1 Corĩtu 16:2 - ꞌRe Ihâimana Uꞌâsi Mono Zadawa Wasuꞌu

² Dumigu sidâpâsi 're sãmra aba mono da, te za rob'uiprazé hã 're ipo'o u'âsi za'ra wa'aba mo, aihâiba mono bâ wa'aba. Aipawa'â hã suru na 're waibui wa'aba mono wamhã, suru na te za 're ipo'o za'ra wa'aba mo. Duré sa'ẽtẽ na 're waibui wa'aba mono wamhã, sa'ẽtẽ na te za duré 're ipo'o za'ra wa'aba mo. Atẽme ĩwisi aba wapsi, asiwi 'rã'õtõ aba da, asima rosa'rata za'ra wa'aba õ di za. Ĩwana ré, te za asiwi 're i'rã'õtõ u'âsi aba mo dumigu sidâpâsi, ĩzô nomro siromo da.

1 Corĩtu 16:2 ပူးပေါင်းရင်းမြစ်များ

Zenezi 26:12

Tawamhã Izaqui, taha wahum na ma tô tame rob're hã 'manha. Tawamhã te te oto tehâri wamhã, te te i'a're nhipai u ma tô waze, 100 na isa'rata nhipai u. E marĩ wa. Uburé Danhib'apito iwẽ na te te pawapto wa.

Zenezi 30:27

Tawamhã Labã, ma te ãma sada'â ãne: — Ĩzawi na hã ma'ãpé ĩ'rata 're aihâimana u'âsi mono. E marĩ wa. Wa hã marĩ te i'manharĩ nhipese na, wa tô waihu'u, aihâiba u'âbâmhã Uburé Danhib'apito iwẽ na te te 're ĩpawapto mono zéb zarina hã.

Zenezi 30:30

We ãwa ĩwisi wana ré hã asimarĩ hã aré umrore di. Tane nherẽ, ma tô oto sina hâ. Duré 'Re ihâimana u'âsi mono, nimomo 're ĩne mono sidâpâsi ma tô iwẽ hã te te aima 're apisutu. Tane nherẽ, oto wa hã ãhã na hã ĩhawi a'uwẽ norĩ si te oto 're i'a'madâ'â mono da si, wa tô oto ĩsima wẽ zahi.

Zenezi 32:10

Wa hã asib'a'uwẽ, tarére na 're ĩhâimana mono nherẽ, ĩma asimizawi pese zé hã duré ai'umnhasi u'âsi wa, ĩ'ãma 're aiwamri mono zé hã aré tô ĩma hã ibâi õ di. Panho'u Zodã pa na te saprĩ wamhã, ĩsiwazusizéb ré si wa tô saprĩ. Tane nherẽ, ãhã na awa'awi na hã wa oto maparane dawa'õtõ na abaze norĩ ré hã apâ ĩsina siri.

Zenezi 33:11

Tahawa ma'ãpé ĩzawi na hã aima ĩnhoprubzé te we isimroi mono hã asima wẽ za'ra na. 'Re ihâimana u'âsi mono ma tô iwẽ na si ĩma 're hâimana. Tahawa uburé marĩ ĩwi sô 're irobaba mono hã ma tô te te ĩma 're anhomri. Tawamhã Zaco, Ezauhu ma hã te te nasi tãma 'ruzadawa za'rei'õ wa, ma tô oto sima wẽ.

Marcu 14:8

Pi'õ hã ma tô i'uwaibaba tô ĩma 'manha, iwẽ hã. Ã hã ĩdâ'â wana ré, ma tô ãma ĩhâiba zadaze, da te iré ĩnherẽzéb u.

Luca 16:10

Te duré tãma nharĩ za'ra, ãne: — Ãté ni'wam norĩ hã te za danhibrob 'rare hã, dazô te te 're 'madâ'â wẽ za'ra. Tawamhã dama umnhasi wa, te za da te tãma 're pisutu za'ra, danhibrob ahâ na, te te dazô 're 'madâ'â za'ra mono da oto. Tane, danhibrob 'rare, dazô te te 're 'madâ'â wasété za'ra mono wamhã, te za da te 're waihu'u za'ra, isa'ẽtẽ na zama, za dawi 're isipsaihuri za'ra mono na.

Luca 24:1

Dumigu na rowa'a wi, te pi'õ norĩ hã ai'aba'ré, ab're u. Marĩ wa'u te siré âri za'ra, isadaze hã.

Zuwã 20:19

Tawamhã tô taha bâtâ na dumigu na bâdâ sébré wi, ma tô si'rã'õtõ, Zezusihi siré 're inomro mono norĩ si. Dama ipire norĩ pipa te, ma tô siré 'rinhitop tete za'ra. Tame si'rã'õtõ ré, ma tô Zezusi hã tãma sihâi'ré za'ra. Taha wamhã, te iwa'wab za'ra za. Tawamhã te ãne tãma nharĩ za'ra: — Rowẽ na 're aihâimana za'ra wa'aba mono.

Zuwã 20:26

Tawamhã romhuri misi ãma si'utõrĩ za'ra pari, ma tô duré Zezusihi siré 're inomro mono norĩ hã si'rã'õtõ, tô dumigu na. Tome hã te oto ime tinhamra za'ra. Tawamhã 'ri nhitop tete nherẽ, ma tô duré wei itẽme tizébré za'ra, Zezusi hã. Iwa'wab za'ra, te duré ãhã wamhã za. Ãne te tawamhã duré sawi za'ra: — Rowẽ na 're aihâimana za'ra wa'aba mono.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:7

Tawamhã sabadu mara na wa tô wasi'rã'õtõ ni, tame isazei'wa norĩ 're isi'ubumroi mono norĩ me, i'u'ẽtẽ wapu hã wa te huri da. Tawamhã Paulu hã sisa'u ma tô wama roti za'ra, awẽ za oto morĩ na dâ'âsina. Simiroti za'ẽtẽ na te mara wa'wam nherẽ, zahadu wama roti za'ra.

2 Corĩtu 8:10

Ĩnhimirosa'rada hã wa za oto aima waihu'u za'ra wa'wa, rob'uiprazé asiwi i'ubumroi wa'aba zém na hã. Wahub 'rata na ma tô dawana asima ipisutu za'ra wa'wa, rob'uiprazé hã asiwi i'rã'õtõ aba zéb da hã. Dawana ma tô duré rob'uiprazé ubumro na ãma isãna'rata za'ra wa'wa. Tahawa, ma'ãpé asiwi uprosi wẽ wa'aba, rob'uiprazé ubumro hã. Ato sina, ãma asisaze za'ra wa'aba ne, te za oto ãhã na hã ãma i'uwaimrami za'ra wa'wa duré, rob'uiprazém na hã, aihâiba mono bâ aima 're ihâimana za'ra wa'aba mono zéb zarina, niha wamhã, isa'ẽtẽ zarina, niha wamhã, duré isuru zarina.

Apocalipsi 1:10

Tawamhã tame ĩnhamra ré, Wanhib'apito nhibâtâ na 'Re ihâimana u'âsi mono pẽ'ẽzani hã ma tô ĩ'uihâ pi'ra. Te te ĩ'uihâ pi'rai wa, wa tô aimawi ĩhâiba, ĩhâiba waihu'u õ na. Tawamhã ĩhâiba waihu'u õ na ĩhâimana ré, wa tô ni'wai mreme hã wapa, ĩbabarãi hawi. Mreme 'rãihâ na te ĩma tinha, danhimnhihârâzé hârâ 'rãihâ na ne.