1 Corĩtu 4:16 - ꞌRe Ihâimana Uꞌâsi Mono Zadawa Wasuꞌu

¹⁶ Taha zarina, wa za oto aima roti za'ra wa'wa, Cristuhu nhirã zarina 're ĩmorĩ wẽ ne, oto 're anomro wẽ wa'aba mono da, aima ãma 're ĩsisanho za'ra wa'aba mono zéb zarina.

1 Corĩtu 4:16 ပူးပေါင်းရင်းမြစ်များ

1 Corĩtu 11:1

Wa hã 're ĩmorĩzém na aima ãma 're ĩsisanho za'ra wa'aba mono zéb zarina, te za 're anomro wẽ wa'aba mo. Cristu hã ti'ai ãma 're morĩ ré, wama ãma 're isisanho za'ra mono zéb zarina, wa hã 're ĩhâimana mono ne, te za duré 're anomro wẽ wa'aba mo.

Filipu 3:17

Ĩsisãnawã norĩ, ma'ãpé ĩsine 're ĩmorĩ wẽ ne, 're anomro wẽ wa'aba mono za. Ni'wam norĩ ma, tãma ãma 're iwasisanho za'ra mono zéb zarina, wasine 're ihâimana wẽ za'ra mono norĩ ne, te za a norĩ wa'aba zama ãma 're aihâimana wẽ za'ra wa'aba mo.

Filipu 4:9

Te aima 're rowasu'u za'ra wa'aba mono ré, aipo're na 're ĩwapari za'ra wa'aba mono zéb zarina, ma tô 'Re ihâimana u'âsi mono nhimiroti hã iwaihu'u pese za'ra wa'wa. Duré ai'rata 're ĩnhamra aba mono ré, atõmo na asiwi 're ĩ'madâ'â aba mono na, ma tô duré iwaihu'u pese za'ra wa'wa. Ãne na uburé marĩ na aima 're ĩsisanho za'ra wa'aba mono zéb zarina, te za 're aihâimana wẽ za'ra wa'aba mo. Ãne wamhã, 'Re ihâimana u'âsi mono hã wama rowẽ nhomri'wa hã te za 'râwi asiré 're hâimana u'âsi za'ra wa'wa.

1 Tesalonita 1:6

A norĩ wa'wa hã ma tô 're anomro wẽ wa'aba mo, ãma iwasisanhozéb zarina, duré Wanhib'apito ãma isisanhozéb zarina. Iwaihu'u pese pẽ'ẽzani hã ma tô te te 're aipawaptob u'âsi za'ra wa'wa, atoi uptabi za'ra wa'aba na 're sazei pese za'ra wa'aba mono da, da te ai'ãma 're irowasété za'ra wa'aba mono na 're robzépata za'ra wa'aba mono nherẽ.

2 Tesalonita 3:9

Wanhib'apito wasu'uwẽ na, wa te aima 're iromhuri za'ra wa'aba mono zé wa'rãmi, marĩ na 're wapawaptob za'ra wa'aba mono da, wama 're i'ru za'ra wa'aba mono zé hã, tô sena te aré tô wama 're i'ru za'ra wa'aba mo. Tane nherẽ, marĩ na wa te 're rowaptẽrẽ za'ra mono õ di, ai'rata 're wahâimana za'ra wa'aba mono ré hã. Ãne wa tô aima ãma asanho za'ra wa'aba ni, 're iwahâimana za'ra mono zéb zarina, 're anomro aba mono da.

Hebreu 13:7

Ma'ãpé ãma asipo're pu'u za'ra wa'aba, 'Re ihâimana u'âsi mono zadawa wasu'u na isãna'rata hawi te te ãma aima 're irowasu'u za'ra wa'aba mono norĩ ãma hã, ai'madâ'â'wa za'ra wa'aba norĩ ãma hã. Ta norĩ 're ihâimana za'ra mono zém na, duré 're idâ'â za'ra mono zém na zama, te za ãma 're asipo're pu'u u'âsi za'ra wa'aba mo. Ta norĩ hã 'Re ihâimana u'âsi mono si te te sina 're i'umnhasi za'ra mono ne, te za duré a norĩ wa'wa hã isine asina 're i'umnhasi za'ra wa'aba mo, 'Re ihâimana u'âsi mono hã.

1 Pedru 5:3

Asimi'madâ'â za'ra wa'wa hã tãma 're 'madâ'â pese za'ra wa'aba mono da, ma tô aipisutu za'ra wa'wa, 'Re ihâimana u'âsi mono hã. Tahawa, a norĩ wa'wa hã dama aipire wẽ te, 're dawada'uri za'ra wa'aba mono õ di za. Asimipawapto wẽ na te za tãma ãma 're asanho wẽ za'ra wa'aba mo, asimi'madâ'â za'ra wa'aba norĩ ma.