Jejenö weiökwe, Micaiasma yöa̧linobe—Isabenö yötawakwö, yöka̧laja̧danö wene jwiinö kwȩwa̧jitjö̧ma, öwawakobe, Isabenö Jo̧ yöawaja̧ma yöbawö̧kö̧sa, omöna weneda yöbawo̧sa jö̧ba̧lö öwawena, —jö̧ba̧lö. Ikenama jobe ju̧kwadönö yöawinobe Micaiasma: —Okobe deinö yötawaja̧ jawa kwomukwataduwo chömöledö, —jö̧ba̧lö.
Santiago 2:5 - Dios Iwene5 Chö̧ja̧wo̧dö chösödawö̧, a̧ja̧kwaduwitjö. Böjȩnö ju̧kwadöma usulasedönö edö, Bidöma mikwawöködö, jö̧ba̧lö, tjomukwatobe. Jo̧kwaijayonö Diosma jobadönö edö, Jwiinö mikwawadö, jö̧ba̧lö, edobe. Diosma jobadö jwibadönö omudawö ujuninobe jwiinö juna̧ladöda batjibobö, tjo̧'wo̧ luwo̧ jawa, Jesucristonö tjo̧'wo̧ tjöwana̧lobetjö̧. Ja̧danö, Diosma jobadönö omudawö ujuninobe ju'wi möle jo̧bakwö webö tjö̧jobö, iteda La'aka Luwo̧ webö ö̧jobe ja̧nö. Jau chö̧ja̧wo̧dö, usulasedönöbi jejenö tjö̧jobö omudawö ujuninobe Diosma okobe deinö jo̧banö ösödadö tjö̧jakwa̧ma. အခန်းကိုကြည့်ပါ။ |
Santiago 2:5
54 ပူးပေါင်းရင်းမြစ်များ
Ja̧danö, ju'wibi yötawa: Ju'wikwenama jojodöma balada tju̧juna̧lakö̧, jwiakö̧ wajuwanö yöbawöködö. Omönada yöbawadö. Wanedö yötawa: Bakwo̧ balada jwibo̧da ö̧jijayonö ötjöma juna̧lo̧sa jö̧ba̧lö omöna yöbawo̧. Ja̧danö, jelo̧ balada nöinö juna̧lo̧ ö̧jijayonö ötjöma jwibo̧sa jö̧ba̧lö omöna yöbawo̧. Ömönada yöbawadö.
Jau chömöledö, ju'wedö tjitebotjö yöbawadö ichibö, Jerusalennö ju̧kwadönö abebö tja̧ja̧kwitjö̧ma, atadakwawa baikwö tjatadakwedö: —Isabenö Jo̧ma, Sion mösa'o jȩmi comunidad Jerusalen otidö ujunajabe, iteda ömöledönö tjöeba̧lemi comunidad baibanö, ja̧danö iteda ömöledö usula emawö jinadöma, jobe ja̧nö otiwanö tjö̧jakwedö, —jö̧ba̧lö.
tjöbajale tjewawinadöma babema edadö, ja̧danö kwebachinöködöma babema kwebachadö, ja̧danö tji̧sȩdo̧ sulinadöma, babema tji̧sȩdo̧ otiwadö, ja̧danö a̧ja̧kwinöködöma babema a̧ja̧kwadö, ja̧danö ö'wö babibajadöma yemidanö 'yabibajadö, ja̧danö usula jojodöma otiwa jawa wene yöawakwawa a̧ja̧kwadö jö̧ba̧lö Juannö yökawaduwo, ja̧ baledi̧ a̧ja̧kwö ötjönö öwaisakobetjö̧.
