Santiago 1:19 - Dios Iwene

¹⁹ Chösödawö̧ chö̧ja̧wo̧dö, biya̧ yötawi̧ma kwomukwataduwo: Ökwödötjö bakwo̧nökwena, Dios iwenetjö isabenö ji̧ jawa yöawobema ösödinö kwa̧ja̧kwa̧laduwo. Ja̧danö, ju'wibi kwomukwataduwo: Ökwödöma yöka̧lakwawaduwena tjo̧'omanö, tiyuwanö yöka̧laduwo. Ja̧danö ju'wibi: Juluwanöma kwölabiduwoko, omukwatökönö.

Santiago 1:19 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 32:16

Ja̧danö, ajayinö jobadö yötja̧lonö, ötjöma chiteada̧latö, jokwaijayonö babema, jobadö yötja̧lokobetjö̧, sule 'wii̧nö ja̧nö tjatadokobetjö̧,

Proverbios 10:19

Ja̧danö, ju'wibi yötawa, wanedö: Bakwo̧, nöinö yöba̧lo̧ma, iteda yöa̧li̧tjö sulabe jawa laebena, nöinö yöa̧lobetjö̧. Isabenö yötawa: Jweinö omukwatö jo̧ma nöinöma yöba̧lö̧kö̧.

Proverbios 13:3

Ja̧danö, ju'wibi yötawa: Yöa̧lakwa̧ abönö ö'wiyawakwawönö omukwato̧ma iteda otiwanö ö̧ji̧ te'ada̧lo̧danö te'ada̧lobe, lekwe ö̧jakobetjö̧. Jobekwö ö̧jokobe yöa̧lakwa̧ abönö omukwatö̧kö̧ma. Jo̧bama omukwatökönö nöinö yöa̧lobetjö̧ usulaso̧da ö̧ja̧kwo̧.

Proverbios 14:17

Ja̧danö, ju'wibi yötawa: Juluwanö dameakwo̧ma omukwatökönö ja̧bö jo̧. Ja̧danö, jelo̧nöbi yötawa: Jojodöma jwiinö tjöpöjödobe sulabenö ja̧akwa̧ o̧'wo̧ junö omukwato̧nöma.

Proverbios 14:29

Ja̧danö, ju'wibi yötawa, du̧ju̧tajanö wanedöma, juluwanö dameakwö̧kö̧nöbi, juluwanö dameakwo̧nöbi: Bakwo̧ juluwanö dameakwö̧kö̧ma jwiinö waiso̧, juluwanö chödameakwoböma mikwawokobe, jö̧ba̧lö. Jobekwö wajwibo̧ juluwanö dameakwo̧ma. Juluwanö dameakwo̧ma jo̧ba ödameakwi̧ma itedada öwawinö i̧sekwobe, jweinö omukwatökönö jo̧ jö̧ba̧lö.

Proverbios 15:18

Ja̧danö, ju'wibi yötawa: Bakwo̧ juluwanö dameakwo̧ma ju'wedönöbi ölakwabikwawö tjödameakwobö ja̧bo̧. Jo̧kwaijayonö juluwanö dameakwö̧kö̧ma dameakwadönö tjo̧'o̧manö ösödö yöa̧lobetjö̧ pjabato̧, tjo̧'wo̧ ösöwachibanö.

Proverbios 15:2

Ja̧danö, ju'wibi yötawa: Jweinö omukwato̧ yöawi̧ma isabenö mikwawobe. Jo̧bama yöawena, yöawi̧ a̧ja̧kwo̧ma jwiinö ösödobe, jweinö yöbawo̧, yöawi̧tjö chöwaisachibobö jo̧be, jö̧ba̧lö. Jobekwö mikwawokobe jweinö omukwatö̧kö̧ yöawi̧ma. Jweinö omukwatö̧kö̧ yöawi̧tjö tjöwaisachiboböma jwiobe, mikwawökö ji̧ jawada yöawobetjö̧.

