1 Corĩtu 4:17 - ꞌRe Ihâimana Uꞌâsi Mono Zadawa Wasuꞌu

¹⁷ Taha da, wa tô Timotiu hã atẽme satõrĩ za'ra wa'wa, te te ãma 're aipawaptob za'ra wa'aba mono da. Ta hã ĩ'ra ne, oto ĩma 're hâimana mono wa, ĩma sawi uptabi di duré. Ta hã te Wanhib'apito si te te 're 'madâ'â pese, tiwi sipi'rai ãna. Ta hã atẽme wisi aba wapsi, te za Cristu Zezusihi ãma si 're ĩhâimana mono zém na ãma aipo're pu'u za'ra wa'wa, daro mono bâ isazei'wa norĩ hã 're isi'rã'õtõ mono norĩ ma, te 're iroti mono zém na zama.

1 Corĩtu 4:17 ပူးပေါင်းရင်းမြစ်များ

Provébiu 13:17

Romreme 'wapéi'wa norĩ iwasédé i'umnhasi'õ hã te za ropire u 're rere'e. Tane nherẽ, i'umnha hã da te 're isatõrĩ za'ra mono norĩ hã te za dahâzé'õzé hã te te dama 're ãwisi za'ra.

Mateu 24:45

Tawamhã Zezusi te duré tãma ãma romnhimiré'é za'ra, ãne: — Dama romhuri'wa i'umnha hã duré isimiroti wẽ hã, e niha 're ihâimana mono zé hã. Ãne hã 're hâimana mono wamhã, te za isib'apito hã nimomo tiwi morĩ õ ré, tãma pisutu, uburé tãma iromhuri'wa norĩ hã isa'u nherẽ, te te sô 'madâ'â pese za'ra da. Te za duré tãma roti, bâtâ pisutu zéb zarina isa za'ra zé hã te te ãma tãma uwaimrami za'ra da, tãma iromhuri'wa norĩ ma.

Mateu 25:21

— Tawamhã isib'apito te asa tãma tinha, ãne: “Wẽ di tô. A hã ĩma romhuri wẽ 'wai uptabi. Ĩma ai'umnhasi di. Rob'uiprazé hã surure na hâimana nherẽ, ma tô ãma iromhuri wẽ, ĩzô. Tahawa, ãhã nhipai u wa za oto aima pisutu, marĩ ahâ uptabi na ĩma 're ab'madâ'â u'âsi mono da. Te za oto ĩsiré 're aihâimana mo, wasiré ãma 're watoi u'âsi mono da.” Ãne ma tô tãma ropisutu siro, tãma iromhuri wẽ 'wai ma.

Mateu 25:23

— Tawamhã isib'apito asa te tãma tinha, ãne: “Wẽ di tô. A hã ĩma romhuri wẽ 'wa. Ĩma ai'umnhasi di. Rob'uiprazé hã surure nherẽ, ma tô ãma ĩzô iromhuri wẽ. Tahawa, ãhã nhipai u wa za duré aima pisutu, marĩ ahâ uptabi na ĩma 're ab'madâ'â u'âsi mono da. Te za oto ĩsiré 're aihâimana mo, wasiré ãma 're watoi u'âsi mono da.” Ãne ma tô duré tãma ropisutu siro, tãma iromhuri wẽ 'wai ma hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 16:1

Tawamhã Débi u ma tô aimasisi zahuré, Paulu norĩ hã. Taha pari, ma tô duré aimasisi zahuré, Risitira u. Tame te aibâ hã 're sãmra, Zezusihi zazei'wa hã, Timotiu na isisi hã. Ina hã zudeu, Zezusihi zazei'wa, ta hã. Tane nherẽ, imama hã zudeu õ di, gregu norĩ siré hã, ta hã.

1 Corĩtu 11:16

Ãté ni'wam norĩ hã asiré 're ihâimana za'ra wa'aba mono norĩ hã te za ãne na sina ĩzadawa 'ru za'ra, pi'õ norĩ hã 'rã ubu ré 're ihâimana za'ra mono wasu'u na hã, te te ĩzaze za'ra õ wa. Ãne wamhã, wa za ãne na si ĩzadawa na tãma ãma wa'rãmi za'ra. Wa norĩ hã aimawi na, wa te dama 're roti za'ra mono õ di. Mare di. Duré 'Re ihâimana u'âsi mono nhib'a'uwẽ, siré 're isi'rã'õtõ mono norĩ hã te duré õhõ na si te te ãma 're rosa'rata za'ra, pi'õ norĩ hã 'rã ubu ré, 're ihâimana za'ra mono wasu'u na si.

