1 Corĩtu 14:3 - ꞌRe Ihâimana Uꞌâsi Mono Zadawa Wasuꞌu3 Tane nherẽ, ni'wam norĩ hã damreme uwaibaba, 'Re ihâimana u'âsi mono zadawa wasu'u na, sena na isazei'wa norĩ ma, te te ãma 're rowasu'u za'ra mono wamhã, taha na si te za isazei'wa norĩ hã 're sipawaptob u'âsi za'ra, Wanhib'apito ãma siptete sina 're nomro mono da, pẽ'ẽ wẽ na. Taha zarina si, te za duré tãma 're rowẽ wairébé apâ, tiwi 're irobzei'õ za'ra mono zém hawimhã. အခန်းကိုကြည့်ပါ။ |
1 Corĩtu 14:3
42 ပူးပေါင်းရင်းမြစ်များ
Tawamhã ma tô ni'wa hã dama sõré, 'Re ihâimana u'âsi mono nhimiroti na Mozési te te irob'ui'érézém na hã. Isadawa 'mahârâ'wa norĩ nhimi'ui'éré hã te duré dama sõré. Te te sõré za'ra parimhã, rowahutuzéb ãma 're da'anhimi'rui mono 'wa hã ma tô Paulu norĩ hã ãne 'mahârâ za'ra, te te dama rowasu'u za'ra da: — Wasiré Izaraéu nhihudu norĩ, asima wẽ za'ra wa'aba wamhã, te za wama irowasu'u za'ra wa'wa, wama robze za'ra da.
'Ri nho'õmo wa'wai baba neb zahuré wamhã, ma tô isazei'wa norĩ hã pawaptob za'ra, hâimana nhiptete na 're nomro mono da, 'Re ihâimana u'âsi mono ãma te te 're sasõmri u'âsi za'ra mono da. Ãne te duré tãma nharĩ za'ra: — A norĩ wa'wa hã Zezusihi zazei'wai wa, marĩ iwasédé hã da te aima 're 'manharĩ za'ra wa'aba mono wamhã, tãma 're aipahi za'ra wa'aba mono õ di za. Ãne na hã te za tô 're irobzépata za'ra wa'aba mo. Tane nherẽ, 'Re ihâimana u'âsi mono nhib'a'uwẽ oto 're anomro aba mono wa, te za niwapsi hâiwa ãma i'rata 're aihâimana u'âsi za'ra wa'aba mo, rowẽ na. — Ãne te tãma nharĩ za'ra.
Tawamhã aibâ hã Zuzé na isisi hã ma tô tinhipti'a hã dama wede, iwa'âbâ zô. Roti wẽ 'wa, ta hã. Tahawa, Banabé na ma tô siwi sisi, Zezusihi zadawa wasu'u'wa norĩ hã. (Banabéhé nhisi hã dama rowẽ zani'wa, te wasu'u, isisi hã.) Levihi nhihudu, ta hã. Sipri na rob'ré za'iti nhisi ãma ipotozé hã. Tinhipti'a hã te te dama wede wamhã, iwa'â, ma tô uburé ti'â, Zezusihi zadawa wasu'u'wa norĩ u.
Tawamhã isazei'wa norĩ ma, rowẽ di oto, Zudéa ãma, duré Galiléa ãma, duré Samaria ãma zama. Uburé tãma rowẽ za'ra di oto, siré 're isi'rã'õtõ mono norĩ ma hã daro mono bâ. 'Re ihâimana u'âsi mono pẽ'ẽzani nhimipawaptobzém na ma tô isazei'wa norĩ hã 're hâimana nhiptete za'ra. Taha zarina, ma tô duré isazei'wa norĩ za'rada hã sina hâimo. Ta norĩ hã ma tô Wanhib'apito Zezusi hã te te 're wazé pese za'ra.
Duré ni'wam norĩ hã 'Re ihâimana u'âsi mono hã te te sima 're apisutu mono wamhã, te za isazei'wa norĩ ma, isimiroti zarina si te te 're rowahutu za'ra, te te 're wapari za'ra mono wa, pẽ'ẽ toi u'âsi, ãma 're hâimana za'ra mono da, siptete sina. Duré ni'wam norĩ hã tinhibrom na dama 're sõprub za'ra mono da, te te sima 're apisutu mono wamhã, te za tô ta norĩ hã dawi 're sõti za'ra mono ãna, dama ãma 're sõprub za'ra, sa'ẽtẽ na. Duré ni'wam norĩ hã isazei'wa norĩ 'madâ'â'wa da, te te 're apisutu mono wamhã, te za tô simi'ẽ na te te 're 'madâ'â u'âsi za'ra, ta norĩ zama. Duré ni'wam norĩ hã te te sima 're apisutu mono wamhã, ta norĩ zama te za da'ãma 're pẽ'ẽzé za'ra, dahâzé ré norĩ ãma, duré dawi 're irobzei'õ za'ra mono norĩ ãma. To sina, te za ãne zarina te te 're dapawaptob za'ra, ta norĩ hã. Ãne wa za wa te wasima 're rob'ma'wamarĩ, romhuri mono bâ, dahâiba hã misi nherẽ, dahâiba na marĩ hã ahâ na dama 're ihâimana za'ra mono hã tite mono bâ te te sima 're iromhuri za'ra mono ne.
