1 Corĩtu 3:19 - ꞌRe Ihâimana Uꞌâsi Mono Zadawa Wasuꞌu

¹⁹ Ti'ai ãma isazei'õ'wa norĩ hã tinhimirowaihu te te sima 're i'ruiwapari u'âsi za'ra mono hã, tarére 'Re ihâimana u'âsi mono ma hã. Duréihã ma tô ãne na ni'wa hã 'Re ihâimana u'âsi mono ãma rob'ui'éré siro, ibaihâ na hã: “'Re ihâimana u'âsi mono hã te isazei'õ'wa norĩ nhimirowaihu'u na 're ihâimana za'ra mono norĩ ma, te te tãma 're rob'manharĩ za'ra, tinhimirowaihu'u pese na, 'râwi 're sisimini za'ra mono da.”

1 Corĩtu 3:19 ပူးပေါင်းရင်းမြစ်များ

Ezodu 1:10

Wanhitob'ru norĩ, niwamhã te te wazahui wamhã, ãté Izaraéu nhihudu norĩ zama te za wazada dasiré si'rã'õtõ. Tawamhã te te wa'wapé za'ra parimhã, ãté te za duré wate ti'ai wa'õtõ nho'õmo hawimhã wairé. Taha õ'umnhasite, wa za niha na hã tãma rob'manharĩ za'ra ni, waptu na sina hâ'â pese tõ da.

Ezodu 18:11

Wa tô oto waihu'u ãhã na awa'awi na hã Uburé Danhib'apito, isiptete uptabi na hã uburé ihâiba'õ norĩ nhiptete nhipai u. E marĩ wa. Ta hã Izaraéu nhihudu norĩ, ezipsiu norĩ nhiptetezém hawi te te sõ'reptu za'ra wa, tãma iwazéb'õ za'ra sina, marĩ te te tãma 're 'manharĩ wasété za'ra mono ré.

Provébiu 14:8

Simiza'rese na 're ihâimana mono ma si tãma waihu'u pese di, ti'rãi waihu'u wẽ zarina, i'uwaibaba na si, za 're imorĩ da hã. Tane nherẽ, simiza'rese ãna 're ihâimana mono hã te za 'rãi waihu'u'õ zarina 're sisimini.

Provébiu 21:30

Ti'ai ãma rowaihu hã duré da'rã nhimiza're hã, Uburé Danhib'apito da hã siptete waihu'u õ di.

1 Corĩtu 2:6

Ti'ai ãma isazei'õ'wa norĩ nhimirowaihu'u zarina, te aima 're rowasu'u za'ra wa'aba mono õ di. Hâiwa hawi dahâimanazém na rowaihu'u na si, wa tô isazei'wa norĩ ma, te tãma 're rowasu'u za'ra, 'Re ihâimana u'âsi mono pẽ'ẽzani te te tãma 're iwaihu'u za'ra mono zéb zarina si, prédub sina ãma 're ihâimana za'ra mono norĩ ma hã. Ã hã roti hã ti'ai ãma isazei'õ'wa norĩ nhimiroti nei õ di. Daro mono bâ dama roti'wa norĩ nhimiroti nei õ di duré. Ta norĩ nhimiroti nhiptetezé hã daro mono bâ te za tiwi 're si'utõrĩ za'ra.

1 Corĩtu 4:6

Ĩsisãnawã norĩ, te 're aipawaptob za'ra wa'aba mono da, wa tô ãne na aima ĩsiwasu'u za'ra wa'wa ĩhâimanazém na hã, Apoluhu hâimanazém na zama. 'Re ihâimana u'âsi mono nhimiroti 'rata na rob'ui'éré zarina si, 're aihâimana za'ra wa'aba mono da, wa tô ãne na aima roti za'ra wa'wa, wasiré rowahutu'wa norĩ hã tisiré norĩ nhimiroti nhipai u, wẽ uptabi newa, ta norĩ niwĩ 're aihâimana za'ra wa'aba mono wẽ te, asina 're aiwata za'ra wa'aba mono tõ da duré.

Éfézu 4:14

Ãne wamhã, ai'uté ne wanhimiza'rese ãna 're wanomro mono õ di za oto. Tawamhã dazadawa nhipese na da te wama 're roti za'ra mono nherẽ, roti tô senai'õ hã wa te 're wapari za'ra mono õ wa, roti tô senai'õ niwĩ 're wasipizari za'ra mono õ di za.