1 Corĩtu 7:2 - ꞌRe Ihâimana Uꞌâsi Mono Zadawa Wasuꞌu

² Tane nherẽ, aibâ norĩ hã mro ãna 're hâimana za'ra mono nherẽ, pi'õ na tiwasédé te te 're i'manharĩ za'ra mono zé hã, ahâ uptabi di. Duré pi'õ norĩ hã mro ãna 're hâimana za'ra mono nherẽ, aibâ na tiwasédé te te duré 're i'manharĩ za'ra mono zé hã, ahâ uptabi di. Tahawa, aibâ norĩ hã te za tô 're mro za'ra, timro me si 're hâimana za'ra mono da. Ãne hã wẽ uptabi di, pi'õ aimawi na tiwasédé te te 're 'manharĩ za'ra mono tõ da. Duré pi'õ norĩ hã te za tô 're mro za'ra aibâ na, timro me si 're hâimana za'ra mono da, ta norĩ zama, aibâ aimawi na tiwasédé te te 're 'manharĩ za'ra mono tõ da.

1 Corĩtu 7:2 ပူးပေါင်းရင်းမြစ်များ

Provébiu 18:22

Ni'wa timro da, pi'õ te te 'manhopẽtẽ wamhã, tãma irowẽ uptabi zép si, te za sõpẽtẽ. Ta hã, Uburé Danhib'apito, aibâ te te iwẽsãmrizé te wasu'u.

Provébiu 19:14

Da'ra norĩ te za timama uirĩ na isimarĩ hã 'ri hã duré rob'uiprazé hã te te sima 're waibu za'ra. Tane nherẽ, Uburé Danhib'apito si te za damro pi'õ isimiza'rese wẽ hã te te dama 're anhomri.

Mateu 5:32

Ãne na roti hã tô sena nherẽ, wa za oto wa hã aimawi aima waihu'u za'ra wa'wa, tô õhõ rotizém na hã. Pi'õ norĩ hã aibâ aimawi na 're simisaihuri za'ra mono õ nherẽ, imro te te 're rẽme za'ra mono wamhã, tiwasédé hã te za te te 're 'manharĩ za'ra, aibâ norĩ hã. E marĩ wa. Pi'õ norĩ hã imro te te 're rẽme za'ra mono nherẽ, aibâ aimawi na duré apâ 're mro zahu za'ra mono wamhã, tawapsi te za tiwasédé hã te te 're 'manharĩ za'ra, pi'õ norĩ hã. Tahawa, aibâ norĩ hã tiwasédé te te tãma 're i'manharĩ za'ra mono zém hawi wa, te za duré õ norĩ zama aibâ aimawi na 're mro za'ra mono wa, tiwasédé hã te te 're 'manharĩ za'ra. Duré aibâ norĩ hã, pi'õ, da te 're irẽme za'ra mono na 're mro za'ra mono wamhã, tawapsi, te za duré ta norĩ zama tiwasédé hã te te ãma 're 'manharĩ za'ra, aibâ norĩ hã.

1 Corĩtu 6:18

Tahawa, ma'ãpé, dahâiba na dawasédé, da te 're i'manharĩ za'ra mono wi, asina 're asiptete u'âsi za'ra wa'aba mono. Dawasédé aimawi hã da te 're 'manharĩ za'ra mono wamhã, ãma 're dasihâiba wasété za'ra mono õ di. Aibâ norĩ hã pi'õ na tiwasédé te te 're 'manharĩ za'ra mono wapsi, te za ãma 're sihâiba wasété za'ra. Duré, pi'õ norĩ hã aibâ na tiwasédé te te 're 'manharĩ za'ra mono wapsi, te za duré ta norĩ hã ãma 're sihâiba wasété za'ra aiwa.

1 Corĩtu 7:1

Rob'ui'éré na we asiwi ĩzadanharĩ za'ra wa'aba zém na, wa za oto aima roti za'ra wa'wa. E aibâ norĩ hã 're mro za'ra mono õ nherẽ, tãma 're rowẽ za'ra mono di za. Ãté mro õ nherẽ, tãma 're rowẽ za'ra mono di za tô.

