Santiago 5:4 - Dios Iwene

⁴ Ina yötawa jobadö, juna̧ladönöma. Ökwödöma yelösöda sulabenö omukwatö kwömöayedö batjoduwinö 'wibadönö midö kwiyinaduwokobe. A̧ja̧kwaduwitjö. Jobadöma Diosnö budekwabinö jwötjeba̧linobe ökwödönöma, Tjimidinokobe, sula, jö̧ba̧lö. Ja̧danö, jwötjeba̧li̧ a̧ja̧kwiökwe jwiinö juluwo̧, Duluwo̧ Diosma ökwödö midöködönöma lȩbebo̧.

Santiago 5:4 ပူးပေါင်းရင်းမြစ်များ

Génesis 4:10

Ikenama Isabenö Jo̧ma abebö a̧ja̧kwijetö: —Caín ¿Tajawedö sulabenö ja̧köbaja̧da? Kwöjawo̧ ökwösobu ebawö nijinö 'dukwibajabe. 'Dukwibajobu chedemi jo̧ba jwöeba̧lobedanö nijitjö ökwöa ötjönöma, Lȩbebinö balekwa mikwa, jö̧ba̧lö̧— jö̧ba̧lijetö—.

Diosnö ösödo̧ Job mikwo̧ usula emawina jawa 34:28

ja̧danö jojodönö usula tjemawinö ja̧tji̧nobe. Jobekwö sulabenö ja̧tji̧awö̧, usulasedö tjubudekwi̧ma Dios öba a'o ökwöobe, ja̧danö jwibadö tjubudekwi̧bi a̧ja̧kwobe Diosma. Ja̧danö tjubudekwiökwe, jobadönö pjabatö, balekwa mikwa lȩbebo̧ Diosma.

Diosnö ösödo̧ Job mikwo̧ usula emawina jawa 7:2

—Ja̧danö ötjö usula emawö chö̧ji̧ma, –Dianö 'dö̧ibakwajö, –jö̧ba̧lö teada̧lö̧ jo̧sa, baikwö wanedö yötawa: Midö tjeminökwe tjömöayo̧ tubobe otidenama, yö̧te juluwanö baibakwa̧ omukwatö teada̧lo̧, –Yö̧te juluwanö baibowe, –jö̧ba̧lö, jö̧tö? Ja̧danö, midö wetjökwe otidenama, tjimidakwa̧ omukwatö teada̧lo̧, –Juluwanö tjimidowe, –jö̧ba̧lö, jö̧tö? Ötjöbi ja̧danö, Diosma usula chemawobö wei̧tjö̧, mikwa jwiinö lekwe jawo̧dö chöbaledobe, –Dianö 'dö̧ibakwajö, –jö̧balö. Jau, Diosma ötjönö weajabe, yö̧te tenia yö̧te baledibanö inia tjöbö usula chemawobö,

Éxodo 22:27

Jo̧bama jeledo̧ yö̧te abawado̧ma jwiiökwe ¿tajinö jwaekwobö yö̧te tiyuwenama? Ja̧danö, ötjönö jwöeba̧litjö̧ma, pjabatitjö, jö̧ba̧lö, a̧ja̧kwö pjatatakwo̧sa, lȩlö̧jinö edo̧sachobetjö̧— webijetö Isabenö Jo̧ma Moisesnö weawa wene ujunobö Israel jojodönö.

Éxodo 3:9

Isabenö ¡ayö! ötjö chömöledö Israel jojodö jwötjeba̧li̧ma cho̧'wo tjo̧inö cha̧ja̧kwobe. Ja̧danö, Egipto jojodö inia tjötjinö juluwanö tjotidobö wetjobema chedobe.

Isaías 1:9

Jau chömöledö, ökwödö israel jojodöma, Sodoma comunidaddanö, ja̧danö Gomorra comunidaddanö badibo jö̧da̧linobe, Dios lȩebi̧tjö okobe deinö bakobe debö di̧'yo jö̧da̧linobe chömöledö. Jo̧kwaijayonö, okobe deinö debö di̧'yapji jö̧ba̧lö, Isabenö Jo̧ okobe jwiinö juluwo̧ Diosma ökwödö israel jojodötjö o̧bukwedönö tjöbeba̧lö pjaatajabe, Sodomadanö, ja̧danö Gomorradanö badibapji jö̧ba̧lö.

Isaías 5:7

Ja̧ wanedö yötawaja̧ma, baikwö labebö lotaduwakwö chömöledö: Isabenö Jo̧ okobe jwiinö juluwo̧ Dios öbatjo wanekwachi̧ma, Israel mikwina itji̧mu tupadanö jojodönö wanekwachobe, jadanö otiwanö ubasa'ba ujunina wanekwachi̧ma, Juda jojodönö wanekwachobe. Ja̧danö, otiwanö ökwödönö pjaatinobetjö̧, ökwödönö iteada̧linobe, —Chömöledö Juda jojodöma otiwanö weti̧ a̧ja̧kwö tjö̧jo jö̧ba̧ladö, —jö̧ba̧lö. Jo̧kwaijayonö, wei̧ a̧ja̧kwö kwö̧jaduwo jö̧ka̧laduwemi, jojodönö kwabö lobadöja, jadanö otiwanö jabö kwö̧jaduwobö ji̧jayonö, sulabenö ja̧köbaduwawö̧ tjubudekwi̧da ökwöobe.

