Santiago 2:1 - Dios Iwene

¹ Chö̧ja̧wo̧dö, ökwödöma Duluwo̧ Jesucristonö ösödadöja, Jesús ökwöma isabenö jwiinö mikwawo̧ja, jö̧ba̧lö. Ja̧danö, Duluwo̧ Jesucristonö ösödadöma jojodönö okobe deinö bakwainö kwedaduwobö jo̧be, Mikwawadö, jö̧ba̧lö. Jo̧kwaobetjö̧ baikwö lȩtebaduwakwö: Juna̧ladönö edö, Bidöma ju'wedötjö o̧penönö mikwawadö, jö̧ba̧lö, kwomukwataduwoko chö̧ja̧wo̧dö. Jesucristonö kwösödaduwobetjö̧ jejenö kwomukwataduwobö jwiobe.

Santiago 2:1 ပူးပေါင်းရင်းမြစ်များ

Proverbios 24:23

Baikwöbi laebobe jweinö omukwatadö yötjawina jawa, lȩekwa yöbawo̧nö yötjawinama: Wanedö yötawa: Lȩekwa yöbawo̧ öba a'otjö du̧ju̧taja wene juna̧lakwawadö yötjawobe lȩekwa yöbawo̧nö, wene tju̧juna̧lakwawi̧ jawama. Bakwo̧nökwena yötjawobe lȩekwa yöbawo̧nöma, öwaisachibobö tida jweinö yöawojobö, tida omöna yöawojobö. Ja̧danö, lȩekwa yöbawo̧ma jobadö du̧ju̧taja wene juna̧lakwawadö yötjawi̧ a̧ja̧kwö, bakwemiinö edobö jo̧be. Jelo̧nö ösödö, jelo̧nö öpöjödö edobö jwiyobe. Bakwemiinö edö lȩebakwa̧ma jweinö yöawobö jo̧be.

Proverbios 28:21

Ja̧danö, ju'wibi yötawa: Lȩekwa yöbawo̧ma du̧ju̧taja wene juna̧lakwawadö yötjawi̧ a̧ja̧kwö, bakwemiinö edobö jo̧be. Jelo̧nö ösödö, jelo̧nö öpöjödö edobö jwiyobe. Bakwemiinö edö lȩebakwa̧ma jweinö yöawobö jo̧be. Jobekwö jweinöda yöawobö ji̧jayonö, lȩekwa yöbawadötjö ju'wedöma sulabenö omukwatadö. Jobadöma ju'wedö mikwanö tji̧yitjö emadö omöna yötjawobö, ja'yube mikwanö tjiyitjö̧bi.

Mateo 22:16

Ikenama, omukwatajadö, idöda tjömöayedönö ju'wedönöbi, la'aka luwo̧ Herodesnö ösödadötjö ju'wedönöbi wetjinobe, Jesúsnö abebö tja̧ja̧kwobö baikwö: —Ba̧ja̧dakwawa luwo̧, ökwönö döwaisa, jweinö yöbawo̧ja jö̧ba̧lö. Ja̧danö, Aaa, jojodö sulabenö tjöpöjödapji jö̧ba̧lö omukwatökönö, yebabökönö jweinö Dios ösödi̧ jawa yöbawo̧ja, jö̧ba̧lö döwaisa. Jau ba̧ja̧dakwawa luwo̧, döwaisa, luwedönöbi jweinö yöbawo̧ja, jojodönö wainökwenama kwedokobetjö̧.

Hechos 10:34

Ikenama Pedroma yöbawijetö jobadönö: —Babema tjo̧wi̧ chöwaisachiba. Diosma okobe deinö, jelobe ju̧kwadönöbi jelobe ju̧kwadönöbi bakwaibedödanö bakwainö edo̧. Diosma Israel jojodönöbi ju'wedönöbi bakwainö ösödo̧.

Hechos 20:21

Judío jojodönöbi, judío jojodöböködönöbi, bakwaidödanö edö yöbawiachijatö. Sulabe tjomukwati̧ kabatibö tjöbalewacho, jö̧ba̧lö, yöbawiachijatö. Jesúsnö tjösödo jö̧ba̧lö, yöbawiachijatö— yöbawijetö Pabloma.

Hechos 24:24

Ikenama lekwokobetjö Félixma, jelobe kwebachö 'yi̧na ȩwa̧jijetö, ilekwokwö. Jobujuma judiosuju, Drusila mikwuju. Félixma Pablo yöawi̧ yemidanö a̧ja̧kwotö jö̧ba̧lö webijetö jo̧banö tjichejebobö. Tjichejebökwe yöawi̧, Jesucristonö tjo̧'wo̧ wana̧lakwawa wenema, a̧ja̧kwijetö Félixma.