Jejenö jo̧be, jo̧kwajabetjö̧ ökwödö cha̧jwi̧mu chite'ada̧lawö̧ o̧bȩja̧dödanöbedönö baikwö yöta̧la: Yekabiduwa, Kwabe'doduwi Diosma otiwanö ökwödönö iyobö ösödobetjö̧. Jau chömöledö, Kwabe'doduwima isabenö otiwanö ökwödönö iyobö ösödo̧, ja̧danö jejenö iyobö ösödobetjö̧ iteda la'aka luwo̧ ö̧jenabi ökwödönö iyakobe. Jo̧kwajabetjö̧, jwidena jö̧ba̧lö yekabiduwobö jwiobe yelösöda chömöledö, Diosma isabenö otiwanö ökwödönö te'ada̧lö iyakwo̧, jö̧ba̧lö.
Ja̧danö, ju'wibi jo̧be chömöledö. Dios i̧tji̧mudobetjö̧, Diosma iteda i̧tji̧munö otiwa jawa iyakwa̧ma, ökwödönö ja̧ jawa iyakobe chömöledö. Ja̧danö, otiwa jawa Jesúsnö iyi̧tjöbi, ja̧danö ökwödönöbi iyakobe chömöledö, Jesúskwö bakobe dö̧jobetjö̧. Jau chömöledö, ina böjȩnö ja̧nö, Cristo usula emawinadanö, bakwainö usula emawadösa. Ja̧danö, tupakwö, mölejȩbe ja̧nö, Dabe'do Dios jo̧banö otiwa jawa iyakwa̧bi bakwainö ökwödönöbi iyakobe chömöledö.
Jo̧kwaijayonö, wajwitjinajayonö, Diosma isabenö otiwa jawa ökwödönö iyobö omukwatobe Dios iwene laebi̧danö. Baikwö laebobe Dios iwene: Diosma inesö otiwa jawa otidinobe jo̧banö ösödadönö iyobö. Jojodöma jejenöjaye otiwa jawama la'akatjöda edöködö, ja̧danö la'akatjöda a̧ja̧kwöködö, ja̧danö la'akatjöda tjomajadenö omukwatöködö, tjomukwati̧tjö bajalekwönönö otiwobetjö̧. jö̧ba̧lö laebobe.
Jejenö omukwatö, usula demawijayonö kabatibökönö jwaikwöda yöbawö dö̧jobe chömöledö. Jau chömöledö, okobe jwiinö usula demawi̧ma, ökwödönö pjadatotö jö̧ba̧lö usula demawobe, tupakwönönö ba̧jekwadö jojodönö Dios mikwa jwiinö otiwanö iyenama, otiwanö iyo̧ja jö̧ba̧lö ba̧jekwadö Diosnö tjösödakobetjö̧, ja̧danö okobe deinö Diosnö otiwanö tjomukwatakobetjö̧.
ja̧danö do̧'wo̧ tjo̧achijayonö, do̧'wo̧ luwo̧ ösöwachibanö ja̧dösa. Jau chömöledö, böjȩ jawatjö usulasedösa, jo̧kwaijayonö ju'wedönö nöinö juna̧ladö batjibanö tjo̧'wo̧ luwo̧ jawa iyadösa, ja̧danö jwibadödanö dichejekwijayonö, isabenö mikwawi̧ jawa okobe jwiinö juna̧ladösa. Jau chömöledö, ju'wedö ökwödönö Dios ömöayedöböködö jö̧ba̧lö yötja̧lijayonö, ja̧bö dö̧ji̧ma öwaetjöda i̧sebobe Dios ömöayedö dö̧ji̧ma.
Isabenö pjabatö kwiyaduwobö otiwa chömöledö, baikwö yötawa: Kwöwaisaduwa chömöledö, Duluwo̧ Jesucristo mikwa jwiinö otiwanö iyina wenema, ¿jö̧tö? Jau chömöledö, jo̧bama nöinö ujuna̧linajayonö, ujuna̧li̧ junibö, jwibo̧danö usulaso̧ baibinobe, ökwödönö pjabatö. Jejenö baibinobe, ökwödöma jo̧ba usulaso̧ ö̧jinatjö nöinö juna̧ladö bakibaduwakobetjö̧.