1 Corĩtu 11:2

A norĩ wa'wa hã te oto ĩ'ãma 're aipo're pu'u u'âsi za'ra wa'aba mo, 're ĩhâimana mono zém na hã, duré uburé te aima ãma 're irowasu'u za'ra wa'aba mono zém na zama. Isazei'wa norĩ 're ihâimana za'ra mono zém na roti hã da te ĩma 're iwaihu'u za'ra mono zéb zarina, te oto 're anomro u'âsi aba mo, te aima ãma 're iroti za'ra wa'aba mono zéb zarina si. Tahawa, wa ai'ãma 're ĩwata u'âsi za'ra wa'wa.

1 Corĩtu 11:34

Ni'wam norĩ hã asiré 're ihâimana za'ra wa'aba mono norĩ hã, mra te te 're simroi mono wamhã, tinhorõwa ãma si te za a'â tisa hã te te 're huri. Taha parip si, te za oto asitẽme 're aihutu aba mo, asiré 're asi'rã'õtõ aba mono da. 'Re ihâimana u'âsi mono hã te te siwi 're aiwẽ'õ za'ra wa'aba mono tõ da, te za ãne si i'uwaibaba 're i'manharĩ za'ra wa'aba mo. Nimahã na, ãma atẽme ĩmorĩ aba wapsi, wa za aimawi na aima ãma roti za'ra wa'wa, rob'ui'éré na we asiwi ĩzadanharĩ za'ra wa'aba zém na hã.

1 Corĩtu 16:1

Isazei'wa norĩ ma, rob'uiprazé hã asiwi i'rã'õtõ aba zéb da na, wa za oto aima ãma roti za'ra wa'wa. Galasia na danhipti'a nho'õmo nhisi ãma isazei'wa norĩ, daza'rui mono bâ siré 're isi'rã'õtõ mono norĩ ma, te tãma iroti za'ra zém na, wa za aima ãma roti za'ra wa'wa, duré a norĩ wa'aba zama ãne hã 'manharĩ za'ra wa'aba da.

1 Corĩtu 16:10

Duré, Timotiu hã atẽme ãma wisi za'ra wa'aba wamhã, ma'ãpé asiwi sawi wẽ za'ra wa'aba za, sina hâtâ'â ãna ai'rata sãmra aba da. Wa hã Wanhib'apito ma, te 're iromhuri mono ne, te duré taha zama te te tãma 're romhuri. Tahawa, te za asiwi isawi pese za'ra wa'wa.

1 Corĩtu 4:14

E ãne na te aima iroti za'ra wa'aba zé ma, asiséb za'ra wa'aba da, wa tô ãne na aima ãma rob'ui'éré za'ra wa'wa. Mare di. Taha dai õ di. Taré ĩnhimiroti hã waihu'u pese za'ra wa'aba da, wa ãne na aima ãma rob'ui'éré za'ra wa'wa, ĩ'ra ne oto ĩma 're aihâimana za'ra wa'aba mono wa, ĩma asawi uptabi za'ra wa'aba wa.

1 Corĩtu 4:15

Ãté da'ahâ na te oto da te aima 're roti u'âsi za'ra wa'wa, Zezusihi nhimiroti wẽ na hã, taha na si ãma 're anomro wẽ wa'aba mono da. Da'ra hã da te dasisô 're i'madâ'â pese za'ra mono ne, te ta norĩ hã te te 're ai'madâ'â pese za'ra wa'wa, Zezusi hã 're rẽme za'ra wa'aba mono tõ da. Tane nherẽ, ĩsiwaprosi wa aimama uptabi aba ne, aima 're ĩhâimana za'ra wa'wa. Iwasu'uwẽ na te aima 're irowasu'u za'ra wa'aba mono zéb zarina, Cristu Zezusi hã 're saze za'ra wa'aba mono wa, wa oto aimama uptabi aba ne, 're ĩhâimana, da'ra hã damama siwasutu hawi, dama 're ipoto za'ra mono ne.

1 Corĩtu 4:2

Ni'wa hã isibro, da te tãma 're 'madâ'â mono da, te te sima da'maipisutu wamhã, e niha ihâimanazé hã za, tãma irob'madâ'â'wa da hã. Isib'apito ma, tãma umnhasi na, te za te te tãma 're rob'madâ'â wẽ, te te wẽsãmri da hã.