Hechos 7:2

Jejenö abebö a̧ja̧kwiökwe Estebanma yöbawö atadijetö: —Chömöledö, ötjö yötawi̧ a̧ja̧kwaduwi: Damötjö dewinö dejato̧ Diosma öwawachijetö da'dömine Abrahamnöma, Mesopotamianö ö̧jena, Haránnö ö̧jakwa̧ abönö.

Romanos 1:11

Jau chömöledö, isabenö ökwödönö pjatatobö chösödobetjö̧, ökwödönö edö chichobö jö̧ta̧la. Ja̧danö, O̧'wo̧ Luwo̧ Dios pjaatakobetjö̧ ökwödönö Dios iwene yöbawö pjatatobö jö̧ta̧la, kwo̧'wo̧ luwo̧duwi ujuluwachibanö tupakwö kwa̧ja̧kwaduwobö.

1 Corintios 2:8

Chömöledö, okobe deinö böjȩ luwedöma ja̧ Dios omukwati̧ma la'akatjöda wajwitjinobe. Isabenö yötawa, tjöwaisinatjö̧ma towisa'onö bȩtjoko jö̧tja̧linobe salöinö juluwo̧ Duluwo̧nö.

Deuteronomio 1:17

Jojodö kwöba a'o tjichibenama, nöinö tjujuna̧litjö̧böbi, jwibadö tjö̧ji̧tjöböbi, bakwainö jweinöda lȩekwa yökawaduwo. Ja̧danö lȩekwa yökawaduwobö jȩnama, jojodönö yebabökönö jweinö yökawaduwobö ja̧kobe. Diosda inesö lȩekwa luwo̧ chömöledö, jo̧kwajabetjö̧ jojodönö yebabökönö, jo̧ba wei̧da a̧ja̧kwö, jweinö lȩekwa yökawaduwobö ja̧kobe. Ja̧danö, lȩekwa yökawaduwobö waiyitjö̧ma, chöba a'o tjichibobö ökibaduwo, wene juna̧ladönö, ötjö Moises yötja̧li̧ a̧ja̧kwö lȩekwa yötawobö,

Deuteronomio 16:19

Ja̧danö, lȩekwa sulabenö yötjawobö jwiakobe chömöledö, jweinö, bakwainö lȩekwa yötjawo jö̧tja̧li̧danöda yötjawobö ja̧kobe, jojodönö wainökwena omukwatökönö. Ja̧danö jojodö tjimidi̧, –Chösödi̧danö lȩekwa yökawitjö̧ma chimidocha, –jö̧ba̧lö tjimidi̧ tjemoböma jwiakobe, baikwö wanedö yötawa jejenö midawama, Ja̧ midawama suli̧ waedi̧, waisadö tjöbajale tjewawadödanö batjibobö ja̧i̧, jö̧ba̧lö. Jau chömöledö, jejenö midawama, lȩekwa luwedö tjöba a'o ju̧kwadö otiwadönö suli̧ öwaedobe, lȩekwa yötjawo jö̧tja̧li̧danö yöbawökönö, midadönöda pjabatö sulabenö lȩekwa yötjawobetjö̧.

1 Timoteo 1:19

Ja̧danö kabatökönö Cristonö ösödö kwö̧jo, ja̧danö kwomajadenö kwöwaisi̧danö, jwaikwöda otiwanö ja̧bö kwö̧jo, sulabenö ja̧bökönö. Ju'wedöma tjomajadenö tjöwaisi̧danö ja̧bö tjö̧jinokobetjö̧, waekwinobe. Ja̧danö, Dios iwene tjösödo jö̧tja̧li̧ wenema kabatibö, isa̧ökö weneda tjösödinobe.

1 Timoteo 5:21

Dios öba a'otjö, ja̧danö Cristo Jesús öba a'otjö, ja̧danö Dios weawö̧ ángelesdö tjöba a'otjö ja̧nö biya̧ inesö mikwawi̧ jawa wetakwö Timoteo, ökwönö yöbawö wetaja̧ma ja̧bö kwö̧jo jö̧ba̧lö. Ja̧danö, biya̧ wetaja̧ jawa ja̧bö kwö̧jena, ja̧danö biya̧ jawa Jesúsnö ösödadönö weköbena, bakwo̧nöbi ju'wedönötjö o̧penönö omukwatökönuwi, Aaa, biteda otiwo̧, jö̧ba̧lö, ja̧danö bakwo̧nöbi ju'wedönötjö o̧penönö ösödökönuwi, Aaa, biteda jwiinö chösödökwe, jö̧ba̧lö.

