1 Corĩtu 10:1 - ꞌRe Ihâimana Uꞌâsi Mono Zadawa Wasuꞌu

¹ Ĩsisãnawã norĩ, ãne hã wa za oto aima ãma rob'rãzarõtõ za'ra wa'wa, aima ãma ĩpo're pu'u za'ra wa'aba zém na, ãma 're aipo're simrami za'ra wa'aba mono tõ da. Duréihã wahi'rata norĩ Mozési hã Ezitu hawi te te sani za'ra wamhã, 'Re ihâimana u'âsi mono hâiwa'a na te isõwab za'ra hã mo, bâdâdi te te tãma wasu'u za'ra mono da, te te 'madâ'â pese za'ra mono sina. Â pré na pu'u nhisi wa'wai baba, ma tô duré te te simro, rob'ré na, zara u te te saprĩ za'ra da, ezipsiu norĩ wi hã, te te sõ'reptu za'ra da.

1 Corĩtu 10:1 ပူးပေါင်းရင်းမြစ်များ

Neemia 9:19

A'ubuni wi rop si 're irosa'wari mono ãma hã, a hã darẽme waihu'u õ di, sa'ẽtẽ uptabi na da'ãma 're i'aiwamri mono zé hã aima 're hâimana mono wa. Duré bâtâ mono na hâiwa'a, mara mono na unhama ro'o na, õ norĩ ma, te te tãma bâdâdi na irowa'a za'ra mono hã, tiwi wazere waihu'u za'ra õ di.

Salmu 78:53

Tawamhã ta hã tãma romnhimimnhasi ãna te te simro mono wa, te pahi ãna tihâimana za'ra. Ãhã wamhã, isitob'ru norĩ si hã ma tô âporé na â hã suwa za'ra.

Ezodu 14:29

Tane nherẽ, Izaraéu nhihudu norĩ hã ma tô â wa'waibaba ti'ai 'ré na hã saprĩ za'ra, â nhitõmo si'uiwa wa'wamhã.

Ezodu 40:34

Tawamhã hâiwa'a zarob'a ma tô romhâ 'manharĩ na 'ri hã suwa. Te te suwai wamhã, ma tô Uburé Danhib'apito hâiba na rowa'a hã sa'ẽtẽ na 'ri 're wa'a.

Zuwã 4:20

E mame te za 'Re ihâimana u'âsi mono ãma 're dawata za'ra. E ã ẽtẽ 'rãihâ ãma. E Zeruzalẽ ãma. Ã ẽtẽ 'rãihâ hã ma tô wahi'rata norĩ hã pisutu za'ra, ãme ãma 're dawata za'ra mono da. Asiré zudeu norĩ hã ma tô duré Zeruzalẽ hã pisutu za'ra, tame ãma 're dawata za'ra mono da.

Roma 1:13

Ĩsisãnawã norĩ, ãne na aima ĩsiwasu'u za'ra wa'aba da, wa tô ĩsima wẽ, waihu'u za'ra wa'aba da. Wa tô te ĩsima 're rosa'rata u'âsi, te asabu za'ra wa'aba da. Tane nherẽ, atẽme ãma ĩmorĩ su'u aba da nherẽ, te marĩ hã ĩma 're hâimana u'âsi, õne u'âsi. Zudeu'õ norĩ hã daro mono bâ 're isi'ubumroi mono hã, iwasu'uwẽ hã te tãma 're iwasu'u za'ra mono zém na, te te 're saze za'ra mono wa, wa tô te 're awaibu, 'Re ihâimana u'âsi mono ma. Tane da, wa tô duré te ĩsima 're rowẽ, airo wa'aba ãma asiré zudeu'õ norĩ hã te duré tãma 're awaibui mono da, tame.

Roma 11:21

E 'Re ihâimana u'âsi mono hã zudeu norĩ ma, tinhimihâzé te te tãma 're ba'a za'ra mono õ nherẽ, te za bété a norĩ wa'aba ma tinhimihâzé hã te te aima 're ba'a za'ra wa'wa, tiwi 're aipizari za'ra wa'aba mono wamhã. Mare di. Te za tô te te 're aihâ za'ra wa'wa, tiwi 're aipizari za'ra wa'aba mono wamhã. Tahawa, te za 'Re ihâimana u'âsi mono si asiwi 're iwazé pese za'ra wa'aba mo.

Roma 4:11

'Re ihâimana u'âsi mono hã, Abra'ã hã te te sina i'umnhasi pese zém na si, ma tô wẽsã, sihâiwata nhizâri õ nherẽ. Tahawa, sihâiwata nhizâri õ ré, Abra'ã hã, 'Re ihâimana u'âsi mono te te iwẽsãmrizém na hã, te wama wasu'u za'ra, tô sena na uburé da te 're iwaihu'u za'ra mono zéb da hã. Tahawa, Abra'ã hã uburé 'Re ihâimana u'âsi mono, da te dasina 're i'umnhasi za'ra mono norĩ hi'rada, ta hã. Duré sihâiwata nhihâri õ nherẽ, 'Re ihâimana u'âsi mono te te 're i'awẽsãmri mono norĩ hi'rada.

1 Corĩtu 12:1

Ĩsisãnawã norĩ, wasiré isazei'wa norĩ hã romhuri mono bâ, 'Re ihâimana u'âsi mono pẽ'ẽzani nhimipawapto waihu'u pese na, ãma 're isipawaptob za'ra mono zéb da hã, ta hã te te tãma 're ipisutu za'ra mono zém na, wa za oto aima ãma roti za'ra wa'wa, sena ãma 're iwaihu'u za'ra wa'aba mono zéb da hã, rosa'rata na ãma 're upa za'ra wa'aba mono tõ da.

1 Corĩtu 14:38

Ãne na ĩnhimiroti na, ni'wam norĩ hã te te 're ĩzaze za'ra mono õ wamhã, tawamhã, isazei'õ'wa na te za ta norĩ ãma 're irosa'rata u'âsi za'ra wa'aba mo. Tahawa, a norĩ wa'wa hã ta norĩ nhimiroti hã 're 'madâ'â za'ra wa'aba mono õ di za oto.

Hebreu 11:29

Duré Izaraéu nhihudu norĩ hã, 'Re ihâimana u'âsi mono si te te sina 're i'umnhasi za'ra mono zéb zarina, ma tô â poré na hã saprĩ za'ra, zara u, Â ipré na â poré nhisi na. Â 'ré na da te 're isaprĩ za'ra mono ne, ma tô rob'ré na saprĩ za'ra, â zada'ré amoi u hã, i'uiwada u. Tane nherẽ, ezipsiu norĩ hã rob'ré na dazarina te te aré saprĩ za'ra da, si'aba'réi wamhã, ma tô â hã apâ iré atob za'ra. Tahawa, ezipsiu norĩ hã â poré na ma tô uburé ai'utõ.

Zozué 4:23

Uburé Danhib'apito ate wa'wa 'Re ihâimana u'âsi mono, ma tô Zodã pa â hã aima 'ré za'ra wa'wa, ãma isaprĩ za'ra wa'aba zéb da hã, Âpré na â poré nhisi te te wama i'ré za'ra ne, wa te ãma isaprĩ za'ra zéb da hã.