Isaías 5:9

Jobekwö ja̧bö kwö̧jaduwiökwe, isabenö lȩebakwo̧ Diosma. Jau, cha̧ja̧kwonö, Isabenö Jo̧ Okobe Jwiinö Juluwo̧ Diosma iteda lȩebakwa̧ jawa yöbawö ujuninobe, baikwö: —Isabenö ba̧jȩkwejubiyama jojodö dei ejubiya ji̧bakobe, inesö otiweju jalejubiyabi jojodö dei ejubiya ji̧bakobe, lȩtebakobetjö̧, —jö̧ba̧lö Dios yöbawö ujunina cha̧ja̧kwijatö.

Mateo 9:37

Jobadönö edö, iteda öba̧ja̧di̧ waisachadönö wanedö yöawinobe: —Batjonö wa̧ji̧ma isabenö nöa, emö tjotidobö, jo̧kwaijayonö wa̧ji̧ emö otidadöma ja'yubeda tjuju̧kwobe.

Lucas 18:7

¿Diosja? Sulabenö otido̧ bajalianö ajebi̧ a̧ja̧kwinatjö̧ma, Diosma ¿iteda ömöledö jo̧banö tjubudekwi̧ a̧ja̧kwökenaji̧? Dios omudawö ujuninawö̧ma yö̧tebi mölebi Diosnö budekwadö, ökwödönö pjabatö döpöjojodönö lȩkebo jö̧ba̧lö, ja̧danö lekwe möle atjebijayonö, Diosma juluwanöma pjaatokobedanö ichejekwa, ¿jö̧tö? ¿Dakwö kwomukwataduwa? ¿Isabenö pjaatökenaji̧? Isabenö pjaatakwo̧ chömöledö. Lekwe pjaatokobedanö ichejekwijayonö isabenö a̧ja̧kwo̧ chömöledö, ja̧danö isabenö pjaatakwo̧. Jau chömöledö, isabenö yötawaduwakwö, ajayinö a̧ja̧kwokobedanö ichejekwijayonö, isabenö juluwanö pjabatö tjöpöjojodönö lȩebakwo̧ chömöledö. Jo̧kwajabetjö̧ kabatibökönö Diosnö budekwö akebaduwo chömöledö, isabenö ökwödönö a̧ja̧kwo̧obetjö̧. Jau chömöledö, isabenö Dios lȩebakwa̧ lȩbebö ötjö jojo baibanö jȩminökwema ichö lȩtebocha. Ja̧ wene ösödö kwite'ada̧laduwobö jo̧be. Chöwaisa chömöledö, böjȩ jojodöma, juluwanö tjime'dawachibobe, jo̧kwajabetjö̧ chichibakwa̧ abönö ba̧jekwadö tjime'dawachibena, döpöjojodönö la'akatjöda lȩebökena jö̧ba̧lö. Jo̧kwaijayonö isabenö kwöpöjojodönö lȩbebö chichocha chömöledö, jo̧kwajabetjö̧ isabenö me'dawachibökönö kwite'ada̧laduwo chömöledö, Diosma isabenö a̧ja̧kwobetjö̧— jö̧ba̧lö yöawinobe Jesúsma.

Romanos 9:29

Ja̧danö, tupakwöbi iwȩyudinobe Isaíasma, Israel jojodönö tupakwö baledakwa̧ma. Baikwö iwȩyudinobe: Okobe jwiinö juluwo̧ Diosma Israel jojodötjö ja'yubenö tjö̧jibinö ja̧inobe. Jejenö ja̧inökötjö̧ma, ökwödö Israel jojodöma okobe deinö debö di̧'yo jö̧da̧linena, ja̧danö Sodoma jojodödanö, Gomorra jojodödanö badibo jö̧da̧linobe, bakwo̧bi ji̧bökönö, jö̧ba̧lö iwȩyudinobe Isaíasma. Jobekwö laebobe damötjö tjiwȩyudina Dios iwenema, Israel jojodöböködö Dios ömöledö batjibakwa̧ wenebi, Israel jojodönö lȩebakwa̧ wenebi.

Deuteronomio 15:9

Ja̧danö teada̧lönö kwö̧jaduwo, sulabenö a̧'dȩlanö omukwatö, –Aaa, jelemutjö dötölataja o̧ba yö̧neawachibobetjö̧, chöbalewoböma chöpöjöda, umusidi ina imidakwa̧ abönö umusidi söbebö lotobö baibapji jö̧ba̧lö. –Jobekwö omukwatö, a̧'dȩlanöma kwedaduwoko kwömöledöso̧ jwibo̧nöma chömöledö. Jejenö omukwatö, kwömöledöso̧ jwibo̧nö pjabatökönö kwö̧jaduwitjö̧ma, kwömöledöso̧ma Isabenö Jo̧nö ubudekwena, ja̧danö Dios öba a'otjö wene kwujuna̧lena, pjakato jö̧ka̧li̧danö pjakatokobetjö̧.

Colosenses 4:1

Ökwödö tjömöayedö tjuluwedönö baikwö weta: Bakweminö ja̧köbaduwo jö̧ka̧laduwi̧danö ja̧baduwidönö kwömöayedöduwinöma, kwöwaisaduwobetjö̧ ökwödö kwuluwo̧duwima mölejȩbe jo̧, jö̧ba̧lö.