Proverbios 16:32

Ja̧danö, ju'wibi abebö cha̧ja̧kwaduwakwö: ¿Di̧yatjö̧ mikwawinö ö̧jobökö̧? ¿Dameakwö̧kö̧ ö̧ji̧ökö̧, jwiinö juluwo̧ ö̧ji̧ökö̧? ¿Di̧yatjö̧ mikwawinö ö̧jobökö̧? Isabenö yötawa: Dameakwö̧kö̧ ö̧ji̧danö isabenö mikwawobe. Isabenö, jwiinö juluwo̧ ö̧ji̧tjö̧ bajalekwönönö mikwawobe dameakwö̧kö̧ ö̧ji̧ma. Ja̧danö, ju'wibi abebö cha̧ja̧kwaduwakwö: ¿Di̧yatjö mikwawobeda, dameakwö̧kö̧ ö̧jiobökö̧, inesö la'aka luwo̧ öpöjödawö̧nö ujuluwikö̧? Di̧yatjö̧ mikwawobeda? Isabenö yötawa: Dameakwö̧kö̧ ö̧ji̧ma jwiinö mikwawobe. Isabenö, inesö la'aka luwo̧ öpöjödawö̧nö ujuluwaja̧tjö̧ bajalekwönönö mikwawobe dameakwö̧kö̧ ö̧ji̧ma.

Proverbios 17:14

Ja̧danö, ju'wibi yötawa, wanedö: Ojwe tjöekwemi ojwiyo ja'yubeda ebawobe. Ja̧danö, jemi dadö tju̧tumökötjö̧ma ojwiyoma nöinö ebawibö pjolachaibakobe ¿jö̧tö̧? Te'ada̧lökönö jemima dadö tju̧tumobö jo̧be. Isabenö yötawa: Ja̧ tju̧tumi̧danö jojodöma jamatö jwöjwötjakwawena te'ada̧lökönö katjatakwawobö jo̧be jwiinö tjölakwabikwawapji jö̧ba̧lö. Isabenö, ojwe pjolachibapji jö̧ba̧lö juluwanö tju̧tumi̧danö jojodöma jamatö jwöjwötjakwawena juluwanö katjatakwawobö jo̧be, jwiinö tjölakwabikwawapji jö̧ba̧lö.

Proverbios 17:27

Ja̧danö, ju'wibi yötawa: Isabenö, bakwo̧ waiso̧ma nöinö yöba̧lö̧kö̧. Ja̧danö, jelo̧nöbi yötawa: Tjo̧'o̧manö yöba̧lö, dameakwökönö jo̧ma di̧ya sulojobö jö̧ba̧lö, di̧ya otiwojobö jö̧ba̧lö waiso̧.

Proverbios 18:13

Ja̧danö, ju'wibi yötawa, wanedö: Bakwo̧ ina jwaikwöda yöa̧lonö yöa̧lökwema juluwanö atadobe yöba̧lo̧nöma, yöba̧lo̧ma ina okobe jwiinö yöa̧li̧ma kaatakwawököjayonö. Isabenö, jobekwö atado̧ma jweinö omukwatö̧kö̧, ja̧danö ju'wedöma sulabenö tjedökwe, omukwatö̧kö̧ jö̧ba̧lö.

Proverbios 18:21

Ja̧danö, ju'wibi yötawa: Jojo yöa̧li̧ma juluwobe, ju'wedönö kwabö loi̧danöbi, tjö̧jibinö pjaati̧danöbi. Jo̧kwaobetjö̧ nöinö yöba̧lo̧ma baikwö omukwatobö jo̧be: Nöinö yöta̧li̧tjö jelo̧nö niatibitjö̧ma ötjöda jawa, jö̧ba̧lö.

Proverbios 19:11

Ja̧danö, ju'wibi yötawa: Bakwo̧ ö'wiyakwawönö omukwatobetjö̧ juluwanö ödameakwokobe. Jo̧banö sulabenö yöba̧la̧dönöbi labinö atadö̧kö̧. Isabenö, jojodöma jo̧banö otiwanö tjedobe, otiwanö omukwato̧ jö̧ba̧lö, sulabenö yöba̧ladönö labinö atadokobetjö̧.

