Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -




Santiago 1:22 - Dios Iwene

22 Ja̧danö chö̧ja̧wo̧dö, Dios iwene kwa̧ja̧kwaduwaja̧ ikena ¿dakwö ja̧köbaduwakwa̧da? Kwomukwataduwena, Dios iwene da̧ja̧kwobetjö̧ tjo̧wi̧ otiwa. Ja̧ da̧ja̧kwi̧ di̧sekwobö, ja̧danö Dios weina ja̧doböma jwiobe. Chö̧ja̧wo̧dö yötawaduwakwö. Dios iwene kwa̧ja̧kwaduwijayonö iwenetjö weina ja̧bö kwö̧jaduwökötjö̧ma mikwawokobe. Ja̧danö, kwomukwataduwitjö̧ma, A̧ja̧kwöda da̧ja̧kwobö otiwa. Dö̧ji̧ di̧sekwoböma jwia, jö̧ba̧lö, ökwödöda omöna yöba̧lö jelobekwö omukwatö ökikwaduwena. Chö̧ja̧wo̧dö, böjȩnö ja̧nö Dios iwenetjö yöawakwawa, iteda wei̧ma a̧ja̧kwö dö̧jobö jo̧be.

အခန်းကိုကြည့်ပါ။ ကော်ပီ




Santiago 1:22
31 ပူးပေါင်းရင်းမြစ်များ  

Jau chömöledö, jobekwö omukwatö otido̧ma, wajwibö ja̧bo̧. Otiwi̧ kwakwawa kwökönö, ökwölaso̧pja̧da kwo̧ ichejekwa, ja̧danö sulabenö omukwati̧ma, jelobekwö ö'öbönö öibökwe. Jo̧bajayo̧ma la'akatjöda iteda ö̧jibinö ja̧oböma jwibo̧, ja̧danö iteda ösödökwe, ömamunö do̧'alökwe o̧'wo jawanö omukwatö̧kö̧, —Bite chösödökwema, diosbö̧kö̧, omöna jawa, —jö̧ba̧lö omukwatö̧kö̧.


Jau chömöledö, okobe deinö mölejȩbe jo̧ Chabe'do ösödi̧danö ja̧badöma, yöne chömöledö chö̧ja̧wo̧dö ömadöbi, chöjawujudö ya̧döbi, chojo'dobi tjö̧jobe— jö̧ba̧lö yöawinobe Jesúsma.


Ja̧danö, jobadö 'yabayedö chöba̧ja̧di̧ waisachadönö ba̧ja̧daduwi, okobe jwiinö ökwödönö wetinama, jobadöbi ja̧bö tjö̧jakobetjö̧. Ja̧danö chömöledö, isabenö ökwödökwö chö̧jakwo̧sa, böjȩ 'dö̧ibenanö kabatö— jö̧ba̧lö weinobe Jesúsma.


Yöja̧liökwe, Jesúsma atadinobe: —Isabenö Dios otiwanö pjaatoko chojo'donöma, ötjönö jemobö iyinobetjö̧, jo̧kwaijayonö ja̧tjö bajalekwönönö isabenö nöinö pjabato̧ Diosma, Dios iwene a̧ja̧kwö laebachi̧danö ja̧bö ju̧kwadönöda chömöledö— jö̧ba̧lö.


Ina yöawinobe: —Ötjö, ökwödö kwuluwo̧duwima, kwömasapaduwibiya chidicha̧laja̧ma kwomukwataduwobö chidicha̧latö, Ökwödöbi jejenö pjakataduwobö jo̧be, jö̧ba̧lö. Babema kwöwaisaduwobe pjakataduwobö ji̧ma. Jo̧kwaobetjö̧ jejenö pjakataduwitjö̧ma kwo̧'wo̧duwi ösöwanö kwö̧jaduwena—yöawinobe Jesúsma—.


Jau chömöledö, Dios weina Moisés iwȩyudina juna̧ladönöma, wei̧danö ja̧tjökötjö̧ma, Aaa, bidöma wene jwibadö, ¿jö̧a̧lenaji̧ Diosma? Jö̧ba̧lö̧kö̧ chömöledö, Dios weinadanö ja̧tjitjö̧da jejenö jö̧ba̧lo̧ Diosma, Aaa bidöma wene jwibadö, jö̧ba̧lö.


Ja̧ wene, omöna jawa wene ösödökönaduwi chömöledö. Baikwö yötawaduwakwö: Sulabenö ja̧badökwö kwuju̧kwaduwitjö̧ma, ökwödöbi sulabenö ja̧badö bakibaduwena.


