1 Corĩtu 2:1 - ꞌRe Ihâimana Uꞌâsi Mono Zadawa Wasuꞌu

¹ Ĩsisãnawã norĩ, ma'ãpé ĩ'ãma aipo're pu'u za'ra wa'aba. Wa hã atẽme ãma ĩmorĩ aba wamhã, 'Re ihâimana u'âsi mono nhimiroti hã aré dama iwaihu'u'õ hã, wa tô te aima 're wasu'u za'ra wa'wa. E tawamhã ĩmreme wapari ze na, 're ĩwapari za'ra wa'aba mono da si, wa tô te ĩsi'ãma 're rosa'rata, ĩnhimiroti wẽ wa, ĩ'ãma 're atob'uzu za'ra wa'aba mono da. Mare di. E ti'ai ãma danhimirowaihu'u pese na da te dama 're iroti za'ra mono ne, wa tô te aima 're rowasu'u za'ra wa'wa. Mare di. Tane hãi õ di, ĩnhimirowasu'u hã.

1 Corĩtu 2:1 ပူးပေါင်းရင်းမြစ်များ

Ezodu 4:10

Tawamhã Mozési, ma te 'Re ihâimana u'âsi mono ãma sada'â ãne: — Ĩnhib'apito, tane ĩma iwaihu'u wana ré, niwamhã ĩmreme waihu'u pese na hã ãma ĩhâimana õ di. Wa hã ĩmreme tobre di, duré ĩmreme zani su'u õ di. Duré ĩmreme hã te 're sani mono wamhã, ĩmreme tété hâre di.

Roma 16:18

Ta norĩ hã Wanhib'apito Cristuhu ma, te te 're romhuri za'ra mono õ di. Te te sima 're iwẽ za'ra mono zéb zarina si, te marĩ iwasétére zô si hã sima 're sõpré. Ta norĩ hã sadawa nhipese nherẽ, te isimiroti hã sena newa da te 're wapari ze za'ra, danhimirosa'rata nhib'uware na 're idahâimana za'ra mono norĩ hã. Mreme wapari zei wa, duré asa imreme hã da te dasima 're wẽ za'ra mono da, te taré timreme amo na te te dama 're rowasu'u za'ra, da'ãma 're wata za'ra mono sina. Tawamhã taha zarina, te za awa'awi imreme na da te 're saze za'ra.

Roma 16:25

'Re ihâimana u'âsi mono ãma si, wa za 're wawata u'âsi za'ra. Taha ma si, tãma waihu'u pese di, te te 're iwa'apawapto mono zéb da hã, Zezu Cristuhu wasu'uwẽ hã wa te 're isaze za'ra mono zé hã wa te 're rẽme za'ra mono ãna, wanhiptete u'âsi ãma 're iwanomro mono zéb da hã. Taha wasu'uwẽ hã wa tô te dama 're wasu'u u'âsi. Duréihã iwasu'uwẽ hã, 'Re ihâimana u'âsi mono te te dama 're awaihu'u mono õ di. Iwasu'uwẽ hã dama sa'rese ãna, ma tô aré 're danomro. Tane nherẽ, ma tô 'Re ihâimana u'âsi mono hã iwasu'uwẽ hã dama waihu'u oto, isadawa 'mahârâ'wa norĩ nhimi'ui'éré hawimhã. Tahawa, te oto isimiwada'urizéb zarina si, da te 're waihu'u za'ra daro mono bâ, da te ãma 're isazei pese za'ra mono zéb da hã, duré da te 're iwapari pese za'ra mono zéb da hã oto.

1 Corĩtu 1:17

 dawabzuri hã te dama 're ab'manharĩ mono da, te te datẽme ĩzatõrĩ õ di, Cristu hã. Iwasu'uwẽ si te dama 're wasu'u mono da, ma tô datẽme ĩzatõ. Tahawa, ti'ai ãma danhimirowaihu'u na da te dama 're iroti za'ra mono nei õ di wa hã, te dama 're irowasu'u mono zé hã. Ti'ai ãma danhimirowaihu'u na Cristu te dama 're wasu'u mono 'wa'âhã, wedepo'o nhonhi'rãmi na dazada idâ'âzé wasu'u hã te aré wapu na dama 're hâimana. Tane 'wa'âhã, Cristuhu wasu'uwẽ hã marĩ dai õ di aré, da te ãma 're saze za'ra mono wa, 'Re ihâimana u'âsi mono te te ãma 're ida'anho'reptui mono da hã.

