1 Corĩtu 15:9 - ꞌRe Ihâimana Uꞌâsi Mono Zadawa Wasuꞌu

⁹ Wa hã uburé ĩsiré Zezusihi zadawa wasu'u'wa norĩ zapari, wa 're ĩhâimana, tãma ĩwapu za'ra na. E marĩ wa. Te sazei õ ré, wa tô 'Re ihâimana u'âsi mono nhib'a'uwẽ ma, te tãma 're rob'manharĩ wasété u'âsi za'ra. Tahawa, ibâi õ di aré, isadawa wasu'u'wa na, da te 're ĩwaptẽrẽ za'ra mono zé hã.

1 Corĩtu 15:9 ပူးပေါင်းရင်းမြစ်များ

1 Corĩtu 10:32

Marĩ hã 're 'manharĩ za'ra wa'aba mono õ di za oto, da te ãma 're ai'madâ'â za'ra wa'aba mono wa, dawasété u 're darere'e mono tõ da. Ãne hã dazada 're 'manharĩ za'ra wa'aba mono õ di za, zudeu norĩ da, duré zudeu'õ norĩ da, duré 'Re ihâimana u'âsi mono nhib'a'uwẽ 're ihâimana za'ra mono norĩ da.

2 Corĩtu 11:5

E ta norĩ hã Cristuhu zadawa wasu'u'wa pâ, ma tô bété isimirowasu'u na ãma isaze za'ra wa'wa. E ĩnhimiromhuri hã tãma wapu bâ, ta norĩ nhimiromhuri ma hã.

2 Corĩtu 12:11

Cristuhu zadawa wasu'u'wa na, asiwi ĩwaihu'u za'ra wa'aba õ wa, wa tô ĩnhimiromhuri wẽ na si aima ĩsiwasu'u za'ra wa'wa, ãne hã te ĩsima wẽ õ nherẽ. Ãté ĩnhimiza'rese'õ ne, wa tô ãne na aima ĩsiwasu'u za'ra wa'wa, a norĩ wa'wa hã dama 're ĩwasu'u wẽ za'ra wa'aba mono õ 'ru te. 'Re ihâimana u'âsi mono te te 're ĩpawapto mono õ 'wa'âhã, aré marĩ dai õ di, 're ĩhâimana mono zé hã tô. Tane nherẽ, Zezusihi zadawa wasu'u'wa newa, senai'õ na te te aima 're iroti za'ra wa'aba mono norĩ ma, ĩwapu na tãma 're ĩhâimana za'ra mono õ di.

Galata 1:13

Wa hã wasiré zudeu norĩ nhimizazezéb zarina 're ĩmorĩ ré, wa tô ĩsima wẽ upta, wasiré iwaprédu mono norĩ nhipai u, wahi'rata norĩ nhimiroti zarina si, 're ĩmorĩ da. Ãne 're ĩmorĩ ré, 'Re ihâimana u'âsi mono nhib'a'uwẽ norĩ ma, ĩwasété na wa tô te 're arob'manharĩ aré, Wanhib'apito zazei'wa norĩ ma hã. Wa tô te ĩsima 're awẽ, te 're uprosi mono da. Ãne ma tô ĩwasu'u wasédé hã 're iwapari za'ra wa'aba mo.

Galata 1:23

Taré ma tô ĩwasu'u wẽ si te te 're wapari za'ra, ta norĩ hã. Ãne na ĩwasu'u wẽ hã: “Paulu hã ma tô te te wa'ãma 're arowasété aré, Wanhib'apito ãma, wa te 're sasõmri tõ za'ra mono da. Tane nherẽ, Zezu Cristuhu wasu'uwẽ na te oto te te 're da'apawapto, Wanhib'apito ãma da te 're sasõmri za'ra mono da.” Ãne na si ma tô ĩwasu'u wẽ hã te te 're ropé.

Filipu 3:6

Wasiré zudeu norĩ hâimanazém na, 'Re ihâimana u'âsi mono ma, 're ĩhâimana mono da, wa tô 're ĩsiwasutu u'âsi aré. Tahawa, Zezusihi zazei'wa norĩ ma, wa tô te tãma 're rob'manharĩ wasété za'ra, Zezusi hã 'Re ihâimana u'âsi mono 'ra õ newa, ta norĩ hã te 're i'ruiwapari za'ra mono zéb zarina, te te 're robzépata za'ra mono da. Uburé 'Re ihâimana u'âsi mono nhimiroti 'rada hã wa tô duré te 're 'madâ'â pese tô, taha zarina 'Re ihâimana u'âsi mono te te ĩwẽsãmri da newa. Tahawa, nima hã isimiroti te ãma i'upa na da te dasiwi ĩwaihu'u õ di.