Ja̧danö, Diosnö atebobe kwo̧'wo̧ luwo̧duwinö do̧batö kwöwaisachibaduwobö Dios ökwödönö jwiinö otiwa jawa iyi̧ma, tjo̧'wo̧ luwo̧ jawa. Chömöledö, Diosma jwöbijetö ökwödönöma iteda ömöledö bakibaduwobö. Ja̧danö, ökwödönö, iteda ömöledö babibadönöma, jwiinö otiwi̧, kwo̧'wo̧ luwo̧duwi jawa iyobö jwöbijetö Diosma ökwödönöma.
Chömöledö, ötjöma ju'wedö Dios ömöledö babibinadötjö baikwönönöda jo̧sa. Jejenöijayonö Diosma ötjönö lȩlö̧jino edö 'da̧batö ujuninobe, judío jojodöböködönö yötawobö, Cristoma jwiinö pjabato̧, jwiinö otiwo̧, jwiinö juluwo̧, jö̧ba̧lö. Ja̧ jawa, Cristo pjaati̧, otiwi̧, ujuluwi̧ jawa kaatiboböma jwibo̧, jö̧ba̧lö, yötawobö 'da̧batö ujuninökwesa.
Jau Timoteo, ja̧tjö chö̧jibanö pjaatinobe Duluwo̧ma, ja̧danö ju'wibi okobe jwiinö ötjönö sulabenö ja̧tji̧tjö chö̧jibanö pjaatakobe, ja̧danö iteda yöbawö weena mölejȩbe wene jwiinö chichibobö i̧'yejebakobe. Ba̧kwȩlö̧jatebö kabatökönö jo̧banö dösödobö jo̧be, otiwo̧ja, juluwo̧ja jö̧ba̧lö, jejenö otiwa.
Ja̧danö, jejenö ja̧bö chö̧jiökwe, chuunö chubutjawakwaka, sulabe jwibadö tjubutjawakama, ida̧ökö mölejȩbe te'ada̧lö jo̧be, 'dö̧ibaji̧ möle Duluwo̧ chuunö öwanenanö kabatö. Jau Timoteo, Duluwo̧da sulabe jwibo̧ inesö lȩekwa luwo̧ma, ja̧danö ja̧ mölema, Duluwo̧ma ja̧ka inesö otiwaka ötjönö iyö öwanakobe. Jo̧kwaijayonö sule ötjönödamaökö, okobe deinö Duluwo̧ ichakwa̧ ösödö te'ada̧ladönöbi iyakobe ja̧ mölema.
Jejenö omukwatö ujuninobe Moisésma, Dios jojodönö tjö̧jibinö pjabatö weakwo̧nö ite'ada̧lobetjö̧, Israel jojodötjö öbötjachakwo̧nöma. Ja̧danö, jejenö te'ada̧lö ja̧nö, Moisésma Dios ömöledökwö usula emawinobe. Jejenö ja̧nö omukwatinobe, Usula emawö chö̧jijayonö, usula emawö Dios ömöledökwö Dios weakwo̧nö te'ada̧lö chö̧ji̧ma ajayinö Egiptonö okobe jwiinö juna̧lö chö̧jinatjö o̧penönö mikwawobe, jö̧ba̧lö. Moisésma jejenö omukwatinobe iteda ö̧ji̧ möle jawa omukwatokobetjö̧. Moisésma ju'wi möle mölejȩbe ö̧jakwa̧ omukwatinobe, Dios jwiinö mikwawi̧ iyakwa̧ möle. Isabenö, Moisésma ja̧ möle te'ada̧lö Diosnö o̧'wo̧ wana̧lö ö̧jinobe.
Chö̧ja̧wo̧dö, wene baledena tjo̧'wo̧ 'dibachibö, jwaikwöda, Diosnö tjo̧'wo̧ wana̧lö 'ya̧döma, Dios pjaatawö̧. Ja̧danö, jwaikwöda tji̧'yi̧ma tji̧sekwobe, Diosnöda do̧'wo̧ wana̧lö ja̧dösa, jö̧ba̧lö. Ja̧danö chö̧ja̧wo̧dö, jobadöma Dios yöbawö ujunina tjemakwedö, ba̧kwȩlö̧jatebö ja̧kwawama. Jau chö̧ja̧wo̧dö, Diosma yöbawö ujuninobe, Ötjönö ösödadönö ba̧kwȩlöjatebo ja̧kwawa chiyakwo̧sa, jö̧ba̧lö.