1 Corĩtu 1:6

Cristuhu wasu'uwẽ hã ma tô 're isazei pese za'ra wa'aba mo. Taha zarina, te oto asiptete sina ãma 're anomro aba mo.

1 Corĩtu 2:13

Tahawa, wa norĩ hã ti'ai ãma danhimirowaihu'u pese zarina, wa te oto dama 're rowasu'u za'ra mono õ di. 'Re ihâimana u'âsi mono pẽ'ẽzani te te wama 're i'aroti mono zéb zarina si, wa oto wa te dama 're rowasu'u za'ra. Ipẽ'ẽ 're, Ipẽ'ẽzani tãma 're ihâimana za'ra mono norĩ ma si, wa isimiroti wẽ hã wa te tãma 're wasu'u za'ra, 'Re ihâimana u'âsi mono hâimanazé wasu'uwẽ na hã.

1 Corĩtu 2:4

Zezusihi wasu'uwẽ, te aima 're wasu'u za'ra wa'aba mono wamhã, ti'ai ãma danhimirowaihu'u pese na da te dama 're iroti za'ra mono ne, te aima 're rowasu'u za'ra wa'aba mono õ di, ãma 're ĩzaze za'ra wa'aba mono da hã. 'Re ihâimana u'âsi mono pẽ'ẽzani hã tiwaihu'u pese na te te 're i'aipawaptob za'ra wa'aba mono na si, ma tô sena na 're isazei pese za'ra wa'aba mo, Zezusihi wasu'uwẽ hã.

1 Corĩtu 2:7

E 'wa iwaihu'u pese nhimiroti, te dama 're iwasu'u mono hã bété. 'Re ihâimana u'âsi mono nhimiroti hã aré dama iwaihu'u'õ si, wa wa hã te dama 're wasu'u u'âsi, iwaihu'u pese zarina isimiroti wẽ uptabi si. Ta hã ma tô aré dawi udâ, da te 're waihu'u za'ra mono tõ da a'â, isimiroti wẽ wasu'u hã. Tane nherẽ, te te aropoto mono õ ré, ma tô te te sima 're wa'apisutu siro, iwaihu'u pese siré si oto 're wahâimana u'âsi za'ra mono da, rowẽ uptabi na.

2 Corĩtu 10:10

Ni'wam norĩ hã te duré te te sima 're ĩwasu'u za'ra, ãne: “Pauluhu nhimiroti hã pire uptabi di, tinhimi'ui'éré na si te te wama 're iroti za'ra mono zém na hã. Mreme tete sina, te za duré ãma wama roti pese za'ra, tinhimi'ui'éré na hã. Tane nherẽ, wa'rata sãmra wamhã, marĩ dai õ di. Wama mreme wapu za'rare di.” Ãne te ni'wam norĩ hã te te sima 're ĩbâsi za'ra, ĩza'rerap si.

2 Corĩtu 11:6

Ãté ĩmreme hã, ĩma pibu prã ti tô, da'ahâ nho'a te dama 're irowahutu mono zéb da hã. Tane nherẽ, Cristuhu wasu'uwẽ si, tô sena hã ĩma waihu'u pese di. Ãne na ma tô oto ĩ'ãma iwaihu'u pese za'ra wa'wa, a norĩ wa'wa hã.

2 Tesalonita 1:10

Tawamhã wei morĩ wamhã, isimiroti zarina 're danomro wẽ mono da, te te 're idapawaptob za'ra mono norĩ hã te za ãma tiwata za'ra, te te sina 're i'umnhasi za'ra mono norĩ hã. Te za tô ãma titob'uzu za'ra. A norĩ wa'aba zama, wanhimirowasu'u zarina iwasu'uwẽ na 're isaze za'ra wa'aba mono norĩ hã, te za ãma dame aiwata za'ra wa'wa za. Te za duré ãma atob'uzu za'ra wa'wa za. Tane tô, bâdâ ipire, iwa waptã'ã wapsi, te za uburé dama ãma uwaimra.

