प्रेरीत् 8:37 - पश्‍चिम तामाङ

³⁷ [फीलीपचे थेत, “र्‌हङ्‌की सेम् य्‍हङ्‌सेनो बीस्‍वास् स्‍य्‍हेङ्‍सम् एचे बप्‍तीस्‍मा कीन्‍ब खम्‍ब” बी पङ्‍ज्‍यी। ओसेम् नपुङ्‍सक्‍चे, “येसु ख्रीस्‍ट्‍नो पर्‌मेस्‍वर्‌की ज य्‍हीन्‍ब बी ङ बीस्‍वास् स्‍य्‍हेङ्‌ब” बी पङ्‍ज्‍यी।]

प्रेरीत् 8:37 ပူးပေါင်းရင်းမြစ်များ

मत्‍ती 16:16

ओसेम् सीमोन पत्रुसचे, “थेङ् सोम्‍बो पर्‌मेस्‍वर्‌की ज मुक्‍ती न्‍हङ्‌बे ख्रीस्‍ट् य्‍हीन्‍ब” बी पङ्‍ज्‍यी।

मत्‍ती 28:19

होत्‍तज्‍यीम् देरेम् एङ्‍यीमा य्‍हर्‌ज्‍यीम् जम्‍मनो जातीमात ङइ डबमा स्‍य्‍हेङो, अपतेङ् ज ओसेम् पबीत्र आत्‍माइ छेन्‍री थेङ्‌यीमात बप्‍तीस्‍मा पीनो।

मर्‌कुस् 16:16

बीस्‍वास् स्‍य्‍हेङ्‌ज्‍यीम् बप्‍तीस्‍मा कीन्‍बलमा थर्‌स्‍ये मुब। तर बीस्‍वास् अस्‍य्‍हेङ्‌बलमाचे न्‍यायकी दीन्‍री सजाय यङ्‍स्‍ये मुब।

युहन्‍ना 11:27

मार्‌थचे पङ्‍ज्‍यी, “य्‍हीन्‍ब प्रभु, थेङ् जम्‍बुलीङ्‌री ब्‍योन्‍युबे मुक्‍ती न्‍हङ्‌बे ख्रीस्‍ट् पर्‌मेस्‍वर्‌की ज य्‍हीन्‍ब बी ङ बीस्‍वास् स्‍य्‍हेङ्‌ब।”

युहन्‍ना 20:31

तर चु तम् ब्रीबल मुब, होत्‍तज्‍यीम् एङ्‍यीमाचे येसुत मुक्‍ती न्‍हङ्‌बे ख्रीस्‍ट् पर्‌मेस्‍वर्‌की ज य्‍हीन्‍ब पङ्‍ज्‍यीम् बीस्‍वास् स्‍य्‍हेङ्‌खइ, ओसेम् थेङ्‌त बीस्‍वास् स्‍य्‍हेङ्‌ज्‍यीम् खेमेनो अबेबे जीवन यङ्‍खइ।

युहन्‍ना 6:68

सीमोन पत्रुसचे पङ्‍ज्‍यी, “प्रभु, ङ्‌यीमा खन, खलइज ङ्‍यीब? खेमेएनो अबेबे जीवन् यङ्‌बे फ्रोइ थेङ्‌तेङ् मुब।

युहन्‍ना 9:35

यहुदी अगुवामाचे कन ग्‍यम्‍से फेन्‍बे म्‍हीत तेत्‍लाज्‍यी पङ्‍बे तम् येसुचे सेन्‍जेत्‍प बीसेम् थेङ्‌चे हुजु म्‍हीत खतु तज्‍यीम् सुङ्‌ज्‍यी, “एचे म्‍हीइ जत बीस्‍वास् स्‍य्‍हेङ्‌ब?”

प्रेरीत् 2:38

ओसेम् पत्रुसचे थेङ्‌यीमात पङ्‍ज्‍यी, “देरेम् एङ्‍यीमा जम्‍मचेनो र्‌हङ्-र्‌हङ्‍की पापमाकी क्षमाकी लागीरी पस्‍चताप स्‍य्‍हेङो ओसेम् येसु ख्रीस्‍ट्‍की छेन्‍री बप्‍तीस्‍मा कीनो। ओसेम् एङ्‍यीमाचे पबीत्र आत्‍माइ बक्सीस् यङ्‍स्‍ये मुब।

प्रेरीत् 8:12

तर फीलीपचे पर्‌मेस्‍वर्‌की य्‍हुल्‍तेङ् येसुइ बारेरी ज्‍यबे सम्‍तर्‌त स्‍येत्‍प बीसेम् थेङ्‍यीमाचे बीस्‍वास् स्‍य्‍हेङ्‌ज्‍यी। ओसेम् अपकोलतेङ् अमकोलमाचे बप्‍तीस्‍मा कीन्‍ज्‍यी।

प्रेरीत् 8:21

एल चु लक्‍री तइ बोएनो अरे। तलेपङ्‍सम् पर्‌मेस्‍वर्‌की ङोन्‍ग्‍यम् एइ सेम् ज्‍यब अरेबल टीम्।

