mateu 8:14

Tawamhã Zezusi hã Pedruhu nhorõwa u ma tô mo. Morĩ wamhã, imaprewa hã ma tô sabu, wa'ro na waptâ wa hâzé ré, inomro hã.

Marcu 1:30

Tame te Simahã maprewa hã hâzé ré nomro, wa'ro za'ẽtẽ na. Tawamhã sisisi wi, te Zezusihi ma 'mahârâ za'ra, hâzé na inomro na.

Luca 6:15

duré Mateu norĩ hã, Tomehẽ me, duré Tiagu, Afeuhu 'ra hã, duré Sima Zeroti,

Luca 8:20

Tawamhã Zezusihi ma, ma tô ni'wa hã rowasu'u, ãne: — Ano norĩ hã te rowi asô aimasa, ana za'ra wa'aba me. Te sima wẽ za'ra, te te asabu za'ra da.

Zuwã 1:42

Tawamhã ma tô Zezusihi u we saprõ apâ. We te te itẽme ãwisi wamhã, Zezusi te Sima hã 'madâ. Te tãma tinha, ãne: — A hã Sima, Zuwãhã 'ra. Ãhã na wa za asisi na oto ãma saprĩ. Cefasi na asisi hã za oto. Ãma isaprĩ na hã Pedru na isisi hã.

Zuwã 2:12

Tawamhã Cafanau na 'ri nho'õmo nhisi u te oto mo, Zezusi hã. Ina zama te isiré mo. Ino norĩ zama te duré isiré ai'aba'ré. Isiré 're inomro mono norĩ zama, te duré isiré ai'aba'ré. Tawamhã sihutu wamhã, suru na te tame asimro.

Zezusihi zadawa wasuꞌuꞌwa norĩ nhimiromhuri na robꞌuiꞌéré 1:14

Tawamhã awẽ sidâpâsi te nasi si'rã'õtõ, 'Re ihâimana u'âsi mono ma, mreme zusi da nasi, Zezusihi no norĩ me, duré ina Maria na isisi hã aimawi pi'õ norĩ me.

Roma 16:1

Ãne, wa za aima wasu'u za'ra wa'wa, wahidiba Febi na isisi hã. Ta hã simizawi pese di. Sẽcréia na 'ri nho'õmo nhisi ãma, te isazei'wa norĩ hã te te 're apawaptob u'âsi.

1 Corĩtu 1:12

Ãne wa za aima waihu'u za'ra wa'wa. Ni'wam norĩ me asiré 're aihâimana za'ra wa'aba mono nherẽ, te ãne dama 're asiwasu'u za'ra wa'aba mo: “Wa norĩ hã Pauluhu nhimiroti si, wa za wa te 're 'madâ'â za'ra.” Duré ni'wam norĩ hã te 're siwasu'u za'ra, ãne: “Wa norĩ hã Apoluhu nhimiroti si, wa za wa te 're 'madâ'â za'ra.” Duré ni'wam norĩ hã te 're siwasu'u za'ra, ãne: “Wa norĩ hã Pedruhu nhimiroti si, wa za wa te 're 'madâ'â za'ra.” Duré ni'wam norĩ hã te ãne 're siwasu'u za'ra: “Wa norĩ hã Cristuhu nhimiroti si, wa za wa te 're 'madâ'â za'ra.” Ãne te dama 're asiwasu'u za'ra wa'aba mo, aimreme si'ahâ za'ra wa'aba na.

1 Corĩtu 7:15

Duré, ni'wam norĩ hã isazei'õ'wa 're hâimana za'ra mono wamhã, timro hã isazei'wa te te 're rẽme za'ra mono da, te te sima 're wẽ za'ra mono wamhã, imro hã te te tiwi 're rosawi za'ra mono õ di za, isazei'wa si'uiwa sima 're hâimana za'ra mono õ wa. Si'uihâ na te za tô 're wairébé, isazei'õ'wa hã. 'Re ihâimana u'âsi mono hã ma tô te te sima 're aiwẽ za'ra wa'wa, robze sina ãma 're aihâimana za'ra wa'aba mono da. Tahawa, aimro hã isazei'õ'wa aima 're hâimana za'ra wa'aba mono wa, te te oto 're aiwẽ'õ za'ra wa'aba mono wamhã, te za tô tãma 're iwaprosi waré za'ra wa'aba mo, te te tô 're airẽme za'ra wa'aba mono da. Pi'õ norĩ, isazei'wa 're anomro aba mono wamhã, duré aimro hã Wanhib'apito te te 're saze za'ra mono õ nherẽ, e te za te te 're saze za'ra, nimahã bâtâ na hã, Cristu hã. Ãté te za tô te te 're saze za'ra. Ãté te te 're saze za'ra mono õ di za. Ãne hã aima waihu'u za'ra wa'aba õ di. Duré aibâ norĩ, isazei'wa 're anomro aba mono wamhã, aimro hã te te 're saze za'ra mono õ nherẽ, e te za te te 're saze za'ra, nimahã bâtâ na hã. Ãne hã aima waihu'u za'ra wa'aba õ di duré. Tahawa, aimro hã isazei'õ'wa na aima 're hâimana za'ra wa'aba mono wa, te te oto 're aiwẽ'õ za'ra wa'aba mono wamhã, ihâimanazéb zarina, te za tô tãma 're iwaprosi waré za'ra wa'aba mo, te te tô 're airẽme za'ra wa'aba mono da.