1 Corĩtu 7:17

Wanhib'apito hã te te aima 're ipisutu za'ra wa'aba mono zéb zarina si, te za oto 're aihâimana u'âsi za'ra wa'aba mo. 'Re ihâimana u'âsi mono hã tinhib'a'uwẽ da, te te sima 're aipisutu za'ra wa'aba mono õ ré, niha 're i'aihâimana za'ra wa'aba mono zém hawi, 're aiwairébé aba mono zém na, 're asi'madâ'â za'ra wa'aba mono õ di za, zudeu na, duré zudeu'õ na. Õne haré te za oto 're aihâimana u'âsi za'ra wa'aba mo. Ãne na si, wa tô wa hã te dama 're aroti u'âsi, daro mono bâ isazei'wa norĩ hã siré 're isi'rã'õtõ u'âsi mono norĩ ma hã.

1 Corĩtu 7:25

Rob'ui'éré na we asiwi ĩzadanharĩ za'ra wa'aba zém na, wa za duré ãma aima roti za'ra wa'wa, mro ãna zahadu 're ihâimana za'ra mono norĩ na hã. Wanhib'apito hã ti'ai ãma 're morĩ ré, ãne na te te dama ãma 're roti mono õ nherẽ, wa za aima ãma roti za'ra wa'wa. Wanhib'apito hã tinhoprubzéb zarina, ma tô te te 're ĩpawapto, dama ĩ'umnhasizéb zarina, isimiroti zarina si, te dama ãma 're roti mono da. Taha zarina, wa za tô oto aima ãma roti za'ra wa'wa.

2 Corĩtu 8:18

Wasisãnawã hã wa za duré isiré ãma atẽme satõrĩ za'ra wa'aba ni, aibâ hã. Ãme isazei'wa norĩ hã ma tô te te sima 're wasu'u wẽ za'ra, Cristuhu wasu'uwẽ na simiromhuri wẽ uptabi wa, ta hã.

Éfézu 6:21

Tiquicu hã te za aima ĩwasu'u za'ra wa'wa, waihu'u za'ra wa'aba da, ĩhâimanazé hã. Ta hã wapawapto wẽ 'wa na 're ihâimana mono, Wanhib'apito ma romhuri'wa, wama isawi pe hã.

Filipu 2:19

Aiwasu'u wẽ za'ra wa'wa hã za te wapari wa, ĩma rowẽ hâ, ĩwasu'u hã za wapari za'ra wa'aba wa, za aima irowẽ za'ra wa'aba ne. Tahawa, wa tô ĩsima wẽ, Timotiu hã te ãma atẽme satõrĩ su'u za'ra wa'aba da. Wanhib'apito Zezusi hã ãne hã sena na te te ĩma pisutu wamhã, wa za tô ãma atẽme satõrĩ za'ra wa'wa, aima ĩwasu'u za'ra wa'aba 'wa da hã, duré apâ we ĩtẽme wisi wa, te te ĩma aiwasu'u za'ra wa'aba 'wa da hã.

Filipu 2:22

Tane nherẽ, Timotiu hã 're imorĩ wẽ na ma tô iwaihu'u za'ra wa'wa, da te 're pibui wasété mono nherẽ, 're isipizari mono õ na hã. Ta hã ma tô ĩsiré te te 're romhuri u'âsi, Cristuhu wasu'uwẽ na hã. Damama siré da te 're iromhuri u'âsi za'ra mono ne, ma tô ĩsiré te te 're romhuri u'âsi, ta hã.

Colosu 1:7

Epafrasihi nhimirowasu'u zarina, ma tô ãma iwaihu'u za'ra wa'wa. Ta hã Cristuhu ma wasiré romhuri'wa, wama isawi pe hã. Simi'ẽ na te Cristuhu ma, te te ai'ãma 're romhuri pese za'ra wa'wa, wa'upana.

Colosu 4:9

Taha siré, te za duré Onezimu hã ãma mo, wasisãnawã wama isawi pese hâiba amo hã, wama i'umnha hã ta hã duré, tame asiré isazei'wa norĩ, asiré 're aihâimana za'ra wa'aba mono hã. Ta norĩ si te za aima rowasu'u za'ra wa'wa, ãme iromhâimanazém na hã, duré iwahâimana za'ra zém na zama.

1 Timotiu 1:18

Duréi pese hã ma tô ni'wam norĩ hã Wamama zadawa hawimhã marĩ na aima rowasu'u za'ra, za tãma asimiromhuri na iwaihu'u siromo zéb da. Taha zarina ĩ'ra Timotiu, wa za aima ti'ru, da te aima iwaihu'uzé hã asina 're 'madâ'â u'âsi mono da, roti tô senai õ, ãma 're 'wapéi u'âsi mono da. Ãne te za 're aimo, ãma 're 'wapéi u'âsi mono da. Roti tô sena si te za 're i'madâ'â pese mo, Zezu Cristuhu wasu'uwẽ hã wa te 're isaze za'ra mono zép si. Te za duré 're aimorĩ wẽ. Ãne wamhã, aiwasété õ wamhã, 'râwi 're asisãmri mono õ di za, aiwasété na. Ãhã na ni'wam norĩ hã tiwasété na 're sisãmri za'ra mono nherẽ, 're siwẽ'õ za'ra mono õ di. Tahawa, ma tô oto sazei utõrĩ za'ra, Wanhib'apito nhimiroti hã wa te 're isaze za'ra mono zé hã.