Proverbios 19:19

Ja̧danö, ju'wibi jwebebö yötawaduwakwö: Bakwo̧ juluwanö dameakwo̧ma, ba̧kwȩlö̧jatebö juluwanö dameakwo̧obetjö̧ ba̧kwȩlö̧jatebö wene ujuna̧lakwo̧, yemidanöbi yemidanö. Ja̧danö, ökwödöma kwomukwataduwena, wene ujuna̧li̧tjö̧ ö̧jibobö pjadatena, jö̧ba̧lö. Chömöledö, isabenö yötawa: Jo̧ba wene ujuna̧li̧tjö ö̧jibinö pjakataduwitjö̧ma yemidanö yemidanöbi ba̧kwȩlö̧jatebö pjakataduwobö jena, jo̧bama kabatökönö wene ujuna̧lakwobetjö̧. Jo̧kwaobetjö̧ jwebebö yötawaduwakwö: Pjakataduwobö jwiyobe, pjakataduwokonö.

Proverbios 21:23

Ja̧danö, ju'wibi yötawa: Bakwo̧ yöa̧lakwa̧ abönö ö'wiyawakwawönö omukwato̧ma ju'wedökwö wene jwiinö ö̧jakwo̧.

Proverbios 25:28

Ja̧danö, ju'wibi yötawa: Bakwo̧ juluwanö dameakwo̧ma itenöda pjaati̧ma jwiyobe, ödameakwi̧ tjöbeba̧lö. Dameakwa̧löda jo̧. Wanedö yötawa: Jojodö tjuju̧kwemi tjöbeba̧lö tjöekwemi̧ jwiitjö̧ma ¿dakwö pjaatoböda tjöpöjojodö ölakwabikwawö tjichenama? Pjaatakwawa jwiyobe. Ja̧ ji̧danö, juluwanö dameakwo̧nö pjaatoböma jwiobe.

Proverbios 29:20

Ja̧danö, ju'wibi yötawa: Waisanö omukwatö̧kö̧nöma Dios pjaatoböma jobe, 'diokobe. Jo̧kwaijayonö Dios pjaatoböma jwiyobe jelo̧nö, juluwanö omukwatökönö yöba̧lo̧nö. Jo̧banö, juluwanö omukwatökönö yöba̧lo̧nö Dios pjaatoböma jwiinö 'diobe. Isabenö, 'diobe juluwanö omukwatökönö yöba̧lo̧nö pjaati̧ma, waisanö omukwatö̧kö̧nö pjaatitjö̧ bajalekwönönö 'diobe.

Mateo 5:22

Jo̧kwaijayonö jemi bajalekwönönö baikwö yötawaduwakwö ötjöma chömöledö: Sule kwömöledöso̧nö kwabö loköbitjö̧damaökö, kwömöledöso̧nö kwölabitjö̧bi, lȩekwa jo̧be jö̧ba̧lö. Ja̧danö, kwömöledöso̧nö sulabenö yöka̧litjö̧ma, lȩekwa luwedö tjöba a'o kwö̧jena, ja̧danö kwömöledöso̧nö wajwibo̧ja, mikwawö̧kö̧ja jö̧ba̧lö yöka̧litjö̧ma, ökwöla nöolatjö Dios lȩebakwa̧tjö kwemena, jö̧ba̧lö yötawaduwakwö.

Marcos 12:37

Jejenö wȩyudö Davidma öbabijetö Dios weakwo̧nöma, Chuluwo̧, jö̧ba̧lö. Ja̧danö, jejenö öabitjö̧ma, Chuluwo̧, jö̧ba̧lö, jo̧bama Davidtjö tupadanö jojoajayonö David uluwo̧bi jo̧. Davidma itedatjö tupadanö jojonö öabökö, Chuluwo̧, jö̧ba̧lö. Ja̧danö, Davidma Dios weakwo̧nö, Chuluwo̧, öabitjö̧ma jo̧bama Davidtjö o̧penönö la'aka luwo̧ena, David uluwo̧obetjö̧— jö̧ba̧lijetö Jesúsma, itedada yöbawö, Ötjöda David Uluwo̧sa, jö̧ba̧lö. Ja̧danö, Dios weakwo̧ma Davidtjö tupadanö jojobi, ja̧danö, David Uluwo̧bi jo̧, jö̧ba̧lö, jö̧ba̧lijetö Jesúsma. Jejenö jö̧a̧lobe jojodöma ba̧jekwadö tjo̧'wo̧ ösöwachibanö a̧ja̧kwijadötö.

