1 Corĩtu 3:12 - ꞌRe Ihâimana Uꞌâsi Mono Zadawa Wasuꞌu

^12-13 Ni'wam norĩ hã, 'ri na'rata 'manharĩ nhisiwi te te siwi 'ri wamhã, ãté marĩ hã unhama ro'o na 're isi'unhama mono õ na si, te za siwi 'ri, iwa'âbâ za'ẽtẽ na, ẽtẽ waipo pré oru na, duré ẽtẽ waipo prã prata na, duré ẽtẽ waipo na. Ãté ihâiba amo norĩ hã te za marĩ iwa'âbâ surure na si siwi 'ri, unhama wa iro'o pese na si, wede na hã, duré du na hã, duré amnho teihi na hã. Tawamhã nimahã na 'ri hã ro'o nherẽ, si'unhama õ wamhã, te za waihu'u za'ra ni, marĩ iwẽ na si 'ri'wa norĩ hã te te siwi i'manharĩ na hã. Tazahã si'unhama wamhã, te za marĩ iwẽ prã na si te te siwi i'manharĩ na waihu'u za'ra ni. Tane te ni'wam norĩ hã Cristuhu wasu'uwẽ na, i'uwaibaba si te te dama 're rowasu'u za'ra. Duré ni'wam norĩ hã senai'õ na te te dama ãma 're roti za'ra. Tawamhã niwapsi te za 'Re ihâimana u'âsi mono hã pibu za'ra, Zezusihi wasu'u na te te dama 're irowasu'u za'ra mono zé hã, pé tô sena zô. Za da'ãma isipo'ozéb ãma, te za pibu za'ra. Tawamhã te za waihu'u za'ra, sena na Cristuhu wasu'uwẽ na te te dama 're irowasu'u za'ra mono norĩ hã, duré senai'õ na te te dama ãma 're irowasu'u za'ra mono norĩ zama.

1 Corĩtu 3:12 ပူးပေါင်းရင်းမြစ်များ

Salmu 119:72

Asimiroti hã uburé pese danhimarĩ dama 're ihâimana za'ra mono nhipai u, tô sena ĩma iwẽ uptabi na te 're hâimana.

Salmu 19:10

Sô rob'ruiwapari za'ẽtẽ uptabi di, ẽtẽ waipo pré oru nhipai u, tô oru iwazari'õ iwẽ uptabi nhipai u. Duré ropĩni ise nhipai u, tô ropĩ iwazari'õ ise uptabi nhipai u te 're hâimana, isimiroti hã.

Ezodu 5:12

Tahawa ma tô Izaraéu nhihudu norĩ, Ezitu ti'ai 'remhã te te sô ropé, amnho teihi da te 're itehâri si'atarẽme mono zô si'uihâ na te te sima 're ubumro za'ra mono da.

Provébiu 16:16

Wẽ uptabi di ẽtẽ waipo pré oru nhipai u, da'rãiwaihu'u wẽ, da te 're iwaihu'u za'ra mono da hã. Duré wẽ uptabi di ẽtẽ waipo prã prata nhipai u, danhimirowaihu'u wẽ na 're idahâimana za'ra mono zé hã.

Provébiu 30:6

Niwamhã 'Re ihâimana u'âsi mono te te inharĩzéb upana hã ãma 're anhisiwi mono õ di za. Ãne hã 're 'manharĩ mono wamhã, te za te te aima 're pri'i. Te za duré te te 're aihâi'ré, asadawa nhipese na hã.”

Provébiu 8:10

Ma'ãpé aima ĩnhimirotizé, ẽtẽ waipo prã prata nhibrob're, asima 're wẽ za'ra wa'aba mono. Duré ĩnhimirowaihu, ẽtẽ waipo pré oru uptabi nhibrob're, asima 're pisutu za'ra wa'aba mono.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:30

Duré ni'wam norĩ hã asiré wa'aba nherẽ, te za aima sadawa hapese za'ra wa'wa, isiniwĩ 're anomro aba mono da, isazei'wa norĩ hã uburé isiniwĩ 're nomro mono da.