Ni'wam norĩ hã asiré isazei'wa 're ihâimana za'ra mono norĩ hã, te ãne na te te sima 're nharĩ za'ra: “Marĩ hã wa te 're 'manharĩ za'ra mono tõ da, 'Re ihâimana u'âsi mono te te wawi 're awẽ'õ mono õ nherẽ, wa norĩ zama, wa te wasiwi 're wẽ'õ za'ra mono õ di za, wa te 're 'manharĩ za'ra mono tõ da. Wa za tô wa te 're 'manharĩ za'ra, wa te wasima 're iwẽ za'ra mono zéb uwaibaba si.” Ãne ma tô ni'wam norĩ hã te te sima 're waihu'u za'ra. Tane hã wẽ di tô. Tane nherẽ, marĩ hã 'Re ihâimana u'âsi mono te te wawi 're awẽ'õ mono õ nherẽ, ãté wa te 're 'manharĩ za'ra mono wa, wa za wasiré isazei'wa norĩ wi, wa te ãma 're 'wa'rutu za'ra. Tahawa, marĩ hã dazu wa te 're 'manharĩ za'ra mono õ di za, wasiré isazei'wa norĩ wi, wa te ãma 're 'wa'rutu tõ za'ra mono da. Duré wasiré isazei'wa norĩ hã, Cristuhu ãma si siptete sina 're nomro mono da, wa te 're ipawaptob za'ra mono da si, wa za tô uburé marĩ hã iwẽ si wa te 're 'manharĩ za'ra.
A norĩ wa'wa hã bété. Ma tô sô 're asõpré u'âsi aba mo, 'Re ihâimana u'âsi mono Tipẽ'ẽzani na hã, romhuri mono bâ te te aima 're ipisutu za'ra wa'aba mono zéb zô, ãma 're asipawaptob za'ra wa'aba mono zéb da hã. Romhuri hã õhõ si 're hâimana za'ra mono õ di, ipire uptabi na hã. Sisarina si õ di, romhuri hã. Tahawa, romhuri iwẽ uptabi zô si, te za asima 're irob'ruiwapari u'âsi za'ra wa'aba mo, ãma 're asipawaptob za'ra wa'aba mono zéb da, Wanhib'apito ãma asiptete sina 're anomro u'âsi aba mono da, taha ãma si.
Ĩsisãnawã norĩ, ãhã wasu'u na, wa za oto aima 'rãsutu za'ra wa'wa. Asiré 're asi'rã'õtõ aba mono wamhã, ni'wam norĩ si te za aima 're sõ're za'ra wa'wa, isazei'wa nho'rezém na. Ni'wam norĩ si te za duré isazei'wa norĩ 're aihâimana za'ra wa'aba mono zém na, te te aima 're roti za'ra wa'wa. Ni'wam norĩ si te za duré marĩ iwaihu'u'õ hã te te aima 're waihu'u za'ra wa'wa, 'Re ihâimana u'âsi mono hã ta norĩ ma si, te te 're iwaihu'u za'ra mono zéb zarina. Timreme nai õ nherẽ, te za duré ni'wam norĩ si 'Re ihâimana u'âsi mono hã te te aima 're sadawa wasu'u za'ra wa'wa, damreme aima iwaihu'u za'ra wa'aba õ na hã. Ni'wam norĩ si te za duré aimreme aba na, te te aima ãma 're wasu'u pese za'ra wa'wa sõ'awi, aré damreme aima iwaihu'u za'ra wa'aba õ na 'Re ihâimana u'âsi mono, da te aima 're isadawa wasu'u za'ra wa'aba mono zé hã. Asimiromhuri aba mono bâ, te za ãma 're asipawaptob u'âsi za'ra wa'aba mo aihâiba mono bâ wa'aba, Wanhib'apito ãma si asiptete sina 're anomro aba mono da.
