1 Corĩtu 13:2 - ꞌRe Ihâimana Uꞌâsi Mono Zadawa Wasuꞌu2 'Re ihâimana u'âsi mono hã te dama 're sadawa wasu'u wẽ mono nherẽ, duré uburé roti hã ĩma waihu'u pese nherẽ, duré uburé rowaihu hã dama iwaihu'u'õ hã ĩma waihu'u pese nherẽ, ĩnhimizawi pese zé hã ĩma 're hâimana mono õ wamhã tarére, wa aré 're ĩhâimana, 'Re ihâimana u'âsi mono ma hã. Marĩ dai õ di tô aré, 're ĩhâimana mono zé hã. Ãté ĩma waihu'u pese di aré, te tãma nharĩ da, ẽtẽ 'rãihâ ma, si'ré da, tizabzém nhiti, 'Re ihâimana u'âsi mono si, te 're umnhasi mono wa. Ãne da, 'Re ihâimana u'âsi mono te 're umnhasi mono nherẽ, ĩnhimizawi pese zé hã ĩma 're hâimana mono õ wamhã, aré marĩ dai õ di tô duré, 're ĩhâimana mono zé hã. အခန်းကိုကြည့်ပါ။ |
1 Corĩtu 13:2
38 ပူးပေါင်းရင်းမြစ်များ
Tawamhã Zezusi hã te asa tãma nharĩ za'ra, ãne: — 'Re ihâimana u'âsi mono hã suru na 're umnhasi za'ra wa'aba mono wa, tãma hã mei waihu'u za'ra wa'aba õ di. Tô sena, wa aima waihu'u za'ra wa'wa. Mostada nhamare hã surure nherẽ, da te 're wa, oto poto wamhã, wede za'ẽtẽ uptabi di. Tane, a norĩ wa'wa hã surure na 'Re ihâimana u'âsi mono 're umnhasi za'ra wa'aba mono wamhã, surure na nherẽ, uburé marĩ hã te aré 're i'manharĩ za'ra wa'aba mo, asi'uihâ na aima waihu'u za'ra wa'aba õ nherẽ. Ã ẽtẽ 'rãihâ ma, te aré inharĩ za'ra wa'wa, si'uihâ na si'ré da, isabzém nhiti. Tawamhã te aré tô ai'ré.
Tawamhã figuera wede hã ma tisã, bâdâdi zada'ré isa hã. Figuera na wede nhisi hã. Te te sãmri wamhã, ma tô itẽme apa, te te sabu da, i'rã zô. Tane nherẽ, 'rãi ãna te za, isui ré si. Tahawa, te figuera wede ma, tinha ãne: — Niwa i'ai'rã da hã, mare di za oto. Ai'rã'õ u'âsi, te za oto 're asa mo. Tawamhã awa'awi ma tô oto wede hã tiwede'ré.
Tawamhã Zezusi te asa tãma nharĩ za'ra, ãne: — Tô sena wa aima waihu'u za'ra wa'wa. 'Re ihâimana u'âsi mono hã 're wawã za'ra wa'aba mono ãna, õhõ si 're umnhasi za'ra wa'aba mono wamhã, te za marĩ hã aima waihu'u pese za'ra wa'aba õ nherẽ, 're i'manharĩ za'ra wa'aba mo isadawa para, wa hã figuera wede ma, te inharĩ ne, ãne hã za tô aiwa niwa ĩnhimi'manharĩ sine 're i'manharĩ za'ra wa'aba mono zé hã. Õhõta ẽtẽ 'rãihâ te za. 'Re ihâimana u'âsi mono si 're umnhasi za'ra wa'aba mono wamhã, te za ẽtẽ 'rãihâ ma inharĩ za'ra wa'wa, 'râwi sisa'o'o wa, âi ba hã waptã'ã da. Tawamhã asadawa para wa'aba, te za tô âi ba waptãrã, ẽtẽ 'rãihâ hã. Ãne 'Re ihâimana u'âsi mono si 're umnhasi za'ra wa'aba mono wamhã, te za tô isadawa para, marĩ iwẽ hã 're i'manharĩ za'ra wa'aba mo, aima waihu'u pese za'ra wa'aba õ nherẽ, ãne hã.