Marcos 2:2

Jejenö a̧ja̧kwö ba̧jekwadö ichö ko̧ko̧kwö ji̧jadötö Jesús ö̧jeju okwa. Ba̧jekwadö ko̧ko̧kwö tjuju̧kwobetjö̧ jamatakwawemi jwiijetö, a̧petukwöchobe apjude ö'öböbi. Jesúsma ichajadönöma Dios iwene yöbawijetö.

Lucas 15:1

Jesús yöawena, la'aka luwo̧ itea balada impuesto ötjabi̧ balada emadöbi, ju'wedö sulabedö ötjabawö̧bi Jesús ö̧jobekwö tji̧'yinobe, yöawi̧ tja̧ja̧kwobö, ja̧danö Jesúsma jobadönö a'dewö lobökönö jobadönöbi yöawinobe.

Lucas 19:48

Jo̧kwaijayonö jojodö jwaikwöda Jesús öba̧ja̧di̧ a̧ja̧kwa̧lö tjö̧jinobe, ja̧danö jejenö a̧ja̧kwa̧lö tjö̧jobetjö̧, Jesúsnö söbebö lotjobö tjisakwi̧ma waekwinobe, Jesúsnö sulabenö ja̧ditjö̧ma wene baibena, jö̧ba̧lö yetjabobetjö̧.

Hechos 1:15

Ju'wi möle jobadö tjoko̧ko̧kwena, ciento veinte jenanö ju̧kwijadötö. Pedroma jobadö tjö'da̧denö jamatö yöbawijetö:

Hechos 10:33

Jejenö weitjö̧ chömöayedönö wetijatö ökwönö öbibö tji̧'yobö baikwö kwichobö. Ökwöma otiwanö kwichajabe. Babema ökwödöma okobe deinö, Dios öba a'o bena dö̧ja da̧ja̧kwobö okobe jwiinö Duluwo̧ weina ökwönöma—jö̧ba̧lijetö Cornelioma.

Hechos 13:48

Ikenama judío jojodöböködöma ja̧ yötjawi̧ a̧ja̧kwö ösödijadötö, Diosma webijetö ökwödönöbi iteda iwene, ji̧bakwawa wenema da̧ja̧kwobö, jö̧ba̧lö. Ja̧danö, Dios iwene jwiinö otiwa, jö̧ba̧lö, ösödijadötö. Jobadötjö ju'wedöma, Dioskwö ba̧kwȩlö̧jatebö tjö̧jakwedöma, Jesúsma dö̧jibinö pjabato̧, jö̧ba̧lö, Jesúsnö ösödö do̧batö emijadötö.

Hechos 17:11

Ja̧danö, Bereanö ju̧kwadö judío jojodöma, Pablo yöawi̧ a̧ja̧kwö ösödö a̧ja̧kwijadötö. Jobadöma Tesalónicanö ju̧kwadö judío jojodötjö o̧penönö ösödö a̧ja̧kwijadötö. Jobadöma tjo̧'wo̧ ösöwanö, Da̧ja̧kwobö jö̧da̧la, jö̧ba̧lö, a̧ja̧kwijadötö Dios iwenema. Ju'wi möle jwiinö tja̧ja̧kwaja̧ ikenama, Dios iwene, damötjö tjiwȩyudina waisachö eda̧lijadötö, Pabloma Dios iwene yöawi̧da jweinö yöbawo̧, jö̧ba̧lö.

Hechos 2:42

Ja̧danö, jobadöma kabatökönö Jesús webawedö yötjawobe a̧ja̧kwöbi, Dios jawa yöba̧lakwawöbi ba̧jijadötö. Kwakwawa kwanöbi bakobe ba̧jijadötö. Jesús ö'wöchina omukwatö pan kwanöbi kwijadötö, ubasobu owöbi owijadötö. Ja̧danö, Diosnö abeböbi abebijadötö, bakobe ju̧kwadöma.

Efesios 4:26

Ja̧danö, chömöledö, kwo̧'wo̧ sulachibaduwenama sulabenö ja̧köbaduwoko. Lekwema kwo̧'wo̧ kwusulawaduwa. Yi̧ibakwa̧ abönö kwo̧'wo̧ sökibaduwo kwo̧'wo̧ suladuwi̧ma.