Rob'ui'éré na we asiwi ĩzadanharĩ za'ra wa'aba zém na, wa za duré aima ãma roti za'ra wa'wa, waihu'u pese newa romhâiba 'manharĩ ãma 're idawata za'ra mono zéb da, dasa hã da te tãma 're isõmri za'ra mono zém na, romhâiba 'manharĩ ma hã. Ãne ma tô we ĩma asiwasu'u za'ra wa'wa, rob'ui'éré na hã: “Wa norĩ hã isazei'wa oto 're wanomro mono wa, wama waihu'u pese za'ra di, 'Re ihâimana u'âsi mono nhimiroti hã. Taha zarina, wa za marĩ hã dasiré, wa te 're 'manharĩ za'ra, wa te wasima 're iwẽ za'ra mono zéb zarina.” Ãne na ma tô we ĩma asiwasu'u za'ra wa'wa. Tane tô. Uburé wa norĩ ma hã wama waihu'u pese za'ra di tô, 'Re ihâimana u'âsi mono nhimiroti hã. Tane nherẽ, marĩ hã da te 're waihu'u pese za'ra mono wẽ te, te za 're dasi'madâ'â ze za'ra, 'râwi. Tane nherẽ, isazei'wa norĩ hã 're isisawi pese za'ra mono zéb zarina si, te za 're sipawaptob u'âsi za'ra, siptete sina siré ãma 're hâimana u'âsi za'ra mono da.
Wa norĩ hã, Timotiuhu me, uburé marĩ ipire wa te 're sépata mono wamhã, te za tô te te 're wapawapto, wapẽ i're wama 're sa'wari mono da hã. Tahawa, wama waihu'u pese di oto duré, isarina, wa te 're idapawapto mono zéb da hã, wasine 're dapẽ'ẽ nhimi'wara mono da, marĩ ipire hã da te 're sépata za'ra mono wamhã. 'Re ihâimana u'âsi mono te te 're iwapawapto mono ne, wa za tô wa norĩ zama wa te 're dapawaptob za'ra, dapẽ hã i're dama 're simi'wara mono da apâ.
Wasisãnawã norĩ, wa tô aima waihu'u pari za'ra wa'aba ni, 're i'anomro wẽ wa'aba mono zéb da na, taha zarina, 'Re ihâimana u'âsi mono hã ai'ãma 're toi u'âsi za'ra wa'aba mono da. Taha zarina, te tô oto ãma 're anomro wẽ wa'aba mo. Ãhã na wa za duré aima roti pese za'ra wa'aba ni, 're anomro wẽ wa'aba mono zém nhipai u, asima 're sa'ẽtẽ za'ra wa'aba mono da, Wanhib'apito Zezusihi zadawa para.
Ta norĩ hã te dahi'rata norĩ nhimirob'rãzarõtõ 'ratare si te te 're 'madâ'â za'ra. Duré dahi'rata sidâpâsi te dahi'rata nhisi wasu'u zama, ta norĩ hã te te 're 'madâ'â pese za'ra. Taha zarina, te ãma 're dasisada'âbâ za'ra. Ãne wamhã, ta norĩ hã te te 're dapawapto wẽ za'ra mono õ di, 'Re ihâimana u'âsi mono nhimirowa'õtõzéb uwaibaba õ wa. Ta hã da te 're i'umnhasi za'ra mono zéb zarina si, te za isimirowa'õtõzé hã da te 're waihu'u za'ra.
Nimahã na wa za ãma atẽme wi. Ma'ãpé, ãma atẽme ĩwisi õ ré hã, dama 're sõré u'âsi mono za, 'Re ihâimana u'âsi mono nhimiroti 'rata na rob'ui'éré hã. Te za duré Wanhib'apito wasu'uwẽ na dama 're irowasu'u u'âsi mo. Te za duré 're idapawaptob u'âsi mo, isimiroti zarina 're danomro wẽ mono da. Taha da, te za asina 're i'madâ'â u'âsi mo.
Ãté pawa'âbâ ãna dama romhuri'wa norĩ 'madâ'â'wa hã te za isazei'wa 're 'maimo. E tawamhã imreme hã te te 're 'madâ'â pese za'ra mono õ di za, isisãnawã ne tãma 're 'maihâimana mono nherẽ, i'madâ'â 'wa hã. Mare di. Isimiroti na te za te te 're wazéb za'ra. Isazei'wa 're 'maimorĩ wa, duré tãma sawi pese za'ra wa, te za ti'madâ'â'wai ma, te te tãma 're romhuri wẽ uptabi za'ra. Ãne na te aima 're iroti mono zéb zarina, te za isazei'wa norĩ ma 're i'aroti pese mo, ãma 're nomro wẽ mono da.