Tawamhã Ãtioquia ãma 'Re ihâimana u'âsi mono zadawa 'mahârâ'wa norĩ hã duré dama rowahutu'wa norĩ hã te 're si'ubumro, isazei'wa norĩ wazari. Ãne isisi norĩ hã: Banabé, duré Simiã, isisi amo na isisi hã Ihâimana 'rã na; duré Luciu, Sireni ãma aré 're isãmra mono hã; duré Saulu, duré Manaé, apito Erodihi siwadi aré, Manaé hã, Erodihi nhorõwa ãma siré prédub zahuré wa.
Ĩsisãnawã norĩ, zudeu'õ na da te 're aiwaptẽrẽ za'ra wa'aba mono norĩ hã, marĩ aré dama iwaihu'u'õ na roti ipire wasu'u na hã wa za oto aima rowasu'u za'ra wa'wa, asimiza'rese ãna 're aihâimana za'ra wa'aba mono tõ da. Zudeu norĩ upana, 'Re ihâimana u'âsi mono hã ai'ãma wa'aba si 're sib'a'uwẽ mono newa, 'râwi asi'ãma 're aiwata za'ra wa'aba mono tõ da, wa za oto ãne na aima rowasu'u za'ra wa'wa. Izaraéu nhihudu norĩ hã 'Re ihâimana u'âsi mono wi, pẽ'ẽ tete uptabi na 're hâimana za'ra mono nherẽ, pẽ'ẽ tete u'âsi, tiwi 're hâimana za'ra mono õ di za. Duréihã, 'Re ihâimana u'âsi mono te te sima ipisutu siromo zéb zarina, zudeu'õ norĩ hã da'ahâ uptabi na Cristu za da te 're isaze za'ra mono norĩ za'ratazé hã, oto iwa waptã'ã wapsi, te za oto zudeu norĩ hã ahâ uptabi na itẽme 're sipizari za'ra, õhõ ãma si oto 're nomro mono da.
Ĩsisãnawã norĩ, wa hã wa tô ai'ãma waihu'u pese za'ra wa'wa, asimizawi pese sina oto 're i'anomro wẽ wa'aba mono zém na hã. Duré aima waihu'u pese za'ra wa'aba di oto, 're aihâimana wẽ za'ra wa'aba mono zéb da hã. Ãne hã wa tô duré ai'ãma waihu'u pese za'ra wa'wa, Wanhib'apito nhimiroti na oto asima 're iroti waihu'u pese za'ra wa'aba mono zém na zama.
'Re ihâimana u'âsi mono ãma si, wa za 're wawata u'âsi za'ra. Taha ma si, tãma waihu'u pese di, te te 're iwa'apawapto mono zéb da hã, Zezu Cristuhu wasu'uwẽ hã wa te 're isaze za'ra mono zé hã wa te 're rẽme za'ra mono ãna, wanhiptete u'âsi ãma 're iwanomro mono zéb da hã. Taha wasu'uwẽ hã wa tô te dama 're wasu'u u'âsi. Duréihã iwasu'uwẽ hã, 'Re ihâimana u'âsi mono te te dama 're awaihu'u mono õ di. Iwasu'uwẽ hã dama sa'rese ãna, ma tô aré 're danomro. Tane nherẽ, ma tô 'Re ihâimana u'âsi mono hã iwasu'uwẽ hã dama waihu'u oto, isadawa 'mahârâ'wa norĩ nhimi'ui'éré hawimhã. Tahawa, te oto isimiwada'urizéb zarina si, da te 're waihu'u za'ra daro mono bâ, da te ãma 're isazei pese za'ra mono zéb da hã, duré da te 're iwapari pese za'ra mono zéb da hã oto.