प्रेरीत् 8:36

“थेङ्‌यीमा ग्‍यम्‍री य्‍हर्‌टीमम् यी मुबे ग्‍लारी दोःज्‍यी। ओसेम् हुजु नपुङ्‍सक्‍चे फीलीप्‍त, ‘चुरी यी टीम्, देरेम् ङचे बप्‍तीस्‍मा कीन्‍बरी ताचे र्‌होद्‍ल?’” बी ङ्‌योत्‍ज्‍यी।

प्रेरीत् 8:38

ओसेम् थेचे रथ र्‌होद्‍पुङ्‍ज्‍यी। हुजु लीप्‍चे थेङ्‌य्‍हीनो यी मुबे ग्‍लारी ङ्‌यीज्‍यीम् फीलीपचे थेत बप्‍तीस्‍मा पीन्‍ज्‍यी।

प्रेरीत् 9:20

थे ग्‍योन्-ग्‍योन्‍नो यहुदीमा र्‌हुब् तबे दीम्‍री ङ्‌यीज्‍यीम् “येसु पर्‌मेस्‍वर्‌की ज य्‍हीन्‍ब” पङ्‍ज्‍यीम् स्‍येत्‍प तीप्‍ज्‍यी।

रोमी 10:10

तलेपङ्‍सम् ङ्‍य्‍हङ्‍माकी सेम्‍चे बीस्‍वास् स्‍य्‍हेङ्‌ज्‍यीम् ङ्‍य्‍हङ्‍मा पर्‌मेस्‍वर्‌की ङोन्‍री धर्‌मी तब, ओसेम् ङ्‍य्‍हङ्‍की सुङ्चे स्‍वीकार् स्‍य्‍हेङ्‌ज्‍यीम् ङ्‍य्‍हङ्‍मा थर्‌ब।

१ कोरीन्‍थी 12:3

होत्‍तज्‍यीम् एङ्‍यीमाचे चु तम् गोखइ पङ्‍बे सेम् ङल मुब, पर्‌मेस्‍वर्‌की आत्‍मा ग्‍यम्‍से तम् पङ्‍बे म्‍ही खल्‍चेएनो “येसुत केम्‍लङ् फोःखइ” बी अपङ्, ओसेम् पबीत्र आत्‍माइ अगुवाइ यङ्‍बे म्‍हीचेकीनो, “येसुनो प्रभु य्‍हीन्‍ब” बी पङ्‍ब खम्‍ब।

१ पत्रुस 3:21

हुजु यीचे बप्‍तीस्‍माकी सङ्‍केत् स्‍य्‍हेङ्‌ब, हुजुचे देरेम् एङ्‍यीमात थर्‌नलब। चु ल्‍हीइ ख्रीती ख्रुप र्‌हङ्‍ब अय्‍हीन्, तर चोखो बीबेक्‍चे पर्‌मेस्‍वर्‌तेङ् स्‍य्‍हेङ्‌बे बाचा य्‍हीन्‍ब। येसु ख्रीस्‍ट् स्‍यीजेत्‍ज्‍यीम् सोजेत्‍पल ग्‍यम्‍से एङ्‍यीमा थर्‌ब।

१ युहन्‍ना 4:15

येसुनो पर्‌मेस्‍वर्‌की ज य्‍हीन्‍ब बी स्‍वीकार लबे म्‍हीतेङ् पर्‌मेस्‍वर् स्‍य्‍हुजेत्‍प, ओसेम् थे पर्‌मेस्‍वर्‌तेङ् टीब।

१ युहन्‍ना 5:1

येसुतनो ख्रीस्‍ट् य्‍हीन्‍ब पङ्‍ज्‍यीम् बीस्‍वास् लबलमा जम्‍मनो पर्‌मेस्‍वर्‌की कोलमा य्‍हीन्‍ब। ओसेम् खल्‍चे अपत म्‍होइब थेचे थेङ्‌की कोलमातएनो म्‍होइब।

१ युहन्‍ना 5:10

होत्‍तज्‍यीम् खल्‍चे पर्‌मेस्‍वर्‌की जत बीस्‍वास् स्‍य्‍हेङ्‌ब थेचे र्‌हङ्‍की सेम्‍री चु गबाही देमेन् य्‍हीन्‍ब बी ङ्‍येन्‍ब। तर खल्‍चे पर्‌मेस्‍वर्‌त बीस्‍वास् अस्‍य्‍हेङ् थेचे पर्‌मेस्‍वर्‌की गबाहीत भ्‍यु तन लब, तलेपङ्‍सम् जइ बारेरी न्‍हङ्‌बे गबाहीत थेचे बीस्‍वास् स्‍य्‍हेङ्‍बल अत।

१ युहन्‍ना 5:5

जम्‍बुलीङ्‍त खल्‍चे डाब खम्‍ब? खल्‍चे येसुत पर्‌मेस्‍वर्‌की ज पङ्‍ज्‍यीम् बीस्‍वास् स्‍य्‍हेङ्‌ब थेचेनो जम्‍बुलीङ्‍त डाब।