Wanhib'apito wasu'uwẽ, te dama 're iwasu'u mono hã tô sena. Tahawa, te za da'madâ'â'wa norĩ hã iwasu'uwẽ hã te te 're 'madâ'â pese za'ra, i'uwaibaba si te te dama ãma 're roti za'ra mono da, rowẽ na si Wanhib'apito ãma 're danomro mono da, duré ãma 're siwaihu'u za'ra mono da, tinhimiroti na te te 're i'upa za'ra mono norĩ hã.
Ĩnhimiroti zarina si, te za 're ida'apawapto mo, Wanhib'apito ãma 're danomro wẽ mono da. 'Re danomro wasété mono tõ da, te za dawi 're i'azawi pese mo. Wanhib'apito zadawa para te za aimreme pire na si dama 're i'aroti mo, asimiroti wapu wa, da te dasiwi 're aiwẽ'õ mono tõ da, dama 're i'aroti mono zém na hã.
Iwada'uri zarina si, pawa'âbâ ãna dama romhuri'wa norĩ ma zama, te za 're i'aroti mo, tinhib'apito mreme hã te te 're wapari pese za'ra mono da, isimiromhuri na te te 're wẽsãmri za'ra mono da, isib'apito hã. Romhuri'wa norĩ hã timreme na te te tãma 're wa'rãmi za'ra mono õ di za, tinhib'apito ma hã.
Ni'wam norĩ hã Cristuhu zazei'wa dasiré 're hâimana za'ra mono wa, rowahutu u dasiré 're si'rã'õtõ mono nherẽ, ma tô ta norĩ hã oto rosahâri pese za'ra. Tane nherẽ, wa norĩ hã wasiré 're iwasi'rã'õtõ mono zé hã wa te wasiwi sazâri õ di za. Wa za tô wasiré 're wasi'rã'õtõ u'âsi, ãma 're wasipawapto pese za'ra mono da, 'Re ihâimana u'âsi mono hã wa te wasina 're i'umnhasi za'ra mono zém na si 're wanhiptete za'ra mono da. E marĩ wa. Wanhib'apito apâ we imorĩzéb u hã bâdâ hã romhutu na aima waihu'u pese za'ra wa'aba wa.
Awẽ sidâpâsi te za duré asimiroti na 're asipawaptob u'âsi za'ra wa'aba mo, aipẽ'ẽ toi u'âsi Cristuhu ãma si 're anomro wẽ wa'aba mono da, asiptete sina. Satanasihi nhimiroti wasédé hã wẽ newa, aiwasédé hã 're 'manharĩ za'ra wa'aba mono tõ da, duré 'Re ihâimana u'âsi mono nhimiroti hã asiwi 're wẽ'õ za'ra wa'aba mono wa, ai'rã tete na tiwi 're aihâimana za'ra wa'aba mono tõ da, te za tô 're asipawaptob u'âsi za'ra wa'aba mo, rowẽ na wasiré 're wahâimana za'ra mono ré, ti'ai ãma hã.
Sila hã ma tô ĩpawapto, aima ĩnhimiroti suru za'ra wa'aba nherẽ, te te aima rob'ui'éré za'ra wa'aba da. Ta hã ĩsisãnawã ne, te ĩma 're hâimana. Tahawa, ĩma umnhasi di. Wa hã wa tô ĩsima aiwẽ za'ra wa'wa, ĩnhimiroti na te aipawaptob za'ra wa'aba da, Wanhib'apito ãma si asiptete sina 're anomro aba mono da, 'Re ihâimana u'âsi mono nhimipawaptobzé hã asi'uihâ na asina 're waihu'u za'ra wa'aba mono da. Taha wasu'u na si, wa tô te aima 're rowasu'u za'ra wa'wa, tô sena wa ta hã. Tahawa, te te 're aipawapto wẽ za'ra wa'aba mono wa, te za asiptete sina ãma 're anomro aba mo.
Ĩsisãnawã norĩ, tane nherẽ, te za ãma 're asipawaptob u'âsi za'ra wa'aba mo, Wanhib'apito wasu'uwẽ na 're isaze za'ra wa'aba mono zém na, aihâimana prédubzé hã asima 're sa'ẽtẽ u'âsi za'ra wa'aba mono da. Duré 'Re ihâimana u'âsi mono ma, 're aimreme zusi aba mono wamhã, Ipẽ'ẽzani te te aima 're iwaihu'u za'ra wa'aba mono zém na si, te za tãma 're aimreme zusi aba mo.
ကြော်ငြာတွေ