Efesios 4:31

Chömöledö ja̧danö, ökwödönö sulabenö baibenama kwo̧'wo̧ suladuwi̧ baibanö omukwatöma kwuju̧kwaduwa. Kwo̧'wo̧ suladuwi̧ma omukwatökönö kwo̧'wo̧ luwo̧duwinö söbekwa̧lö ju̧kwaduwi. Labinö sulabenö jö̧ba̧liböma jö̧ba̧liköbaduwa. Ja̧danö, labinö sulabenö jwöbeba̧löbi jwökeba̧laduwa. Ja̧danö, kwömöledöduwinö ju'wedönö, Sulabenö ja̧badö, jö̧ba̧löma, jö̧ba̧liköbaduwa. Ja̧danö, okobe jwiinö sulabenö omukwatö ja̧awama, ja̧bökönö kwuju̧kwaduwo.

Colosenses 3:15

Ja̧danö, kwömöledöduwikwö wene jwiinö kwo̧'wo̧ luwo̧duwi ösöwachibanö kwö̧jaduwo chömöledö. Ja̧ kwo̧'wo̧ luwo̧duwi ösöwachibanö kwö̧jaduwi̧ma, Cristotjö ichi̧ chömöledö. Ja̧danö, kwömöledöduwi Cristonö ösödadökwö kwo̧'wo̧ luwo̧duwi ösöwachibanö kwö̧jaduwo jö̧ba̧lö, Diosma ökwödönö jwöinobe, Cristo iteba'o bakwa'o bakibaduwanö. Ja̧danö, Diosnö kwösödaduwo chömöledö, otiwanö pjabato̧ja jö̧ba̧lö.

Colosenses 3:8

Jau chömöledö, babema okobe jwiinö biya̧ jawa kakatibaduwobö jo̧be, dameakwawabi, labikwawabi, suli̧ waedö omukwatakwawabi. Ja̧danö, ju'wedönö sulabenö yöa̧lakwawabi, ja̧danö suli̧ jawa yötja̧loko jawa yöa̧lakwawabi kakatibaduwo.

1 Tesalonicenses 2:13

Ja̧danö, ju'wibi yötawaduwakwö chömöledö. Ökwödönö Dios iwene yödawenama, Aaa, jojodö yötjawi̧ jö̧ba̧löma kwöpöjödinaduwokobe, Dios iwene jö̧ba̧lö kwösödinaduwobe chömöledö. Ja̧danö, jejenö kwösödinaduwobetjö̧, Diosnö kabatökönö ösödö adebobe, otiwanö Tesalónicanö ju̧kwadönö pjabato̧ja jö̧ba̧lö. Jau chömöledö, yödawina wenema isabenö Dios iwene, ja̧danö ja̧ wenetjö Diosma ina ökwödö Jesúsnö ösödadönö kwöbalewachibaduwanö ja̧bo̧.

Santiago 1:16

Chösödawö̧ chö̧ja̧wo̧dö, jelobekwö kwomukwataduwoko Diosnö, Diosma sulabenö webo̧ ökwödönöma, jö̧ba̧lö.

Santiago 1:2

Chö̧ja̧wo̧dö yötawaduwakwö. Böjȩnö dö̧jenama nöinö sulabe wene baledobe okobe deinö ökwödönöma. Usula demawinö, ja̧danö, inia tjödinö, yelösöda ju'wi jawabi sulabe wene baledobe chö̧ja̧wo̧dö. Ja̧danö chö̧ja̧wo̧dö, wene ökwödönö baledena ¿dakwö dö̧jobö jo̧beda? Sulabe baledena ¿do̧'wo̧ tjo̧bekwö dö̧jobö jo̧beji̧? Do̧'wo̧ tjo̧bekwökönö dö̧jaduwo chö̧ja̧wo̧dö. Baikwö domukwatobö jo̧be: Sulabenö baledijayonö do̧'wo̧ ösöwanö dö̧jobö jo̧be, jö̧ba̧lö. Jau chö̧ja̧wo̧dö. Ökwödönö wene baledijayonö do̧'wo̧ ösöwanö dö̧jaduwo. Ja̧danö chö̧ja̧wo̧dö, wene ökwödönö baledena baikwö kwomukwataduwo. Diosma ökwödönö wene baledi̧ma webo̧, söbebö lobökönö. Ja̧danö ¿tajawedö söbebö lookobeda ökwödönö wene baledi̧ma? Biya̧ chö̧ja̧wo̧dö: Ökwödönö wene baledena Diosma, Ötjönö tjo̧'wo̧ wana̧lö, jwaikwöda tji̧'yojobö chedo, jö̧ba̧lö, edobe. Chö̧ja̧wo̧dö, wene ökwödönö baledijayonö do̧'wo̧ ösöwanö dö̧jobö jo̧be. Ja̧danö kwo̧'wo̧duwi ösöwanö, Diosnö kwo̧'wo̧duwi wana̧lö kwö̧jaduwobetjö̧, wene baledijayonö, kwo̧'wo̧duwi 'dibachibö jwaikwöda kwi̧'yadaduwakwedöja.