2 Timotiu 2:2

Ĩnhimirowasu'u hã ma tô aipo're na 're iwapari mo, isazei'wa norĩ nho'a te dama 're irowasu'u mono zé hã. Ta norĩ hã ahâ di. Tawamhã 're i'awapari mono zé hã te za aibâ norĩ ma 're i'awaihu'u mo, aima i'umnhasi za'ra norĩ ma hã, tãma iwaihu'u pese za'ra zéb zarina, ĩnhimirowasu'uzém na te te duré ãma 're uzusi za'ra mono da hã, dapawaptom na.

2 Timotiu 3:10

A hã ma tô ĩwaihu, ĩnhimiroti na, duré ĩhâimanazém na, duré dapawaptom na ĩnhimiromhuri na te ĩsina 're iroti mono zém na, duré Wanhib'apito umnhasi sina 're ĩhâimana mono zém na, duré da'ãma ĩwa'a su'u õ na 're ĩhâimana mono zém na, duré te 're ida'azawi pese mono zém na, duré marĩ ahâ na ĩzada 're hâimana mono nherẽ, Wanhib'apito ãma ĩsina ĩnhiptete sina 're ĩhâimana mono zém na zama. Ma tô duré iwaihu, da te ĩma 're irob'manharĩ wasété za'ra mono zém na hã, duré te 're irobzépata mono zém na hã. Ma tô duré iwaihu, marĩ hã ĩzô 're iwairébé mono zém na hã, Ãtioquia na 'ri nho'õmo nhisi ãma, duré Iconizu ãma, duré Risitira ãma. Ipipa na da te ĩ'ãma 're rob'manharĩ wasété za'ra mono wa, wa tô te 're robzépata za'ẽtẽ. Tane nherẽ, ĩdâ'â tõ da, ma tô Wanhib'apito hã nasi a'â ĩnho'reptu.

Titu 1:5

Titu, Cereta na rob'ré za'iti nhisi ãma wa tô airẽ, tame asãmra da a'â. E marĩ da. Romhuri hã i'uwaibaba na dama hiri da. Duré iprédum norĩ hã 're apisutu mono da, 'ri nho'õmo mono bâ isazei'wa norĩ te te 're 'madâ'â za'ra mono da. Tawamhã te aima irotizéb zarina si, te za oto 're i'apisutu mo.

Apocalipsi 2:10

Za 're irobzépata za'ra wa'aba mono zém na hã asina 're aipahi za'ra wa'aba mono õ di za. Ĩwapari pese za'ra wa'aba. Wa'uburé hã nimahã na te za dama ai'mai'ru wasété 'wa, da te ai'maimrami aba da, dazazéb 're, da te ai'manheme aba da, te te aipibu za'ra wa'aba da, tô sena ĩzaze za'ra wa'aba zô. Tawamhã 10 na bâdâ hã te za ai'ãma 'maihai'utõrĩ 'wa, dazazéb 're ai'masima'wara aba ré, niha aihâiba za'ra wa'aba na 're 'mairobzépata za'ra wa'aba mono ré hã. Ãne wamhã, ma'ãpé asiwi ĩrẽme aba tõ, tô'ã. Tawamhã da te ai'manhimroi wa'aba zém na ai'masi'utõrĩ aba nherẽ, ĩ'mairẽme aba õ wamhã, duré dawi ĩ'mai'udâ wa'aba õ wamhã, wa za aima wa'âbâ za'ra wa'wa. Rowẽ, wa za aima pisutu za'ra wa'wa, ĩ'rata 're i'ai'ubumroi u'âsi aba mono zéb da hã.

Apocalipsi 2:13

Ĩma waihu'u pese di, 're i'ai'ubumroi wa'aba mono zé hã. Tame te Satanasihi nhimiwada'uri na 're dahâimana za'ra. Tame ma tô Ãtipasi hã dasiwi wĩrĩ ni asõ'a za'ra wa'aba, simi'ẽ na te te dama 're ĩzadawa wasu'u mono hã. Tane nherẽ, asõ'a za'ra wa'aba da te dasiwi wĩrĩ nherẽ, tãma aipahi za'ra wa'aba õ di. Ĩrẽme za'ra wa'aba õ di duré. Õne haré te ĩnhimiroti na si 're aihâimana za'ra wa'aba mo.