A norĩ wa'wa hã, zudeu'õ na te 're aihâimana za'ra wa'aba mo. Tahawa, zudeu'õ na 're aihâimana za'ra wa'aba mono zéb zarina, te za tô uburé marĩ hã 're i'manharĩ za'ra wa'aba mo. Isazei'wa norĩ hã asiré 're ai'rã'õtõ aba mono ré, aibâ norĩ hã 'rã ubu ré, 'Re ihâimana u'âsi mono ma, 're mreme zusi mono wamhã, duré 'rã ubu ré, 'Re ihâimana u'âsi mono zadawa wasu'u na te te dama 're rowasu'u za'ra mono wamhã, e marĩ te ta norĩ hâimanazé hã wama wasu'u za'ra. Ta norĩ hã Cristu te te siwi 're iwazéb za'ra mono õ zé, te wama wasu'u za'ra, zudeu'õ norĩ hâimanazéb uwaibaba õ wa, ãne hã.
Ãne ma tô 'Re ihâimana u'âsi mono hã romhuri hã te te wama 're apisutu, wate mono bâ isimipawapto waihu'u pese na tãma ãma 're iwasipawaptob za'ra mono zéb da hã, wasiré isazei'wa norĩ hã. Romhuri hã danhipai u ipire uptabi hã ma tô ni'wam norĩ ma si te te 're apisutu, Zezusi hã te te 're isadawa wasu'u za'ra mono zéb da hã, isazei'õ'wa norĩ ma, Zezusihi zadawa para. Romhuri aimawi hã ipire hã ma tô duré ni'wam norĩ ma si, te te 're apisutu, 'Re ihâimana u'âsi mono zadawa wasu'u na, sena na isazei'wa norĩ ma si te te ãma 're irowasu'u za'ra mono zéb da hã. Duré isazei'wa norĩ 're ihâimana wẽ za'ra mono zéb da hã, 'Re ihâimana u'âsi mono nhimiroti zarina, te te dama ãma 're iroti za'ra mono zéb da hã, ma tô duré ni'wam norĩ ma isimiromhurizéb da hã, te te tãma 're apisutu, 'Re ihâimana u'âsi mono hã. 'Re ihâimana u'âsi mono waihu'u pese na, marĩ dama i'manharĩ waihu'u'õ hã te te dama 're 'manharĩ za'ra mono da, ma tô duré ni'wam norĩ ma si te te 're apisutu, isimiromhurizéb da hã. Ma tô duré ni'wam norĩ si te te 're pisutu za'ra, iwaihu'u pese zarina te te ãma 're dapese za'ra mono da, 're dahâzé za'ra mono wa. Duré marĩ zô, tiwi 're irowaptâ'â za'ra mono norĩ ãma 're sina u'âsi mono da, ma tô duré ni'wam norĩ hã te te 're apisutu, isibrob'õ norĩ ãma hã, duré ihâzé ré norĩ ãma hã. Duré isazei'wa norĩ 'madâ'â'wa, dama 're hâimana za'ra mono da, ma tô duré ni'wam norĩ hã te te 're apisutu. Duré damreme dama iwaihu'u'õ na te te dama 're sadawa wasu'u za'ra mono da, ma tô ni'wam norĩ si te te 're apisutu, timreme nai õ nherẽ, te te dama ãma 're isadawa wasu'u za'ra mono zéb da hã.
Ti'ai ãma hâiwa ãma zama, uburé damreme mono bâ te dama 're arowasu'u wẽ mono nherẽ, ĩnhimizawi pese zé hã ĩma 're hâimana mono õ wamhã, piza'a 're baihâ 'manharĩ tede hã, da te 're tata'a za'ra mono wa, 're wamreme 'rãihâ za'ra mono wa, da te 're iwapari a za'ra mono ne, wa aré taré te dama 're arowasu'u. Ãne wamhã, marĩ dai õ di aré tô, dama 're ĩnhimirowasu'u mono zé hã.