1 Corĩtu 7:3

Aibâ norĩ hã pi'õ na oto 're mro za'ra mono wamhã, timro wi, tihâiba hã te te 're sawi za'ra mono õ di za oto. Duré pi'õ norĩ hã aibâ na oto 're mro za'ra mono wamhã, duré timro wi tihâiba hã te te 're sawi za'ra mono õ di za oto.

1 Corĩtu 7:9

Tane nherẽ, dahâiba na dawasété wi 're idanhiptete za'ra mono õ si, wẽ õ di. Tahawa, aihâiba na aiwasété wi, asina 're asiptete waihu'u za'ra wa'aba mono õ wamhã, te za tô asina 're aimro za'ra wa'aba mo, asisô 're rowasutu zahu za'ra wa'aba mono tõ da.

Éfézu 5:28

Aibâ norĩ, Cristu te te 're iwa'azawi pese mono zéb zarina, te za aimro hã 're isawi pese za'ra wa'aba mo. 'Re sawi pese za'ra wa'aba mono wa, marĩ iwẽ zô asima 're asõpré wa'aba mono ne, te za duré aimro ma zama iwẽ zô 're asõpré wa'aba mo. Tawamhã marĩ hã iwẽ zô aimro ma 're asõpré wa'aba mono zém na, te za marĩ hã iwẽ zô asima zama 're asõpré wa'aba mo.

Éfézu 5:33

Aima za'ra wa'aba zama, te rowasu'u hã 're hâimana, ãma 're i'aihâimana za'ra wa'aba mono zéb da hã oto. Tahawa, aibâ norĩ, te za aimro 're isawi pese za'ra wa'aba mo. 'Re isawi pese za'ra wa'aba mono zéb zarina, marĩ iwẽ zô asima 're asõpré wa'aba mono ne, te za duré aimro ma zama 're asõpré wa'aba mo, iwẽ zô hã. Duré pi'õ norĩ, aimro hã te za 're iwazéb za'ra wa'aba mo.

1 Tesalonita 4:4

Aibâ norĩ hã aimro si te za 're i'madâ'â za'ra wa'aba mo, aiwasédé hã 're 'manharĩ za'ra wa'aba mono tõ da.

1 Timotiu 4:3

Ta norĩ hã te za dasina 're idamro za'ra mono zé hã dawi sawi za'ra, dasina 're damro za'ra mono tõ da, dasiwaprosi 're dahâimana za'ra mono da. Te za duré dasazé hã dawi sawi za'ra, marĩ mono bâ 're dasaihuri tõ mono da, 'Re ihâimana u'âsi mono hã uburé dasazé hã te te apoto mono nherẽ, ãma 're idasaihuri mono zéb da hã. Isazei'wai mono bâ wama waihu'u pese za'ra di, dasazém na isimiroti hã. Ãne wa, sõpru wa, ãma 're wawata za'ra mono pari, wa za isimipoto na 're wasaihuri.

Zuize 21:22

Tawamhã ãne zarina imama norĩ, duré isisãnawã norĩ wama siwapsari za'ra da, we si'aba'réi wamhã, wa za ãne tãma nharĩ za'ra ni za: “Ma'ãpé wazawi za'ra na hã ãma wama rowairébé za'ra wa'aba, si'ubumro da. E marĩ wa. Zabe-Ziliadi wa te 'wapé za'ra wamhã, uburé Bẽzamihĩ nhihudu norĩ ma da hã, pi'õ norĩ ibâ na wa te wasiwi waibui õ di. Duré a norĩ wa'wa hã ropisudu ihâimanazém na hã ãma upa za'ra wa'aba dai õ di. E marĩ wa. A norĩ wa'wa hã õ norĩ ma, ai'ra tãma sõmri za'ra wa'aba õ wa. Õ norĩ hã aima sa'rese za'ra wa'aba õ di. Pi'uriwi ma tô dasiwi waibu za'ra ni.”