Santiago 1:26

Chö̧ja̧wo̧dö Diosnö ösödadöma, ju'wedönö otiwanö yötja̧lobö jo̧be. Bakwo̧, Ötjöma Diosnö ösödo̧sa, jo̧banö ba̧kwȩlö̧jatebö abebö, ja̧danö jo̧ba wei̧ a̧ja̧kwö, jö̧ba̧lö, yöa̧lijayonö jojodönö sulabenö yöa̧litjö̧ma ¿isabenö otiwanö ö̧jobeji̧, Dios ösödi̧danö? Otiwanö jö̧kö̧. Ja̧danö, jo̧ba Dios iwene yöawakwawejube i̧'yi̧ma, ¿mikwawobeji̧? Mikwaokobe. Ja̧danö, Diosnö ösödo̧sa, jö̧ba̧lö, yöa̧li̧ma ¿mikwawobeji̧? Mikwawokobe. Chö̧ja̧wo̧dö, jojodönö sulabenö yöba̧lo̧ma itenöda omöna yöba̧lo̧danö itedada omajadenö jelobekwö omukwatobö öibökwe, Otiwanö jo̧sa, jö̧ba̧lö. Jo̧kwaobetjö̧ jo̧ba Diosnö ösödi̧ma mikwawokobe chö̧ja̧wo̧dö. Ja̧ Diosnö ösödi̧ma inesö ösödi̧maökö.

Santiago 2:1

Chö̧ja̧wo̧dö, ökwödöma Duluwo̧ Jesucristonö ösödadöja, Jesús ökwöma isabenö jwiinö mikwawo̧ja, jö̧ba̧lö. Ja̧danö, Duluwo̧ Jesucristonö ösödadöma jojodönö okobe deinö bakwainö kwedaduwobö jo̧be, Mikwawadö, jö̧ba̧lö. Jo̧kwaobetjö̧ baikwö lȩtebaduwakwö: Juna̧ladönö edö, Bidöma ju'wedötjö o̧penönö mikwawadö, jö̧ba̧lö, kwomukwataduwoko chö̧ja̧wo̧dö. Jesucristonö kwösödaduwobetjö̧ jejenö kwomukwataduwobö jwiobe.

Santiago 2:5

Chö̧ja̧wo̧dö chösödawö̧, a̧ja̧kwaduwitjö. Böjȩnö ju̧kwadöma usulasedönö edö, Bidöma mikwawöködö, jö̧ba̧lö, tjomukwatobe. Jo̧kwaijayonö Diosma jobadönö edö, Jwiinö mikwawadö, jö̧ba̧lö, edobe. Diosma jobadö jwibadönö omudawö ujuninobe jwiinö juna̧ladöda batjibobö, tjo̧'wo̧ luwo̧ jawa, Jesucristonö tjo̧'wo̧ tjöwana̧lobetjö̧. Ja̧danö, Diosma jobadönö omudawö ujuninobe ju'wi möle jo̧bakwö webö tjö̧jobö, iteda La'aka Luwo̧ webö ö̧jobe ja̧nö. Jau chö̧ja̧wo̧dö, usulasedönöbi jejenö tjö̧jobö omudawö ujuninobe Diosma okobe deinö jo̧banö ösödadö tjö̧jakwa̧ma.

Santiago 3:10

Yelösöda bakwanenöda dinenenöda Diosnö ösödö otiwanö yöda̧li̧bi, jojonö sulabenö yöda̧li̧bi yöda̧lobe. Jejenö dötölatajanö yöda̧lobö yelösöda jwiobe chö̧ja̧wo̧dö.