1 Timotiu 1:11

Roti tô sena na si, wa tô te dama ãma 're aroti, Wanhib'apito wasu'uwẽ na te dama 're rowasu'u mono wamhã. Wẽ uptabi di, Wanhib'apito wasu'u hã. Taha da, ma tô ĩma pisutu, iwasu'uwẽ na te ãma 're da'apo're pu'u mono da, 'Re ihâimana u'âsi mono hã, rowẽ u'âsi 're imorĩ hã.

2 Timotiu 1:8

Ãne wamhã, 're asisé mono õ di za, Wanhib'apito wasu'uwẽ hã dama 're wasu'u tõ mono da hã. Duré 're asisé mono õ di za, ĩwasu'u na. Wanhib'apito wasu'uwẽ na te dama 're rowasu'u mono 'ru te, ma tô dasiwi ĩnherẽ ni, dazazéb 're. Tahawa, wa oto te 're robzépata. Ãne wa, ma'ãpé 'Re ihâimana u'âsi mono hã tinhiptede te te aima isõmri na, sada 're asiptete mono, ĩsine 're robzépata mono da.

1 Zuwã 4:14

Wamama hã ma tô ti'ra hã we satõ, Danho'reptui'wa da. Ta hã wa tô wa te 're 'madâ'â za'ra, watõmo na. Ãhã na wa oto wa te dama 're wasu'u za'ra, Danho'reptui'wa na, i'ra hã.

Apocalipsi 1:9

Wa hã Zuwã, asisãnawãi wa'wa. A norĩ wa'wa hã Zezusihi ãma si 're anomro aba mono wa, danhimirob'manharĩ wasédé, 're isépata za'ra wa'aba mono ne, wa duré te 're robzépata, asine za'ra wa'aba, Zezusihi ãma si 're ĩmorĩ wa. Zezusihi ãma si wasiré 're wanomro mono wa, wa duré 'Re ihâimana u'âsi mono nhib'a'uwẽ 're wahâimana za'ra. Ta hã te za duré te te 're wa'apawaptob u'âsi, da te 're wa'ruiwapari za'ra mono wa, wa te 're robzépata za'ra mono nherẽ, wawasété u tiwi 're wasipizari za'ra mono tõ da, wanhiptete u'âsi ãma 're wanomro mono da. Wa hã wa tô te dama 're sadawa wasu'u, 'Re ihâimana u'âsi mono hã. Tô sena na Zezusihi zazei'wa na wa tô duré dama 're ĩsiwasu'u u'âsi. Tahawa, ma tô dasiwi ĩ'âri ni. Ma tô duré dasiwi ĩzatõrĩ ni, Patemusi na rob'ré za'iti nhisi u.

Apocalipsi 19:10

Tawamhã tô õ hã hâiwa ãma romhuri'wa papara, wa tô ĩhi'rãtitõ aime, ãma ĩwata da aré. Tane nherẽ, te ĩma tinha, ãne: — Tô'ã. Ãne hã 'manharĩ tõ. Wa hã asine hã, 'Re ihâimana u'âsi mono ma romhuri'wa, wa 're ĩhâimana, duré asisãnawã norĩ ne hã, duré asiré isazei'wa norĩ ne hã. Ta norĩ hã roti tô sena uptabi hã, Zezusi te te dama 're i'awaihu'u mono hã te te 're iwapari pese za'ra mono. Ta norĩ ne hã, wa 're ĩhâimana, wa hã. Ma'ãpé 'Re ihâimana u'âsi mono ãma si 're aiwata mono. 'Re ihâimana u'âsi mono zadawa 'mahârâ 'rata 'wa norĩ hã, Ipẽ'ẽzani te te tãma 're iwaihu'u za'ra mono zéb zarina si, te ta norĩ hã te te dama 're sadawa wasu'u za'ra. E marĩ na te bété te te dama 're sadawa wasu'u za'ra. Tô õhõ na, Zezusi, ti'ab ré uburé te te dama 're i'awaihu'u mono na si, te ta norĩ hã te te dama 're sadawa wasu'u za'ra, 'Re ihâimana u'âsi mono hã.