19 थेङ्यीमाचे स्वतन्त्र स्य्हेङ्पीन्ब पङ्ज्यीम् बाचा लब, तर थेङ्यीमा र्हङ्नो पाप्की बान तबल तब, तलेपङ्सम् खजु तम्चे म्हीत डाब थेङ्यीमा हुजुलनो बान तब।
येसुचे थेङ्यीमात जोहाप् न्हङ्ज्यी, “ङ एङ्यीमात देमेन्नो पङ्ब, पाप स्य्हेङ्बलमा जम्मनो पापकी बान य्हीन्ब।
हुजु लीप्चे म्हङ् स्यप्पे म्ही थेङ्यीमाकी जोरी छ्योङ्खज्यीम् थेङ्यीमात चुङ्ज्यीम् म्य्हज्यी। ओसेम् थेङ्यीमा क्लीङ्दो तज्यीम् ल्ही ल्हुङ्बनो म्हग नाज्यीम् हुजु दीम्चे छ्योङ्य्हर्ज्यी।
ख्रीस्ट्चे ङ्य्हङ्मात मोसाचे ब्रीबे नीयम् ग्यम्से फेःपीन्जेत्पल मुब, होत्तज्यीम् ङ्य्हङ्मा स्वतन्त्र तबल मुब। होत्तज्यीम् सेम् कोङ्ज्यीम् टीउ, ओसेम् देबेएनो मोसाचे ब्रीबे पर्मेस्वर्की नीयम्की बाना थतउ।
बीस्वासी र्होमा, एङ्यीमामी स्वतन्त्र तबरी ङ्होत्जेत्पल य्हीन्ब। चु स्वतन्त्रत ल्हीकी स्वभाब अनुसार ब्रबरी थकोलो। बरु गीःचे गीःत म्होइज्यीम् ज्यब स्य्हेङो।
चोले थेङ्यीमा म्ही ज्यीज्यीम् सैतान्की व ग्यम्से स्योर्ब खम्स्ये मुब, तलेपङ्सम् थेङ्यीमात सैतान्चे म्हेन्ब र्हङ्ले ब्रबरी सैतान्चे चुङ्ज्यीम् थेन्बल मुब।
तलेपङ्सम् ङोन्ग्यम् ङ्य्हङ्माएनो मुर्ख, पर्मेस्वर्त अङ्येन्बल, बराल्तीज्यीम् ब्रबल। ङ्य्हङ्मा अज्यबे सेम्तेङ् मनमोज्की बाना मुबल। ओसेम् र्होत न्होङ्न लबे सेम् थोःबतेङ् स्हेर्बल, म्हीमाचे ङ्य्हङ्त अखोबल ओसेम् ङ्य्हङ्मा न्हङ्एनो गीःचे गीःत अखोबल मुबल।
खलइ अधीन्रीएनो टीअथोबे म्हीमाचे र्हङ्ले र्हङ्की जीवन् सोउ, तर होले सोम्यङ्ज्यी पङ्ज्यीम् एङ्यीमाचे अज्यबे लक्मा स्य्हेङ्ब थम्हयो। तर पर्मेस्वर्की बाना तउ।
चोलेनो थेङ्चे बाचा स्य्हेङ्जेत्पे ङ्हच्छ्यङ् ग्लुब अखम्बे बर्दान्मा ङ्य्हङ्मात न्हङ्जेत्ज्यी। एङ्यीमा चु जम्बुलीङ्री मुबे अज्यबे सेम्की नास् लबे तम्मा ग्यम्से स्योर्ज्यीम् पर्मेस्वर्की स्वभावरी ब्रउ बी हुजु बर्दान्मा न्हङ्बल य्हीन्ब।
तर थेङ्यीमाचे ङ्य्हङ्की प्रभुतेङ् मुक्तीदाता येसु ख्रीस्ट्त स्येःज्यीम् जम्बुलीङ्की अज्यबे लक्मा स्य्हेङ्ब पीत्लाज्यीम्एनो देबे दोःज्यीम् हुजु अज्यबे लक्मा स्य्हेङ्ज्यी पङ्सम् थेङ्यीमाकी लीक्यम्की गती ङोन्ग्यम्ल बीमएनो झेन् अज्यब तब।