Roma 16:17

Ĩsisãnawã norĩ, wa za oto ĩnhimiroti na aima 'rãsutu za'ra wa'wa. Ni'wam norĩ hã te aimawi tinhimirosa'rata prã na te te 're 'wa'rutu za'ra, isazei'wa norĩ wi. Te te tiwi ãma 're 'wa'rutu za'ra mono wa, te isazei'wa norĩ hã imreme hã te te 're wapari za'ra. Taha zarina, te duré sima ãma 're siwanhizari. Ta norĩ nhimirob'manharĩ wasété zéb zarina, te isazei'wa norĩ hã 're si'marõpãrĩ za'ra, tiwasété na. Zezusihi nhimiroti na, da te aima 're iroti za'ra wa'aba mono zéb upana, te ta norĩ hã te te dama 're roti za'ra, aimawi na si. Tahawa, te za tiwi 're asisawi pese za'ra wa'aba mo, ta norĩ siré 're aihâimana za'ra wa'aba mono tõ da.

1 Corĩtu 3:11

'Ri'wa norĩ hã, 'ri na'rata nhana'rada te te siwi 'manharĩ wamhã, misi haré iwẽ na si te za tô siwi 'manha. Tane duré, misire iwasu'uwẽ hã te 're hâimana, dawana te aima 're iwasu'u za'ra wa'aba mono hã, tô õ hã Zezu Cristuhu wasu'uwẽ hã. Iwasu'u aimawi hã 're 'maihâimana mono õ di, da te ãma 're saze za'ra mono wa, 'Re ihâimana u'âsi mono te te ãma 're ida'anho'reptui mono zéb da hã.

2 Corĩtu 2:17

Ni'wam norĩ hã 're simarĩ ahâ za'ra mono da si, te 'Re ihâimana u'âsi mono zadawa wasu'u na te te dama 're romhuri za'ra. Tane nherẽ, wa norĩ hã ta norĩ ne, 're wahâimana za'ra mono õ di. Duré marĩ aimawi zô, wa te wasima 're romhuri za'ra mono õ di wa norĩ hã, 'Re ihâimana u'âsi mono zadawa wasu'u na hã. Cristuhu waihu'u pese zarina si, wa tô wa te dama 're rowasu'u za'ra sena na, 'Re ihâimana u'âsi mono nho'a, ãne da, te te sima wapisutu za'ra wa, ta hã.

2 Corĩtu 4:2

Ni'wam norĩ hã asiré 're hâimana za'ra wa'aba mono nherẽ, ma tô wawasédé hã wa'ãma sa'ra za'ra, wahâimana nhipese sina dawi 're wahâimana mono newa. Uburé marĩ hã pi'uriwi da te 're i'manharĩ wasété za'ra mono zé hã, wa tô wa te wasiwi 're awẽ'õ. 'Re ihâimana u'âsi mono zadawa wasu'u hã, wa te dawi ãma 're 'wa'rutu mono õ di. Õhõ si, wa tô sõ'awi wa te dama 're wasu'u u'âsi, sena na, 'Re ihâimana u'âsi mono nho'a. Ãhã zarina, te za 'râwi dapẽ'ẽ na da te 're wawaihu'u za'ra, wazadawa nhipese ãna, 're iwahâimana mono zém na hã.

Colosu 2:8

Tahawa, te za 're asi'madâ'â pese za'ra wa'aba mo, dasi'uihâ na senai'õ na danhimirosa'rata nhipese na da te aima 're roti za'ra wa'aba mono wamhã, ãma 're dazaze za'ra wa'aba mono tõ da, tô sena newa taha ãma si 're aihâimana za'ra wa'aba mono tõ da. Ni'wam norĩ hã danhimiwada'uri zarina pawa'âbâ ãna te te dama 're iromhuri za'ra mono ne, robzei'õ na apâ 're aihâimana za'ra wa'aba mono õ'umnhasite, te za dawi 're asi'madâ'â pese za'ra wa'aba mo. Danhimirosa'rata nhipe hã Cristuhu hawib õ di. Dahi'rata sidâpâsi tô senai'õ na taré da te dasima 're iroti za'ra mono zém hawimhã ta hã, duré ihâiba'õ norĩ hã wasété uptabi na 're ihâimana za'ra mono norĩ hã ropâ siptete sina marĩ te te 're i'madâ'â za'ra mono hawimhã, danhimirosa'rata nhipe hã.