Duré uburé ĩnhibro hã isibrob'õ norĩ ma, te tãma 're anhomri mono nherẽ, ĩnhimizawi pese zé hã ĩma 're ihâimana mono zarinai õ wamhã, aré tô tarére hã, dama ãma 're ĩnhoprub mono zé hã. Duré isazei'wa 're ĩhâimana mono wa, da te 're ĩ'ruiwapari mono zéb zarina, da te dasiwi ĩzata da, duré dawi ĩsihâiba zawi õ nherẽ, tane nherẽ, aré duré tarére, ĩnhimi'manharĩ wẽ zé hã, ĩnhimizawi pese zé ĩma 're hâimana mono õ wamhã.
Isazei'wa norĩ hã, 'Re ihâimana u'âsi mono te te dama 're isadawa wasu'u za'ra mono zé hã, niwapsi te za te te tiwi 're anhihâri, 'Re ihâimana u'âsi mono hã, ta norĩ hã te te dama 're sadawa wasu'u za'ra mono tõ da oto. Duré isazei'wa norĩ hã timreme nai õ nherẽ, damreme amo na te te dama 're irowasu'u za'ra mono zé hã, te za duré te te tiwi 're anhihâri. Duré 'Re ihâimana u'âsi mono pẽ'ẽzani na, da te 're irowaihu'u za'ra mono zé hã, niwapsi te za duré te te dawi 're anhihâri. Isazei'wa norĩ nhimizawi pese zép si, si'utõrĩ waihu'u õ di za. Taha si, te za õne u'â 're hâimana u'âsi.
Asiré 're asi'rã'õtõ aba mono ré, ni'wam norĩ hã aimreme aba na 'Re ihâimana u'âsi mono te te aima 're sadawa wasu'u za'ra wa'aba mono wamhã, maparane te za tô te te aima 're 'mairowasu'u wa'wa. Si'ubdatõ dahâiba na hã wamhã, wẽ di duré. Ãne wamhã, ni'wam norĩ hã asiré isazei'wa norĩ hã te za isimirowasu'u za'ra zém na te te sima ãma 're rowasu'u pese za'ra, 'Re ihâimana u'âsi mono hawib zô, tô sena zô, te te ãma iwaihu'u pese za'ra zéb da hã.
Ĩsisãnawã norĩ, ãne wa za ãhã wasu'u na hã aima ãma 'rãsutu za'ra wa'wa. Aimreme aba zém na, 'Re ihâimana u'âsi mono zadawa 'mahârâ'wa 're aihâimana za'ra wa'aba mono da, te za 'râwi 're asi'madâ'â za'ra wa'aba mo. Duré damreme dama iwaihu'u'õ na, 'Re ihâimana u'âsi mono, asima 're sadawa wasu'u za'ra wa'aba mono tõ da, 're asisadawa uwati za'ra wa'aba mono õ di za.
Ni'wa hã simreme nai õ nherẽ, damreme dama iwaihu'u'õ na te te dama rowasu'u wamhã, 'râwip si te ta hã ãma sipawapto, Wanhib'apito ãma siptete na 're hâimana u'âsi mono da. Te te ãma dapawapto waihu'u õ di za, dama sadaihu'u õ wa. Tane nherẽ, ni'wa hã damreme uwaibaba, 'Re ihâimana u'âsi mono zadawa wasu'u na isazei'wa norĩ ma, te te rowasu'u wamhã, aihĩni te za wapari waihu'u za'ra, taha zarina oto ãma 're sipawaptob za'ra mono da, Wanhib'apito ãma ta norĩ hã siptete sina ãma 're hâimana za'ra mono da oto.