Chösödawö̧ chö̧ja̧wo̧dö, biya̧ yötawi̧ma kwomukwataduwo: Ökwödötjö bakwo̧nökwena, Dios iwenetjö isabenö ji̧ jawa yöawobema ösödinö kwa̧ja̧kwa̧laduwo. Ja̧danö, ju'wibi kwomukwataduwo: Ökwödöma yöka̧lakwawaduwena tjo̧'omanö, tiyuwanö yöka̧laduwo. Ja̧danö ju'wibi: Juluwanöma kwölabiduwoko, omukwatökönö.
Ja̧danö, ökwödö chö̧ja̧wo̧dötjö böjȩ jawa jwibadönö, usulasedö, jö̧ba̧lö, ötjabiwö̧nö yötawaduwakwö. Ökwödöma jwiköbaduwobetjö̧ kwö̧jaduwi̧ma waiya, yelösöda. Jo̧kwaijayonö, ¡Ökwödöwe, usulasedösa! jö̧ba̧lö, kwomukwataduwoko chö̧ja̧wo̧dö. Ju'wi kwomukwataduwobö jo̧be, biya̧: Diosma ökwödönö möakwö kabebö edö yöa̧lobe, Bidöma jwiinö mikwawadö, jö̧ba̧lö. Chö̧ja̧wo̧dö böjȩ jawa jwiköbaduwijayonö kwo̧'wo̧duwi ösöwanö, Dios i̧tji̧mudobetjö̧ jwiinö mikwawadösa, jö̧ba̧lö, omukwatö kwö̧jaduwo.
isabenö mölejȩbe dö̧jakwedösa, jö̧ba̧lö, ja̧danö isabenö Dios iteda i̧tji̧munö iyakwa̧ demakwedösa jö̧ba̧lö. Jau chömöledö, ja̧ Dios ökwödönö iyakwa̧ma, la'akatjöda suli̧ waekwökö ji̧, ja̧danö suli̧ jwöachökö ji̧, ja̧danö 'dö̧ibajökö ji̧. Ja̧danö, Diosma ja̧ ökwödönö iyakwa̧ma mölejȩbe ujuninobe, jobe dichibena ökwödönö iyobö.
Jau chömöledö, kwöwaisaduwa, dö̧jibinö pjabato̧ Duluwo̧ Jesucristoma, la'aka luwo̧ ja̧nö yöbawö ö̧jakobe, ja̧danö ökwödö jo̧banö ösödadöma jo̧bakwö dö̧jakwedösa, ¿jö̧tö? Ja̧danö chömöledö, ju'wibi yötawaduwakwö, yötawaja̧danö jwaikwöda ja̧bö kwö̧jaduwobö kwisakwaduwitjö̧ma, jobe tekachaduwenama Diosma isabenö jwiinö otiwanö ökwödönö iyakobe, ina böjȩnö kwö̧jaduwayi chösödi̧danö otiwanö ja̧bö ji̧nadöja jö̧ba̧lö.
Jo̧bama baikwö yöawobe ökwödö Esmirna jojodönö, jo̧banö ösödadönöma: Ökwödö, Esmirna jojodönö inia tjököbaduwinö baledi̧ma chöwaisa. Yelösöda, jwibadöja, usulasedö babibinadöja, chöwaisa. Jo̧kwaijayonö, ökwödöma kwo̧'wo̧ luwo̧duwinö okobe jwiinö juna̧ladödanö kwö̧jaduwobe, böjȩ jawa jwiköbaduwijayonö. Chöwaisa, judío jojodötjö ju'wedöma omöna yötja̧lobe ökwödönöma, Sulabenö ja̧badö, jö̧ba̧lö. Jobadöma, Ökwödödasa Dios ömöledö, jö̧ba̧lö, yötja̧lijayonö, tjo̧'wo̧ luwo̧nö Dios ömöledö babibinöködö. Jobadöma Awetjanöda ösödadö.