Chömöledö, isa̧ökö jawa omukwatökönaduwi. Ökwödötjö bakwo̧, Aaa, waiso̧sa, böjȩ waisakwawa jawa waiso̧sa jö̧ba̧lö omukwatitjö̧ma, wajwibo̧danö baibobö jo̧be. Jejenö wajwibo̧danö baibobö jo̧be, isabenö waisakwawa jawada waiso̧ baibo jö̧ba̧lö.


Kwöwaisaduwa chömöledö, Diosma sulabedönö weökakobe, jo̧bakwö ja̧nö luwedö baibanö yötjawobö. Jau chömöledö, isabenö yötawaduwakwö, sulabenö alewö ja̧badöbi, ja̧danö o̧'wo̧ jawa ösödadöbi, ja̧danö tji̧lȩkwa̧muböködökwö ja̧badöbi, ja̧danö ömadö ömadökwö ja̧badöbi,


Chömöledö, omukwatökönaduwi, Aaa Diosnö odijayonö wene jwiena jö̧ba̧lö. Bakwo̧bi Diosnö ooböma jwia chömöledö. Baikwö wanedö yötawa batjo jawa chömöledö: Bakwo̧ ödebiya öditjö̧ma, iyakwa̧da pokwakobe, ja̧danö iyakwa̧da wa̧ji̧ emakwo̧, ¿jö̧tö?


Bajaleapo yötawi̧ma baikwö yötawaduwakwö, otiwi̧ jawada, jojodö biya̧ma otiwa jö̧ba̧lö tjomukwato jö̧tja̧li̧ jawada kwomukwataduwo jö̧ba̧lö. Jau chömöledö, isabenö ji̧ jawada, ja̧danö otiwanö tjomukwati̧ jawada, ja̧danö jwei̧ jawada, ja̧danö bakwainö wene jwii̧ jawada, ja̧danö tjo̧'wo̧ ösöwi̧ jawada, ja̧danö jojodö tja̧ja̧kwobö otiwi̧ jawada omukwatö kwö̧jaduwo.


Jau chömöledö, okobe jwiinö yöka̧laduwi̧ma, Duluwo̧ Jesús jawa i̧sebö yöka̧laduwo, ja̧danö okobe jwiinö ja̧köbaduwi̧ma, Duluwo̧ Jesús jawa i̧sebö ja̧köbaduwo. Ja̧danö, Jesús pjaatinobetjö̧, ba̧kwȩlö̧jatebö Dabe'do Diosnö kwösödaduwo, Otiwanö pjabato̧ja, jö̧ba̧lö.


Jau Timoteo, sulabedöbi, Jesúsnö ösödadösa jö̧ba̧lö omöna yöba̧ladöbi ida̧ökö sulabenö ja̧tjobe babema, jo̧kwaijayonö 'dö̧ibaji̧ mölema jemi bajalekwönönö jwiinö sulabenö ja̧tjakobe, jojodönö omöna yöba̧löbi, omöna yöa̧lakwawa ösödöbi.


Ökwödö Jesúsnö ösödadöma, ina Jesúsnö dösödakwa̧ abönö böjȩ jojodö ja̧bö tjö̧ji̧danö ja̧bö dö̧jijatö Tito. Ja̧danö, wajwibadö ja̧nö, Dios wei̧ a̧ja̧kwökönö ja̧nö, omöna yöa̧lakwawa ösödö ja̧nö dö̧jijatö ajayinöma. Jejenö dö̧jenama, sulabe jawa dösödinama ökwödönö juluwinobedanö ichejekwa. Jau Tito, okobe jwiinö sulabe jawa dösödinama ökwödönö juluwinobedanö ichejekwa. Ja̧danö, ökwödönö juluwinobetjö̧, otiwanö ja̧bö dö̧joböma jwidinobe. Ja̧danö, jwaikwöda sulabenö dösödi̧ jawada ja̧bö dö̧jijatö. Ja̧danö, jejenö ja̧nö, kabatökönö sulabenö ja̧bö, ö'wiabinö edö dö̧jijatö. Ja̧danö, ju'wedönö öpöjödadö, ja̧danö ju'wedö tjöpöjödawö̧ dö̧jijatö ajayima.