1 Timotiu 6:3

Ãté ni'wam norĩ hã aimawi na te za isazei'wa norĩ ma te te tãma 're rowasu'u za'ra. Ãté Wanhib'apito Zezu Cristuhu nhimiroti na, ta norĩ hã te te ãma 're saze za'ra mono õ di za, tô sena nherẽ, Wanhib'apito nhimiroti hã rowẽ na ãma 're idanomro mono zéb da hã, duré dawẽ na si ãma 're idanomro mono zéb da hã. Ãne wamhã, roti tô sena hã tãma waihu'u za'ra õ di za. Taré te za tinhimiroti wẽ na 'râwi sina 're wata za'ra. Ta norĩ ma, wẽ di, marĩ wasu'u na 'râwi ãma 're isisada'âbâ za'ra mono da hã, duré 'râwi timreme na 're isi'wapé za'ra mono da hã. Taha zarina, te za tisi'ruiwapari na te te sima ãma 're wa'rãmi za'ra, ãma 're sisada'âbâ za'ra mono da. Te za duré te te 're dawasu'u wasété za'ra. Te za duré si'ãma te te 're rosa'rata wasété za'ra. Roti tô sena hã tãma waihu'u pese za'ra õ wa, roti tô sena zarina si te te 're rosa'rata wẽ za'ra mono õ di za. Ta norĩ hã te te duré sima 're rosa'rata siwamnarĩ za'ra, isazei'wa norĩ hã rob'uiprazé hã te te tãma 're sõmri za'ra mono da, isimirowasu'u wa'rãmi, sibro pese na 're hâimana za'ra mono da.

2 Timotiu 2:20

'Ri wawẽ ãma hã piza hã ahâ na te 're hâimana za'ra, ẽtẽ waipo pré oru 'manharĩ hã, duré ẽtẽ waipo prã prata 'manharĩ hã, duré wede 'manharĩ hã, duré zé'a 'manharĩ hã. Nima norĩ hã, marĩ da hã wẽ uptabi di, marĩ hã da te ãma 're i'manharĩ za'ra mono zéb da hã. Duré nima norĩ hã marĩ da hã wẽ uptabi õ di, marĩ hã da te ãma 're i'manharĩ za'ra mono zéb da hã.

2 Timotiu 3:13

Iwasété norĩ hã, duré ihâimana nhipese norĩ hã te za 're siwasété pese za'ra. Isadawa nhipese na te za da te ãma 're sasõmri za'ra. Te za duré dapẽ'ẽ 're dasima 're dazadawa nhipese za'ra.

2 Timotiu 3:7

Pi'õ norĩ hã, ni'wam norĩ nhimirowasu'u te te 're wapari ze za'ra mono nherẽ, roti tô sena hã niwa te te iwaihu'u za'ra da hã, mare di za.

2 Timotiu 4:3

E marĩ wa, wa ãne aima ti'ru. Nimahã na hã sena roti hã da te 're wapari ze za'ra mono õ di za. Rowasu'u hã da te 're iwapari ze za'ra mono zéb uwaibaba si, te za da te 're wapari za'ra. Dama rowahutu'wa da, te za da'ahâ na da te dasima 're pisutu za'ra, rowasu'u hã da te 're iwapari ze za'ra mono zéb uwaibaba si, te te dama 're rowasu'u za'ra mono da.

Hebreu 13:9

Cristuhu wasu'uwẽ upana, danhimiroti aimawi na da'ãma 're sasõmri za'ra wa'aba mono õ di za, senai'õ na da te dasima 're irowasu'u za'ra mono na hã. 'Re ihâimana u'âsi mono hã tinhoprubzéb zarina, iwẽ uptabi hã te te wama 're i'apisutu mono na si, wa za wapẽ'ẽ 're ãma 're wanhiptete u'âsi za'ra. Taha si wa norĩ hã wama iwẽ uptabi za'ra hã. Dasa hã da te dasiwi 're isawi za'ra mono na roti hã da te 're i'madâ'â za'ra mono na, ãma 're danhiptete waihu'u za'ra mono õ di, dapẽ'ẽ 'remhã. E marĩ wa. Taré na dasa hã 're hâimana mono wa. Taha na ãma 're dasipawapto waihu'u za'ra mono õ di tô, dasa da te dasiwi 're isawi za'ra mono na roti na hã.