Tito 1:1

Tito, böja kwialusöjanö ötjö Pablo mikwo̧ma wȩyudö wetakwö. Ötjöma Dios ömöayo̧sa, ja̧danö Jesucristo webawo̧sa. Ötjöma Dios 'da̧batö ujuninökwesa, Dios omudawö ujuninawö̧nö pjabatö chöba̧ja̧do jö̧ba̧lö. Ja̧danö, jobadönö chöba̧ja̧dobe, jwaikwöda Dios yöawi̧ tjösödakobetjö̧. Ja̧danö, isabenö wene tjöwaisakobetjö̧ chöba̧ja̧dadönö. Ja̧danö, Dios ösödi̧danö ja̧bö tjö̧jakobetjö̧ chöba̧ja̧dadönö.

Tito 2:13

Jau Tito, ina böjȩnö dö̧jayi, do̧'wo̧ wana̧lö dite'ada̧lobe, isabenö Dios jö̧a̧lina möle badekwachakobe jö̧ba̧lö, inesö otiwa möle, ökwödö dö̧jibinö pjabato̧ la'aka Dios Jesucristoma iteda ujulu i̧sebenama.

Hebreos 12:2

Ja̧danö jwaikwö 'ya̧nö, me'dawachibökönö, Jesús, dö̧jibinö pjabato̧nö eda̧löda di̧'yobö jo̧be. Chömöledö, Jesúsma ökwödönö pjaatinobetjö̧ Diosnö do̧'wo̧ wana̧ladö babibinadösa, Jesúsnö do̧batö emö. Ja̧danö, Jesús ökwödönö pjaatinobetjö̧ ba̧kwȩlö̧jatebö Diosnö do̧'wo̧ wana̧ladösa, jo̧banö kabatibökönö, jwaikwöda 'ya̧nö. Jo̧kwaobetjö̧ chömöledö, Jesúsnöda omukwata̧lö, jo̧ba i̧'yinadanö di̧'yobö jo̧be. Jo̧ba ö̧jina omukwataduwi. Yelösöda usula emawö woinobe towisa'onö bȩtjajökwema. Isabenö, ja̧ jo̧banö lȩtjebi̧ma yelösöda jwiinö taba̧lö̧ji̧ jawanö lȩtjebinobe. Jo̧kwaijayonö Jesúsma omukwatinokobe itenöda taba̧lö̧ji̧ jawanö lȩtjebi̧ma. Usula emawijayonö ju'wi möle baibakwa̧ omukwatinobe, jwiinö o̧'wo̧ ösöwanö ö̧jakwa̧ma. Ja̧danö, Jesús towi sötenö bȩtjajökwema ö'wö baibinobe. Jemi ikenama ö'wö babibajo̧ma wobajaletjö tjeachajinobe. Ja̧danö, yemidanö tjebachajo̧ma mölejȩbe kabekwachajö ȩwa̧jinobe. Ȩwa̧jo̧ma Abe'do Dios ö̧bemi öwaisobekwöchobe öbamatinobe. Chömöledö, Jesúsma jwiinö usula emawijayonö kaatibinokobe ju'wi möle baibakwa̧ omukwatobetjö̧, jwiinö o̧'wo̧ ösöwanö ö̧jakwa̧da. Jo̧kwaobetjö̧ chömöledö, jwaikwö 'ya̧nö, kabatibökönö, Jesús, dö̧jibinö pjabato̧nö eda̧löda di̧'yaduwo.

Santiago 1:16

Chösödawö̧ chö̧ja̧wo̧dö, jelobekwö kwomukwataduwoko Diosnö, Diosma sulabenö webo̧ ökwödönöma, jö̧ba̧lö.

Santiago 1:19

Chösödawö̧ chö̧ja̧wo̧dö, biya̧ yötawi̧ma kwomukwataduwo: Ökwödötjö bakwo̧nökwena, Dios iwenetjö isabenö ji̧ jawa yöawobema ösödinö kwa̧ja̧kwa̧laduwo. Ja̧danö, ju'wibi kwomukwataduwo: Ökwödöma yöka̧lakwawaduwena tjo̧'omanö, tiyuwanö yöka̧laduwo. Ja̧danö ju'wibi: Juluwanöma kwölabiduwoko, omukwatökönö.