Chö̧ja̧wo̧dö Diosnö ösödadöma, ju'wedönö otiwanö yötja̧lobö jo̧be. Bakwo̧, Ötjöma Diosnö ösödo̧sa, jo̧banö ba̧kwȩlö̧jatebö abebö, ja̧danö jo̧ba wei̧ a̧ja̧kwö, jö̧ba̧lö, yöa̧lijayonö jojodönö sulabenö yöa̧litjö̧ma ¿isabenö otiwanö ö̧jobeji̧, Dios ösödi̧danö? Otiwanö jö̧kö̧. Ja̧danö, jo̧ba Dios iwene yöawakwawejube i̧'yi̧ma, ¿mikwawobeji̧? Mikwaokobe. Ja̧danö, Diosnö ösödo̧sa, jö̧ba̧lö, yöa̧li̧ma ¿mikwawobeji̧? Mikwawokobe. Chö̧ja̧wo̧dö, jojodönö sulabenö yöba̧lo̧ma itenöda omöna yöba̧lo̧danö itedada omajadenö jelobekwö omukwatobö öibökwe, Otiwanö jo̧sa, jö̧ba̧lö. Jo̧kwaobetjö̧ jo̧ba Diosnö ösödi̧ma mikwawokobe chö̧ja̧wo̧dö. Ja̧ Diosnö ösödi̧ma inesö ösödi̧maökö.


Chö̧ja̧wo̧dö, ökwödöda edinö sulabenö yöka̧lakwawaduwoko kwö̧ja̧wo̧döduwinö, Sulabenö ja̧tja, jö̧ba̧lö. Jejenö yöka̧laduwena kwö̧ja̧wo̧dönö lȩbebadödanö yöka̧laduwobe, jobadötjö möakwönönö omukwatö. Ja̧danö, ökwödö ¿lȩkebaduwobö jo̧beji̧, kwö̧ja̧wo̧döduwinö? Jwiobe chö̧ja̧wo̧dö. ¿Wajwiköbaduwiji̧ Dios ökwödönö wei̧, Kwö̧ja̧wo̧dökwö ösödabikwawö kwö̧jaduwo, jö̧ba̧lö, wei̧ma? Jejenö kwö̧jaduwobö jo̧be chö̧ja̧wo̧dö. Kwömöledöduwinö lȩbebö yöka̧laduwobö weokobe Diosma. Jo̧kwaobetjö̧ jejenö kwömöledöduwinö, Sulabenö ja̧tja, jö̧ba̧lö, lȩbebö yöka̧laduwena Dios wei̧ma öpöjödö kwö̧jaduwobe. Dios wei̧ma junibö, Sula, da̧ja̧kwökö, jö̧ba̧lö, ju'wida lȩbebö yöbawöda kwö̧jaduwobe.


Jo̧kwaobetjö̧ chö̧ja̧wo̧dö, yötawaduwakwö. Bakwo̧, otiwanö ja̧bö ö̧jobö waiso̧ma, otiwanö ja̧bö ö̧jobö jo̧be. Isabenö öwaisobe böjanö yötawaja̧, Dios jo̧ba ö̧jobö ösödi̧ma. Jo̧kwaijayonö jo̧bama Dios otiwanö ja̧bö ö̧jobö wei̧ öwaisijayonö jelobekwö omukwatö sulabenö ö̧jitjö̧ma, jo̧bama yelösöda sulabenö ja̧obe, jweinö öwaisijayonö jelobekwö omukwatö i̧'yobetjö̧.


Ja̧danö chömöledö, jobadöma sulabenö ja̧tjaja̧ mikwa baibanö, usula tjemawakwedö. Jau chömöledö, okobe jwiinö tjösödi̧ jawama taba jwiinö ja̧badö, ja̧danö tojabinöma ja̧böködö, mölebi jojodö tjedonö taba jwiinö sulabenö ja̧bö ju̧kwadö. Ja̧danö chömöledö, kwö'da̧de ja̧nö sulabenö ja̧bö tjö̧jobetjö̧, jobadötjö taba lö̧jobe ökwödönö. Baikwö wanedö yötawa, kamijido̧ otiwado̧nö yȩabibi̧danö, jobadöma ökwödönö yetjebobedanö jo̧be, ökwödönö jojodö sulabenö tjomukwatobö ja̧tjobetjö̧. Jau chömöledö jobadöma jwaikwöda omöna yöba̧lö tjö̧jonö, tabakwökönö ökwödökwö Duluwo̧ midawö woina omukwatö kwukwaduwi̧ bakobe kwadö chömöledö, ökwödöbi Jesúsnö ösödadösa jö̧ba̧lö. Ja̧danö chömöledö, ökwödökwö bakobe tjö̧jobetjö̧, ökwödötjöböködötjijayonö, jojodö jobadö sulabenö ja̧bö tjö̧ji̧ edö, okobe deinö ökwödönö tjomukwatakobe, Jesúsnö ösödadöma jwaikwöda sulabenö ja̧bö ju̧kwadö, jö̧ba̧lö.