Marĩ hã aré dama iwaihu'u'õ hã wa za oto aima wasu'u hâi'ré za'ra wa'wa, sõ'awi. Ma'ãpé ĩwapari pese za'ra wa'aba za. Wa norĩ hã Zezusihi zazei'wa norĩ hã, ti'ab ré uburé wasi'utõrĩ siromo õ di za, rob'rãsutuzé wana hã. Rob'rãsudu hã oto iwa iwaptã'ãzé waihu'uzéb da, danhimnhihârâzé da'rãsutu'wa, da te oto wapari za'ra wamhã, uburé ti'ai ãma zahadu wahâiba ré 're iwanomro mono norĩ hã, wa za awa'awi wahâiba na saprĩ za'ra ni, waptu na 're idatõmo si'rãmi za'ra mono ne. Danhimnhihârâ hã da te wapari za'ra wi, ni'wam norĩ isazei'wa dawana 're idâ'â za'ra mono hã te za apâ ahâiwa'utu, dâ'â ãna oto 're hâimana u'âsi za'ra mono da, ihâiba tiwi 're si'utõrĩ waihu'u za'ra mono ãna. Tawamhã wa norĩ zama wahâiba ré 're iwanomro mono norĩ hã, wa za duré wahâiba itém na isi'utõrĩ'õ na saprĩ za'ra ni.
Wa hã Paulu, Apoluhu me, duré ni'wam norĩ me, wa Cristuhu ma si, wa te 're romhuri za'ra. Iwasu'uwẽ hã dama iwaihu'u'õ hã, i'uwaibaba si, wa te dama 're wasu'u za'ra mono da, ma tô wapisutu za'ra, 'Re ihâimana u'âsi mono hã. Taha na si, wanhimiromhurizéb za'ra hã. Tahawa, te za ãne na si wa'ãma 're irosa'rata za'ra wa'aba mo.
Danhihâiwata nhihâri ré si 're idahâimana za'ra mono zé hã marĩ dai õ di, 'Re ihâimana u'âsi mono ma hã. Duré danhihâiwata nhihâri õ nherẽ, 're idahâimana za'ra mono zé hã marĩ dai õ di, 'Re ihâimana u'âsi mono ma hã, ãne hã tô aiwa. Ãne si tãma ipire hã, 're idahâimana za'ra mono zéb da hã. 'Re ihâimana u'âsi mono nhimiroti, da te 're 'madâ'â pese za'ra mono sina 're idanomro wẽ mono zép si, tãma ipire hã.
Duré, waihu'u pese newa, romhâiba 'manharĩ ãma 're idawata za'ra mono zéb da, dasa, da te tãma 're isõmri za'ra mono na, wa za oto aima roti za'ra wa'wa. E romhâiba 'manharĩ ma, dasa, da te tãma 're isõmri za'ra mono na, te za a norĩ wa'wa hã dame ãma 're asaihuri aba mo, isazei'wa 're anomro aba mono nherẽ. E dame ãma 're asaihuri aba mono õ di za. Ãne, wa za aima ãma waihu'u za'ra wa'wa. Romhâiba 'manharĩ ãma 're idawata za'ra mono hã, 'Re ihâimana u'âsi mono nei õ di. Iwaihu'u pese zéb da hã, marĩ hã tãma hâimana õ di. Robaba uptabi di. Tarére ta hã rob'manharĩ. Ãne hã wama waihu'u pese za'ra di. Siwaprosi, te 'Re ihâimana u'âsi mono si 're hâimana, waihu'u pese uptabi na. Isine hã marĩ hã isipai u iwaihu'upe hã 're 'maihâimana mono õ di, aimawi hã. Robaba uptabi di. Ãne hã wama waihu'u pese za'ra di duré.