1 Pedru 1:7

Wanhib'apito umnhasi sina 're aihâimana za'ra wa'aba mono zô, te za rowasédé hã asada 're hâimana za'ra wa'wa. Wanhib'apito Zezu Cristuhu ma, wẽ di, Wanhib'apito umnhasi sina 're i'aihâimana za'ra wa'aba mono zé hã. Ẽtẽ waipo pré oru hã dama isawi pese zém nhipai u, tãma wẽ di. Ẽtẽ waipo pré oru hã wa'âbâ za'ẽtẽ wa, dama sawi pese di, ta hã dama 're hâimana u'âsi mono dai õ nherẽ. Zata õ zô, te za unhama wa hiri ni, zata õ wa, da te iwaihu'uzéb da hã, oru uptabi na. Tane, a norĩ wa'wa hã rowasédé hã asada 're hâimana za'ra wa'aba mono nherẽ, Wanhib'apito umnhasi sina 're aihâimana u'âsi za'ra wa'aba mono wamhã, apâ wei morĩ wapsi, te za danho'a ai'ãma tiwata za'ra wa'wa, õhõ umnhasi sina ãma 're i'aihâimana u'âsi za'ra wa'aba mono zém na. Tame te za duré marĩ hã iwẽ hã aima sõmri za'ra wa'wa. Rowẽ uptabi hã te za duré aima pisutu za'ra wa'wa. Tawapsi, aima 're rowẽ uptabi za'ra wa'aba mono di za oto.

Apocalipsi 2:14

Tane nherẽ, te duré marĩ hã ĩwi ro'wa'ré, te ai'ãma iwaihu'u za'ra wa'wa hã. Ni'wam norĩ hã ma tô aibâ nhimiroti na 're hâimana za'ra, Balaã na aibâ nhisi hã. Ta hã ma tô duréihã Baraquihi ma te te 're roti, Izaraéu nhihudu norĩ ma, sadawa nhipese na te te 're roti wasété za'ra mono da, simiroti wẽ newa, isine 're hâimana wasété za'ra mono da. 'Re ihâimana u'âsi mono upana, romhâiba 'manharĩ ãma 're dawata za'ra mono da, danhimizama da te tãma 're isõmri za'ra mono hã, ma tô Baraqui hã te te 're a'ru, Izaraéu nhihudu norĩ ma, te te 're huri mono da. Ma tô duré te te tãma 're roti pese za'ra, pi'õ, mro ré nherẽ, aibâ aimawi na 're simisaihuri za'ra mono da, duré aibâ, mro ré nherẽ, pi'õ aimawi na 're simisaihuri za'ra mono da.

Apocalipsi 21:18

Duré 'ri nho'õmo 'wawi wa'ra hã ẽtẽ'ubuzi zarob'a na i'manharĩ hã. Duré 'ri nho'u hã oru uptabi na si 'ri 'manharĩ mono hã, aimawi na wazari ãna. Aiwa simhi ne hã isarob'a uptabi.

Apocalipsi 3:18

Tahawa, wa za oto aima roti pese za'ra wa'wa. Ẽtẽ waipo pré oru uptabi hã iwazari'õ hã da te 're i'ruiwapari za'ra mono zéb zarina, da te dawi 're i'uipra za'ra mono ne, te za ĩnhimiroti zô si 're asõpré wa'aba mo, iwẽ uptabi zô si, aipẽ'ẽ 're asibro pese ne, rowẽ na si ĩ'ãma 're aihâimana u'âsi za'ra wa'aba mono da. Duré da'uza hâirã hã te za da te dawi 're uipra za'ra, ãma 're dasi'uza za'ra mono wa, da te 're 'madâ'â ze za'ra mono da. Tane te za duré a norĩ wa'wa hã ĩwi 're irowaptẽrẽ u'âsi za'ra wa'aba mo, wa hã te 're aipawaptob za'ra wa'aba mono da, ĩ'ãma 're anomro wẽ wa'aba mono da, taha zarina, asisém na 're aihâimana za'ra wa'aba mono tõ da oto. Duré datõmo nhihâzém na 're dasitõmo wẽ za'ra mono da, 're dasitõmonhihâ za'ra mono da, da te dawi 're i'uipra za'ra mono ne, te za ĩzô si tô 're asõpré u'âsi aba mo, ĩnhimiroti hã waihu'u pese za'ra wa'aba da.