Chö̧ja̧wo̧dö, ökwödöma okobe deinö sulabenö ja̧bö ja̧dösa ¿jö̧tö? Bakwo̧, Ötjöma sulabenö ja̧bö̧kö̧sa, jö̧ba̧lö, yöa̧litjö̧ma ¿jweinö omukwatö yöba̧lo̧ji̧? Jelobekwö omukwato̧. Isabenö chö̧ja̧wo̧dö, jo̧bama iteda omukwati̧da öibökwe. Ja̧danö, jo̧bama o̧'wo̧ luwo̧ okwanö Dios iwene, isabenö ji̧ wenema öpöjödobe. Isabenö chö̧ja̧wo̧dö, jo̧ba, Sulabenö ja̧bö̧kö̧sa, jö̧ba̧lö, yöba̧lo̧ma iteda omukwati̧da omukwatobetjö̧ Dios isabenö ji̧ yöawi̧ma öpöjödo̧.


Chö̧ja̧wo̧dö ¿dakwö ja̧nö di̧sekwobeda döwaisobö, Isabenö ökwödöma Diosnö waisadösa, jo̧bakwö dötewinö 'ya̧jadösa, jö̧ba̧lö? Biya̧ chö̧ja̧wo̧dö: Dios wei̧ a̧ja̧kwö dö̧jobö jo̧be. Jejenö, jo̧ba wei̧ a̧ja̧kwö dö̧jena döwaisa, Isabenö ökwödöma Diosnö waisadösa, jö̧ba̧lö.


Chi̧tji̧mu, yötawaduwakwö. Isabenö bakwo̧ Dios wei̧ a̧ja̧kwö jo̧ma, sulabenö ja̧bökönö jo̧. Jo̧bama Cristo sulabenö ja̧bökönö ö̧jinadanö sulabenö ja̧bökönö jo̧. Jo̧kwaijayonö ju'wedö jelobekwö omukwatö yötjawobe. Jobadöma ökwödönö sulabenö ja̧köbaduwobö ötjibotö jö̧ba̧lö yötjawobe. Chö̧ja̧wo̧dö, jobadö yötjawi̧ma kwa̧ja̧kwaduwoko. Jobadö jelobekwö omukwatö yötjawi̧ a̧ja̧kwökönö otiwanö ja̧bö kwi̧'yaduwo chö̧ja̧wo̧dö.


Gayo, chöjawo̧ chösödökwe, yötawakwö. Suli̧ jawa ja̧badö tjö̧ji̧danö kwö̧joko. Otiwi̧ jawa ja̧badö tjö̧ji̧danöda kwö̧jo. Otiwi̧ jawa ja̧bö ja̧döma tji̧sekwobe, Ökwödöma Dios i̧tji̧mu babibinadösa, jö̧ba̧lö. Jo̧kwaijayonö suli̧ jawa ja̧bö ja̧döma wainö tji̧sekwobe, Ökwödöma Diosnö wajwibadösa, jö̧ba̧lö. Gayo, otiwi̧ ja̧wa ja̧bö kwö̧jo, dö̧ja̧wo̧dönö pjabatö.


Ikenama nöbo̧ toba'dadanöso̧nöma mölejȩbetjö böjȩkwö labinö jabö lotjobe chedijatö. Jo̧bama damötjö, a̧ko'da ji̧na, Awetja mikwo̧, böjȩnö ju̧kwadönö okobe deinö omöna yöba̧lo̧, jö̧ba̧lö, ötjabökwe. Ja̧danö, iteda ömöayedö, sulabedö ángelesdönöbi labinö jabö lotjinawö̧, mölejȩbetjö böjȩkwö.


Ikenama Jesúsma jö̧a̧lijatö ötjönöma: —A̧ja̧kwitjö. Lekwökö chichakwa̧ma. Yötawakwö. Bi'ye baledakwa̧ kwiwȩyudina'ye weawa a̧ja̧kwadöma tjo̧'wo̧ ösöwanö tjö̧jakwedö— yöawijatö Jesúsma.


ကြှနျုပျတို့နောကျလိုကျပါ:

ကြော်ငြာတွေ


ကြော်ငြာတွေ