1 Corĩtu 11:3 - ꞌRe Ihâimana Uꞌâsi Mono Zadawa Wasuꞌu

³ Tane nherẽ, wa ĩsima wẽ, waihu'u za'ra wa'aba da, ãne: Cristu hã uburé aibâ norĩ nhib'apito, te 're hâimana. Duré aibâ norĩ hã uburé timro norĩ nhib'apito, te 're hâimana za'ra. Duré 'Re ihâimana u'âsi mono hã, te Cristuhu nhib'apito na hã 're hâimana.

1 Corĩtu 11:3 ပူးပေါင်းရင်းမြစ်များ

Zenezi 3:16

Tawamhã pi'õi ma, te duré oto tãma tinha ãne: — 'Re aiwasã mono sidâpâsi sa'ẽtẽ na 're robzépata mono da hã wa za aima pisutu. Tahawa ai'ra aima 're poto za'ra mono wamhã, te za sé uptabi na isé hã 're i'azépata mo. Ãhã nherẽ, te za aimro siré 're aihâimana mono da hã asima 're iwẽ u'âsi mo. Ta hã te za duré asib'apito na hã aima 're hâimana oto.

Mateu 28:18

Tawamhã Zezusi hã ma tô 'râwi itẽme timorĩ za'ra oto. Taha wamhã, ma tô tãma nharĩ za'ra, ãne: — Ĩmama hã ma tô ĩma pisutu, isadawa para dama ĩpire na 're ĩhâimana mono da, ti'ai ãma, duré hâiwa ãma zama.

Zuwã 14:28

Wa za oto aiwi ĩmorĩ 'wa. Niwapsi wa za duré we apâ atẽme ĩmorĩ 'wa. Ãne ma tô te ĩsina irotizé hã iwapari za'ra wa'wa. Ĩmama u wa za oto apâ mo, ĩma ipire u. 'Re ĩzawi pese za'ra wa'aba mono 'wa'âhã, te aré 're ato za'ra wa'aba mo ĩzabâdâ, Ĩmama u za oto ĩmorĩ wa, wa hã.

1 Corĩtu 3:23

Duré a norĩ wa'wa hã te Cristuhu ma si 're aihâimana za'ra wa'aba mo, isib'a'uwẽ na hã. Ta hã, 'Re ihâimana u'âsi mono te te pisutu wa, ma tô wei mo ti'ai u, Danho'reptui'wa da hã. Tahawa, Cristuhu nhib'a'uwẽ na si, te za asima 're asiwasu'u za'ra wa'aba mo. Wanhib'a'uwẽ na, asima 're asiwasu'u za'ra wa'aba mono õ di za.

Éfézu 4:15

Wa norĩ hã roti tô sena na si, wa za wasima wa te 're roti za'ra, 're wasisawi pese za'ra mono sina. Ãne wamhã, wahâimana wẽ na, wa za wa te 're sa'ẽtẽ za'ra. Tawamhã wa za oto wa te wasina 're uwaimrami za'ra, Cristuhu ne 're iwanomro wẽ uptabi mono zé hã, Wanhib'apito ne.

Colosu 1:18

Ta hã uburé tizazei'wa norĩ 'madâ'â'wa te 're hâimana, pire uptabi na. Ta hã dapisutu'wa duré, 're idapoto téb za'ra mono na 're idanomro mono da hã. Dâ'â nherẽ, apâ hâiwa'utu wa, te oto dama pire na 're hâimana u'âsi, uburé za idahâiwa'utu za'ra norĩ nhipai u. Tahawa, te oto danhipai u pire uptabi na 're hâimana tô.

Colosu 2:10

Tane duré a norĩ wa'wa hã, Cristuhu ãma 're anomro aba mono wa, marĩ zô aiwi 're rowaptâ'â za'ra wa'aba mono õ di, rowẽ na ãma 're i'anomro u'âsi aba mono zéb da hã. Cristu hã uburé ihâiba'õ norĩ 'madâ'â'wa norĩ nhipai u, te pire uptabi na õhõ si 're hâimana u'âsi, siwaprosi.

Colosu 2:19

Ta norĩ hã Cristuhu wasu'uwẽ si te te sima 're tété za'ra mono õ di. Cristu hã uburé tizazei'wa norĩ 'madâ'â'wa te pire na 're hâimana taha si, da'rã hã dahâiba ma pire na 're ihâimana za'ra mono ne. Dahâiba na danhorõ 're ihâimana za'ra mono hã te dahi hã te te sitẽme 're tété tete za'ra, danhiptete sina ãma 're dahâimana za'ra mono da, dahâiba na hã. Tane duré Cristu hã te za tinhib'a'uwẽ norĩ hã te te 're apawapto, ta norĩ hã 're sipawaptob za'ra mono da, siptete sina ãma 're hâimana u'âsi za'ra mono da. Te za duré te te 're apawapto, prédup sina ãma 're ihâimana za'ra mono zém na te te sima 're sa'ẽtẽ u'âsi za'ra mono da, 'Re ihâimana u'âsi mono te te tãma 're i'awẽ mono zéb zarina.

Colosu 3:18

Pi'õ norĩ, aimro nhimiroti hã te za 're iwapari pese za'ra wa'aba mo, Cristuhu zazei'wa tô sena ãma 're ihâimana za'ra mono zéb zarina.

1 Pedru 3:1

Pi'õ norĩ, romhuri'wa norĩ hã tinhib'apito mreme te te 're iwapari pese za'ra mono ne, te za duré aimro mreme hã 're iwapari pese za'ra wa'aba mo. Ãté aimro za'ra wa'wa hã zahadu te te saze za'ra õ di, 'Re ihâimana u'âsi mono nhimiroti hã. Tane nherẽ, tãma 're aihâimana wẽ za'ra wa'aba mono zéb zarina, te za oto sima wẽ za'ra, Cristuhu zazei'wa oto 're hâimana za'ra mono da. Te te 're saze za'ra mono da, tãma 're roti za'ra wa'aba mono õ nherẽ, te za uihâ na te te 're saze za'ra. E marĩ wa. Tãma 're aihâimana wẽ za'ra wa'aba mono wa, duré imreme hã 're wapari pese za'ra wa'aba mono wa.