1 Corĩtu 7:39

Pi'õ norĩ hã imro tiwi 're dâ'â za'ra mono õ ré, te te 're rẽme waihu'u za'ra mono õ di za. Tiwi 're dâ'â za'ra mono wapsi, te za oto pibui pese na timro na te te 're sahu za'ra, aibâ aimawi na. Tane nherẽ, aibâ isazei'õ'wa na 're mro za'ra mono õ di za. Aiwa isazei'wa si'uiwa na te za tô sina 're mro za'ra apâ.

1 Corĩtu 7:7

Tane nherẽ, wa hã ĩmro õ na 're ĩhâimana mono zéb zarina, aimro ãna 're aihâimana za'ra wa'aba mono zéb da hã, ĩma wẽ di aré. Tane nherẽ, 'Re ihâimana u'âsi mono hã aiwa te te dama 're apisutu mono õ di, dahâiba mono bâ, niha 're idahâimana za'ra mono zéb da hã. Dasisarina si 're idahâimana za'ra mono õ na hã, taha si te za te te dama 're apisutu, damro ré 're dahâimana za'ra mono da, duré damro ãna 're idahâimana za'ra mono da hã.

1 Corĩtu 7:8

Aimro ãna 're aihâimana za'ra wa'aba mono norĩ ma, wa za oto aima roti za'ra wa'wa, duré pi'õi mrotõ norĩ ma zama. Õne haré, 're aihâimana za'ra wa'aba mono da hã, wẽ di, wa hã ĩmro õ na 're ĩhâimana mono ne. Ãne hã ĩma wẽ di.

Galata 1:19

Ãhã wamhã, Pedruhu siré norĩ hã aihĩni te sõpẽtẽ za'ra õ di, Cristuhu zadawa wasu'u'wa norĩ hã. Tiaguhu si, wa tô tawamhã sõpẽtẽ. Wanhib'apito sisémemhã ta hã.

1 Timotiu 3:2

Isazei'wa norĩ 'madâ'â'wai mono bâ, te za 're hâimana wẽ za'ra. Tawamhã iwasédé hã da te ãma 're isa'ra mono da hã, mare di. Timro uptabi si te za duré te te sima 're 'madâ'â za'ra, misi haré. Hâimana prédum na te za duré dama 're hâimana za'ra. Tiwasété wi te za sina 're siptete u'âsi za'ra, 're nomro wẽ mono da. Te za duré dama 're hâimana wẽ za'ra. Duré itẽme 're dasihutu mono wamhã, te za te te 're da'mazasi su'u za'ra. Duré roti na rowaihu hã te za tãma 're hâimana za'ra, te te ãma 're idapawaptob za'ra mono zéb da hã.

1 Timotiu 4:3

Ta norĩ hã te za dasina 're idamro za'ra mono zé hã dawi sawi za'ra, dasina 're damro za'ra mono tõ da, dasiwaprosi 're dahâimana za'ra mono da. Te za duré dasazé hã dawi sawi za'ra, marĩ mono bâ 're dasaihuri tõ mono da, 'Re ihâimana u'âsi mono hã uburé dasazé hã te te apoto mono nherẽ, ãma 're idasaihuri mono zéb da hã. Isazei'wai mono bâ wama waihu'u pese za'ra di, dasazém na isimiroti hã. Ãne wa, sõpru wa, ãma 're wawata za'ra mono pari, wa za isimipoto na 're wasaihuri.

1 Timotiu 5:2

Duré pi'õ iprédum norĩ hã te za aimreme wẽ na 're i'apawapto mo, aimreme wẽ na ana hã 're ipawapto mono ne. Duré pi'õ ipréduptém norĩ hã te za aimreme wẽ na 're i'apawapto mo, aimreme wẽ na si aihidiba norĩ hã 're i'apawapto mono ne. Aiprédup sina te za ta norĩ ma hã 're aihâimana mo.

Titu 1:6

Ãne wa tô aima roti, ta norĩ ãma. Wẽ na 're inomro mono norĩ si te za 're i'apisutu mo, da'madâ'â'wa da hã. Wẽ na 're nomro mono wa, iwasédé hã da te ãma 're isa'ra mono õ norĩ si, te za 're i'apisutu mo. Timro uptabi si te te 're i'madâ'â za'ra mono norĩ si, te za 're i'apisutu mo, da'madâ'â'wa da hã. I'ra norĩ hã tô sena isazei'wa 're inomro mono norĩ mama si, te za 're i'apisutu mo. I'ra norĩ hã po're õ wamhã, duré te te 're rowasutu za'ra mono wamhã, te za iwasu'u na da te ãma 're ropé. Tawamhã ta norĩ mama hã 're apisutu mono õ di za, da'madâ'â'wa da hã.

Hebreu 13:4

Imro ré norĩ hâimanazé hã te za 're iwazé pese za'ra wa'aba mo, 'Re ihâimana u'âsi mono ma, ta hã pire uptabi wa. Aimro si te za asima 're i'madâ'â u'âsi za'ra wa'aba mo. E marĩ wa. Ni'wam norĩ hã tihâiba na tiwasédé te te 're 'manharĩ za'ra mono wamhã, 'Re ihâimana u'âsi mono hã te za ta norĩ te te 're hâ za'ra. Duré ni'wam norĩ hã mro ré nherẽ, imro'õ hâiba na 're sipsaihuri za'ra mono wamhã, te za ta norĩ hã duré te te 're ahâ za'ra, 'Re ihâimana u'âsi mono hã.