1 Corĩtu 7:31 - ꞌRe Ihâimana Uꞌâsi Mono Zadawa Wasuꞌu

³¹ Ti'ai ãma uburé marĩ na 're romhuri za'ra wa'aba mono nherẽ, taha si asima 're wẽ uptabi za'ra wa'aba mono õ di za. E marĩ wa. Uburé marĩ hã ti'ai ãma, da te 're i'madâ'â za'ra mono hã te za dawi 're si'utõrĩ u'âsi za'ra. Tahawa, hâiwa ãma uburé marĩ iwẽ si 're ihâimana za'ra mono zô si, te za sô 're irob'ruiwapari u'âsi za'ra wa'aba mo.

1 Corĩtu 7:31 ပူးပေါင်းရင်းမြစ်များ

Luca 21:34

Tawamhã Zezusi hã tinhimiroti na ma tô tãma 'rãsutu za'ra, ãne: — Asimiza'rese sina, te za 're aihâimana za'ra wa'aba mo. Datoi u hã âsipãrĩ na 're asapa'a za'ra wa'aba mono õ di za. Marĩ na si 're rosa'rata za'ra wa'aba mono õ di za. E marĩ wa. Rosa'rese õ ré, bâdâ ipire, iwa waptã'ã õ'umnhasite. Rosa'rese õ ré, te robzari hã itede'wa hã te te 're waibu, wedenhorõ na. Tane, duré rosa'rese õ ré, te za bâdâ ipire hã iwa waptãrã, uburé ti'ai ãma hã.

1 Corĩtu 7:29

Ĩsisãnawã norĩ, tô sena, wa za ãne hã aima waihu'u za'ra wa'wa. Romhuture di oto, irob'rãsutuzéb u hã. Tahawa, taha õ ré, Wanhib'apito ma si, wa te 're iromhuri pese za'ra mono zéb da si, wa za 'râwi wasina 're wanhopré u'âsi. Tahawa, aibâ norĩ, aimro ré 're aihâimana za'ra wa'aba mono norĩ hã, aimro zawi na si 'râwi asima ãma 're rosa'rata za'ra wa'aba mono õ di za.

1 Corĩtu 7:30

Duré asisô 're aiwa'õ za'ra wa'aba mono wamhã, taha na si 're rosa'rata za'ra wa'aba mono õ di za. Duré aima 're irowẽ za'ra wa'aba mono zéb zarina, ato sina 're anomro aba mono wamhã, taha na si 're rosa'rata za'ra wa'aba mono õ di za. Duré marĩ hã asima 're uipra za'ra wa'aba mono wamhã, taha na si 're rosa'rata za'ra wa'aba mono õ di za, asima.

1 Corĩtu 9:18

E marĩ na tawamhã, ĩpawa'âbâzé hã. 'Re ihâimana u'âsi mono zadawa 'mahârâ'wa norĩ siré 're ĩhâimana mono nherẽ, marĩ zô dama 're ĩnhimnhasi mono õ zarina, da te 're ĩpawa'âbâ mono ãna, wa iwasu'uwẽ si te dama 're wasu'u. Taha na si, wa 're ĩtoi u'âsi. Taha na si ĩpawa'â hã, ãma 're ĩtoi u'âsi mono zém na si.

Hebreu 12:27

E marĩ te tawamhã wama wasu'u za'ra imreme hã, “irẽme ma” na hã. Uburé za marĩ hã ti'ai ãma, 'Re ihâimana u'âsi mono nhimipodo nimahã na te te sãsã'ã za'ra wa, za isi'utõrĩ mono zé, te wama wasu'u za'ra. Tawamhã taha nhowa're're, te za iwẽ uptabi hã da te oto isãsã'ã waihu'u'õ hã 're hâimana u'âsi za'ra hâiwa ãma, isi'utõrĩ waihu'u'õ hã.

1 Pedru 1:24

Duréihã ma tô ãhã wasu'u na ãma rob'ui'éré, 'Re ihâimana u'âsi mono zadawa 'mahârâ'wa hã. Ãne te rowasu'u: “Du hã 're wapti'i hâ za'ra mono õ ré, te za 're 'ré za'ra. Duré romnhirãrã norĩ hã wẽ nherẽ, te za 're sirãrã a'a za'ra. Tane duré dahâiba hã wẽ nherẽ, te za 're si'utõrĩ su'u.

1 Pedru 4:7

Ro isi'utõrĩzéb u hã, romhuture di oto. Tahawa, te za aihâiba na asina 're asiptete za'ra wa'aba mo. Duré aihâimana nhimiza'rese te za 're aihâimana za'ra wa'aba mo, 'Re ihâimana u'âsi mono ma, 're aimreme zusi u'âsi aba mono da.

1 Zuwã 2:17

Ti'ai ãma uburé 're idahâimana wasété za'ra mono zé hã isi'utõrĩzéb u, ãhã na hã te te sina rotété u'âsi, duré uburé marĩ iwasédé hã da te dasima 're i'ruiwapari za'ra mono zama. Zahadu wapsi te za ai'utõ, simisutu. Ni'wam norĩ hã 'Re ihâimana u'âsi mono nhimipisutuzém na si 're hâimana za'ra mono wapsi, ta norĩ si te za 're hâimana u'âsi za'ra, si'utõrĩ ãna.