Santiago 4:11

Chö̧ja̧wo̧dö, ökwödöda edinö sulabenö yöka̧lakwawaduwoko kwö̧ja̧wo̧döduwinö, Sulabenö ja̧tja, jö̧ba̧lö. Jejenö yöka̧laduwena kwö̧ja̧wo̧dönö lȩbebadödanö yöka̧laduwobe, jobadötjö möakwönönö omukwatö. Ja̧danö, ökwödö ¿lȩkebaduwobö jo̧beji̧, kwö̧ja̧wo̧döduwinö? Jwiobe chö̧ja̧wo̧dö. ¿Wajwiköbaduwiji̧ Dios ökwödönö wei̧, Kwö̧ja̧wo̧dökwö ösödabikwawö kwö̧jaduwo, jö̧ba̧lö, wei̧ma? Jejenö kwö̧jaduwobö jo̧be chö̧ja̧wo̧dö. Kwömöledöduwinö lȩbebö yöka̧laduwobö weokobe Diosma. Jo̧kwaobetjö̧ jejenö kwömöledöduwinö, Sulabenö ja̧tja, jö̧ba̧lö, lȩbebö yöka̧laduwena Dios wei̧ma öpöjödö kwö̧jaduwobe. Dios wei̧ma junibö, Sula, da̧ja̧kwökö, jö̧ba̧lö, ju'wida lȩbebö yöbawöda kwö̧jaduwobe.

Santiago 5:12

Ja̧danö chö̧ja̧wo̧dö, a̧ja̧kwaduwitjö jwiinö mikwawi̧ yötawi̧ma, biya̧: Yöbawö kwujunaduwena, Jau jejenö ja̧tocha, jö̧ba̧lö, ju'wi wanedakwawö yökawaduwoko. Yökawaduwoko, Omönada yöta̧litjö̧ma, mölejȩbe jo̧ Dios ötjönö lȩebotjö, jö̧ba̧lö. Jejenö wanedakwawö yökawaduwoko chö̧ja̧wo̧dö. Ja̧danö, jelo̧nöbi böjȩnö kwuluwo̧duwinö wanedakwawö yökawaduwoko, Böjȩtjö chuluwo̧ma ötjönö lȩebo omönada yöta̧litjö̧ma, jö̧ba̧lö. Yelösöda jejenö yöka̧laduwoko. Chö̧ja̧wo̧dö jweinö yöka̧laduwo, Jejenö ja̧tocha, jö̧ba̧lö. Ja̧danö, ja̧köbaduwoböma jwiitjö̧ma jweinö yöka̧laduwo, Jejenö ja̧tökakobe, ja̧toböma jwia, jö̧ba̧lö.

Santiago 5:19

Chö̧ja̧wo̧dö, ökwödötjö bakwo̧, Dios isabenö yöawi̧ a̧ja̧kwökönö, jelobekwö le'dewinö i̧'yitjö̧ma ökwödöma jo̧banö yöbawö jwekebaduwobö jo̧be. Jejenö yöbawö jwekebaduwo, Yemidanö tjebachaji Dios yöawi̧ ösödö kwö̧jo, jö̧ba̧lö, jo̧bama yemidanö tjeachajobö, Dios isabenö yöawi̧ ösödö.

1 Juan 2:21

Ja̧danö chö̧ja̧wo̧dö, ökwödönö chöwaisa, Isabenö ji̧ yöawi̧ waisadöja, jö̧ba̧lö. Chomukwatokobe ökwödönö, Jelobekwö omukwatadö, jö̧ba̧lö. Ja̧danö, Dios isabenö ji̧ iwenema wajwibadö, jö̧ba̧lö, chomukwatokobe. Chö̧ja̧wo̧dö ökwödönö chöwaisa, Isabenö ji̧ yöawi̧ waisadöja, jö̧ba̧lö. Ja̧danö kwöwaisaduwobe, Omöna yöbawadö yötjawi̧ma isabenö ji̧ yöawakwawamaökö, jö̧ba̧lö. Ja̧danö chö̧ja̧wo̧dö kwöwaisaduwobe, Omöna yöawakwawama Dios isabenö ji̧ iwenetjö ichokobe, jö̧ba̧lö.