Cristuhu zadawa wasu'u'wa na, asiwi ĩwaihu'u za'ra wa'aba õ wa, wa tô ĩnhimiromhuri wẽ na si aima ĩsiwasu'u za'ra wa'wa, ãne hã te ĩsima wẽ õ nherẽ. Ãté ĩnhimiza'rese'õ ne, wa tô ãne na aima ĩsiwasu'u za'ra wa'wa, a norĩ wa'wa hã dama 're ĩwasu'u wẽ za'ra wa'aba mono õ 'ru te. 'Re ihâimana u'âsi mono te te 're ĩpawapto mono õ 'wa'âhã, aré marĩ dai õ di, 're ĩhâimana mono zé hã tô. Tane nherẽ, Zezusihi zadawa wasu'u'wa newa, senai'õ na te te aima 're iroti za'ra wa'aba mono norĩ ma, ĩwapu na tãma 're ĩhâimana za'ra mono õ di.
Wa norĩ hã marĩ iwẽ'õ na ãté 'râwi wapẽ'ẽ 're, wa za wasima wa te 're rosa'rata za'ra. Ãne na te te sima 're wa'awẽ mono õ di, 'Re ihâimana u'âsi mono pẽ'ẽzani hã. Marĩ iwẽ na si 'râwi wapẽ'ẽ 're, wa te wasima 're rosa'rata za'ra mono da, te za te te sima 're wa'awẽ. Tawamhã marĩ iwẽ'õ na 'râwi wapẽ'ẽ 're, wa te wasima 're rosa'rata za'ra mono wamhã, te za te te 're wa'a'uwati, 'Re ihâimana u'âsi mono pẽ'ẽzani hã, wa te wasima ãma 're rob'manharĩ za'ra mono tõ da. Tahawa, wa za ãne aima waihu'u za'ra wa'wa. Ma'ãpé, 'Re ihâimana u'âsi mono pẽ'ẽzani nhimiwada'uri zarina si, 're anomro aba mono za oto. Tawamhã siwa'ru marĩ iwẽ'õ na aipẽ'ẽ 're asima 're rosa'rata za'ra wa'aba mono nherẽ, asina hã 're rob'manharĩ za'ra wa'aba mono õ di za.
Ãne 're danomro wasété mono õ di za, 'Re ihâimana u'âsi mono pẽ'ẽzani nhimiwada'uri zarina 're danomro mono wamhã. Te za da te 're dazawi pese za'ra. Duré dapẽ'ẽ 're datoi u'âsi, te za 're dahâimana za'ra. Duré dapẽ'ẽ toi u'âsi, te za 're dahâimana za'ra. Duré dawara sina dasisada 're dazahi za'ra mono õ di za. Duré danhimizawi pese na te za 're dahâimana za'ra. Duré marĩ iwẽ na te za dama 're danhoprub za'ra. Duré tô sena wa, ropisutu wẽ na, te za da te dama ãma 're rob'manharĩ wẽ za'ra.
Tô sena Zezu Cristuhu wasu'uwẽ hã wẽ uptabi di, aré dama sa'rese õ nherẽ, Wamama hã te te oto dama ihâi'ré hã wa te 're isaze za'ra mono zé hã, ãma 're iwanomro wẽ mono zéb da hã. Ãne te te dama iwaihu'uzé hã: “A'uwẽ na ma podo, ti'ai ãma. Duré tô sena i'ra 're imorĩ wẽ uptabi na, ma tô Tipẽ'ẽzani na dama waihu'u za'ra. Duré hâiwa ãma 'Re ihâimana u'âsi mono ma romhuri'wa norĩ hã ma tô titõmo na 'madâ'â za'ra. Duré a'uwẽ mono bâ 're idahâimana za'ra mono norĩ hã ma tô iwasu'uwẽ na da te 're dapo're pu'u za'ra, daro mono bâ. Ma tô duré da te dasina 're umnhasi za'ra. Duré rowẽ uptabi u ma tô mo, hâiwa u.”
ကြော်ငြာတွေ