Chömöledö, jejenö usulasedödanö kwö̧jaduwobetjö̧ ökwödönö pjabatö yötawaduwakwö, wanedö yöbawö. Ötjötjö orotjö kwemaduwo juna̧ladödanö bakibaduwakobetjö̧. Ja̧ oro, ökwölatjö laebaja̧ bakwai̧ oro, jwiinö mikwawi̧ oroma. Ja̧danö, ja̧ oro, ötjötjö kwemaduwi̧ oroma, Dios isabenö mikwawi̧ iyi̧ jawa wanekwachobe. Ja̧danö, kamisi̧ dewi̧ o̧di̧juma ötjötjö emibö 'dukawaduwo, otiwanö taba jwiinö kwekachaduwakobetjö̧. Ja̧danö, jowobu'be ötjötjö emö, kwöbajalebiyaduwi kwa̧bekwaduwo yemidanö otiwanö kwedaduwakobetjö̧.
Ja̧ baledaja̧ yötjawi̧ a̧ja̧kwinobe Jotanma, ja̧danö a̧ja̧kwajo̧, Siquen comunidad badeibösa'o Guerizin mösa'obe i̧'yinobe, jobetjö Siquen comunidad jojodönö yöa̧lobö. Ja̧danö, ichibö labinö jwöbö yöawinobe baikwö: —Ökwödö Siquen comunidad luwedönö yötawa, ja̧danö yötawi̧ kwa̧ja̧kwaduwobö jo̧be, yötawi̧ kwaja̧kwaduwiökwe, Diosma ökwödönöbi a̧ja̧kwakobetjö̧.
Tupakwö yöawinobe Dios yöawi yöbawo̧ma Elinö: —Jo̧kwajabetjö̧, jejenö sulabenö ja̧köbaduwitjö̧, baikwö yöawobe Isabenö Jo̧, israel jojodö tjuluwo̧ Diosma, Isabenö yöbawö chujunijatö kwömöledönö, Aaronbi, i̧tji̧mu tupadanö jojodöbi ba̧kwelöjatebö chöba a'otjö weti̧ otidö tjö̧jakwedö jö̧ba̧lö, jo̧kwaijayonö baikwö yötawakwö, la'akatjöda ja̧ wene badekwachökakobe ökwödönö, baikwö yötawa: Ötjönö otiwanö omukwatö ju̧kwadönöma, ötjöbi balekwa mikwa otiwanö jobadönö omukwatö chö̧jocha, ja̧danö ötjönö öpöjödadönö, ötjöbi balekwa mikwa chöpöjödocha jö̧ba̧lö. Ja̧danö ökwödöma ötjönö otiwanö omukwatökönö kwöpöjödaduwobetjö̧, Aaronnö yöbawö chujuninama ökwödönö badekwachökakobe la'akatjöda.
Isabenö otiwanö pjabato̧ Isabenö Jo̧ma, usula jojodö niji̧so̧pjanö ba̧jadönö, niji̧sopja tjö̧bemitjö kabebo̧, ja̧danö jwibadönö ökwölasopja̧nö tjö̧bemitjö otiwanö kabebo̧, la'aka luwedö tjö'da̧de tjö̧bamatobö, ja̧danö otiwanö tjomukwatawö̧ tjiteaka ba̧jadö batjibobö. Jobekwö webo̧ Isabenö Jo̧ma, Jo̧bada bö̧jȩ la'aka wa̧pedö ujuninobetjö̧, ja̧danö la'aka wa̧pedajo̧, jo̧ba̧da bö̧jebi wa̧pedö ujuninobetjö̧.
ကြော်ငြာတွေ