Santiago 2:3

Ja̧danö, ökwödöma otiwanö 'dubawo̧nö edö, Bena ba̧wi, jwiinö otiwakanö, jö̧ba̧lö, kwösödaduwobe nöinö. Jo̧kwaijayonö usulaso̧nö, Yena jamataji, ja̧danö, bena chömasapa la'akanö bamati, weköbaduwobe, jo̧banö nijakwönönö edö.

Santiago 2:9

Jo̧kwaijayonö okobe deinö juna̧ladönöbi jwibadönöbi bakwainö kwedaduwökötjö̧ma, yelösöda sulabenö ja̧bö kwö̧jaduwena chö̧ja̧wo̧dö, Dios wei̧ a̧ja̧kwökönö. Ja̧danö, jejenö Dios wei̧ kwa̧ja̧kwaduwiökökwe Diosma ökwödönö lȩbebö yöawobe, Bidöma sulabenö ja̧badö ötjö weti̧ tja̧ja̧kwokobetjö̧, jö̧ba̧lö.

Santiago 3:17

Jo̧kwaijayonö chö̧ja̧wo̧dö, jejenöma jö̧kö̧ Dios öibökwema. Diosma jo̧banö pjabatö öibobe waisinö omukwatobö, Dios omukwati̧danö. Ja̧danö, jo̧bama suli̧tjö 'da̧bachibö ö̧jobe, o̧'wo̧ luwo̧nö bakwainö otiwanöda edö. Ja̧danö, jejenö otiwanö edö ju'wedökwö wene jwiinö ö̧jobe. Ja̧danö ju'wedönö ösödö, tjo̧'omanö yöba̧lö, jo̧. Ja̧danö, ö̧ja̧wo̧döma jo̧banö jwebeba̧lö yötja̧lenabi jo̧ba Dios öibökwe waisanö omukwato̧ma otiwanö a̧ja̧kwobe, öwaisachibobö. Ja̧danö, jo̧bama ömöledönö lȩlö̧jino edobe, ba̧kwȩlö̧jatebö pjabatö. Jo̧bama isabenö iteda yöa̧li̧danö i̧sekwo̧, jojodönö ba̧kwȩlö̧jatebö pjabatö. Ja̧danö chö̧ja̧wo̧dö, jo̧ba Dioskwö jwaikwöda 'yo̧. Ja̧danö, jo̧ba Dios öibökwe waisanö omukwato̧ma jojodönö okobe deinö bakwainö edobe, jwibadönöbi, juna̧ladönöbi bakwaibedöda. Ja̧danö, jo̧ba waisanö omukwato̧ma yöba̧löda yöba̧lö̧kö̧, i̧sekwökönö. Jo̧bama iteda yöa̧li̧danö i̧sekwö jo̧.

2 Pedro 1:1

Dokwa chömöledö, Ötjöma Simón Pedrosa, ja̧danö Jesucristo webawo̧sa, ja̧danö ju'wibi jo̧ba ömöayo̧sa. Ötjöma böja kwialusöja wȩyudö wetaduwakwö, ökwödö Cristonö chösödi̧danö bakwainö ösödadönö. Jau chömöledö, dö̧jibinö pjabato̧ Dios Jesucristoma bakweminö jojodönö edo̧obetjö̧, ötjönö pjaatinadanö ökwödönöbi pjaatinobe, Cristonö chösödi̧danö ökwödöbi bakwainö kwösödaduwobö. Ja̧danö, ökwödö bakwainö ösödadönö böja kwialusöja wȩyudö wetaduwakwö.

Judas 1:16

Jobadö sulabenö yöbawadönö baikwö yöta̧la: Diosnö sulabenö yöba̧ladö, ja̧danö ju'wibi jojodönö tjo̧'wo̧ sulinö yöba̧ladö, ja̧danö ju'wibi idöda sulabenö tjösödi̧ jawa isakwö ju̧kwadö, ja̧danö ju'wibi otiwo̧sa jö̧ba̧lö labinö yöba̧ladö, ja̧danö ju'wibi idöda tjemotö jö̧ba̧lö jojodö tjösödachibanö yöba̧ladö.

Apocalipsis 14:12

Jo̧kwaobetjö̧ ötjö, Juan, yötawaduwakwö. Ökwödöma Dios ömöledö babibinadöja, jo̧ba wei̧ a̧ja̧kwadöja, Jesúsnö ösödadöja. Kwo̧'wo̧ luwo̧duwi 'dibachibö ja̧nö te'ada̧lakwawö kwö̧jaduwo, böjȩnö ja̧nö sulabenö baledenabi.